Read gen Lukà 2 Bible Online

Lukà 2 - gen bible

Lukà 2

¹Wàlɛbɛ ŋua, Romà-fìɔgã kè tɔ̀ Ogustòa, ɖè ègbè be woa hlɛ̃ àmè kèwo kpata lè yèbe fìɔdua keŋu mèa.

²Àmè hɛ̃hlɛ̃ kèa ye le nyi cucugbã, wàlɛbɛ kè Kirinìo nyi Sirìa be èdùjiɖùtɔa.

³Àmè sia àmè le yì na nyikɔ lè ye ŋutɔ be èdù mè.

⁴Yozɛ̀f cã jo lè Nazarɛ̀t, Galilea be ànyigbã ji, yì Bɛtlɛhɛ̀m lè Yudeà be ànyigbã ji, àfikè wo jì èfìɔ David lèa, la yì na nyikɔ, ɖo, èfìɔ David be hɛ̃nu mè ye bè jɔ̀ lè.

⁵E kplɔ̀ èsrɔ̃a Maria kè si èfu lèa, ɖo àsi ne woa yì na nyikɔ.

⁶Funu ye wo lè, eye àzã kè gbè Maria la jì èvia sù;

⁷e jì ŋusùvi, yebe ŋùkɔ̀gbevi. E xasa àvɔ ɖo e ŋuti, sɔ ɛ̀ mlɔ̃ ènu kè mè èlãwo ɖùnà ènu lèa mè, ɖo, wo mu kpɔ tèpe na wo lè àmèjrozɛ̃pe ò.

⁸Àlɛ̃kplɔ̀tɔ[1] ɖewo lè èdù ŋua mè, le àgblè ji, le ɖia woabe àlɛ̃wo lè èzã mè.

⁹Mawu be àtikplɔtɔ ɖe ze do wo, eye Tɔhonɔ̀ be gogo kɔ̀ pòxla wo, eye vɔ̃vɔ̃ gãa ɖe jè woa ji.

¹⁰Vɔ̀a, Mawu be àtikplɔtɔa to na wo be: “Mì mu gbà vɔ̃ ò, ɖo àŋɛ̀nyuɛ̃ kè la do jìjɔɛ na dùkɔ̃a kpataa, ye mù hɛ̃ va na mì.

¹¹Wo jì hlùɛ̃tɔ ɖèka na mì egbè, lè èfìɔ David be èdù mè, E ye nyi Mɛ̀sia, Tɔhonɔ̀a.

¹²Ènu kè mì la kpɔ sɔ jèsì ìa ye nyi ekè: mì la kpɔ vifɛ̃ ɖe, wo xasa àvɔ ɖo e ŋuti, sɔ ɛ̀ mlɔ̃ ènu kè mè èlãwo ɖùnà ènu lèa mè.”

¹³Eye zè ɖèkaa, jiŋùkusi be àhùakɔ̃ fuu bɔ̀ ɖo àtikplɔtɔa ŋuti ye wo le kafu Mawu be:

¹⁴“Gogo na Mawu le èji hũi, fàfa va ànyigbã ji na àmè kèwo ɖo èjro nyuɛ̃awo[2].”

¹⁵Kè Mawu be àtikplɔtɔawo jo lè woa gbɔ yì jiŋùkusia, àlɛ̃kplɔ̀tɔawo gblɔ̃ na woa nɔ̀nɔwo be: “Mì va ne mia yì kaka Bɛtlɛhɛ̀m, ɖo e jè be mia yì kpɔ ènu kè jɔ̀, eye Tɔhonɔ̀ na mi nyaa.”

¹⁶Wo ɖèbla yì funua, eye wo kpɔ Maria ku Yozɛ̀f, kudo vifɛ̃a lè ànyimɔmlɔ̃ lè ènu kè mè èlãwo ɖùnà ènu lèa mè.

¹⁷Kè wo kpɔ ɛ̀a, wo tɔ ènyà kè Mawu be àtikplɔtɔa to na wo so ɖèvia ŋutia gbɔ̃gblɔ̃.

¹⁸Ènu kè àlɛ̃kplɔ̀tɔawo gblɔ̃a kpaca àmè kèwo kpata sè a.

