Read gen Lukà 12 Bible Online

Lukà 12 - gen bible

Lukà 12

¹Wàlɛbɛ ŋua, àmè àkpe àkpewo bɔ̀, àleke be wo le ɖo àfɔ̀ woa nɔ̀nɔwo ji. Yesù pò nupo na yebe nukplaviwo cucugbã, gblɔ̃ be: “Mì kpɔ mìa ɖokoewo ji nyuɛ̃ ɖe na Farizìwo be *mawɛhuãnu kè nyi blamùtumùnu wɔ̀wɔ.

²Ènusianu kè ji wo cɔ̃ ènua, wo la klo ènu lè e ji, eye ènyà wawla ɖe sia ɖe la ɖì, àmèwo la sè.

³Ye ŋutia, ènyà sia ènyà kè mì gblɔ̃ lè èzã mèa, wo la sè è lè ŋùkèkè mè, eye ènyà sia ènyà kè mì ɖèkpa, gblɔ̃ lè èxɔ̀-gã mèa, wo la ɖè è to lè àgũ tòpò.”

⁴“Èxlɔ̃ nyèwo, mù le gblɔ̃ na mì be mì mu gbà vɔ̃ àmè kèwo wùnà ŋutilã, eye, lè ekèa yomè a, wo mu gbà teŋu wɔ̀ ènu ɖe wu e ŋua ò.

⁵Vɔ̀a, mù la fiɔ mì àmè kè mì la vɔ̃a. Mì vɔ̃ àmè kè, ne e wù àmè vɔ̀a, e gbà ɖo ŋusɛ̃ la sɔ ɛ̀ dãŋùgbe ɖo èzò màvɔ mèa. Ɛ̃ɛ, mù lè to na mì be mì vɔ̃ nènemea!”

⁶“Wo mu sànà àfixèvi àtɔ̃, taŋugavi èvè òa? Co Mawu mu ŋlɔ̀be woa dòmètɔ ɖèka tètè ò.

⁷Ye ŋutia mìawo cã a, mì mu gbà vɔ̃ ò, ɖo èɖà kèwo lè èta na mìawo ŋutɔ cã nyi hɛ̃hlɛ̃. Mì xɔ̀ àsì fuu wu àfixèviwo.”

⁸“Mù le gblɔ̃ na mì be, àmè sia àmè kè la hũ e mè lè àmèwo be ŋùkumè be yè nyi tɔ̀ nyèa, *Àgbètɔ be Èvia cã la hũ e mè be e nyi yè tɔ̀, lè Mawu be àtikplɔtɔwo be ŋùkumè.

⁹Àmè kè la gbe mù lè àmèwo be ŋùku mèa, *Àgbètɔ be Èvia cã la gbe ye cã lè Mawu be àtikplɔtɔwo be ŋùkumè.

¹⁰Àmè kè la gblɔ̃ ènyà vlo ɖe so Àgbètɔ be Èvia ŋutia, wo la sɔ kè è; vɔ̀ àmè kè la gblɔ̃ ènyà vlo ɖe so Gbɔ̃gbɔ̃ Kɔ̀kɔ̀ɛ a ŋutia, wo mu la sɔ kè è ò.”

¹¹“Ne wo kplɔ̀ mì yì bɔ̀bɔ̀pewo àlo kòjoɖotɔwo kudo dùjiɖùtɔwo gbɔa, mì mu gbà ci siayi ɖo àlekè mì la hlùɛ̃ mìa ɖokoewo ta, àlo lè ènyà kè mì la gblɔ̃a ŋuti ò,

¹²ɖo Gbɔ̃gbɔ̃ Kɔ̀kɔ̀ɛ a la fiɔ mì ènu kè mì la gblɔ̃ lè gà ŋua mèa.”

¹³Àmè ɖe so àmèha a dòmè, gblɔ̃ na Yesù be: “Ènufiɔtɔ, to na nɔ̀vi nyè ne mia kudo è mia ma ècrɔ̃nu kè nyi mia tɔ̀a.”

¹⁴Yesù ɖo e ŋuti na ɛ̀ be: “Ŋusù, àmè kɛ ye ɖo mù kòjoɖotɔ, àlo ènumatɔ ɖo mìa nu ò?”

