Read gen Lukà 3 Bible Online

Lukà 3 - gen bible

Lukà 3

¹Lè Romà-fìɔgã Tiberìo be èfìɔɖùɖu be èpè woeàtɔ̃gɔ̃a mèa, kè Pɔ̃tìo Pilatò nyi dùjiɖùtɔ lè Yudeà, eye Herod nyi èfìɔgbɔfìɔ lè Galileaa, nɔ̀via Filipò nyi èfìɔgbɔfìɔ lè Iturea ku Trakonitè be àgowo jia, eye Lisania nyi èfìɔgbɔfìɔ lè Abilenè,

²eye Anà ku Kayafà nyi * mawunɔ gãwoa, Mawu be ènyà ɖì na Yòhanɛ̀s, Zakarìa be èvia lè zògbè ji.

³Eye e va Yɔrdàn be àgowo keŋu ji, le do èdɛ̃ɖɔ̀li be mawusilèle be àŋɛ̀a na èvuɛ̃ be kèke.

⁴Sìgbè àlekè ènu kè Ezayà, Mawu be gblɔ̃ɖɛtɔa ŋlɔ̀ ɖo yebe xoma mèa nènea: “Àmè ɖe be ègbè le ɖì lelele lè zògbè ji: mì jrà Tɔhonɔ̀ be èmɔa ɖo, mì jɔ̀ yebe àfɔ̀mɔwo nyuɛ̃ ɖe.

⁵Wo la ɖɔ bàlì sia bàlì, wo la gbã èto sia èto ku èkpo sia èkpo va ànyi, wo la jɔ̀ èmɔ gɔ̃glɔ̃wo, wo la wɔ̀ èmɔ càklì càklìwo la zìɔ̃.

⁶Eye àmèwo kpata la kpɔ lekè Mawu la hlùɛ̃ yebe dùkɔ̃a gã ɖoa.”

⁷Eye e gblɔ̃ na àmèha kèwo va ne bèa lè mawusi na woawo be: “Mìa jàkpàtà be xòmèviwo, àmè kɛ ye ɖo àfɔ̀ àfɔ̀ ji na mì be, mìa si lè Mawu be kòjoɖoɖo be àzã kè gbãnà a nu ò?

⁸Mì na ne mìabe wɔ̀nawo ne ɖèfiɔ be mì trɔ lè mìabe ènuvuɛ̃wo yomè. Mì mu gbà nɔ gblɔ̃ lè mìa ɖokoewo mè be: 'Abràham ye nyi mia tɔgbe ò', ɖo mù le to na mì be Mawu teŋu sɔ èkpe kèawo sɔ wɔ̀ èviwo na Abràham.

⁹Wo sɔ èfiɔ ɖo àtiwo be ekè ŋuti vɔ̀ ne woa sò wo. Àti ɖekpekpe àti kè mu la sɛ̃ èku òa, wo la sò è sɔ dà ɖo èzò mè.”

¹⁰Àmèwo biɔ Yòhanɛ̀s be: “Nukɛ ye jè be mia wɔ̀ ò?”

¹¹E ɖo e ŋuti na wo be: “Ne àmè ɖe ɖo àwù èvèa, ne na ɖèka àmè kè mu ɖo ɖekpe òa. Ne àmè ɖe ɖo ènu kè be la ɖùa, ne ma ɛ̀ ku àmè kè mu ɖo òa.”

¹²Dùgajɔ̀tɔwo cã va Yòhanɛ̀s gbɔ ne bèa lè mawusi na wo. Wo biɔ ɛ̀ be: “Ènufiɔtɔ nukɛ ye mi ɖo la wɔ̀ ò?”

¹³E ɖo e ŋuti na wo be: “Mì mu gbà xɔ̀ ègà lè àmè ɖe si, tovò lè ekè èsea gblɔ̃a ŋuti ò.”

¹⁴Gbãdãgbãwo cã biɔ ɛ̀ nènea ke be: “Nukɛ ye e jè be mia wɔ̀ ò?” Eye e gblɔ̃ na wo be: “Mì mu gbà wɔ̀ ènu veve ku àmè ɖe ò, mì mu gbà jè àgɔ̀ lè àmè ɖe ji ò, mìabe fɛ̃tu ne jè ŋùmè na mì.”

¹⁵Dùkɔ̃a lè ŋùɖo mè, eye àmèwo kpata le biɔ woa ɖokoewo sè be, àlo Yòhanɛ̀s ye le nyi Mɛ̀siaa?

¹⁶Vɔ̀a, Yòhanɛ̀s ɖo e ŋuti na woa kpata be: “Ènyè yaa, mù le lè mawusi na mì ku èsì, vɔ̀a, àmè kè wu gã mùa lè yo nyè mè gbãnà. Nyè mu jè ne ma tu yebe àfɔ̀kpakawo ŋutɔ cã ò. Ne e vaa, Gbɔ̃gbɔ̃ Kɔ̀kɔ̀ɛ ku èzò ye be la sɔ lè mawusi na mì.

¹⁷E le yebe èlùfunua[3] ɖo àsi, la sɔ ɛ̀ fu *èlùawo. E la lɔ èlùawo kɔ̀ ɖo yebe àvà ji, la lɔ fòfloawo kɔ̀ ɖo èzò kè mu cina gbèɖe òa mè.”

