Read gen Lukà 22 Bible Online

Lukà 22 - gen bible

Lukà 22

¹*Kpɔ̃nɔ àkpiti be àzã kè ye wo yɔna be Toŋutivayìa gogo.

²*Mawunɔ gãwo kudo ènu ŋlɔ̀tɔwo le ji èmɔ la wù Yesù, vɔ̀a, wo lè vɔ̃ dùkɔ̃a.

³Eye, Satana ɖo èjì mè na Yudà kè wo yɔna be Iskariɔt kè nyi Yesù be *nukplavi woèvèawo dòmètɔ ɖèkaa.

⁴Yudà yì kpɔ * mawunɔ gãwo kudo gbãdãgbãwo be èga, pò nupo kudo wo so àlekè bè la wɔ̀ la do Yesù àsi na woa ŋuti.

⁵Èjì jɔ̀ wo eye wo pò kudo è be yèwoa na ɛ̀ ègà.

⁶Yudà lɔ̃ ɖo e ji na wo, eye be tɔ àlekè be la wɔ̀ la do Yesù àsi na wo, eye àmèha a mu la nya òa jiji.

⁷*Kpɔ̃nɔ àkpiti be àzã kè ji wo wùnà àlɛ̃vi sɔ ɖùnà Toŋutivayìa va ɖo.

⁸Yesù dɔ̃ Petrò kudo Yòhanɛ̀s, to na wo be: “Mì yì jrà Toŋutivayì be àzãa ɖo ɖɛ ne mia va ɖù.”

⁹Wo biɔ ɛ̀ be: “Fikɛ ye wò jro be mia yì wɔ̀ ɛ̀ lè ò?”

¹⁰E ɖo e ŋuti na wo be: “Ne mì ɖo èdùa mèa, mì la dogò àmè ɖe kè dro tɔ̀mèyìzea. Mì kplɔ̀ ɛ̀ do kaka yì àxue kè mè be la ɖoa mè.

¹¹Mì gblɔ̃ na àxuetɔa be: 'Ènufiɔtɔa be mia va biɔ wò be: èxɔ̀ kɛ mè ye mù la ɖù Toŋutivayì be ènu ɖùɖua lè ku *nukplavi nyèwo ò?'

¹²Eye àxuetɔa la sɔ èxɔ̀ gã ɖe, kè mè ènu sia ènu sɔ̀gbè lè vɔ̀a, fiɔ mì lè àsãŋu ji. Funu ye mì la jrà ɖo na àzãa ɖùɖu.”

¹³Nukplavi èvèawo yì, eye wo kpɔ ènuawo sìgbè àlekè Yesù gblɔ̃ na woa nène, eye wo ɖà Toŋutivayì be ènu ɖùɖua.

¹⁴Eye, wàlɛbɛ kè gà mèa sùa, Yesù kudo yebe *àmèdɔ̃dɔ̃awo nɔ̀ ànyi na ènu ɖùɖua.

¹⁵Eye Yesù gblɔ̃ na wo be: “E jro mù ŋutɔ be ma ɖù Toŋutivayì be ènu ɖùɖu kèa ku mì, gbɔ̀xue ma kpe èfũ.

¹⁶Đo mù le to na mì be, nyè mu la gbà ɖù ì gbèɖe, kaka na gà kè mè ènu kèa be gɔ̃mèɖèɖe la zɔ̃ sù lè Mawu be fìɔdua mè ò.”

¹⁷Eye e sɔ kogò ɖèka, eye ekè be do àkpe na Mawu vɔ̀a, e gblɔ̃ be: “Mì xɔ̀ ɛ̀, ne mìa ma ɛ̀ lè mìa nɔ̀nɔwo dòmè,

¹⁸ɖo mù le to na mì be, so fifìa, nyè mu gbà la nù vɛ̃ ɖe, kaka na gà kè mè Mawu be fìɔdua la va ɖo ò.”

¹⁹E yomè a, e sɔ kpɔ̃nɔa, kè be do àkpe na Mawu vɔ̀a, e kã ɛ̀, sɔ na yebe nukplaviwo, gblɔ̃ be: “Ekèa ye nyi àpe ŋutilã, ekè wo ɖè na ɖo mìa taa; mì nɔ wɔ̀ ekèa lè àpe ŋùɖo mè.”