¹⁵E yì e ji gblɔ̃ na wo be: “Mì kpɔ nyuɛ̃ ɖe, eye mìa kpɔ mìa ɖokoewo ji, ɖo ŋùbia ɖekpekpe ŋuti; ɖo àgbètɔ be àgbè mu kù ɖo ènu gbogbo kèwo lè e siawo ŋuti ò.”

¹⁶Yesù yì e ji, do èlo na wo be: “Àgblèdàtɔ àdɔ̀kùnɔ̀ ɖe be ànyigbã wɔ̀ ènuku sùgbɔ na ɛ̀.

¹⁷Ye ŋutia, e gblɔ̃ lè ye ɖokoe mè be: 'Ènu kɛ mù la wɔ̀ ò? Đo tèpe mu gbà lè àsi nyè, ne ma jrà ènu kèwo mù ŋɛ̃awo ɖo ò.'

¹⁸E ɖo e ŋuti na ye ɖokoe be: 'Mù kpɔ ènu kè mù la wɔ̀a vɔ̀. Mù la mù àvà nyèawo, eye mù la tù kèwo lòlò wua ɖo woa tèpe. Eye mù la jrà àgblènuku nyèwo, kudo ènu nyèwo keŋu ɖo.'

¹⁹E yomè a mù la gblɔ̃ na ɖokoe nyè be: 'Wò bɔ̀ ènu fuu kèwo wò la zã lè èpè sùgbɔ mèa ɖɛ vɔ̀. Ye ŋutia, ɖì ɖo e mè, ɖù, ènu, eye wòa kpɔ jìjɔɛ.'

²⁰Vɔ̀a Mawu gblɔ̃ na ɛ̀ be: 'Kpɔ, yɛ̀yìnɔ̀ ɖa! Èzã kèa ŋutɔ mèa, wo la xɔ̀ àpo àgbè a. Eye fifìa, àmè kɛ tɔ̀ ye ènu kèwo wò jrà ɖoawo la nyi ò?'”

²¹Yesù wu e nu be: “Ènu kèa hagbè ye wɔ̀nà àmè kè bɔ̀ ènu sùgbɔ na ye ɖokoe lè ànyigbã ji, vɔ̀ ènu ɖekpekpe mu lè e si lè Mawu gbɔ òa.”

²²Lè ekèawo yomè a, Yesù gblɔ̃ na yebe nukplaviwo be: “Ekèa ŋuti ye mù gblɔ̃nà na mì be, mì mu gbà ci flima ɖo ènu kè mì la ɖù ne mia nɔ̀ àgbè, àlo ènu kè mì la tàa ŋuti ò.

²³Àgbè a xɔ̀ àsì wu ènu ɖùɖu, eye àmètia cã xɔ̀ àsì wu àwùdodo kudo àvɔ tàta.

²⁴Mì bù àkpàfiɔ̃wo ŋuti kpɔ. Wo mu dona ènu, àlo ŋɛ̃na ènu ò; wo mu ɖo ènujràɖope, àlo àvà cã ò; co gãke Mawu nyìnà wo! Mìawo ya mì xɔ̀asì zè nenè ɖe wu xèviwo!

²⁵Ne lè mìa dòmè, àmè ɖe ciji ɖo yebe àgbè ŋuti cã a, àmè kɛ ye la teŋu sɔ ŋùkèkè ɖèka tigɔ̃ kpe yebe àgbè ŋùkèkèwo ò?

²⁶Ne e nyi be ènu vi kèa tètè ŋutɔ cã be wɔ̀wɔ mu lè mìa ŋuti òa, nukɛ ŋuti ye mì ci flima ɖo èbuwo ŋuti ɖo ò?

²⁷Mì bù àlekè zògbèjì-sepòpowo sĩnàa ŋuti kpɔ. Wo mu gbĩnà èkà àlo lɔ̃nà àvɔ ò. Vɔ̀a, mù lè to na mì be, èfìɔ Salomɔ̀n, lè yebe gogo gãa mè ŋutɔ cã a, mu ɖo àcɔ sɔ̀ kudo zògbèjì-sepòpowo tɔ̀ ò.

²⁸Eŋuã, ne Mawu ɖo àcɔ ɖe xòmèku, na ègbe kè lè àve mè, egbèa, eye èsɔ̀ kpòa wo la sò e dãŋùgbe ɖo èzò mè, be la fiɔ̃a, mu la ɖo àcɔ na mìawo ya bòhũ wu òa? Xɔ̀sèvitɔwo!

