Read gen Lukà 17 Bible Online

Lukà 17 - gen bible

Lukà 17

¹Yesù gblɔ̃ na yebe nukplaviwo be: “Ènu kèwo la dɔ̃ àmè ɖo ènuvuɛ̃ mèawo mu la dokpò vava ò. Vɔ̀a, hèlu na àmè kè la dɔ̃ àmè ɖo ènuvuɛ̃ mèa.

²E la nyɔ na ɛ̀ be woa sɔ ète bla ɖo èkɔ̀ na ɛ̀, eye woa sɔ ɛ̀ dãŋùgbe ɖo àpù mè, wu ne bèa nyi àfɔ̀klɛ̃ na ɖèvi kèawo dòmètɔ ɖèka.

³Mì kpɔ mìa ɖokoe ji nyuɛ̃ ɖe.” “Ne nɔ̀vi wò jè àgɔ̀[16] do wòa, gbe è na ɛ̀; ne e ɖɔ̀lì èdɛ̃a, sɔ kè è.

⁴Ne e jè àgɔ̀ do wò zè adrɛ̃, gbè ɖèka, eye be trɔva gbɔ wò zè adrɛ̃, gblɔ̃ be: 'Mù jè àgɔ̀a', sɔ kè è.”

⁵*Àmèdɔ̃dɔ̃awo gblɔ̃ na Tɔhonɔ̀ be: “Do xɔ̀sè, xɔ̀sè ji na mi.”

⁶Tɔhonɔ̀ gblɔ̃ be: “Ne, lè nyàwo toto mèa, mì ɖo xɔ̀sè sìgbè lokòku nènea, mì la to na vòti kèa be: 'Hɔ̃ so èkè ji; ne wòa yì mìɔ̃ lè àpù mè', eye àtia la sè mìabe ègbè.”

⁷“Mìa dòmètɔ kɛ ye, ne e ɖo sumɔ̃vi kè dènà àgblè na ɛ̀, àlo kpɔna èlãwo ji na ɛ̀, eye, ne sumɔ̃via so àgblè va àxomèa, e la to na ɛ̀ be: 'Va nɔ̀ ànyi ne wòa ɖù ènu kudo mù zè ɖèka' ò?

⁸Mu ɖe ye be la to na ɛ̀ bòhũ be: 'Wɔ̀ ènu ɖùɖu nyè na mù. Sã àvɔ ɖo àlì, ne wòa sumɔ mù. Ma ɖù, ma nù gbɔ̀xue; e yomè a, wò cã wò la ɖù, la nù' òa?

⁹Eye ne sumɔ̃via wɔ̀ ènu kèwo yebe àpetɔ biɔ ɛ̀a cã ɖe, àpetɔa la do àkpe na ɛ̀a?

¹⁰Mìawo cã a, ne mì wɔ̀ ènu kèwo keŋu Mawu ɖo na mìa, mì gblɔ̃ be: 'Sumɔvi kpò ye mi nyi; ènu kè mi ɖo la wɔ̀a, ye mi wɔ̀.'”

¹¹E va jɔ̀ be Yesù le yì Yèruzàlɛm, eye be to Sàmarìa ku Galilea dòmè.

¹²Kè be le ɖo kɔpe ɖe mèa, èkpònɔ̀ èwo va dogò è. Wo nɔ̀tè lè àzɔ̀ge,

¹³do àpa gblɔ̃ be: “Àpetɔ Yesù, ku ŋuzĩzĩ na mi.”

¹⁴Kè Yesù kpɔ woa, e to na wo be: “Mì yì sɔ mìa ɖokoewo fiɔ mawunɔwo.” Eye wàlɛbɛ kè wo le yìa, woabe ŋutiwo kɔ̀.

¹⁵Vɔ̀a, àmè ɖèka lè woa dòmè, ekè be kpɔ be èdɔ̀a vɔ̀ na yèa, e trɔva le kafu Mawu kudo ègbè lelele.

¹⁶E va jè èklò lè Yesù be ŋùkɔ̀, cɔ̃ ŋùmè ànyi, lè yebe àfɔ̀wo nu, do àkpe na ɛ̀. Ŋusù kèa nyi Sàmarìatɔ.

¹⁷Eye, Yesù biɔ ɛ̀ be: “Mu nyi àmè èwo be ŋuti ye kɔ̀a? Àmè àsiɖèkɛ kpɔ̀tɛawo ɖe?

¹⁸Eŋuã, àmè ɖe mu gbà lè woa dòmè kè la trɔva na gogo Mawu, tovò lè àmèjro kèa ŋuti ò a?”

