Read gen Lukà 24 Bible Online

Lukà 24 - gen bible

Lukà 24

¹Lè kuasiɖa be ŋùkèkè cucugbã gbèa, lè ŋùdekɛ̃nyɛ fùtùa, nyɔ̃nùawo sɔ àmìsìsi huɛ̃ titi, kèwo wo jràɖo ɖɛa ɖo àsi, va èyɔ̀doa to.

²Vɔ̀a, wo kpɔ be wo mlì èkpea jo lè èyɔ̀doa nu[19]

³Wo ɖo e mè vɔ̀a, wo mu kpɔ Yesù be àmètia ò.

⁴Ekèa na be wo titɔ, eye woabe àyè gbãdo. Wàlɛbɛ ŋua ye wo kpɔ ŋusù èvè ɖewo lè àwù dàzòwo mè, va tɔtè lè woa gbɔ.

⁵Nyɔ̃nùawo vɔ̃, cɔ̃ ŋùmè ànyi. Vɔ̀a, ŋusùawo gblɔ̃ na wo be: “Nukɛ ŋuti ye mì le ji àmè kè lè àgbè a lè àmè kukuwo dòmè ɖo ò?

⁶Mu lè fikèa ò, e fɔ̃ so èku. Mì ɖoŋù ènyà kè be gblɔ̃ na mì, wàlɛbɛ kè be nɔ̀ Galilea!

⁷E gblɔ̃ be: 'Wo ɖo la do *Àgbètɔ be Èvia àsi na ènuvuɛ̃wɔ̀tɔwo, ne woa ka ɛ̀ ɖo àtisòga ŋuti, eye lè ŋùkèkè ètɔ̃gɔ̃a gbèa, Mawu la fɔ̃ ɛ̀ so èku.'”

⁸Nyɔ̃nùawo ɖo ŋùkuvi Yesù be ènyà kèa ji,

⁹eye, ekè wo trɔ so èyɔ̀doa toa, wo gblɔ̃ ènu kèawo keŋu na *nukplavi woeɖèkaawo kudo àmè kpɔ̀tɛawo keŋu.

¹⁰Nyɔ̃nùawo ye nyi: Mari, Magdalà tɔ̀a ku Joanà kudo Mari Yakobò be ènɔa gbàkudo nyɔ̃nù bu kèwo bɔ̀ ɖo woa ŋutiawo.

¹¹Vɔ̀a, ènyà ŋuawo ɖì èdrũ toto be ènyà lè *àmèdɔ̃dɔ̃awo gbɔ, eye wo mu xɔ̀ nyɔ̃nùawo ji sè ò.

¹²Gãkea, Petrò sitè, pu dù yì èyɔ̀doa to. E ɖèkɔ̀ kpɔ e mè, vɔ̀a, àmèɖìvɔa[20] kpò ye be kpɔ. Ènu kè jɔ̀a, kpaca ɛ̀, eye e trɔ yì àxomè.

¹³Gbè ŋua gbè tututua, Yesù be *nukplavi èvè zɔ̃ èmɔ le yì kɔpe ɖe kè wo yɔna be Emaus-a mè, eye e lè sìgbè kpeti woèvè nène lè Yèruzàlɛm gbɔ.

¹⁴Wo le kã àseŋu so ènu kèwo keŋu jɔ̀ va yìawo ŋuti.

¹⁵Wàlɛbɛ kè wo le kã àseŋu, eye wo le bù ènu kèawo ŋuti kpɔa, Yesù ŋutɔ va gogo wo, zɔ̃ kudo wo le yì.

¹⁶Wo kpɔ ɛ̀ gãke wo mu jèsi ì ò.

¹⁷Eye e gblɔ̃ na wo be: “Àseŋu kɛwo ŋùmè ye mì le kã lè mìa nɔ̀nɔwo dòmè, kè mì le zɔ̃a ò?” Eye wo tɔtè, ɖɔ ku ŋuzĩzĩ.

¹⁸Woa dòmètɔ ɖèka kè wo yɔna be Kleopas-a, ɖo e ŋuti na ɛ̀ be: “Wò ɖèka kpò ye nyi àmèjro lè Yèruzàlɛm kè mu sè ènu kèwo jɔ̀ lè funu lè àzã kèawo jia òa?”

