Read gen Lukà 15 Bible Online

Lukà 15 - gen bible

Lukà 15

¹Dùgajɔ̀tɔwo kudo ènuvuɛ̃wɔ̀tɔ buwo va Yesù gbɔ ne woa ɖo èto è.

²Farizìwo ku èsefiɔtɔwo le lì lihũi gblɔ̃ be: “Ŋusù kèa xɔ̀nà èvuɛ̃wɔ̀tɔwo nyuɛ̃ ɖe, eye be ɖùnà ènu kudo wo.”

³Vɔ̀a, Yesù do èlo kèa na wo be:

⁴“Àmè kɛ ye lè mìa dòmè, la ɖo àlɛ̃ èkà èvè takpo, eye ɖèka la bu lè woa dòmè, eye mu la gble àlɛ̃ èkà èvè ci woeàsiɖèkɛawo ɖɛ ɖo ègbegbà ji, la yì ji ɖèka kè bua kaka la kpɔ ɛ̀ ò?

⁵Ne e kpɔ ɛ̀a, e la sɔ ɛ̀ ɖo kɔ̀lìgba mè ku jìjɔɛ,

⁶va àxomè, eye be la yɔ èxlɔ̃awo kudo yebe àxuekɔ̀tɔwo bɔ̀, la gblɔ̃ na wo be: 'Mì kpɔ jìjɔ̀ɛ kudo mù, ɖo mù kpɔ àlɛ̃ kè bua.'

⁷Mù le to na mì be nènea ke wo la kpɔ jìjɔɛ so ènuvuɛ̃wɔ̀tɔ ɖèka pɛ kè ɖɔ̀lì èdɛ̃a ŋuti lè jiŋùkusi, wu àmè jɔ̀jɔɛ èkà èvè ci woeàsiɖèkɛ kèwo mu hiã èdɛ̃ ɖɔ̀lì òa ŋuti.”

⁸“Àlo ne klòsalò-ga èwo lè nyɔ̃nù ɖe si, eye be bu ɖèkaa, mu la sũ kãligbɛ̃ la kplɔ̀ yebe àxomè, la ji ì veve ɖe, kaka va sɛ̃ gà kè mè be kpɔ ɛ̀ òa?

⁹Eye ne e kpɔ ɛ̀a, e la yɔ èxlɔ̃awo kudo yebe àxuekɔ̀tɔwo bɔ̀, la gblɔ̃ na wo be: 'Mì jɔ̀jì kudo mù, ɖo mù kpɔ klòsalò-ga nyè kè bua.'

¹⁰Mù le to na mì be, nènea ke ye Mawu be àtikplɔtɔwo jɔ̀nàjì ɖo ènuvuɛ̃wɔ̀tɔ ɖèka kè ɖɔ̀lì èdɛ̃a ŋuti.”

¹¹Yesù gbà yì e ji gblɔ̃ be: “Ŋusù ɖe ɖo èvi-ŋusù èvè.

¹²Vɔ̀a, vifɛ̃tɔa va gblɔ̃ na ètɔa, gbè ɖèka be: 'Ètɔ nyè, sɔ àpo ènu wòwo be màma kè la va nyi àpe ècrɔ̃nua, na mù.' Eye woa tɔ ma ènu kèwo lè e sia na wo.

¹³Ŋùkèkè ɖewo yomè a, vifɛ̃tɔa cã yebe ènuwo keŋu bɔ̀, eye be yì èdù màsɔɛ ɖe mè. E zã yebe ènuwo yàkà yàkà[12].

¹⁴Kè be zã yebe ènuwo kpata vɔ̀a, àdɔ̀ gã ɖe va to lè èdù kè mè be lèa mè, eye e jè èhiã[13] mè.

¹⁵E yì sɔ ye ɖokoe pu[14] èdùa mè tɔ ɖè ji, eye ŋusùa ɖo e ɖoɖa yebe àgblè mè, ne bèa yì kpɔ èhãwo ji.

¹⁶Ènu kè èhãwo ɖùnàa jrona ɛ̀, vɔ̀a, àmè ɖe mu na ɛ̀ kpɔ ò.

¹⁷E va yì ye ɖokoe mè kpɔ, gblɔ̃ be: 'Sumɔvi sùgbɔ lè ètɔ nyè be àxomè, eye ènu ɖùɖu sùnà wo kaka kpɔ̀tɔ̀nà. Ènyè ye lè ku àdɔ̀-ku lè fikèa yà.

