Read gen Lukà 23 Bible Online

Lukà 23 - gen bible

Lukà 23

¹Eye ànyinɔ̀pea keŋu sitè, kplɔ̀ Yesù yì Pilatò be ŋùkɔ̀.

²Lè funua, wo le dohùɛ do è be: “Mi kpɔ àmè kèa le gble èto na miabe dùkɔ̃a. E gbe be wo mu gbà tu Romà-fìɔgã be ètaci ò. E gbà gblɔ̃nà be èyè ye nyi Mɛ̀sia, èfìɔa.”

³Pilatò biɔ Yesù be: “Èwò ye nyi Yudàviwo be èfìɔa?” Eye, Yesù ɖo e ŋuti na ɛ̀ be: “Èwò ye le gblɔ̃ ɛ̀.”

⁴Pilatò gblɔ̃ na * mawunɔ gãwo ku àmèha a be: “Nyè mu kpɔ be ŋusù kèa dà lè *èse ɖe ji ò.”

⁵Vɔ̀a, woawo ya tɛ ègbè ɖo e ji be: “Ènu kèwo be le fìɔ àmèwoa, le do èzĩ tɔ̀tɔ Yudeà nyigbãa kpata ji, so Galilea kaka va fikèa.”

⁶Kè Pilatò sè wo pò nupo so Galilea ŋutia, e biɔ be: “Galileatɔ ye àmè kèa nyia?”

⁷Kè be kpɔ be àgo kè ji Herod kpàcɛ̀ lèa ji ye Yesù soa, e ɖo è ɖoɖa Herod gbɔ, ɖo, e cã lè Yèruzàlɛm gà ŋua mè.

⁸Kè Herod kpɔ Yesùa, èjì jɔ̀ ɛ̀ ŋutɔ, ɖo e le ji la kpɔ ɛ̀ fifìa, e dìdì, ɖo ènu kèwo be sè so e ŋutiawo ŋuti. E le kpɔ èmɔ be Yesù la wɔ̀ ŋùdãdɔ ɖe ne yèa kpɔ.

⁹E biɔ ɛ̀ ènyà sùgbɔ, vɔ̀a, Yesù mu ɖo ènyà ɖekpe ŋuti na ɛ̀ ò.

¹⁰* Mawunɔ gãwo ku ènuŋlɔ̀tɔwo lè funu, le dohùɛ do è ku tùkaɖa.

¹¹Herod kudo yebe gbãdãgbãwo ɖè àlɔmè lè Yesù ŋuti. Wo kò è, sɔ àwù biɖibiɖi ɖe do na ɛ̀, ɖo è ɖoɖa Pilatò.

¹²Gbè ŋua gbè ye Herod ku Pilatò zũ èxlɔ̃, ɖo wo nɔ̀ èkɛ̃ mè ku woa nɔ̀nɔwo sãa.

¹³Pilatò yɔ mawunɔ gãwo kudo èdùmèmègãwo gbàkudo dùkɔ̃a bɔ̀.

¹⁴E gblɔ̃ na wo be: “Mì kplɔ̀ ŋusù kèa va na mù be e le gble èto na dùkɔ̃a; vɔ̀a kè mù biɔ ɛ̀ ènyà lè mìa kpata mìa be ŋùmè a; nyè mu kpɔ àgɔ̀ ɖe lè e ŋuti, sɔ kù ɖo ènu kèwo ŋuti mì le dohùɛ do èa ɖo ò.

¹⁵Herod cã mu kpɔ àgɔ̀ kè be jè a ò. Ye ŋuti ye e gbìgbɔ̀ trɔ ɛ̀ ɖoɖa mi. Mì mu kpɔ fifì be ŋusù kèa mu wɔ̀ ènu ɖe kè jè na èku òa?

¹⁶Ye ŋutia, mù la na wo la pò è; eye, e yomè a, mù la tàsi ì.” [

¹⁷Lè *Toŋutivayì be àzã ɖùɖu hùenua, Pilatò ɖènà gàmènɔ̀tɔ ɖèka to na wo.]

¹⁸Eye, àmèha a kpata tɔ àpa dodo le gblɔ̃ be: “Wù ŋusù kèa, ne wòa ɖègà Barabas na mi!”

¹⁹— Àmè kè wo le do-gà ɖo èzĩ tɔ̀tɔ kudo àmè wùwu ŋutia. —

²⁰Pilatò gbà pò nupo na wo, le jro la tàsi Yesù.

