Read gen Lukà 20 Bible Online

Lukà 20 - gen bible

Lukà 20

¹Vɔ̀a ekè Yesù lè fiɔ ènu eye be le do àŋɛ̀nyuɛ̃ a na àmèwo lè mawuxɔa mè gbè ɖèkaa, * mawunɔ gãwo kudo èsefiɔtɔwo gbàkudo èdùmèmègãwo va kpɔ ɛ̀.

²Wo biɔ ɛ̀ be: “Gblɔ̃ àcɛ̀ kè wò ɖo, sɔ lè wɔ̀ ènu ŋuawoa na mi, àlo gblɔ̃ àmè kè na wò ŋusɛ̃ ŋua na mi.”

³Vɔ̀a, Yesù ɖo e ŋuti na wo be: “Nyè cã mù la biɔ mì ènyà ɖèka pɛɛ.

⁴Yòhanɛ̀s be mawusi lèlèa, Mawu gbɔ be so loo, àlo àgbètɔwo gbɔa? Mì gblɔ̃ ɛ̀ na mù.”

⁵Wo le ènyàa kpɔ lè woa nɔ̀nɔwo dòmè be: “Ne mi gblɔ̃ be: 'Mawu gbɔ ye à', e la biɔ mi sè be: 'Nukɛ ŋuti ye mi mu xɔ̀ e ji sè ò?'

⁶Vɔ̀a ne mi gblɔ̃ be: 'Àgbètɔwo ye à', dùkɔ̃a kpata la pò èkpe mi wù, ɖo àmèwo kpata kã ɖo e ji be Mawu be gblɔ̃ɖɛtɔ ye Yòhanɛ̀s nyi.”

⁷Eye wo ɖo e ŋuti na ɛ̀ be yèwo mu nya àfi kè ye e so ò.

⁸Eye Yesù cã gblɔ̃ na wo be: “Nyè cã nyè mu la gblɔ̃ àmè kè na mù àcɛ̀ ye mù sɔ le wɔ̀ ènu kèawoa na mì ò.”

⁹E yomè a, Yesù do èlo kèa na dùkɔ̃a be: “Ŋusù ɖe dà vɛ̃-gble. E sɔ ɛ̀ do àsi na vɛ̃gblèjikpɔtɔwo, eye be jo yì èdù bu mè, xɔ̀ àzã dìdì ɖe.

¹⁰Kè vɛ̃ku yàya be hùenu ɖoa, ŋusùa dɔ̃ yebe sumɔ̃vi ɖèka ɖoɖa vɛ̃gblèdàtɔawo gbɔ, be woa sɔ àkpa kè nyi yè tɔ̀a ɖoɖa yè. Vɔ̀a, vɛ̃gblèdàtɔawo pò sumɔ̃via, nyà ɛ̀ ɖoɖa àsi gba àlɔ̀ gba[17]

¹¹Ŋusùa dɔ̃ sumɔ̃vi bu ɖoɖa. Wo pò e cã, zũ ì, eye wo nyà ɛ̀ ɖoɖa àsi gba àlɔ̀ gba.

¹²Ŋusùa gbà dɔ̃ àmè ètɔ̃gɔ̃a ɖoɖa. Wo do àbì e ya ŋuti, eye wo nyà ye cã.

¹³Fifìa, ŋusùa va bù èta mè, gblɔ̃ lè ye ɖokoe mè be: 'Nukɛ ye mù la wɔ̀ ò? Mù la dɔ̃ èvi nyè dèvea ɖoɖa wo. Ta mu nyɔ òa, wo la ɖo bùbu na ɛ̀.'

¹⁴Vɔ̀a, kè vɛ̃gblèdàtɔawo kpɔ èvia a, wo gblɔ̃ lè woa nɔ̀nɔwo dòmè be: 'Àmè kè la va ɖù ècrɔ̃a ye nyi ekèa. Mì va ne mia wù ì, ne ècrɔ̃nua bèa trɔ zũ mia tɔ̀.'