¹⁹Vɔ̀a, Maria ya le ènyà kèawo kpata ɖo èta mè eye, e bùnà woa ŋuti kpɔ lè yebe èjì mè.

²⁰E yomè a, àlɛ̃kplɔ̀tɔawo trɔjo, le na gogo ku kafu Mawu ɖo ènu kèwo keŋu wo sè, gbà kpɔa ŋuti, sìgbè àlekè wo gblɔ̃ ɛ̀ na wo va yìa nène.

²¹Ŋùkèkè ènyi gbèa, wo sò èvo na ɛ̀, eye wo ɖo nyikɔ na ɛ̀ be Yesù, nyikɔ kè Mawu be àtikplɔtɔa gblɔ̃ na Maria gbɔ̀xue be fɔ ɖèvia be èfua.

²²E yomè a, kè yebe ŋutikɔ̀kɔ be àzã sù, sɔ zɔ̃ ɖo Mosè be èsea jia, wo sɔ ɖèvia yì Yèruzàlɛm ne woa jo è na Tɔhonɔ̀

²³ɖo wo ŋlɔ̀ ɖo Tɔhonɔ̀ be èsea mè be: “Ŋusù ŋùkɔ̀gbeviwo kpataa, wo la ɖè wo ɖovò na Tɔhonɔ̀.”

²⁴Wo ɖo la savɔ kè èsea gblɔ̃a, wo la na peplelu èvè àlo àhɔ̃nevi èvè.

²⁵Vɔ̀a, ŋusù ɖe nɔ̀ Yèruzàlɛm gà ŋua mè; wo yɔna ɛ̀ be Simeɔ̀n. Ŋusù kèa nyi àmè jɔ̀jɔɛ ku mawume. E vɔ̃na Mawu, eye be le nɔ̀tè kpɔ àmè kè la hlùɛ̃ Izràɛl gãa eye Gbɔ̃gbɔ̃ Kɔ̀kɔ̀ɛ lè e ji.

²⁶Gbɔ̃gbɔ̃ Kɔ̀kɔ̀ɛ a ɖèfiɔ ɛ̀ be mu la ku ne mu kpɔ Mɛ̀sia kè Tɔhonɔ̀ dɔ̃ ɖoɖaa ò.

²⁷Gbɔ̃gbɔ̃ a kplɔ̀ ɛ̀ va mawuxɔa mè; eye, kè àjìtɔawo hɛ̃ Yesù, vifɛ̃a va ne woa wɔ̀ ènu kè èsea gblɔ̃ so ŋùkɔ̀gbeviwo ŋutia na ɛ̀a,

²⁸Simeɔ̀n xɔ̀ ɖèvia ɖo àlɔ̀ mè, do àkpe na Mawu, gblɔ̃ be:

²⁹“Fifìa, Àpetɔ, na sumɔ̃vi wòa ne jo yì lè fàfa mè sìgbè àlekè wò gblɔ̃ ɛ̀a nène.

³⁰Đo, Ŋùkuvi nyèwo kpɔ àpo hlùɛ̃gãa vɔ̀.

³¹Hlùɛ̃gã kè wò jrà ɖo ɖɛ na dùkɔ̃wo kpataa.

³²E ye nyi kɔ̀kɔ̀ɛ kè la na dùkɔ̃ kèwo lè xixea mèawo la jèsi wò, eye e la na gogo Izràɛl, àpo dùkɔ̃a.”

³³Ènu kè Simeɔ̀n gblɔ̃ so Yesù ŋutia, kpaca Yesù be ètɔ ku ènɔa ŋutɔ.

³⁴Simeɔ̀n tusì na wo, gblɔ̃ na Maria, Yesù be ènɔa be: “Mawu sɔ ɖèvi kèa na ne bèa nyi àfɔ̀klɛ̃ na Izràɛlvi sùgbɔ; e la fɔ̃ àmè sùgbɔ ɖotè. E la nyi Mawu be jèsì ɖe ekè ŋuti àgbètɔwo la sitè ɖoa,

³⁵nènea, e la ɖè sùsu kèwo lè àmè sùgbɔ be àyè mèawo fiɔ. Eye èwò ŋutɔa, wò la sè veve lè èkla mè sìgbè èwui ɖaɖa ye wo sɔ ŋɔ àpo èjì nène.”