²⁰Nène a ke, e sɔ kogòa cã na wo lè ènu ɖùɖua yomè, lè gblɔ̃ be: “Kogò kèa ye nyi *zòɖùɖu yeyea lè àpe èhũ mè, èhũ kè wo kɔ̀ ɖɛ ɖo mìa taa.

²¹Vɔ̀a, mì kpɔɖa, àmè kè la do mù àsia lè èkplɔ̃ kèa ŋuti kudo mù.

²²Nyàwo a *Àgbètɔ be Èvia la jo sìgbè àlekè Mawu gblɔ̃ ɛ̀ ɖɛa nène. Vɔ̀a, hèlu na àmè kè la do è àsìa.”

²³Eye nukplaviawo le biɔ woa nɔ̀nɔwo sè be àmè kɛ ye lè yèwo dòmè la wɔ̀ ènu kèa ò.

²⁴Nukplaviawo tɔ ènyà dɔ̃dɔ̃ kudo àdã lè woa nɔ̀nɔwo dòmè, ɖo wo le ji la nya àmè kè nyi àmè gãa lè woa dòmèa.

²⁵Yesù gblɔ̃ na wo be: “Dùkɔ̃wo be èfìɔwo ɖùnà woa ji, eye wo yɔna àmè kèwo ɖo hɔ̃hlɔ̃ ɖo woa jiawo be 'Àdɔ̀mè nyuɛ̃ wɔ̀tɔwo.'

²⁶Mu gbà nyi nène lè mìa dòmè ò. Vɔ̀a, àmè kè nyi gã lè mìa dòmèa, ne nɔ̀ ɖèvi tèpe, eye àmè kè nyi ŋùkɔ̀nɔ̀tɔa, ne nɔ̀ sumɔ̃vi tèpe.

²⁷Đo àmè kɛ ye le nyi àmè gã wu ò? Àmè kè nɔ̀ ànyi lè èkplɔ̃ ŋutia ye loo, àlo àmè kè le sumɔ ɛ̀a ye? Mu nyi àmè kè le ɖù ènua ye à? Co, ènyè ya, mù lè mìa dòmè sìgbè sumɔ̃vi nène.

²⁸Mìawo ye nɔ̀ ŋuti nyè gà sia gàmè, lè àpe tètèkpɔwo mè.

²⁹Ye ŋutia, sìgbè àlekè Ètɔ nyè ɖo è ɖɛ na mù be ma ɖùfìɔ nènea, nyè cã mù ɖo è ɖɛ na mì be mìa va ɖùfìɔ,

³⁰ne mìa ɖù, eye mìa nù kudo mù lè fìɔdu nyèa mè, ne mìa nɔ̀ ànyi lè fìɔzìkpe ji, la ɖo kòjo kudo Izràɛl be kɔ̀ta woèvèawo.”

³¹Tɔhonɔ̀ gblɔ̃ be: “Simɔ̀n, ɖo èto mù. Satana biɔ be yèa fu mì sìgbè àlekè wo funa *èlùa nène.

³²Vɔ̀a, mù fãkue na Mawu ɖo ta wò ne xɔ̀sè mu gbà va hùe do wò ò. Ne wò trɔ va gbɔ nyèa, do ŋusɛ̃ nɔ̀vi wòawo.”

³³Petrò ɖo e ŋuti na ɛ̀ be: “Tɔhonɔ̀, mù sɔ̀gbè ne ma yì ègàkpa mè, àlo mà ku ŋutɔ cã kudo wò.”

³⁴Vɔ̀a, Yesù ɖo e ŋuti na ɛ̀ be: “Petrò, mù le to na wò be kòklo mu la kpɔ ku àtɔ egbè keŋu gbɔ̀xue wò la gbe, zè ètɔ̃ be ye mu jèsi mù ò.”

³⁵Fifìa, Yesù biɔ yebe nukplaviwo be: “Kè mù dɔ̃ mì ɖoɖa be mì mu gbà hɛ̃ ègàkòtòkũ, àlo àkpɛtɛ, àlo àfɔ̀kpa òa, ènu ɖe dɛ̃ mìa?” Wo ɖo e ŋuti na ɛ̀ be: “Aò! Ènu ɖe mu dɛ̃ mi ò.”