¹⁹Yesù biɔ wo be: “Ènyà kɛ ye jɔ̀ ò?” Wo gblɔ̃ na ɛ̀ be: “Ènu kè jɔ̀ ɖo Yesù Nazarɛttɔ̀a jia. Àmè kèa nyi Mawu be gblɔ̃ɖɛtɔ sɛ̃ŋu ɖe. E wɔ̀ ŋùdãdɔ gãwo, pò nupo ku ŋusɛ̃ lè Mawu ku àgbètɔwo be ŋùmè.

²⁰Vɔ̀a, miabe * mawunɔ gãwo ku èdùmèmègãwo ɖè e do àsi eye wo gblehùɛ do è, ka ɛ̀ ɖo àtisòga ŋuti.

²¹Miawo ya, mi lè kpɔ èmɔ be e ye la hlùɛ̃ Izràɛl be dùkɔ̃a gã, vɔ̀a, ŋùkèkè ètɔ̃ sɔ̃ŋu ye nyi ekèa kè ènu kèawo jɔ̀. Vɔ̀a, wu ekèawo kpataa,

²²nyɔ̃nù ɖewo kèwo lè mia dòmèawo, va gblɔ̃ ènyà wɔ̀ ŋùdã ɖe na mi. Wo yì èyɔ̀doa to ŋùdekɛ̃nyɛ fùtù,

²³eye, ekè wo mu kpɔ yebe àmètia òa, wo va gblɔ̃ na mi be yèwo kpɔ Mawu be àtikplɔtɔwo, eye wo gblɔ̃ na yèwo be e lè àgbè.

²⁴Mia dòmètɔ ɖewo cã yì èyɔ̀doa to, eye wo kpɔ ènuawo pɛpɛpɛ sìgbè àlekè nyɔ̃nùawo gblɔ̃ ɛ̀a nène. Vɔ̀a, àmè ɖe mu kpɔ ye ŋutɔ ò.”

²⁵Yesù gblɔ̃ na wo be: “Mìa sùkunɔ̀, susu mà le ènu kaba tɔwo! Nukɛ ŋuti ye mì mu xɔ̀ ènu kèwo keŋu Mawu be gblɔ̃ɖɛtɔwo gblɔ̃ ɖɛawo ji sè ò?

²⁶Mì mu nya be e jè be Mɛ̀siaa bèa ɖù àyà kèawo gbɔ̀xue bèa ɖo yebe gogo mè òa?”

²⁷Eye Yesù ɖè ènu kèwo kù ɖo e ŋuti lè Ŋɔ̀ŋlɔ̃awo kpata mèa gɔ̃mè na wo, so ekèwo Mosè ŋlɔ̀awo ji kaka va ɖo Mawu be gblɔ̃ɖɛtɔwo tɔ̀awo ji.

²⁸Kè wo gogo kɔpe kè mè wo le yìa, Yesù wɔ̀ sìgbè àmè kè la to woa ŋuti yì ŋùkɔ̀a nène.

²⁹Vɔ̀a, wo zĩ e ji, gblɔ̃ na ɛ̀ be: “Nɔ̀ ku mi, ɖo fìɛ̃si[21] ɖo vɔ̀, eye xixea mè cã le cɔ̃.” Eye e yì woabe àxomè ne bèa ci woa gbɔ.

³⁰Kè wo le ɖù ènua, Yesù sɔ kpɔ̃nɔ, do àkpe ɖo e ta, kã ɛ̀, sɔ na wo.

³¹Gà ŋua mè ye woabe ŋùkuviwo hũ zè ɖèka, eye wo kpɔ Yesù jèsi, vɔ̀a, e bu lè woa gbɔ.

³²Wo gblɔ̃ na woa nɔ̀nɔwo be: “Miabe èjì mu ɖɔ ku jìjɔɛ, wàlɛbɛ kè be le pò nupo na mi lè èmɔa ji, le ɖè Ŋɔ̀ŋlɔ̃awo gɔ̃mè na mia òa?”

³³Eye wo so jè èmɔ, trɔ yì Yèruzàlɛm. Wo kpɔ nukplavi woeɖèkaawo ku àmè kèwo bɔ̀ ɖo woa ŋutiawo,

³⁴eye wo gblɔ̃ na wo be: “Tɔhonɔ̀ fɔ̃ nyàwo eye, e ɖè ye ɖokoe fiɔ Simɔ̀n!”

