Read gen Lukà 21 Bible Online

Lukà 21 - gen bible

Lukà 21

¹Yesù kɔ ŋùmè yìji eye be kpɔ àdɔ̀kùnɔ̀wo lè sɔ woabe ènu nanawo le do ènujɔ̀ɖakaa mè.

²E kpɔ àhòsì wɔ̀amènɔ̀ ɖe cã sɔ flãvi[18] èvè ɖo e mè.

³Eye e gblɔ̃ na àmè kèwo lè funuawo be: “Nyàwo mù le to na mì: àhòsì wɔ̀amènɔ̀ kèa na ènu wu àmè sia àmè.

⁴Đo àmè kpɔ̀tɛawo kpataa, ènu sùgbɔ kè lè woa sia mè ye wo sɔ lè, va do ènujɔ̀ɖakaa mè. Vɔ̀a, e yaa, ènu kè lè e si ne bèa sɔ nɔ̀ àgbè a kpata ye be sɔ do e mè.”

⁵Ekè, àmè ɖewo le kã àseŋu so àlekè wo ɖo àcɔ na mawuxɔa kudo èkpe xɔ̀asìwo, gbàkudo ènu nana nyuɛ̃wo ɖoa ŋutia,

⁶Yesù gblɔ̃ be: “Mì le kpɔ ènu kèawoa? Èŋù ɖewo la va kè, ekè èkpe ɖe mu la kpɔ̀tɔ̀ lè èɖe ji kè wo mu la mù pu ànyi ò.”

⁷Wo biɔ ɛ̀ be: “Ènufiɔtɔ, gà kɛ mè ye ènu kèawo la va jɔ̀ ò? Nukɛ ye la nyi jèsì be wo lili mi ò?”

⁸Yesù ɖo e ŋuti na wo be: “Mì kpɔ nyuɛ̃ ɖe ne àmè ɖe mu gbà flù mì ò. Đo àmè sùgbɔ la sɔ àpe nyikɔ ɖo ènu, la va gblɔ̃ be: 'Ènyè ye nyi Mɛ̀sia!' Àlo wo la gblɔ̃ be: 'Gàmè sù vɔ̀.' Mì mu gbà jè woa yomè ò.

⁹Gà kè mè mì la sè àhùa be nyikɔ kudo èzĩ tɔ̀tɔa, mì mu gbà vɔ̃ ò, ɖo ènu kèawo ɖo la jɔ̀ cucugbã, vɔ̀a, vɔ̀vɔnua mu la va trolo ò.”

¹⁰Yesù gbà yì e ji gblɔ̃ be: “Dùkɔ̃ ɖe la sitè ɖo dùkɔ̃ bu ŋuti, eye, èfìɔdu ɖe la sitè ɖo èfìɔdu bu ŋuti.

¹¹Ànyigbã la hũhũ, eye àdɔ̀ kudo èdɔ̀ vuɛ̃ la to lè àfi vòvòvòwo. Ŋɔjinuwo gbàkudo jèsì gãgãwo la so jiŋùkusi.

¹²Vɔ̀a, gbɔ̀xue ènu kèawo la jɔ̀ a, wo la le mì, la tĩ mìa yomè. Wo la kplɔ̀ mì yì bɔ̀bɔ̀pewo, la sɔ mì do ègàkpa mè. Wo la kplɔ̀ mì yì èfìɔwo kudo dùjiɖùtɔwo be ŋùkɔ̀ ɖo ŋuti nyè.

¹³Ènu kèawo la jɔ̀ ɖo mìa ji, eye, mì la kpɔ èmɔ la ɖù ɖase so ŋuti nyè.

¹⁴Ne nɔ̀ susu mè na mì be, mì mu hiã la gbã èta so ènu kè mì la gblɔ̃a ŋuti ò.

¹⁵Đo ènyè ŋutɔ ye la sɔ ènu nyãnyãl be ènyà kè mì la gblɔ̃a sɔ ɖo àyè mè na mì, eye mìabe kɛ̃tɔ ɖe ma teŋu gblɔ̃ ènyà ɖe kè la teŋu gbã mìa tɔ̀a do ò.

¹⁶Mìabe àjìtɔwo kudo mìa nɔ̀viwo, mìabe xòmètɔwo kudo mìabe èxlɔ̃wo ŋutɔ cã la do mì àsi eye, wo la gblehùɛ do mìa dòmètɔ sùgbɔ.

¹⁷Àmèwo kpata la crì mì ɖo ŋuti nyè.

¹⁸Vɔ̀a, mìabe èɖà kèwo lè èta na mìa, ɖèka ŋutɔ cã mu la bu ò.