³⁶Mawu be gblɔ̃ɖɛtɔ-nyɔ̃nù ɖe lè funu; wo yɔna ɛ̀ be Anà. Fanùɛl kè so Àsɛr be kɔ̀ta mèa be èvi ye be nyi. E sĩ sùgbɔ. E nɔ̀ èdu ku èsrɔ̃a kè be ɖè so tùgbɛ̀jɛ mèa èpè adrɛ̃; e yomè a, èsrɔ̃a ku.

³⁷Vɔ̀a, mu gbà ɖè èsrɔ̃ bu ò, eye be ɖo èpè èkà èvè ci ènè. Mu dona kpò mawuxɔa mè nɔ̀nɔ ò; e sumɔna Mawu èzã ku kedè; e blana ènu eye be fãnàkue.

³⁸E va woa gbɔ lè gàpòpo ŋua mè, tɔ Mawu kafu-kafu. E pò nupo so ɖèvia ŋuti na àmè kèwo kpata lè nɔ̀tè kpɔ gà kè mè Mawu la va jo Yèruzàlɛm-a.

³⁹Kè Yesù be àjìtɔwo wɔ̀ ènu kèwo keŋu Tɔhonɔ̀ be èsea biɔ vɔ̀a, woa ku ɖèvia, wo trɔyì woabe èdù, Nazarɛ̀t mè, lè Galilea-ànyigbã ji.

⁴⁰Đèvi a lè sĩ, lè ɖo ŋusɛ̃. E ɖɔ ku ènunya eye Mawu be màje lè ku ì.

⁴¹Èpè sia èpèa, Yesù be àjìtɔwo yì ɖùnà *Toŋutivayì be àzã lè Yèruzàlɛm.

⁴²Kè Yesù ɖo èpè woèvèa, wo gbà kplɔ̀ ɛ̀ yì sìgbè àlekè wo wɔ̀nà sãa nène.

⁴³Kè wo ɖù àzãa vɔ̀a, Yesù be àjìtɔwo trɔ tùtà àxue, vɔ̀a, Yesù ya ci Yèruzàlɛm, eye Yozɛ̀f ku Maria mu nya ò.

⁴⁴Wo sɔ ɛ̀ be e lè àmè kèwo le zɔ̃ èmɔ ku yèwoa dòmè. Eye wo zɔ̃ àzɔ̃lì ŋùkèkè ɖèka keŋu gbɔ̀xue va tɔ ɛ̀ jiji lè woabe hɛ̃numewo ku woabe èxlɔ̃wo dòmè.

⁴⁵Vɔ̀a, wo mu kpɔ ɛ̀ ò, eye wo gbìgbɔ̀ trɔyì Yèruzàlɛm le ji ì.

⁴⁶Lè ŋùkèkè ètɔ̃gɔ̃a gbèa, wo kpɔ ɛ̀ lè mawuxɔa mè. E nɔ̀ ànyi lè ènufiɔtɔwo dòmè, le sè ènyà lè woa nu, eye be le biɔ wo ènyà.

⁴⁷Eye, yebe ènunya ku àlekè be le ɖo ènyà ŋuti na àmèwo ɖoa, kpaca àmè kèwo keŋu le ɖo èto èa.

⁴⁸Kè Yesù be àjìtɔwo va kpɔ ɛ̀a, e kpaca wo eye ènɔa biɔ ɛ̀ be: “Èvi nyè, nukɛ ŋuti ye wò wɔ̀ ènu kèa ku mi ɖo ò? Ènyè ku ètɔ wò mi ciji le ji wò pòxla.”

⁴⁹Yesù ɖo e ŋuti na wo be: “Nukɛ ŋuti ye mì le ji mù ɖo ò? Mì mu nya be mù ɖo la nɔ̀ ètɔ nyè be àxomèa?”

⁵⁰Vɔ̀a wo mu ŋɔjè ènu kè be le gblɔ̃ na woa mè ò.

⁵¹Eye Yesù trɔ kpàsà yebe àjìtɔwo do yì Nazarɛ̀t. E sènà ètonu na wo. Ènɔa, le ènu kèawo kpata ɖo èta mè.

⁵²Eye Yesù le sĩ, le yì ŋùkɔ̀ lè ènunya mè, eye yebe ènu jènà ŋùmè na Mawu ku àmèwo.