³⁵Àmè èvèawo cã gblɔ̃ ènu kèwo jɔ̀ lè èmɔa jiawo, ku àlekè wo kpɔ Yesù jèsi wàlɛbɛ kè be le kã kpɔ̃nɔa ɖoa na wo.

³⁶Wàlɛbɛ kè wo lè gblɔ̃ ènyà kèawoa, Yesù ŋutɔ to ɖo woa dòmè, gblɔ̃ na wo be: “Fàfa ne nɔ̀ mìa ji.”

³⁷Àdìka sò wo, eye vɔ̃vɔ̃ jè woa ji. Wo bù be ŋùãlì ye, yèwo lè kpɔ.

³⁸Vɔ̀a, Yesù biɔ wo be: “Nukɛ ŋuti ye mì titɔ ɖo ò? Nukɛ ŋuti ye mì le do àɖìkà ɖo ò?

³⁹Mì kpɔ àlɔ̀ nyèwo kudo àfɔ̀ nyèwo ɖa, ne mìa jèsi ì be ènyè ŋutɔ ye. Mì tɔ àsi mù kpɔ ne mìa nya, ɖo ŋùãlì mu ɖona ŋutilã kudo èpu sìgbè àlekè mì kpɔ mù ɖoa nène ò.”

⁴⁰Kè be gblɔ̃ ènyà kèawoa, e sɔ yebe àlɔ̀ kudo yebe àfɔ̀wo fiɔ wo.

⁴¹Vɔ̀a, ekè ènyàa wɔ̀ ŋùdã na wo, eye èjì le jɔ̀ wo ŋutia, wo mu xɔ̀ ɛ̀ sè ò. Yesù biɔ wo be: “Ènuɖùɖu ɖe lè mìa si lè fikèa?”

⁴²Wo sɔ èlãvi mème kãkã na ɛ̀,

⁴³eye be xɔ̀ ɛ̀ ɖù lè woabe ŋùmè.

⁴⁴Yesù gblɔ̃ na wo be: “Ènyà kèawo tututu ye mù gblɔ̃ na mì wàlɛbɛ kè mù nɔ̀ mìa dòmèa be: e jè be ènu kèwo keŋu wo ŋlɔ̀ so ŋuti nyè lè Mosè be xoma ku Mawu be gblɔ̃ɖɛtɔwo be xomawo kudo Salmɔ̀wo mèawo ne zɔ̃ sù.”

⁴⁵Eye, e hũ woabe susu mè ne woa ŋɔjè ŋɔ̀ŋlɔ̃awo mè.

⁴⁶E gblɔ̃ be: “Wo ŋlɔ̀ ɖɛ be Mɛ̀siaa la ɖù àyà eye e la fɔ̃ so àmèkukuwo dòmè lè ŋùkèkè ètɔ̃gɔ̃a gbè,

⁴⁷eye wo la do àŋɛ̀a lè yebe nyikɔ mè na dùkɔ̃wo keŋu ne woa ɖɔ̀lì èdɛ̃, àleke be Mawu bèa sɔ woabe ènuvuɛ̃wo kè wo. Wo la tɔ àŋɛ̀a dodo so Yèruzàlɛm.

⁴⁸Mìawo ye nyi ɖàsèfowo na ènu kèawo.

⁴⁹Eye kpɔɖa, mù la sɔ ènu kè Ètɔ nyè fìãa, ɖoɖa mì. Mìawo yaa, mì nɔ̀ Yèruzàlɛm be èdùa mè, kaka woa sɔ jiŋùkusi be ŋusɛ̃a do na mì.”

⁵⁰Lè ekèa yomè a, Yesù kplɔ̀ yebe nukplaviawo yì Betanìa. E kɔ àlɔ̀ yì ji, tusì na wo lè funua.

⁵¹Wàlɛbɛ kè be le tusì na woa, e gble wo ɖɛ, eye wo kɔ ɛ̀ yì jiŋùkusi.

⁵²Vɔ̀a, woawo ya jè *èɖɛ̀ na ɛ̀, trɔ yì Yèruzàlɛm ku jìjɔɛ gã ɖe.

⁵³Wo nɔ̀nà mawuxɔa mè gà sia gà mè, kafuna Mawu.