Read gen Lukà 16 Bible Online

Lukà 16 - gen bible

Lukà 16

¹Yesù gblɔ̃ na yebe nukplaviwo be: “Ŋusù àdɔ̀kùnɔ̀ ɖe lè; e ɖo ènujikpɔtɔ ɖèka. Àmèwo va sãma ènujikpɔtɔa na ɛ̀ be e le gũ yebe ènuwo.

²Ŋusùa yɔ yebe ènujikpɔtɔa, to na ɛ̀ be: 'Ènyà kɛwo ye mù le sè so ŋuti wò ò? Va na mù àkɔ̃ŋùta, ɖo wò mu gbà teŋu nɔ̀ ènu nyèwo nu ò.'

³Ènujikpɔtɔa gblɔ̃ lè ye ɖokoe mè be: 'Nukɛ ye mù la wɔ̀ fifì ò? Đo àpetɔ nyè le nyà mù lè èdɔ mè. Àgblè ye mù la yì dà a? Nyè mu ɖo ŋusɛ̃ ò. Ènu ye mù la yì biɔa? Èŋù la kpɛ̃ mù.

⁴Mù nya ènu kè mù la wɔ̀ ne àmèwo ne xɔ̀ mù ɖo àxomè, wàlɛbɛ kè wo la nyà mù lè èdɔ mèa.'

⁵Ènujikpɔtɔa, va yɔ àmè kèwo ɖù èfɛ̃ do yebe àpetɔawo, biɔ àmè cucugbã tɔ̀a be: 'Èfɛ̃ nène ye wò ɖù do àpetɔ nyè ò?'

⁶Èfɛ̃ɖùtɔa ɖo e ŋuti be: 'Àmì kplikpã èkà èvè takpo.' Vɔ̀a ènujikpɔtɔa to na ɛ̀ be: 'Àpo xoma ye nyi ekèa; nɔ̀ ànyi ne wòa ɖèbla ŋlɔ̀ ɖɛ be kplikpã èkà ci èwo.'

⁷E biɔ èfɛ̃ɖùtɔ bu be: 'Èwò ya ɖe, èfɛ̃ nenè ye wò ɖù ò?' Eye, e ya ɖo e ŋuti be: 'Èlù jijenu èkà èvè takpo.' Ènujikpɔtɔa to na ɛ̀ be: 'Sɔ àpo xoma a, ne wòa ɖèbla ŋlɔ̀ ɖɛ be *èlù kòtòku èkà èvè.'

⁸Eye, àpetɔa kafu ènujikpɔtɔ màwɔ̀anùkuaa, ɖo e jè àyè ŋutɔ. Nyàwo yebe nyi be, xixe kèa mè be èviwo nyana àyè kè wo la zã kudo woa hatiwo, wu kɔ̀kɔ̀ɛ mè be èviwo.”

⁹“Ènyè yaa, mù le to na mì be, mì sɔ ègà màjɔ̀ màjɔ̀ jè èxlɔ̃ àmèwo, àleke be, ne e va dɛ̃ mìa, woa xɔ̀ mì ɖo gòxɔ kòkòɖàbìwo mè.

¹⁰Àmè kè wɔ̀nà ànùkua lè ènu viwo mèa, wɔ̀nà ànùkua lè ènu gãwo cã mè. Eye àmè kè mu wɔ̀nà ànùkua lè ènu viwo mè òa, mu wɔ̀nà ànùkua lè ènu gãwo cã mè ò.

¹¹Vɔ̀a, ne wo mu teŋu kã ɖo mìa ji be mì la wɔ̀ ànùkua lè xixe kèa be àdɔ̀kùnuwo ji kpɔkpɔ mè òa, àmè kɛ ye la sɔ àdɔ̀kùnu àdodoe na mì be mìa kpɔ e ji ò?

¹²Eye ne wo mu teŋu kã ɖo mìa ji la sɔ àdɔ̀kùnu kèwo mu nyi mìa tɔ̀ òa na mì òa, àmè kɛ ye la sɔ ènu kè nyi mìawo ŋutɔ mìa tɔ̀a na mì ò?”

¹³“Sumɔvi ɖe mu teŋu sumɔ àpetɔ èvè ò; àlo, e la lɔ̃ àmè ɖèka la crì àmè èvègɔ̃a; àlo e la tɛ ɖo àmè ɖèka ŋuti, eye mu la kãma na àmè èvègɔ̃a ò. Mì mu la teŋu sumɔ Mawu kudo ègà ɖodu ò.”

¹⁴Eye ekè Farizì kèwo nyi àmè kèwo lɔ̃nà ègàawo, sè ekèawo keŋuã, wo le kò è.

¹⁵Eye e gblɔ̃ na wo be: “Mìawo yaa, mì le kpɔ mìa ɖokoe àmè jɔ̀jɔɛwo lè àmèwo be ŋùmè; vɔ̀a, Mawu jèsi mìabe èjìwo, ɖo ènu kè nyi ènu gã lè àmèwo be ŋùmè a, nyi ènu nyɔŋu lè Mawu be ŋùmè.”