¹⁵Eye, wo dɔ̃ ɛ̀ to lè vɛ̃-gblea mè, eye wo wù ì.” Yesù biɔ be: “Nukɛ ye vɛ̃gblètɔa la wɔ̀ na vɛ̃gblèdàtɔ ŋuawo ò?

¹⁶E la va crɔ̃ àgblèdàtɔ ŋuawo eye, be la sɔ vɛ̃-gblea do àsi na àmè buwo.” Kè àmèawo sè ènyà kèa, wo gblɔ̃ be: “Aò Gbèɖe!”

¹⁷Yesù kpɔ wo dũũ, gblɔ̃ be: “Nukɛ ye ŋɔ̀ŋlɔ̃ a le gblɔ̃ ò? 'Èkpe kè èxɔ̀tùtɔwo gbèa ye va zũ koŋùjikpea.'

¹⁸Àmè ɖekpekpe àmè kè la jè èkpe kèa jia, la kãkã, eye ne èkpea jè àmè ɖe jia, e la tùkù àmèa.”

¹⁹Lè gà ŋua mè kea, * mawunɔ gãwo ku èsefiɔtɔwo le ji èmɔ kè wo teŋu to la le Yesùa, ɖo wo nya be yèwo ŋuti ye be do èlo kèa ɖo; vɔ̀a, wo le vɔ̃ dùkɔ̃a.

²⁰Eye wo tɔ ɛ̀ ɖiaɖia; wo dɔ̃ àmè kèwo le fiɔ woa ɖokoewo àmè jɔ̀jɔɛwoa ɖoɖa ne woa le è lè nupo pòpo mè, ne woa teŋu kplɔ̀ ɛ̀ do àsi na èdùjiɖùtɔa be àcɛ̀.

²¹Wo va biɔ Yesù be: “Ènufiɔtɔ, mi nya be ènyà kèwo wò gblɔ̃nàa kudo ènu kèwo wò fiɔnawo kpata sɔ̀gbè, eye, wò mu sina àmè be ŋùmè ò. Vɔ̀a, wò fiɔna Mawu be èmɔa lè nyàwo mè.

²²E sɔ̀gbè be mia tu ètaci na Romà-fìɔgã, Kayizarò-a? Àlo mu sɔ̀gbè ò?”

²³Vɔ̀a, Yesù fɔ̀ woabe àyè, eye e gblɔ̃ na wo be:

²⁴“Mì sɔ klòsalò-ga ɖèka fiɔ mù ne ma kpɔ. Àmè kɛ be tata ye lè e ji ò? Àmè kɛ be ŋɔ̀ŋlɔ̃ ye nyi ekèa ò?” Wo ɖo e ŋuti na ɛ̀ be: “Romà-fìɔgã, Kayizarò tɔ̀ ye.”

²⁵Eye Yesù gblɔ̃ na wo be: “Mì sɔ ènu kè nyi Kayizarò tɔ̀a na Kayizarò, eye mì sɔ ènu kè nyi Mawu tɔ̀a na Mawu.”

²⁶Wo mu teŋu lè è lè yebe nupo pòpo mè lè dùkɔ̃a be ŋùkɔ̀ ò, vɔ̀ bòhũa, yebe ènyà ŋuti ɖoɖo kpaca wo ŋutɔ eye, wo mu gbà nya ènu kè wo la gblɔ̃a ò.

²⁷Sadusì ɖewo va Yesù gbɔ; — Sadusìwo ye gblɔ̃nà be fɔ̃fɔ̃ so èku ɖe mu lè ò. — Wo biɔ ɛ̀ be:

²⁸“Ènufiɔtɔ, Mosè ŋlɔ̀ ɖɛ na mi be: 'Ne ŋusù ɖe ɖè èsrɔ̃, eye mu jì èvi ò, vɔ̀ be kua, nɔ̀via la ɖè àhòsìa, la jì èvi sɔ do xòmè na àmè kè kua.'