²⁹Ye ŋutia, mì mu gbà ci flima ɖo ènu kè mì la ɖù kudo ènu kè mì la nùa ŋuti ò. Wu ekèa, mì mu gbà ciji lè sùsu mè ò.

³⁰Ènu kèawo yomè ye xixe mè dùkɔ̃wo keŋu lè, vɔ̀, Mawu ya nya be ènu kèawo hiã mì.

³¹Vɔ̀ mì ji yebe fìɔɖùɖua bòhũ, eye Mawu la sɔ ènu kèawo kpe è na mì.”

³²“Àlɛ̃havi, mù gbà vɔ̃ ò! Đo e jè ŋùmè na mìa Tɔa be bèa sɔ fìɔdua na mì.

³³Mì sà ènu kèwo lè mìa siawo, ne mìa ma ègàa na wɔ̀amènɔ̀wo. Mì tɔ̃ gàkòtòku kèwo mu gblena òa na mìa ɖokoe, eye mì jrà mìabe àdɔ̀kùnuwo ɖo ɖɛ lè jiŋùkusi be ne woa nɔ̀ gbèsɔ̀sɔɛ. Fìãfì mu lè funua ò, eye èŋɔ cã mu ɖùnà ènu lè funu ò.

³⁴Đo fikè mìabe fòtrowo lèa, funua ye mìabe èjì cã la nɔ̀.”

³⁵“Mì nɔ̀ ŋùzɔ̃, eye mì na mìabe kãligbɛ̃wo woa nɔ̀ bì.

³⁶Mì nɔ̀ sìgbè àmè kèwo lè kpɔ èmɔ na woabe àpetɔ kè yì nyɔ̃nùkpepea nène. Ne e gbɔ̀ va pò àgboa, mìa hũ ì na ɛ̀ zè ɖèka.

³⁷Sìtu ɖèɖe ye be la nyi na sumɔ̃vi kèwo woa àpetɔ la gbɔ̀ va kpɔ lè ŋùzɔ̃a. Nyàwo mù le to na mì be, àpetɔa la sã àvɔ ɖo àlì, la na wo la nɔ̀ èkplɔ̃ ŋuti, eye be la sumɔ wo.

³⁸Àmè kèwo àpetɔa la gbɔ̀ va kpɔ lè èzã gà woèvè, àlo lè fɔ̃fɔ̃ mè gà ètɔ̃ mè lè ŋùzɔ̃a, wo la nyi *sìtumewo.”

³⁹“Vɔ̀ mì nya ɛ̀ be ne àxuetɔ ɖe la nya gàpòpo kè mè tututu fìãfì la vaa, e la nɔ̀ ŋùzɔ̃ eye mu la na èmɔ fìãfìa ne bèa ɖo yebe àxuea mè ò.

⁴⁰E jè be, mìawo cã, mìa nɔ̀ ŋùzɔ̃, ɖo Àgbètɔ be Èvia la va lè gàpòpo kè mè ye mì mu le kpɔ èmɔ na ɛ̀ òa.”

⁴¹Petrò biɔ ɛ̀ be: “Tɔhonɔ̀, miawo kpò ye wò le do èlo kèa na loo, àlo àmèwo keŋu ye à?”

⁴²Tɔhonɔ̀ gblɔ̃ na ɛ̀ be: “Àmè kɛ gɔ̃ ye nyi hɔ̃nuvi ànùkuame kudo ènunyatɔ, ekè yebe àpetɔ la sɔ ɖo yebe sumɔ̃viwo nu, be ne nɔ na wo, woabe ènu ɖùɖu ɖo gàmè ji ò?

⁴³Wo tusì na sumɔ̃vi ŋua, ekè àpetɔaa la va kpɔ bè la nɔ wɔ̀ èdɔ kè wo ɖo na ɛ̀a.

⁴⁴Nyàwo, mù le to na mì be, e la sɔ sumɔ̃vi kèa ɖo yebe ènuwo keŋu nu.