¹⁸Eye e gblɔ̃ ènyà sùgbɔ buwo cã sɔ do ŋusɛ̃ àmèwo lè yebe àŋɛ̀ dodoa mè.

¹⁹Vɔ̀a Yòhanɛ̀s kã ŋùmè na èfìɔgbɔfìɔ Herod ɖo Herodia, nɔ̀via be èsrɔ̃ kè be xɔ̀ ɖèa, ku ènu fìtì fìtì bu kèwo be wɔ̀awo ŋuti.

²⁰Sɔ kpe ekèawo kpataa, e le Yòhanɛ̀s do-gà.

²¹Kè Yòhanɛ̀s lè mawusi na àmèwo keŋu vɔ̀a, eye be lè è na Yesù cã a, wàlɛbɛ kè Yesù le fãkuea, jiŋùkusi hũ,

²²eye Gbɔ̃gbɔ̃ Kɔ̀kɔ̀ɛ a ɖì ɖo e ji, sɔ àhɔ̃ne be nɔ̀nɔmè. Ègbè ɖe ɖì so jiŋùkusi, gblɔ̃ be: “Èwò ye nyi èvi nyè ɖève a, egbèa mù jì wò.”

²³Yesù le ɖo sìgbè èpè ègbã nène, wàlɛbɛ kè e jè yebe èdɔ gɔ̃mèa. E nyi Yozɛ̀f be èvi sìgbè àlekè àmèwo susuna ɛ̀a nène, Yozɛ̀f nyi Èlìa be èvi,

²⁴àmè kè nyi Matat be èvi, àmè kè nyi Levì be èvi, àmè kè nyi Mɛlkì be èvi, àmè kè nyi Yonà be èvi, àmè kè nyi Yozɛ̀f be èvi,

²⁵àmè kè nyi Matatìas be èvi, àmè kè nyi Àmos be èvi, àmè kè nyi Nàhum be èvi, àmè kè nyi Hɛslì be èvi, àmè kè nyi Nagayì be èvi,

²⁶àmè kè nyi Mahat be èvi, àmè kè nyi Matatìas be èvi, àmè kè nyi Semì be èvi, àmè kè nyi Yozɛ̀f be èvi, àmè kè nyi Yodà be èvi,

²⁷àmè kè nyi Yohanàn be èvi, àmè kè nyi Rezà be èvi, àmè kè nyi Zòrobabɛ̀l be èvi, àmè kè nyi Salatìɛl be èvi, àmè kè nyi Nerì be èvi,

²⁸àmè kè nyi Mɛlkì be èvi, àmè kè nyi Àdì be èvi, àmè kè nyi Kɔsàm be èvi, àmè kè nyi Elmadàm be èvi, àmè kè nyi Ɛrò be èvi,

²⁹àmè kè nyi Yesù be èvi, àmè kè nyi Eliezɛr be èvi, àmè kè nyi Yorim be èvi, àmè kè nyi Matat be èvi, àmè kè nyi Levì be èvi,

³⁰àmè kè nyi Simeɔ̀n be èvi, àmè kè nyi Yozɛ̀f be èvi, àmè kè nyi Yonàm be èvi,

³¹àmè kè nyi Melea be èvi, àmè kè nyi Menà be èvi, àmè kè nyi Màtatà be èvi, àmè kè nyi Natàn be èvi, àmè kè nyi *David be èvi,

³²àmè kè nyi Jesè be èvi, àmè kè nyi Obɛd be èvi, àmè kè nyi Boaz be èvi, àmè kè nyi Salà be èvi, àmè kè nyi Nasɔ̀n be èvi,

³³àmè kè nyi Aminadàb be èvi, àmè kè nyi Admìn be èvi, àmè kè nyi Aranì be èvi, àmè kè nyi Esrɔ̀m be èvi, àmè kè nyi Farɛ̀z be èvi, àmè kè nyi Yudà be èvi,

³⁴àmè kè nyi Yakɔb be èvi, àmè kè nyi Izàk be èvi, àmè kè nyi Abràham be èvi, àmè kè nyi Tarà be èvi, àmè kè nyi Nakɔ̀r be èvi,

³⁵àmè kè nyi Seruk be èvi, àmè kè nyi Ragò be èvi, àmè kè nyi Falɛkò be èvi, àmè kè nyi Ebɛ̀r be èvi, àmè kè nyi Salà be èvi,

³⁶àmè kè nyi Kayinàm be èvi, àmè kè nyi Arfazàd be èvi, àmè kè nyi Sɛm be èvi, àmè kè nyi Nɔa be èvi, àmè kè nyi Lamèk be èvi,

³⁷àmè kè nyi Metusalà be èvi, àmè kè nyi Enɔ̀k be èvi, àmè kè nyi Jarɛt be èvi, àmè kè nyi Màlalɛ̀l be èvi, àmè kè nyi Kayinàm be èvi,

³⁸àmè kè nyi Enɔ̀s be èvi, àmè kè nyi Sɛt be èvi, àmè kè nyi Adàm be èvi, àmè kè nyi Mawu be èvi.