³⁶Eye e gblɔ̃ na wo be: “Vɔ̀ fifìa, àmè kè si ègà lèa, ne sɔ ɛ̀. Àmè kè si àkpɛtɛ lèa, ne sɔ ɛ̀. Ne èwui mu lè àmè ɖe si òa, ne sà yebe àwù ne bèa plè èwui.

³⁷Đo mù lè to na mì be, Ŋɔ̀ŋlɔ̃ kè gblɔ̃ so ŋuti nyè be: 'Wo hlɛ̃ ɛ̀ ɖo èhlɔ̃dãtɔwo dòmèa', ɖo la zɔ̃ sù; eye, ènu kè Ŋɔ̀ŋlɔ̃ a gblɔ̃ so ŋuti nyèa keŋu-keŋu la zɔ̃ sù.”

³⁸Nukplaviawo gblɔ̃ na ɛ̀ be: “Tɔhonɔ̀, kpɔɖa, èwui èvè lè fikèa.” Eye, e ɖo e ŋuti na wo be: “E sù vɔ̀.”

³⁹Sìgbè àlekè ye be wɔ̀na ɛ̀, eye be ma do è nènea, Yesù to yì àmìti-toa ji. Yebe nukplaviwo cã kplɔ̀ ɛ̀ do.

⁴⁰Kè bè ɖo funua, e gblɔ̃ na yebe nukplaviwo be: “Mì fãkue ne mì mu gbà jè tètèkpɔ mè ò.”

⁴¹E yomè a, e jo lè woa gbɔ yì ŋùkɔ̀ vi ɖe, sìgbè èkpedàda jèpe ɖèka nène, jè èklò, tɔ kue fãfã, gblɔ̃ be:

⁴²“Àta, ne wò jro be yèa ɖè àyàɖùɖu be kogò kèa ɖo àzɔ̀ge na mùa, mu gbà nyi àpe jro ò; vɔ̀a, àpo jro ne wɔ̀.” [

⁴³Wàlɛbɛ ŋua, Mawu be àtikplɔtɔ ɖe so jiŋùkusi to ɖo e ji, va do è ŋusɛ̃.

⁴⁴Èhlò mè sãkɔ̃ na ɛ̀, eye, Yesù le drɛ̃ àvũ, le fãkue veve ɖe, eye, àde kè be le jè a lè sìgbè èhũkɔ̃ nène, le jà ɖo ànyigbã.]

⁴⁵Kè be fãkue vɔ̀a, e trɔ va yebe nukplaviwo gbɔ, kpɔ wo lè àlɔ̃ mè, ɖo ènuxàxa na be wo gbɔjɔ.

⁴⁶E gblɔ̃ na wo be: “Nukɛ be àlɔ̃ mì le dɔ̃ ò? Mì fɔ̃ ne mìa fãkue, ne mì mu gbà jè tètèkpɔ mè ò!”

⁴⁷Wàlɛbɛ kè Yesù le gblɔ̃ ènu kèawoa, àmè ɖewo zɔ̃ hòo va. Yudà kè nyi nukplavi woèvèawo dòmètɔ ɖèkaa, lè ŋùkɔ̀ na wo. E gogo Yesù, eye be kisì na ɛ̀.

⁴⁸Yesù gblɔ̃ na ɛ̀ be: “Yudà èsì-kiki ye wò sɔ le do *Àgbètɔ be Èvia àsia?”

⁴⁹Kè nukplavi kèwo bɔ̀ ɖo Yesù ŋutiawo kpɔ ènu kè le jɔ̀ a, wo biɔ ɛ̀ be: “Tɔhonɔ̀, mia ɖè èwui ɖo woa dòmèa?”

⁵⁰Woa dòmètɔ ɖèka dà èwui mawunɔ gãa be sumɔ̃vi, kpà yebe ɖùsi mè be ètoa.

⁵¹Vɔ̀a, Yesù gblɔ̃ be: “Mì tɔtè!” E yomè a, e tɔ àsi sumɔ̃via be ètoa, dà èdɔ̀ na ɛ̀.

⁵²Eye, Yesù gblɔ̃ na mawunɔ gãwo kudo mawuxɔ jikpɔtɔ be ègawo gbàkudo dùmèmègã kèwo va la le èawo be: “Fìãfìtɔ mù nyi ye mì hɛ̃ èkpò kudo èwui, ɖo àsia?

