Read gen Lukà 13 Bible Online

Lukà 13 - gen bible

Lukà 13

¹Gà ŋua mèa, àmè ɖewo va, gblɔ̃ àlekè Pilatò wù Galileatɔ ɖewo, wàlɛbɛ kè wo le savɔa, na Yesù.

²Yesù ɖo e ŋuti na wo be: “Mì susu be Galileatɔ kèawo nyi èvuɛ̃wɔ̀tɔwo wu Galileatɔ kpɔ̀tɛawo keŋu, ye ŋuti wo kpe èfũ nènea ɖoa?

³Kpao! Mù le gblɔ̃ na mì be, ne mì mu ɖɔ̀lì èdɛ̃ òa, mìa kpata mì la crɔ̃ nènea ke.

⁴Àlo, àmè woènyi ŋuawo, kèwo ji Siloa be èmɔjikpɔxɔ̀ mù jè, be wùawo ye nyi èvuɛ̃wɔ̀tɔwo wu àmè kèwo keŋu lè Yèruzàlɛm be èdùa mèa?

⁵Kpao! Mù le to na mì be, ne mì mu ɖɔ̀lì èdɛ̃ òa, mìa kpata mì la crɔ̃ nènea ke.”

⁶Yesù do èlo kèa na wo be: “Àmè ɖe do vòti ɖo yebe vɛ̃-gble mè. E va ji èkusɛ̃sɛ̃ lè àtia ji be yèa gbã, vɔ̀ mu kpɔ ɖekpe ò.

⁷Eye e gblɔ̃ na vɛ̃gblèjikpɔtɔa be: 'Kpɔɖa, èpè ètɔ̃ sɔ̃ŋu ye nyi ekèa, mù va le ji èkusɛ̃sɛ̃ lè àti kèa ji, vɔ̀a nyè mu kpɔ ɖekpe kpɔ ò. Sò è pu ànyi. Nukɛ ŋuti be la nɔ gũ ànyigbãa ɖo ò?'

⁸Vɔ̀ vɛ̃gblèjikpɔtɔa ɖo e ŋuti na ɛ̀ be: 'Àpetɔ, na bèa nɔ̀ ànyi lè èpè kèa cã mè kpɔ. Mù la ɖè èdo pòxla ɛ̀, mù la do kɔkɔli gɔ̃mè na ɛ̀.

⁹Ne èpèa trɔ eye bè sɛ̃ èkua, eŋuã e nyɔ; vɔ̀ ne mu nyi nène òa, wò teŋu na woa sò è fàa.'”

¹⁰Yesù le fiɔ ènu lè bɔ̀bɔ̀pe ɖe lè jɛ̃gbɔ̃zã gbè.

¹¹Nyɔ̃nù ɖe kè gbɔ̃gbɔ̃ vuɛ̃ do èdɔ̀, èpè woènyi sɔ̃ŋu, eye be xa gòbà, eye mu teŋu jɔ̀nà klua òa, lè funua.

¹²Ekè Yesù kpɔ ɛ̀a, e yɔ ɛ̀ va ye ɖokoe gbɔ, gblɔ̃ na ɛ̀ be: “Nyɔ̃nù, wò vò lè èdɔ̀lele wɔ̀a si!”

¹³E dà àlɔ̀ ɖo nyɔ̃nùa ji. Troloa, nyɔ̃nùa jɔ̀, eye e tɔ gogo nana Mawu.

¹⁴Vɔ̀a, bɔ̀bɔ̀pea be ègaa, do àdɔ̀mèze, ɖo Yesù dà èdɔ̀ na àmè lè jɛ̃gbɔ̃zã gbè. E gblɔ̃ na àmèha a be: “Ŋùkèkè àdɛ̃ sɔ̃ŋu ye lè, ne àmè bèa wɔ̀ èdɔ. Mì va ne woa dà èdɔ̀ na mì lè ŋùkèkè ŋuawo ji, vɔ̀a mu gbà nyi lè jɛ̃gbɔ̃zã gbè ò.”

¹⁵Vɔ̀a Tɔhonɔ̀ ɖo e ŋuti na ɛ̀ be: “Àyèmènuwɔ̀tɔwo! Mìa dòmètɔ kɛ ye mu ɖènà èkà yebe ènyì àlo èsɔ-àkɛtɛ lè ènuɖùpe, kplɔ̀nà ɛ̀ yìnà ne bèa nù èsì lè jɛ̃gbɔ̃zã gbè ò?

¹⁶Eye nyɔ̃nù kèa, kè nyi Abràham be jìjimèvia, Satana bla ɛ̀, èpè woènyi sɔ̃ŋu ye nyi ekè. Mu jè be woa tu ì èkà lè jɛ̃gbɔ̃zã gbè òa?”

¹⁷Yesù be ènyà kèawo na be èŋù kpɛ̃ àmè kèwo kpata sitè ɖo e ŋutia. Vɔ̀a, àmèha a kpata kpɔ jìjɔɛ so ŋùdãdɔ kèwo keŋu be wɔ̀awo ŋuti.