¹⁹Eye Yesù gblɔ̃ na ŋusùa be: “Sitè ne wòa joyì, xɔ̀sè wòa hlùɛ̃ wò gã.”

²⁰Farizìwo va biɔ Yesù be: “Gà kɛ mè Mawu be fìɔɖùɖua la va ɖo ò.” E ɖo e ŋuti na wo be: “Mawu be fìɔɖùɖua mu nyi ènu kè wo la teŋu kpɔ kudo ŋùkuvi ò.

²¹Wo mu teŋu gblɔ̃ be: 'E lè fikè', àlo: 'E lè funu ò.' Đo Mawu be fìɔɖùɖua lè mìa dòmè vɔ̀.”

²²E gbà gblɔ̃ na yebe nukplaviwo be: “Àzãwo gbãnà ekèwo mè mì la jro be yèwoa kpɔ *Àgbètɔ be Èvia be àzãwo dòmètɔ ɖèka lè, vɔ̀a, mì mu la kpɔ ɛ̀ ò.

²³Àmèwo la to na mì be: 'E lè fikè', àlo: 'E lè funu!' Vɔ̀a, mì mu gbà yì ò, mì mu gbà ci ji jè yomè na wo ò.

²⁴Đo sìgbè àlekè ye èjikèzò klɛ̃na èzò so jiŋùkusi be àkpa ɖe yìnà àkpa bua, nènea ke ye *Àgbètɔ be Èvia be vavaa la nyi lè yebe àzã gbèa yeŋu.

²⁵Vɔ̀a, keŋu gbɔ̀xue ènu kèa la jɔ̀ a, e ɖo la kpe èfũ sùgbɔ eye jìjimè kèa la gbe è.

²⁶Ènu kè jɔ̀ lè Nɔa be hùenua, ke ye la jɔ̀ lè Àgbètɔ be Èvia be àzãwo gbè.

²⁷Wo le ɖù, le nù, wo le kplɔ̀ nyɔ̃nùwo, wo le na àsu nyɔ̃nùwo kaka va na àzã kè gbè Nɔa ɖo àɖakàhũa mè, eye èsì ɖɔ, crɔ̃ woawo keŋu.

²⁸Ènu kè jɔ̀ lè Lɔt be hùenua cã la jɔ̀. Đo lè Lɔt be hùenua, àmèwo le ɖù, le nù; wo le plè ènu, le sà ènu, le do ènu, le tù èxɔ̀.

²⁹Vɔ̀a, lè àzã kè gbè Lɔt to lè Sodɔ̀m-a, Mawu na, èzò kudo èzòkpe jà so jiŋùkusi va crɔ̃ àmè kèwo ci èdùa mèawo.

³⁰Wàlɛbɛ kè Àgbètɔ be Èvia la ɖè ye ɖokoe fiɔa, nènea ke ye ènuwo la nyi.”

³¹“Lè àzã ŋua gbèa, àmè kè lè èxɔ̀ta, eye yebe ènuwo lè èxɔ̀a mèa, mu gbà ɖì be yèa yì fɔ̀ wo ò. Nène a ke ye àmè kè lè àgblè mèa cã mu gbà trɔva ŋùgbe ò.

³²Mì ɖo ŋùkuvi ènu kè jɔ̀ ɖo Lɔt be èsrɔ̃ jia.

³³Àmè kè la ji be yèa hlùɛ̃ yèbe àgbè gãa, la bu ì, eye, àmè kè la bu ìa, la hlùɛ̃ ɛ̀ gã.

³⁴Mù le to na mì be, lè èzã ŋua mèa, àmè èvè la mlɔ̃ àba ɖèka ji, eye wo la sɔ àmè ɖèka jo, la gble àmè èvègɔ̃a ɖɛ.

³⁵Nyɔ̃nù èvè la nɔ̀ tù ènuku ɖo èdù, eye wo la sɔ àmè ɖèka, la gble àmè èvègɔ̃a ɖɛ. [

³⁶Ŋusù èvè la nɔ̀ àgblè mè, eye wo la sɔ àmè ɖèka, la gble àmè èvègɔ̃a ɖɛ.]”

³⁷Yesù be nukplaviwo biɔ ɛ̀ be: “Tɔhonɔ̀, fikɛ ye ènu kèawo la jɔ̀ lè ò?” Eye, e ɖo e ŋuti na wo be: “Àfi kè ènu kuku lèa, ye àklàsuwo bɔ̀nà ɖo.”