⁴⁵Vɔ̀ ne sumɔ̃via gblɔ̃ lè ye ɖokoe mè be: 'Àpetɔ nyè mu le gbɔ̀ kaba ò', eye be tɔ sumɔ̃vi ŋusù kudo sumɔ̃vi nyɔ̃nùwo pòpo, le ɖù ènu, le nù àhà mua,

⁴⁶yebe àpetɔ la va lè àzã kè gbè mu le kpɔ èmɔ na ɛ̀ lè ò, kudo lè gàpòpo kè ji mu nya òa. E la dɔ̃ èto na ɛ̀ sɛ̃sɛ̃ ɖe, eye be la ɖo yebe màmaa lè àmè màwɔ̀anùkuawo dòmè.

⁴⁷Sumɔvi kè nya àpetɔa be èjro, gãke mu jrà ɖo ɖɛ, àlo wɔ̀ ɖo yebe èjro ji òa, wo la pò è sùgbɔ.

⁴⁸Vɔ̀a, sumɔ̃vi kè mu nya yebe àpetɔ be èjro ò, eye e wɔ̀ ènu kè jè na ètodɔ̃a, wo la pò è vi ɖe kpò. Àmè kè wo na sùgbɔa, wo la biɔ ènu sùgbɔ so e si, eye àmè kè wo sɔ ènu sùgbɔ do àsi na a, wo la biɔ so e si wu.”

⁴⁹“Èzò ye mù ɖè va kɔ̀ ɖo ànyigbã ji, eye mù ji ŋutɔ be ne le kaba!

⁵⁰Mawusi lèle ɖe lè kè jè be woa lè na mù, eye mù ci jojojoe be woa lè è na mù kaba.

⁵¹Mì bù be fàfa mù hɛ̃ va ànyigbã jia? Kpao, mù le gblɔ̃ na mì be, àmè dòmè màma bòhũ ye mù hɛ̃ va!

⁵²So ekèa ji sɔ yìa, ne àmè àtɔ̃ lè àxue ɖe mèa, woa dòmè la ma. Àmè ètɔ̃ la sitè ɖo àmè èvè ŋuti, eye èvè la sitè ɖo ètɔ̃ ŋuti.

⁵³Ètɔ la sitè ɖo èvia ŋusù ŋuti, eye èvi-ŋusù la sitè ɖo ètɔa ŋuti. Ènɔ̀ la sitè ɖo èvi-nyɔ̃nù ŋuti, eye èvi-nyɔ̃nù la sitè ɖo ènɔa ŋuti. Lɔ̃xo la sitè ɖo lɔ̃xoyɔvi nyɔ̃nù ŋuti, eye lɔ̃xoyɔvi-nyɔ̃nù la sitè ɖo lɔ̃xoa ŋuti.”

⁵⁴Yesù gbà gblɔ̃ na àmèha a be: “Ne mì kpɔ lilikpo hɔ̃ so èwèɖoxɔ̀pea, mì gblɔ̃nà zè ɖèka be: 'Èji la jà,' eye e jɔ̀nà cã.

⁵⁵Ne àya pò so àpùgo lɔ̀gea, mì gblɔ̃nà be: 'Xixea mè la jè èzò', eye e nyina nènea.

⁵⁶Blamùtùmùwo! Mì teŋu lènà ŋùku ɖo ànyigbã kudo jiŋùkusi be nɔ̀nɔmè ŋuti, eye mì nyana ènu kè gbãnà a jènàsi. Àleke wɔ̀ ye mì mu teŋu le ŋùku ɖo fifì, be hùenu kèa ŋuti, la kpɔ ènu kè gbãnà a la jèsi ò?”

⁵⁷“Àleke wɔ̀ ye mì mu teŋu sònà ènyà na mìa ɖokoe so ènu kè jè be mìa wɔ̀a ŋuti ò?

⁵⁸Ne èwò kudo àpo kɛ̃tɔ, mì lè èmɔ ji le yì kòjo mèa, tèkpɔ ne wòa jrà mìa kudo e dòmè ɖo, lè èmɔa ji, àleke be kɛ̃tɔ wòa mu gbà kplɔ̀ wò yì kòjoɖotɔ gbɔ, ne kòjoɖotɔa bèa sɔ wò do àsi na ègàkpajikpɔtɔ, ne bèa va do wò ègà ò.

⁵⁹Mù le to na wò be wò mu la to lè ègà mè, kaka na gà kè mè wò la tu èfɛ̃ kè wo sò na wòa vɔ̀ keŋu-keŋu ò.”