¹⁸Yesù gblɔ̃ be: “Nukɛ ye Mawu be fìɔdua ɖì ò? Nukɛ ye mù la sɔ ɛ̀ sɔ̀ kudo ò?

¹⁹E lè sìgbè lokòku, kè àmè ɖe do ɖo yebe àbɔ mè nène. E mìɔ̃, sĩ, va trɔ zũ àti, eye xèviwo va wɔ̀ àtɔ̃ ɖo yebe àlɔ̀zɛ̃wo mè.”

²⁰Yesù gbà gblɔ̃ be: “Nukɛ ye mù la sɔ Mawu be fìɔdua sɔ̀ kudo ò?

²¹E lè sìgbè *mawɛhuãnu kè nyɔ̃nù ɖe sɔ do èwɔ jijenu ètɔ̃ mè, kaka mawɛa keŋu-keŋu hũaa nène.”

²²Yesù le to èdù kudo kɔpewo mè, le fiɔ ènu, eye e tùtà Yèruzàlɛm.

²³Àmè ɖe biɔ ɛ̀ be: “Àpetɔ, nyàwo be nyi be àmè vi ɖe kpò ye la gãa?” Yesù ɖo e ŋuti na ɛ̀ be:

²⁴“Mì drɛ̃ àvũ ne mìa to àgbo kè xixaa nu, ɖo e mè; ɖo mù le to na mì be, àmè sùgbɔ la ji be yèwoa ɖo e mè, gãke wo mu la teŋu ì ò.”

²⁵“Đo ne àxuetɔa va sitè, eye be tu èhɔ̃a, mì la ci e godo, la nɔ pò èhɔ̃a, la nɔ gblɔ̃ be: 'Àpetɔ hũ èhɔ̃a na mi.' Vɔ̀, e la ɖo e ŋuti na mì be: 'Nyè mu jèsi fikè mì so ò.'

²⁶Eŋuã mì la gblɔ̃ na ɛ̀ be: 'Mi ɖù, eye mi nù kudo wò e! Wò fiɔ ènu lè miabe èdùgbowo nu e!'

²⁷Vɔ̀a, e la ɖo e ŋuti na mì be: 'Nyè mu jèsi fikè mì so ò. Àɖìkunuwɔ̀tɔwo, mì bu lè gbɔ nyè!'

²⁸Ne mì kpɔ Abràham, Izàk ku Yakɔb, kudo Mawu be gblɔ̃ɖɛtɔwo keŋu lè Mawu be fìɔdua mè, vɔ̀ wo sɔ mìawo ya dãŋùgbe ɖo e godoa, eŋuã mì la fã àvi, la ɖù àɖuklui.

²⁹Àmèwo, la so èwèzɛ̃pe ku èwèɖoxɔ̀pe, àvego kudo àpùgo la va nɔ̀ ànyi lè àzã-nuɖùpe, lè Mawu be fìɔdua mè.

³⁰Kpɔɖa, àmè ŋùgbesi ɖewo lè, kèwo la va nyi ŋùkɔ̀gbetɔwo, eye ŋùkɔ̀gbetɔ ɖewo lè, kèwo la va trɔ zũ ŋùgbesiwo.”

³¹Gà ŋua mè tututua, Farizì ɖewo va gblɔ̃ na Yesù be: “To ne wòa jo lè fikèa, ɖo Herod lè ji be yèa wù wò.”

³²Yesù gblɔ̃ na wo be: “Mì yì to na wɛ̀tɛ̀klɛ̀ ŋua be: 'Mù le nyà gbɔ̃gbɔ̃ vuɛ̃wo, le dà èdɔ̀ na àmèwo, egbè kudo èsɔ̀, eye lè ŋùkèkè ètɔ̃gɔ̃a gbèa mù la wu èdɔ nyèa nu.'

³³Vɔ̀a, mù ɖo la zɔ̃ èmɔ egbè ku èsɔ̀, kudo nyìsɔ̀, ɖo mu jè be Mawu be gblɔ̃ɖɛtɔ ne ku lè tèpe bu wu Yèruzàlɛm ò.”

³⁴“Yèruzàlɛmtɔwo, Oò, Yèruzàlɛmtɔwo! Mì, àmè kèwo wùnà Mawu be gblɔ̃ɖɛtɔwo, dànà èkpe sɔ wùnà àmè kèwo Mawu dɔ̃ ɖoɖa mìa. Zè nenè ye mù jro, la bɔ̀ mì ɖo gbɔ nyè, sìgbè àlekè kòklo-nɔ bɔ̀nà èviawo ɖo yebe àwàwo gɔ̃mèa nène, vɔ̀ mì mu jro ò?

³⁵Kpɔɖa, wo la hũ gble mìabe àxuea ɖɛ. Mù le to na mì, mì mu gbà la kpɔ mù ò, kaka va sɛ̃ gà kè mè mì la gblɔ̃ be: 'Wo tusì na àmè kè gbãnà lè Tɔhonɔ̀ be nyikɔ mèa.'”