²¹Vɔ̀a, wo do àpa gblɔ̃ be: “Ka ɛ̀ ɖo àtisòga ŋuti! Ka ɛ̀ ɖo àtisòga ŋuti!”

²²Vɔ̀a, e gbà gblɔ̃ na wo, zè ètɔ̃gɔ̃a be: “Àgɔ̀ kɛ ye be jè ò? Nyè mu kpɔ be e wɔ̀ ènu ɖe kè jè na èkua ò. Ye ŋutia, ne mù pò è vɔ̀a, mù la tàsi ì.”

²³Vɔ̀a, wo zĩ e ji kudo ègbè lelele, le biɔ be, wo ne ka ɛ̀ ɖo àtisòga ŋuti, eye woabe àpaa, le yì eji.

²⁴Eye, e sò ènyàa ɖo woa tɔ̀ ji.

²⁵E ɖègà àmè kè wo jro a na wo; àmè kè wo le ɖo ègà, ɖo e hɛ̃ èzĩ tɔ̀tɔ va èdùa mè, eye be gbà wù àmè ŋutia. Vɔ̀a, e sɔ Yesù do àsi na wo ne woa wɔ̀ ènu kè wo jro a kudo è.

²⁶Ekè wo kplɔ̀ Yesù le yìa, wo dogò Kirenè ŋusù ɖe. Wo yɔna ɛ̀ be Simɔ̀n. E so àgblè va le yì àxomè, eye wo dro àtisògaa na ɛ̀, be ne sɔ ɛ̀ jè Yesù yomè.

²⁷Àmè sùgbɔ jè Yesù yomè; nyɔ̃nù ɖewo lè woa dòmè le fã àvi, le na àle.

²⁸Yesù ɖèkɔ̀ kpɔ wo, gblɔ̃ na wo be: “Yèruzàlɛm nyɔ̃nùwo, mì mu gbà fã àvi ɖo èta nyè ò; mi fã àvi bòhũ ɖo mìa ɖokoewo, kudo mìabe èviwo ta.

²⁹Đo, kpɔɖa ŋùkèkèwo gbãnà eye wo la gblɔ̃ be: 'Sìtu ɖèɖe ye e nyi na nyɔ̃nù èkònɔ̀wo ku nyɔ̃nù kèwo be àdɔ̀ mu jì kpɔ, kudo kèwo mu na ànɔ èvi kpɔ òa.'

³⁰Wàlɛbɛ ŋua, àmèwo la tɔ gbɔ̃gblɔ̃ na ètowo be: 'Mì mù jè mia ji.' Wo la gblɔ̃ na èkpowo be: 'Mì cɔ̃ mia ji!'

³¹Đo ne wo le wɔ̀ ekèa kudo àti mumua, àleke e la va nyi na àti pupu ɖo ò?”

³²Wo gbà kplɔ̀ ènubàɖàwɔ̀tɔ èvè ɖewo bɔ̀ ɖo Yesù ŋuti ne woa yì wù woawo cã.

³³Kè wo va ɖo tèpe kè wo yɔna be: “Àmèta tèpea”, wo ka Yesù ɖo àtisòga ŋuti lè funu. Wo ka ènuvuɛ̃wɔ̀tɔ èvèawo cã. Wo ka àmè ɖèka ɖo yebe ɖùsi mè, èvègɔ̃a ɖo yebe èmìɔ̃ mè.

³⁴Vɔ̀a, Yesù gblɔ̃ be: “Àta, sɔ kè wo, ɖo wo mu nya ènu kè wo le wɔ̀ ò.” Wo dà àkɔ̀ ɖo yebe àwùwo ŋuti, ma wo lè woa nɔ̀nɔwo dòmè.

³⁵Dùkɔ̃a tɔtè lè àzɔ̀ge, le kpɔ ènu, wàlɛbɛ kè èdùmèmègãwo le ɖè àlɔmè lè Yesù ŋutia. Wo le gblɔ̃ be: “E hlùɛ̃ àmèwo gã; ne e ye nyi Mɛ̀sia, àmè kè Mawu cã a nyàwo a, ne hlùɛ̃ ye ɖokoe gã.”

³⁶Gbãdãgbãwo cã le ɖè àlɔmè lè e ŋuti, le kò è. Wo tètè gogo è, sɔ vɛ̃ gbegble na ɛ̀ be ne nù.

³⁷Wo gblɔ̃ na ɛ̀ be: “Ne Yudàviwo be èfìɔ ye wò nyi nyàwo a, hlùɛ̃ ɖokoe wò gã.”

³⁸Wo ŋlɔ̀ ènyà kèa cã ɖo yebe èta gbe be: “Àmè kèa ye nyi Yudàviwo be èfìɔ.”

