Read gen Lukà 18 Bible Online

Lukà 18 - gen bible

Lukà 18

¹Yesù gbà do èlo ɖe na yebe nukplaviwo, sɔ lè fiɔ wo be wo ɖo la nɔ̀ fãkue tɛ̀gbɛ̀; be, èjì mu gbà ɖè lè pò na wo gbèɖe ò.

²E gblɔ̃ na wo be: “Kòjoɖotɔ ɖe nɔ̀ èdù ɖe mè; mu vɔ̃na Mawu ò; mu kãmana na àgbètɔ cã ò.

³Àhòsì ɖe cã lè èdù kè mè kòjoɖotɔa lèa mè. Àhòsìa, yì kpɔna kòjoɖotɔa, eji-eji, gblɔ̃nà na ɛ̀ be: 'Sò jɔ̀jɔɛ na mù, lè kɛ̃tɔ nyè si.'

⁴Vɔ̀a, kòjoɖotɔa mu sɔna èɖe lè e mè na ɛ̀ ò. Àzã fuu va yì, keŋu gbɔ̀xue e va gblɔ̃ lè ye ɖokoe mè be: 'Ne nyè mu vɔ̃na Mawu ò, eye nyè mu kãmana na àgbètɔ ò ŋutɔ cã a,

⁵e jè be ma sò kòjo jɔ̀jɔɛ na àhòsì kèa, ɖo nupo kè bè lè do na mùa ŋuti. Ne mu nyi nène òa, e la va nɔ̀ do nupo na mù kaka, ènu la va tìkɔ̀ na mù.'”

⁶Tɔhonɔ̀ gbà yì e ji gblɔ̃ be: “Mì sè ènu kè kòjoɖotɔ màsò jɔ̀jɔɛ ŋua gblɔ̃a ɖa!

⁷Ne ènu lè nènea, mì teŋu susu be Mawu mu la ɖèbla sè ègbè na yebe àmè cãcã kèwo le fã yɔ ɛ̀ èzã kudo kedèa òa? Mu la ɖèbla kpe ɖo woa ŋuti òa?

⁸Mù le gblɔ̃ na mì be e la ɖèbla sò ènyà jɔ̀jɔɛ na wo kaba. Vɔ̀a, gà kè mè *Àgbètɔ be Èvia la vaa, ɖe ye be la gbà kpɔ xɔ̀sè lè ànyigbã jia?”

⁹Yesù gbà do èlo kèa so àmè kèwo kpɔna woa ɖokoewo be yèwo nyi àmè jɔ̀jɔɛwo, eye, wo mu kpɔna àmè kpɔ̀tɛawo be wo nyi ènu ɖe ò a ŋuti,

¹⁰be: “Àmè èvè ɖewo yì mawuxɔ mè, gbè ɖèka, la yì fãkue. Àmè ɖèka nyi Farizì, eye àmè èvègɔ̃a nyi èdùgajɔ̀tɔ.

¹¹Farizìa tɔtè le fãkue lè ye ɖokoe mè be: 'Mawu mù do àkpe na wò be nyè mu lè sìgbè àmè kpɔ̀tɛ kèwo nyi fìãfìwo, àmè màjɔ̀ màjɔwo, gbòlòwɔ̀tɔwo, àlo sìgbè èdùgajɔ̀tɔ kèa ŋutɔ cã nène ò.

¹²Mù blana ènu zè èvè lè kuasiɖa ɖèka mè. Mù nana ènu kèwo mù ɖoa be tèpe èwogɔ̃a.'

¹³Vɔ̀a, èdùgajɔ̀tɔa ya nɔ̀tè lè àzɔ̀ge, eye, mu ji be yèa kɔ ŋùmè yìji, kpɔ jiŋùkusi tètè cã ò. Ne bèa sɔ ɖèfiɔ be yè do è jèsi be yè nyi ènuvuɛ̃wɔ̀tɔa, e le pò àsi àkɔta, le gblɔ̃ be: 'Mawu nyè! Ku ŋuzĩzĩ na mù, ɖo ènuvuɛ̃wɔ̀tɔ ye mù nyi.'

¹⁴Mù le to na mì be wo sɔ àgɔ̀ kè èdùgajɔ̀tɔa, eye bè yì àxomè jɔ̀jɔɛ ɖe. Vɔ̀a, mu nyi nènea na Farizìa ò. Đo, àmè kè kɔ ye ɖokoe yì jia, wo la bɔ̀bɔ̀ ɛ̀ ɖo ànyi, eye àmè kè bɔ̀bɔ̀ ye ɖokoea, wo la kɔ ɛ̀ yì ji.”

¹⁵Àmèwo kɔ vifɛ̃ lè ànɔnuwo cã va Yesù gbɔ ne bèa tɔ wo àsi, vɔ̀a, kè yebe nukplaviwo kpɔ àmèawoa, wo wɔ̀ àdã do wo.

¹⁶Gãkea, Yesù yɔ wo, gblɔ̃ na wo be: “Mì na èmɔ ɖèviwo ne woa va gbɔ nyè; mì mu gbà xe èmɔ na wo ò. Đo àmè kèwo lè sìgbè woawo nèneawo tɔ̀ ye nyi Mawu be fìɔdua.

¹⁷Nyàwo ye mù le to na mì be, àmè kè mu la xɔ̀ Mawu be fìɔdua sìgbè ɖèvi nène òa, mu la ɖo e mè ò.”

¹⁸Yudàviwo be àmègã ɖèka va biɔ Yesù be: “Ènufiɔtɔ nyuɛ̃, nukɛ mù la wɔ̀ ne Mawu bèa na mù àgbè màvɔ ò?”