¹⁶“Mosè be èsea ku Mawu be gblɔ̃ɖɛtɔwo be ènu kèwo wo ŋlɔ̀ ɖɛawo nɔ̀ ànyi kaka Yòhanɛ̀s Mawusilènamètɔa va. So gà ŋua mèa, wo le do Mawu be fìɔdua be àŋɛ̀nyuɛ̃, eye àmè sia àmè le jè àgbàgba la ɖo e mè.

¹⁷Vɔ̀a, e lè bɔ̀bɔɛ ɖe ne jiŋùkusi ku ànyigbãa, woa klo va yì wu be ŋɔ̀ŋlɔ̃jèsì vi tukui ɖèka bèa ɖè lè Mawu be èsea mè.”

¹⁸“Àmè ɖekpekpe kè gbe èsrɔ̃a, eye be ɖè nyɔ̃nù bua, wɔ̀ *àhasì, eye ŋusù kè ɖè nyɔ̃nù kè wo gbea cã wɔ̀ *àhasì.

¹⁹“Ŋusù àdɔ̀kùnɔ̀ ɖe lè, e dona àwù jɛ̃ xɔ̀asìwo, eye e ɖùnà àzã gbè sia gbè.

²⁰Wɔ̀amènɔ̀ ɖe cã lè kè wo yɔna be Lazarò. Àbì xɔ̀ yebe ŋuti fuu eye e mlɔ̃na àdɔ̀kùnɔ̀ a be àgbo ji.

²¹E jrona ɛ̀ be yèa ɖù ènu kèwo gɛ̃na so àdɔ̀kùnɔ̀ a be èkplɔ̃ jia, ne yèa ɖɔpò. Àvũwo va ɖiɖɔna yebe àbìawo mè.

²²Wɔ̀amènɔ̀a va ku, eye Mawu be àtikplɔtɔwo kɔ ɛ̀ yì Abràham gbɔ. Àdɔ̀kùnɔ̀ a cã va ku, eye wo ɖì i.

²³Wàlɛbɛ kè be le ɖù àyà lè èkuwodea, e kɔ ŋùmè yìji, kpɔ Abràham ɖoɖa, eye Lazarò lè àxàda mè na ɛ̀.

²⁴Àdɔ̀kùnɔ̀a do àpa yɔ Abràham, gblɔ̃ na ɛ̀ be: 'Tɔgbe Abràham, mù ɖè kuku, ku ŋuzĩzĩ na mù; dɔ̃ Lazarò ɖoɖa ne bèa sɔ yebe àlɔ̀vi tɔ èsì mè va dà ɖo àɖe ji na mù, ne èjì nyè ne fa, ɖo mù le ɖù àyà lè èzò kèa mè ŋutɔ.'

²⁵Vɔ̀a, Abràham ɖo e ŋuti na ɛ̀ be: 'Èvi nyè, ɖo ŋùkuvi e ji be wò ɖù àgbè lè àpo àgbè hùenu; vɔ̀a, Lazarò yaa, àyà ye be ɖù. Fifìa, e kpɔ àkɔfa lè fikèa, eye èwò yaa, wò le ɖù àyà.

²⁶Gbà wua, mu nyi ènu kèa ŋuti kpò ye ò, ɖo èdo gã ɖe sò mì ku mia dòmè, àleke be, ne àmè ɖe jro la so fikèa yì mìa gbɔa, mu la teŋu ì ò. Nène a ke ye wo mu teŋu so funua cã va mia gbɔ ò.'

²⁷Eye àdɔ̀kùnɔ̀ a ɖo e ŋuti na ɛ̀ be: 'Tɔgbe Abràham, ne nène ye à, mù ɖèkuku na wò, dɔ̃ Lazarò ɖoɖa ètɔ nyè be àxomè,

²⁸ɖo mù ɖo nɔ̀vi ŋusù àtɔ̃ lè funu, ne bèa yì sìa wo ne woa cã wo mu gbà va àyàɖùɖu tèpe kèa ò.'

²⁹Abràham ɖo e ŋuti na ɛ̀ be: 'Wo ɖo Mosè ku gblɔ̃ɖɛtɔwo; wo ne sè woabe ègbè.'

³⁰Àdɔ̀kùnɔ̀ a ɖo e ŋuti na ɛ̀ be: 'Tɔgbe Abràham, ne àmè ɖe mu so àmè kukuwo dòmè yì woa gbɔ òa, wo mu la ɖɔ̀lì èdɛ̃ ò.'

³¹Eye, e gblɔ̃ na ɛ̀ be: 'Ne wo mu sè Mosè ku gblɔ̃ɖɛtɔwo be ègbè òa, ne àmè gbà fɔ̃ so kukuwo dòmè yì woa gbɔ cã a, wo mu la kã ɖo e ji ò.'”