⁵³Wàlɛbɛ kè mù nɔ̀ mìa dòmè gbè sia gbè lè mawuxɔa mèa, mì mu ɖè àsi tɔ mù kpɔ ò. Vɔ̀a, fifìa nyi mìa ku Àbòsam, vìvìti be èfìɔa be ŋusɛ̃ be gàmè.”

⁵⁴Wo le Yesù eye, wo kplɔ̀ ɛ̀ yì mawunɔ gãa be àxomè. Petrò kpàsà wo do, lè àzɔ̀ge.

⁵⁵Àmè ɖewo lè mawunɔ gãa be àxomè, bɔ̀bɔ̀ nɔ̀ ànyi, le pu èzò lè xixenu, eye Petrò yì nɔ̀ ànyi lè woa dòmè.

⁵⁶Sumɔvi nyɔ̃nù ɖe kpɔ ɛ̀ lè ànyi nɔ̀nɔ lè èzòa gbɔ. E kpɔ ɛ̀ dũu, gblɔ̃ be: “Àmè kèa cã zɔ̃nà ku Yesù.”

⁵⁷Vɔ̀a, Petrò gbe, gblɔ̃ be: “Nyɔ̃nù, nyè mu jèsi ì ò.”

⁵⁸Zãɖea, àmè bu va kpɔ Petrò, gblɔ̃ na ɛ̀ be: “Woa dòmètɔ ɖèka ye wò cã wò nyi.” Vɔ̀a, Petrò gblɔ̃ be: “Ènyè mu lè woa dòmè ò.”

⁵⁹Sìgbè gàpòpo ɖèka yomè nènea, àmè bu gbà va tɛ ègbè ɖo e ji be: “Nyàwo ye, ŋusù kèa cã zɔ̃nà ku ì, ɖo Galileatɔ ye be nyi.”

⁶⁰Vɔ̀a, Petrò gblɔ̃ be: “Kpɔɖa, nyè mu sè ènyà kè wò le gblɔ̃a gɔ̃mè ò.” Wàlɛbɛ kè Petrò le gblɔ̃ ènyà kèa, kòklo ku àtɔ zè ɖèka.

⁶¹Tɔhonɔ̀ trɔ kpɔ Petrò, eye Petrò ɖoŋùku ènyà kè Tɔhonɔ̀ gblɔ̃ na ɛ̀ be: “Gbɔ̀xue kòklo la ku àtɔ egbèa, wò la gbe mù zè ètɔ̃.”

⁶²Eye Petrò to jè àgbo ji, fã àvi veve ɖe.

⁶³Àmè kèwo be àsi mè Yesù lèawo, le kò è, eye wo le pò è.

⁶⁴Wo sɔ ènu cɔ̃ ŋùmè na ɛ̀, eye wo biɔ ɛ̀ be: “Gblɔ̃ àmè kè pò wò fifìa na mi!”

⁶⁵Wo zũ ì, gblɔ̃ ènyà bàɖà fuu buwo ɖo e ŋuti.

⁶⁶Kè èŋù kèa, èdùmèmègãwo kudo mawunɔ gãwo, gbàkudo ènuŋlɔ̀tɔwo bɔ̀ eye, wo kplɔ̀ Yesù yì woabe kòjoɖope gãa,

⁶⁷eye wo gblɔ̃ na ɛ̀ be: “Ne èwò ye nyi Mɛ̀siaa, to è na mi.” Vɔ̀a, Yesù ɖo e ŋuti na wo be: “Ne mù to è na mì cã a, mì mu la xɔ̀ ɛ̀ sè ò,

⁶⁸eye, ne mù biɔ mì ènyàa, mì mu la ɖo e ŋuti na mù ò.

⁶⁹Vɔ̀a, so fifìa, Àgbètɔ be Èvia la nɔ̀ ànyi lè Mawu ŋusɛ̃tɔa be ɖùsi mè.”

⁷⁰Woawo keŋu biɔ ɛ̀ be: “Mawu be Èvi ye wò nyia?” Eye e ɖo e ŋuti na wo be: “Eye kpò mìawo ŋutɔ mì gblɔ̃ ŋua.”

⁷¹Eye, wo gblɔ̃ be: “Mi mu gbà hiã ɖase ɖe fifì ò. Mia ŋutɔwo, mi sè be gblɔ̃ ɛ̀ kudo yebe ènu.”