¹⁹Mì do veve ènu, ne mìa hlùɛ̃ mìabe àgbè a gã.

²⁰“Ne mì kpɔ àhùakɔ̃wo xa Yèruzàlɛm-a, mì nya be gà kè mè wo la gbã ɛ̀a gogo.

²¹Eŋuãa, àmè kèwo lè Yudeà a, wo ne si yì ètowo ji. Àmè kèwo lè èdùa mèawo ne to, eye àmè kèwo lè àgblètaawo mu gbà trɔva èdùa mè ò.

²²Đo èhlɔ̃biɔ-zãwo ye be la nyi, ne ènu kèwo wo ŋlɔ̀ ɖɛawo ne zɔ̃ sù.

²³Hèlu na nyɔ̃nù kèwo si èfu la nɔ̀awo ku àmè kèwo la nɔ na ànɔ èvi lè àzã ŋuawo jiawo. Đo àyàɖùɖu gã ɖe la va ànyigbã ji, eye Mawu be àdɔ̀mèze la va dùkɔ̃ kèa ji.

²⁴Wo la wù àmè ɖewo kudo èwui, eye wo la le àmè ɖewo, la kplɔ̀ wo yì èdù buwo mè, eye àgbàlèwo la ɖiki Yèruzàlɛm ku àfɔ̀ kaka sɔ na gà kè mè woabe hùenu la sùa.”

²⁵“Eye jèsìdowo la nɔ̀ èwè ku wètri kudo wètriviwo mè. Lè ànyigbã jia, vɔ̃vɔ̃ la ɖo dùkɔ̃wo, eye wo la ci jojojoe ɖo àpù kudo àsrɔ̀kewo be ègbèɖèɖe ŋuti.

²⁶Ne àmèwo le susu ènu kè la va jɔ̀ lè àgbè a mèa, vɔ̃vɔ̃ la ɖo wo, eye, wo la ku ɖo tè, ɖo Jiŋùkusi be hɔ̃hlɔ̃wo la hũhũ.

²⁷Eye wo la kpɔ *Àgbètɔ be Èvia la nɔ ɖì so lilikpowo mè gbãnà kudo ŋusɛ̃ gbàkudo gogo gãa ɖe.

²⁸Ne ènu kèawo tɔ jɔ̀jɔa, mì sitè ne mìa jɔ̀. Mì kɔ èta yì ji, ɖo gà kè mè Mawu la hlùɛ̃ mì gãa ye lili.”

²⁹Yesù do èlo kèa na wo be: “Mì kpɔ vòti kudo àtiwo kpata ɖa,

³⁰ne wo le to àmàkpaa, mìa ŋutɔ mì nyana be zòzo hùenu ye lili.

³¹Nène a ke ye ne mì va kpɔ ènu kèawo keŋu le jɔ̀ a, mì nya be Mawu be fìɔdua lili vɔ̀.

³²Nyàwo ye mù le to na mì: jìjimè kèa mu la va yì gbɔ̀xue ènu kèawo keŋu la jɔ̀ ò.

³³Jiŋùkusi ku ànyigbã la klo va yì, vɔ̀a, ènyà nyèwo mu la va yì ò.”

³⁴“Mì kpɔ mìa ɖokoewo ji nyuɛ̃ ɖe, ne ènusuɖùɖu ku àhànùmu, kudo èji cici ɖo àgbè kèa be ènuwo ŋuti mu gbà xɔ̀ mìabe èjìwo, ne kòjoɖoɖo be àzã kèa mu gbà va tù mì lè àvò mè ò.

³⁵Đo àzã ŋua la va wàlɛbɛ kè mì mu le ɖoŋù òa, sìgbè àlekè èlã jènà gàmɔ mè lè àvò mèa nène.

³⁶Ye ŋutia, mì nɔ̀ ŋùzɔ̃; mì nɔ̀ fãkue wè sia wè ne mìa teŋu kpɔ ŋusɛ̃ kè la ɖè mì to lè ènu kèwo keŋu la va jɔ̀awo mè, ne mìa teŋu va nɔ̀tè lè *Àgbètɔ be Èvia be ŋùkɔ̀.”

³⁷Lè ŋùkèkè mèa, Yesù fiɔna ènu lè mawuxɔa mè; fìɛ̃si mèa, e yì cina èto kè wo yɔna be *Àmìtiwo be Ètoa ji.

³⁸Ŋùdekɛ̃nyɛ fùtùa, dùkɔ̃a kpata yì bɔ̀nà lè mawuxɔa mè, ɖona èto è.