¹⁸Mù la so, eye mù la yì ètɔ nyè gbɔ, la to na ɛ̀ be: Ètɔ nyè, mù jè àgɔ̀ do Mawu, gbà je è do wò cã.

¹⁹Nyè mu gbà jè be wòa yɔ mù be èvi wò kè ò. Xɔ̀ mù sìgbè sumɔ̃vi wòwo dòmètɔ ɖèka nène.'

²⁰Eye, e so nyàwo, yì ètɔa gbɔ. “Wàlɛbɛ kè be kpɔ̀tɔ̀ lè èmɔ ji gbãnà a, ètɔa kpɔ ɛ̀ ɖoɖa. Yebe ènu wɔ̀ ŋuzĩzĩ na ɛ̀ eye, e pu dù yì kpla àsi èkɔ̀ na ɛ̀, eye be kisì[15] na ɛ̀.

²¹Ɖèvia gblɔ̃ na ètɔa be: 'Ètɔ nyè, mù jè àgɔ̀ do Mawu, gbà jè è do wò cã; nyè mu gbà jè be wòa gbà yɔ mù be èvi wò kè ò…'

²²Vɔ̀a, ètɔa gblɔ̃ na yebe sumɔ̃viwo be: 'Mì ɖèbla yì sɔ àwùgã kè nyɔ wua va na ɛ̀. Mì do àlɔ̀gàvi àlɔ̀ na ɛ̀; mì do àfɔ̀kpa àfɔ̀ na ɛ̀.

²³Mì yì le ènyìvi kè do àmìa va ne mìa wù ì, ne mia ɖà ènu ne mia ɖù, ne mia kpɔ jìjɔɛ,

²⁴ɖo èvi nyè kèa ku, vɔ̀a, e gbà gbɔ̀ àgbè. E bu, vɔ̀, mù gbà kpɔ ɛ̀.' Kè be gblɔ̃ ènyà kèawo yomè a, wo tɔ àzã ɖùɖu, eye wo tɔ jìjɔɛ kpɔkpɔ.”

²⁵“Vɔ̀a, èvia àmègãxotɔa ya lè àgblè mè, gà ŋua mè. Wàlɛbɛ kè be gbɔ̀ gbãnà, le gogo àxuea gbɔa, e sè wo le pò èhũ, le ɖu èwè.

²⁶E yɔ ètɔa be sumɔ̃vi ɖèka, biɔ ènu kè le jɔ̀ a gɔ̃mè sè.

²⁷Eye sumɔ̃via ɖo e ŋuti na ɛ̀ be: 'Nɔ̀vi wò ye gbɔ̀, eye ètɔ wò na wo wù ènyìvi kè do àmìa, ɖo e kpɔ ɛ̀ lè lãmèsɛ̃ mè, gbɔ̀ va.'

²⁸Vɔ̀a, èvi àmègãxotɔa bijì, gbe be yè mu la ɖo àxuea mè ò. Ètɔa to va, ɖè kuku na ɛ̀.

²⁹Vɔ̀a, e ɖo e ŋuti na ètɔa be: 'Èpè nenè ye nyi ekèa mù le sumɔ wò ò? Nyè mu dà lè *èse wò ɖe ji kpɔ gbèɖe ò, vɔ̀a, wò mu na mù gbɔgbɔɛvi ɖèka tètè be ma sɔ kpɔ jìjɔɛ kudo èxlɔ̃ nyèwo kpɔ ò.

³⁰Vɔ̀a, kè èvi wò kèa, kè zã ènu wòwo yàkà yàkà ku *àhasìwɔ̀tɔwo, gbɔ̀ kpòa, wò wù ènyìvi kè do àmìa na ɛ̀.'

³¹Eye, ètɔa gblɔ̃ na ɛ̀ be: 'Èvi nyè, èwò yaa, wò lè gbɔ nyè, wè sia wè, eye ènu kèwo lè àsi nyèwoa, tɔ̀ wò ye wo nyi.

³²Vɔ̀a, e jè be mia ɖù àzã, la kpɔ jìjɔɛ, ɖo nɔ̀vi wò kèa, e ku, eye be gbà gbɔ̀ àgbè; e bu sãa, vɔ̀a, mù gbà kpɔ ɛ̀.'”