Read gen Lukà 19 Bible Online

Lukà 19 - gen bible

Lukà 19

¹Kè Yesù va Yerikòa, e to èdùa mè va le yì.

²Vɔ̀a, ŋusù ɖe kè wo yɔna be Zàkeo a va. Èdùgajɔ̀tɔwo be àmègã be nyi, eye, be nyi àdɔ̀kùnɔ̀.

³E le ji la kpɔ àmè kè nyi Yesùa, vɔ̀, ekè be nyi àmè kpòkpòea, mu teŋu ì ò, ɖo àmèha a ŋuti.

⁴E pu dù, jè ŋùkɔ̀, lia àti ɖe ji ne bèa teŋu kpɔ ɛ̀, ɖo èmɔ ŋua ji Yesù la to.

⁵Kè Yesù va àti kè ji Zàkeo liaa gbɔa, e kpɔ èji, to na ɛ̀ be: “Zàkeo, ɖèbla ɖì, ɖo egbèa, mù la zɛ̃ àpo àxomè.”

⁶Eye Zàkeo ɖèbla ɖì, kplɔ̀ Yesù yì àxomè, eye be xɔ̀ ɛ̀ àmèjro kudo jìjɔɛ.

⁷Ekè àmèwo kpɔ ènu kèa, wo tɔ lihũi lìli ɖo e ŋuti, le gblɔ̃ be: “E yì zɛ̃ ènuvuɛ̃wɔ̀tɔ be àxomè.”

⁸Vɔ̀a, Zàkeo nɔ̀tè lè Yesù be ŋùkɔ̀, gblɔ̃ na ɛ̀ be: “Fifìa, Tɔhonɔ̀, mù la sɔ ènu kèwo lè àsi nyèawo be mamãmè na wɔ̀amènɔ̀wo, eye ne mù bà àmè ɖe a, mù la ɖo e tèpe na ɛ̀, zè ènè.”

⁹Eye Yesù gblɔ̃ na ɛ̀ be: “Hlùɛ̃gã va àxue kèa mè egbè, ɖo ŋusù kèa cã Abràham be èvi be nyi.

¹⁰Đo, *Àgbètɔ be Èvia va, ne bèa ji àmè kèwo buawo, ne bèa hlùɛ̃ wo gã.”

¹¹Wàlɛbɛ kè àmèwo le sè ènyà kèawoa, Yesù gbà do èlo bu na wo ke, ɖo, e gogo Yèruzàlɛm vɔ̀, eye àmèawo le susu be funua ye Mawu be fìɔɖùɖua la tɔ ɛ̀ ji so.

¹²E gblɔ̃ na wo be: “Ŋusù hùɛ̃yi ɖe yì èdù màsɔɛ ɖe mè, ne woa ɖo è èfìɔ lè funu, ne bèa gbà trɔ gbɔ̀.

¹³Keŋu gbɔ̀xue be la yìa, e yɔ yebe sumɔ̃vi èwo, sɔ sìka-ga ɖèka ɖo àlɔ̀ mè na woa dòmètɔ ɖe sia ɖe, gblɔ̃ na wo be: 'Mìa sɔ ɛ̀ do àjɔ kaka na gà kè mè mù la gbɔ̀a.'

¹⁴Vɔ̀a, ŋusùa be èdùmètɔwo crì ì, eye wo dɔ̃ àmèwo jè e yomè ne woa yì gblɔ̃ na àmè kèwo la ɖo è èfìɔa be: 'Mi mu le ji be ŋusù kèa ne ɖùfìɔ ɖo mia nu ò.'

¹⁵Kè wo ɖo ŋusùa èfìɔ, eye be trɔ gbɔ̀a, e yɔ yebe sumɔ̃vi kèwo be ma sìka-ga naawo, ne woa wɔ̀ àkɔ̃ŋùta so àlè kè wo kpɔa ŋuti.