¹⁹Yesù ɖo e ŋuti na ɛ̀ be: “Nukɛ ŋuti wò yɔ mù be àmè nyuɛ̃ ɖo ò? Àmè nyuɛ̃ ɖe mu lè tovò lè Mawu ɖèka ŋuti ò.

²⁰Wò nya èseawo: 'Mù gbà wɔ̀ àhasì ò; mù gbà wù àmè ò; mù gbà fìfĩ ò; mù gbà ɖù àjè ɖase ò; bù ètɔ wò ku ènɔ̀ wò!'”

²¹Vɔ̀a, Yudàviwo be àmègãa ɖo e ŋuti na ɛ̀ be: “Mù wɔ̀nà ɖo *èse kèawo kpata ji so ɖèvi mè ke.”

²²Ekè Yesù sè ènyà kèa, e gblɔ̃ na ɛ̀ be: “Ènu ɖèka kpò ye kpɔ̀tɔ̀ ne wòa wɔ̀: yì sà ènu kèwo keŋu lè àsi wòawo, ne wòa ma ègàa na wɔ̀amènɔ̀wo, eŋuã, wò la ɖo àdɔ̀kùnu lè jiŋùkusi. E yomè a, va ne wòa jè yo nyè mè.”

²³Kè ŋusùa sè ènyà kèa, àkpɔ̃ ɖɔ ɛ̀, ɖo àdɔ̀kùnɔ̀ gã ɖe ye be nyi.

²⁴Kè Yesù kpɔ ɛ̀a, e gblɔ̃ be: “E la sɛ̃ŋu na àdɔ̀kùnɔ̀wo ŋutɔ be woa ɖo Mawu be fìɔdua mè.

²⁵Đo e la nɔ̀ bɔ̀bɔɛ ɖe na èsɔ-kponɔ̀ ne bèa to àbùi be èdo mè wu ne àdɔ̀kùnɔ̀ bèa ɖo Mawu be fìɔdua mè.”

²⁶Àmè kèwo lè ɖo èto èawo gblɔ̃ be: “Ne nènea ye à, àmè kɛ teŋu gã ò?”

²⁷Vɔ̀a, Yesù ɖo e ŋuti na wo be: “Ènu kè àgbètɔ mu teŋu wɔ̀ òa, Mawu ya teŋu wɔ̀ ɛ̀.”

²⁸Eye Petrò gblɔ̃ be: “Kpɔɖa, mi tàsi ènuwo keŋu ɖɛ, eye mi kplɔ̀ wò do.”

²⁹Yesù ɖo e ŋuti na wo be: “Nyàwo mù le to na mì: àmè kè la gble yebe àxue ɖɛ, àlo èsrɔ̃a ɖɛ, àlo nɔ̀viawo ɖɛ, àlo yebe àjìtɔwo ɖɛ, àlo yebe èviwo, ɖo Mawu be fìɔdua ŋutia,

³⁰Mawu la na nène mèa ènu kèwo be gble ɖɛawo, zè nenè ɖe, lè àgbè kèa mè, eye e la gbà na ɛ̀ àgbè màvɔ lè àgbè kè gbãnà a mè.”

³¹Eye e kplɔ̀ àmè woèvèawo bɔ̀ ɖo ye ɖokoe ŋuti, eye be gblɔ̃ na wo be: “Kpɔɖa, mi le yì Yèruzàlɛm, eye ènu kèwo keŋu gblɔ̃ɖɛtɔwo ŋlɔ̀ ɖɛ so Àgbètɔ be Via ŋutiawo la zɔ̃ sù.

³²Đo wo la ɖè e do àsi na àgbàlèwo, wo la kò è, la nyàmà ɛ̀, eye wo la tu ètã kɔ̀ ɖo e ŋuti.

³³Wo la pò è kudo àtãŋù, wo la wù ì; eye, lè ŋùkèkè ètɔ̃gɔ̃a gbèa, e la fɔ̃ so èku.”

³⁴Vɔ̀a, nukplaviawo mu ŋɔjè ènyà kèwo be to na woa ɖekpekpe mè ò. Wo wla ènyà kèawo do wo; eye wo mu nya ènu kèwo Yesù jro la gblɔ̃a ò.

³⁵Ekè Yesù gogo Yerikòa; ŋùvìnɔ̀ ɖe nɔ̀ ànyi lè èmɔ to le biɔ ènu.

³⁶Kè be sè àmèha a va le yìa, e biɔ ènu kè le jɔ̀ a sè,

³⁷eye wo to na ɛ̀ be Yesù Nazarɛttɔ̀ ye va le yì.

³⁸E do àpa be: “Yesù, *David be Èvi, ku ŋuzĩzĩ na mù!”

³⁹Àmè kèwo le zɔ̃ lè ŋùkɔ̀awo, gbe na ɛ̀ be ne bɔ̀nu; vɔ̀a, e gbà do àpa sɛ̃sɛ̃ ɖe kpe è be: “*David be Èvi, ku ŋuzĩzĩ na mù!”

⁴⁰Yesù tɔtè, biɔ be woa kplɔ̀ ɛ̀ va na yè. Kè be gogo èa, Yesù biɔ ɛ̀ be:

⁴¹“Nukɛ ye wò jro be ma wɔ̀ na wò ò?” E ɖo e ŋuti na ɛ̀ be: “Tɔhonɔ̀! Na ne ma gbà kpɔ ènu.”

⁴²Eye Yesù gblɔ̃ na ɛ̀ be: “Kpɔ ènu! Àpo xɔ̀sè hlùɛ̃ wò gã.”

⁴³Eye, ŋusùa kpɔ ènu trolo. E kplɔ̀ Yesù do le na gogo Mawu. Kè dùkɔ̃a kpɔ ènu kèa, e kafu Mawu.