³⁹Ènubàɖàwɔ̀tɔ kèwo wo ka ɖo àtisòga ŋuti bɔ̀ ɖo Yesù ŋutiawo dòmètɔ ɖèka cã lè zũ ì be: “Mu nyi èwò ye nyi Mɛ̀sia òa? Hlùɛ̃ ɖokoe wò gã ne wòa hlùɛ̃ miawo cã gã.”

⁴⁰Vɔ̀a èvuɛ̃wɔ̀tɔ èvègɔ̃a gbe na ɛ̀ be: “Èwò kè le xɔ̀ èto dɔ̃dɔ̃ ɖèka ŋùkumè kudo èa, wò mu vɔ̃na Mawu òa?

⁴¹Miawo ya, ènu kè mi wɔ̀a be èfɛ̃tu ye mi le xɔ̀, vɔ̀a, e ya mu wɔ̀ ènu dàda ɖe ò.”

⁴²E gbà gblɔ̃ be: “Yesù, wàlɛbɛ kè wò la va ɖùfìɔ lè xixe kèa mèa, mù gbà ŋlɔ̀be mù ò.”

⁴³Yesù ɖo e ŋuti na ɛ̀ be: “Nyàwo mù le to na wò, egbèa ke, wò la nɔ̀ Mawu gbɔ kudo mù.”

⁴⁴Eye, sìgbè gà woèvè mè nènea, vìvìti do ɖo ànyigbãa kpata ji, kaka va na wètrɔ gà ètɔ̃ mè.

⁴⁵Èwè be kɛ̃klɛ̃ bu, eye xɔ̀mèsòvɔ kè lè kɔ̀kɔ̀ɛpea mèa, zɛ̃ ɖo èvè.

⁴⁶Eye Yesù do àpa sɛ̃sɛ̃ ɖe be: “Àta, mù sɔ gbɔ̃gbɔ̃ nyèa do àsi na wò.” E yomè a, e miɔ̃ ènu.

⁴⁷Kè àhùagaa kpɔ ènu kè jɔ̀ a, e na gogo Mawu gblɔ̃ be: “Ŋusù kèa, àmè jɔ̀jɔɛ ye be nyi nyàwo.”

⁴⁸Kè àmè kèwo zɔ̃ hòo va kpɔ ènu kèa tèpeawo kpɔ ènu kèwo jɔ̀ a, woa kpata wo tɔ àkɔta pòpo, trɔ yì àxomè.

⁴⁹Yesù be èxlɔ̃wo ku nyɔ̃nù kèwo kpàsà ɛ̀ do so Galileaa, wo nɔ̀tè lè àzɔ̀ge, le kpɔ ènu kèwo le jɔ̀ a.

⁵⁰Ŋusù ɖe lè Yudàviwo be àɖàŋùɖèhaa mè. Wo yɔna ɛ̀ be Yozɛ̀f. Ŋusù kèa nyi àmè nyuɛ̃, ànùkuame.

⁵¹Mu lɔ̃ ɖo ènu kèwo àmè kpɔ̀tɛawo gblɔ̃a, ku ènu kèwo wo wɔ̀a ji ò. Yudeà be èdù kè wo yɔna be Arimatea mè ye be so, eye e le nɔ̀tè kpɔ Mawu be fìɔɖùɖua.

⁵²Ŋusù kèa yì kpɔ Pilatò, biɔ ɛ̀ Yesù be àmètia.

⁵³E ɖè Yesù jo lè àtisògaa ŋuti, xasa kploba xɔ̀asì ɖe ɖo e ŋuti. E sɔ ɛ̀ mlɔ̃ èyɔ̀do ɖe kè wo kù ɖo àkpã mèa mè. Wo mu ɖì àmè ɖe ɖo èyɔ̀do ŋua mè kpɔ ò.

⁵⁴Jàjràɖo be àzã ye e nyi, eye jɛ̃gbɔ̃zãa gogo.

⁵⁵Nyɔ̃nù kèwo kpàsà Yesù do so Galileaa, zɔ̃ ku Yozɛ̀f yì kpɔ èyɔ̀doa, kpɔ àlekè wo sɔ Yesù mlɔ̃ e mè ɖoa.

⁵⁶E yomè a, wo trɔ yì àxomè, jrà àmì sìsì huɛ̃ titiwo ɖo ɖɛ. Wo gbɔ̃jɛ̃ lè jɛ̃gbɔ̃zã gbè sìgbè àlekè èsea biɔa nène.