¹⁶Sumɔvi cucugbã tɔ̀a gblɔ̃ be: 'Tɔhonɔ̀, sìka-ga wòa, jì sìka-ga èwo ɖo e ji kpe è.'

¹⁷Eye àpetɔa ɖo e ŋuti na ɛ̀ be: 'Wò wɔ̀ ènu nyuɛ̃ ɖe, sumɔ̃vi nyuɛ̃ ye wò nyi. Wò wɔ̀ ànùkua lè ènu vi ɖe mè; ye ŋutia, mù la sɔ wò ɖo èdù èwo nu.'

¹⁸Sumɔvi èvègɔ̃a va gblɔ̃ be: 'Tɔhonɔ̀, sìka-ga kè wò sɔ na mùa jì sìka-ga àtɔ̃ buwo.'

¹⁹Àpetɔa ɖo e ŋuti na ɛ̀ be: 'Wò cã, nɔ̀ èdù àtɔ̃ nu.'

²⁰Sumɔvi bu va gblɔ̃ be: 'Tɔhonɔ̀, sìka-ga wòa ye nyi ekèa; mù sã ɛ̀ ɖo dukù to, pòtɛ ɖɛ.

²¹Mù vɔ̃ wò, ɖo, àmè sɛ̃ŋu ye wò nyi. Wò sɔna ènu lè àfi kè wò mu dà ènu ɖo òa, eye wò yànà ènu lè àfi kè wò mu do ènu ɖo òa.'

²²Èfìɔa gblɔ̃ na ɛ̀ be: 'Sumɔvi vuɛ̃, wò ŋutɔ àpo ènu mè-nya mù la sɔ ɖo kòjo na wò. Wò nya be àmè sɛ̃ŋu ye mù nyi; eye, mù sɔna ènu lè àfi kè nyè mu dà ènu ɖo òa, eye mù yànà ènu lè àfi kè nyè mu do ènu ɖo òa.

²³Nukɛ ŋuti ye wò mu sɔ ègà nyèa ɖo ègàjràɖope, ne mù trɔ gbɔ̀a ma xɔ̀ ɛ̀ kudo àlè ò?'

²⁴Eye e gblɔ̃ na àmè kèwo nɔ̀tè lè funua be: 'Mì xɔ̀ sìka-gaa lè e si ne mìa sɔ ɛ̀ na àmè kè si sìka-ga èwo lèa.'

²⁵Vɔ̀a, woawo ya, wo gblɔ̃ na èfìɔa be: 'Tɔhonɔ̀, sìka-ga èwo lè e ya si vɔ̀!'

²⁶'Mù le to na mì be, àmè kè si ènu lèa, wo la gbà na ɛ̀ ènu kpe è; vɔ̀a, àmè kè si mu lè òa, wo la xɔ̀ vi kè lè e sia ŋutɔ cã.

²⁷Fifìa, mì yì kplɔ̀ kɛ̃tɔ nyè kèwo mu jro be ma ɖùfìɔ lè yèwo nu òawo va ne mìa sò èta na wo lè ŋùkɔ̀ na mù.'”

²⁸Kè Yesù gblɔ̃ ènyà kèawo vɔ̀a, e jè ŋùkɔ̀ le yì Yèruzàlɛm.

²⁹Kè be gogo Bɛtfagè ku Betanìa be kɔpe kèwo lè èto kè wo yɔna be àmìti be èto gbɔa, e dɔ̃ yebe *nukplavi èvè,

³⁰gblɔ̃ na wo be: “Mì yì kɔpe kè lè ŋùkɔ̀ na mìa mè. Ne mì ɖo e mèa, mì la kpɔ èsɔ-àkɛtɛvi kè ji àmè ɖe mu lia kpɔ òa ɖe lè èkà mè. Mì tu èkà na ɛ̀, ne mìa kplɔ̀ ɛ̀ va.