²⁹Fifìa nɔ̀vi-ŋusù adrɛ̃ ɖewo nɔ̀ ànyi. Àmè cucugbã tɔ̀a ɖè èsrɔ̃, vɔ̀a, mu jì èvi ò, eye be ku.

³⁰Àmè èvègɔ̃a, kudo ètɔ̃gɔ̃awo cã ɖè àhòsìa kpɔ,

³¹eye nènea, àmè adrɛ̃awo ku, èvi mà ji.

³²Mɛmlɛ̃ nua, nyɔ̃nùa cã ku.

³³Gà kè mè àmèkukuwo la fɔ̃a, àmè kɛ be èsrɔ̃ ye nyɔ̃nùa la nyi lè àmè adrɛ̃awo dòmè ò? Đo woa kpata wo ɖè è kpɔ.”

³⁴Yesù gblɔ̃ na wo be: “Xixe kèa mè viwo ye ɖènà èsrɔ̃, gbà nana àsu.

³⁵Vɔ̀a, àmè kèwo Mawu kpɔ be wo jè la kpɔ gomè lè xixe kè la vaa kudo àmèkukuwo be fɔ̃fɔ̃ mèa, wo mu la ɖè èsrɔ̃ ò; wo mu la na wo àsu cã ò.

³⁶Eye wo mu la gbà teŋu ku cã ò. Đo wo la nɔ̀ sìgbè Mawu be àtikplɔtɔwo nène, eye wo la nyi Mawu be èviwo, ɖo wo fɔ̃ wo so èku.

³⁷Mosè cã ɖè è fiɔ be, àmèkukuwo la fɔ̃, ekè e yɔ Tɔhonɔ̀ lè àve mumu kè le bìzòa mè be: 'Abràham be Mawu, Izàk be Mawu kudo Yakɔb be Mawu a.'

³⁸Eŋuãa, Mawu mu nyi àmèkukuwo be Mawu ò; àmè àgbè-àgbèwo be Mawu ye be nyi, ɖo lè Mawu be ŋùmè a, àmè ŋuawo kpata lè àgbè.”

³⁹Ènuŋlɔ̀tɔ ɖewo xɔ̀ ènyà, gblɔ̃ na Yesù be: “Ènufiɔtɔ, wò pò nupo nyuɛ̃ ɖe.”

⁴⁰Eye, àmè ɖe mu gbà dojì biɔ ɛ̀ ènyà ɖekpe sè ò.

⁴¹Yesù biɔ wo sè be: “Nukɛ ŋuti ye àmèwo gblɔ̃nà be Mɛ̀siaa nyi *David be èvi ɖo ò?

⁴²David ŋutɔ gblɔ̃ lè Salmɔ̀wo mè be: 'Tɔhonɔ̀ gblɔ̃ na Tɔhonɔ̀ nyè be: nɔ ànyi ɖo àpe ɖùsi mè

⁴³kaka ne ma sɔ àpo kɛ̃tɔwo sɔ wɔ̀ àfɔ̀ɖojinu na wò.'

⁴⁴Ne David yɔ ɛ̀ be 'Tɔhonɔ̀a', àleke ye Mɛ̀siaa teŋu nyi yebe èvi ɖo ò?”

⁴⁵Wàlɛbɛ kè dùkɔ̃a kpata lè ɖo èto Yesùa, e gblɔ̃ na yebe nukplaviwo be:

⁴⁶“Mì jè àyè na èsefiɔtɔ, kèwo jina be yèwoa nɔ̀ àwù dìdìwo mè, la nɔ ɖìsà ne àmèwo ne nɔ do ègbè na yèwo lè àfi kè àmèwo sùgbɔ lèawo. Wo jina la nɔ̀ àzìkpe jè ŋùmèwo ji lè bɔ̀bɔ̀pewo eye, wo jrona la nɔ̀ ànyi lè tèpe cucugbã tɔ̀awo, lè ènuɖùpewo.

⁴⁷Wo hlànà àhòsìwo be ènuwo. Wo lɔ̃nà àyè-kuefã dìdìwo wɔ̀wɔ. Wo la gblehùɛ do wo veve ɖe.”