³¹Ne àmè ɖe biɔ mì be: 'Nukɛ ŋuti ye mì le tu èkà na ɛ̀ ɖo màa?' Mì ɖo e ŋuti be: 'Tɔhonɔ̀ ye hiã ɛ̀.'”

³²*Àmèdɔ̃dɔ̃awo yì, eye wo kpɔ ènuawo sìgbè àlekè Yesù gblɔ̃ na woa nène.

³³Wàlɛbɛ kè wo le tu èkà na èsɔ-àkɛtɛvia, àmè kèwo tɔ̀ ye be nyiawo gblɔ̃ na wo be: “Nukɛ ŋuti ye mì le tu èkà na èsɔ-àkɛtɛvia ɖo ò?”

³⁴Wo ɖo e ŋuti na àmèawo be: “Tɔhonɔ̀ ye hiã ɛ̀.”

³⁵Eye, wo kplɔ̀ èsɔ-àkɛtɛvia va na Yesù. Wo sɔ woabe àwùwo ɖo e ji, kɔ Yesù ɖo e ji.

³⁶Wàlɛbɛ kè e le yìa, wo le ɖo woabe àwùwo ɖo èmɔa ji.

³⁷Wàlɛbɛ kè be le gogo àmìti-to be àbù a, èjì jɔ̀ *nukplavi gbogbo kèwo kpàsà ɛ̀ doawo, eye wo tɔ Mawu kafu kudo ègbè lelele, ɖo ŋùdãdɔ kèwo wo kpɔawo ŋuti,

³⁸le gblɔ̃ be: “Sìtu ɖèɖe na èfìɔ kè gbãnà lè Tɔhonɔ̀ be nyikɔ mèa! Fàfa lè jiŋùkusi eye gogo na Mawu lè èji hũi.”

³⁹Farizì ɖewo nɔ̀ àmèha a dòmè gblɔ̃ na Yesù be: “Ènufiɔtɔ, gbe ènyà na nukplavi wòawo.”

⁴⁰Vɔ̀a, Yesù ɖo e ŋuti na wo be: “Mù lè to na mì be, ne woawo yaa, wo bɔ̀nu cã a, èkpewo la do àpa.”

⁴¹Eye wàlɛbɛ kè e gogo èdùa, eye be kpɔ ɛ̀a, e fã àvi ɖo e ta,

⁴²le gblɔ̃ be: “Ne ɖe ye, lè àzã kèa jia, èwò cã wò nya, ènu kèwo la na wò fàfaa! Vɔ̀a fifìa, wo wla wo do àpo ŋùkuviwo!

⁴³Đo èŋùwo la va kè na wò, eye kɛ̃tɔ wòwo la ɖè èdo pòxla wò, eye wo la xixa wò, eye wo la jã wò lè àfi sia àfi.

⁴⁴Wo la mù wò pu ànyi, èwò kudo dùkɔ̃ woa kpata, eye wo mu la tàsi èkpe ɖe ɖo èɖe ji ò; ɖo wò mu kpɔ hùenu kè Mawu va ji wò kpɔa jèsi ò.”

⁴⁵Ekèa yomè a, Yesù ɖo mawuxɔa mè, tɔ àmè kèwo le sà ènuawo nyànya.

⁴⁶E gblɔ̃ na wo be: “Àxue nyèa la nyi kuefã-xue, vɔ̀a, mìawo yaa, mì sɔ ɛ̀ wɔ̀ fĩãfìwo be èdo.”

⁴⁷Yesù fiɔna ènu àmèwo lè mawuxɔa mè gbè sia gbè. * Mawunɔ gãwo, èsefiɔtɔwo kudo èdùmèmègãwo le ji la wù ì.

⁴⁸Vɔ̀a, wo mu kpɔ èmɔ lè e ŋuti ò, ɖo dùkɔ̃a kpata kù ɖo e ŋuti, lè ɖo èto è.