Read gen Lukà 4 Bible Online

Lukà 4 - gen bible

Lukà 4

¹Yesù ɖɔ ku Gbɔ̃gbɔ̃ Kɔ̀kɔ̀ɛ a, to so ètɔ̀ sàsra kè wo yɔna be Yɔrdàn a mè eye Gbɔ̃gbɔ̃ a kplɔ̀ ɛ̀ yì zògbè jì.

²Gbɔ̃gbɔ̃ a nɔ̀ ku ì ŋùkèkè èkà lè zògbèa ji, eye Àbòsam tè è kpɔ. Mu ɖù ènu ɖe lè àzã ŋuawo ji ò, e yomè a, àdɔ̀ wù ì.

³Àbòsam gblɔ̃ na ɛ̀ be: “Ne Mawu be èvi ye wò nyi nyàwo a, ɖè ègbè na èkpe kèa ne bèa trɔ zũ kpɔ̃nɔ.”

⁴Yesù ɖo e ŋuti na ɛ̀ be: “Wo ŋlɔ̀ ɛ̀ ɖɛ be: 'Mu nyi kpɔ̃nɔ kpò ye àgbètɔ la ɖù sɔ nɔ̀ àgbè ò.'”

⁵E yomè a, Àbòsam kplɔ̀ ɛ̀ yì èto hũi[4] ɖe ji, eye lè àɖàbà pòpo ɖèka mèa, e sɔ xixe kèa be èfìɔduwo kpata fiɔ ɛ̀.

⁶E gblɔ̃ na ɛ̀ be: “Mù la na wò ŋusɛ̃ kèa keŋu ku fìɔdu kèawo be gogowo, ɖo ènyè ye wo sɔ ènu kèawo kpata do àsi na eye mù teŋu na àmè kè mù jro a.

⁷Ne wò gbe do èta gũ na mù kpòa, ènu kèawo keŋu la nyi tɔ̀ wò.”

⁸Yesù ɖo e ŋuti na ɛ̀ be: “Wo ŋlɔ̀ ɛ̀ ɖɛ be: 'Tɔhonɔ̀ Mawu ye wò la do èta gũ na, ye ɖèka kpò ye wò la sɛ̃.'”

⁹Eye Àbòsam gbà kplɔ̀ Yesù yì Yèruzàlɛm ke; e sɔ ɛ̀ ɖo mawuxɔa tamè, lè èji boo, gblɔ̃ na ɛ̀ be: “Ne Mawu be èvi ye wò nyi nyàwo a, tìkpo so fikèa yì jè ànyigbã,

¹⁰ɖo wo ŋlɔ̀ ɛ̀ ɖɛ be: 'E la ɖègbè na yebe àtikplɔtɔwo be woa sɔ̀gbè ɖo ŋuti wò, ne woa ɖia wò'

¹¹eye, wo gbà ŋlɔ̀ ɖɛ be: 'Wo la xɔ̀ wò ɖo woabe àlɔ̀wo mè ne àpo àfɔ̀wo mu gbà klɛ̃ èkpe ò.'”

¹²Yesù ɖo e ŋuti na ɛ̀ be: “Wo gbà ŋlɔ̀ be: 'Mù gbà tè Tɔhonɔ̀ Mawu wò kpɔ ò.'”

¹³Kè Àbòsam tè Yesù kpɔ to èmɔwo kpata nu vɔ̀a, e tàsi ì ɖɛ kaka na gà bu mè.

¹⁴Ekèa yomè a, Yesù trɔva yì Galilea. Gbɔ̃gbɔ̃ Kɔ̀kɔ̀ɛ lè ku ì. Àmè kèwo lè àgo ŋua jiawo kpata le gblɔ̃ yebe ènyà.

¹⁵E fiɔna ènu lè bɔ̀bɔ̀pewo eye àmè sia àmè le gblɔ̃ yebe gogo.

¹⁶Yesù va Nazarɛ̀t, àfi kè be sĩ lèa. Lè jɛ̃gbɔ̃zã gbèa, e ɖo bɔ̀bɔ̀pea mè sìgbè àlekè be wɔ̀nà eye be ma do èa nène. E sitè la hlɛ̃ mawunyaa,

¹⁷eye wo sɔ Mawu be gblɔ̃ɖɛtɔ Ezayà be xoma na ɛ̀. Ekè e vlũ ìa, e kpɔ àfi kè wo ŋlɔ̀ ènyà kèawo ɖo be:

¹⁸“Tɔhonɔ̀ be Gbɔ̃gbɔ̃ lè ji nyè, ɖo e cã mù be ma do àŋɛ̀nyuɛ̃ a na wɔ̀amènɔ̀wo; e ɖo mù be ma do jojo be àŋɛ̀ na àhùalewo, be ŋùvìnɔ̀wo ne kpɔ ènu, be ma na àmè kèwo wo le tafuawo, woa nɔ̀ woa ɖokoe sinu,

¹⁹ne ma do Tɔhonɔ̀ be màje be èpèa be àŋɛ̀.”

²⁰E yomè a, Yesù tu xoma a, eye, ekè e gbìgbɔ̀ sɔ ɛ̀ na àmè kè kpɔna bɔ̀bɔ̀pea jia, e trɔyì nɔ̀ ànyi. Àmè kèwo keŋu lè bɔ̀bɔ̀peawo fɔ̀ ŋùkuvi ɖo e ji.

²¹Eye be gblɔ̃ na wo be: “Ŋɔ̀ŋlɔ̃ kèa zɔ̃ sù egbè na mì àmè kèwo lè sèawo.”

²²Àmè kèwo keŋu ɖo èto èawo ɖù ɖase nyuɛ̃ na ɛ̀, eye ènyà kèwo le to so ènu mè na ɛ̀a, kpaca wo eye wo gblɔ̃ be: “Mu nyi Yozɛ̀f be èvi-ŋusùa yeŋuã?”

²³Vɔ̀a, Yesù ɖo e ŋuti na wo be: “Mù nya nyuɛ̃ ɖe be mì la do èlo kèa na mù be: 'Àmàdàtɔ, dà èdɔ̀ na ɖokoe wò.' Ènu gbogbo kèwo keŋu mi sè be: 'Wò wɔ̀ lè Kapɛrnaum va yìa, wɔ̀ wo lè àpo èdù mè fikèa.'”

²⁴E gbà gblɔ̃ be: “Nyàwo ye mù le to na mì: àxue bòkɔ mu jènà àmè ŋùmè ò.

²⁵Lè Mawu be gblɔ̃ɖɛtɔ Èli be hùenu, wàlɛbɛ kè èji mu jà ò, kaka na èpè ètɔ̃ ku wètri àdɛ̃, eye àdɔ̀ gãa ɖe toa, àhòsì sùgbɔ nɔ̀ Izràɛl gà ŋua mè;

²⁶gãke Mawu mu dɔ̃ Èli ɖoɖa woa dòmètɔ ɖe gbɔ ò. Vɔ̀ bòhũa, nyɔ̃nù àhòsì ɖe kè nɔ̀nà Sàrɛptà, lè Sidɔ̀n be ànyigbã jia gbɔ kpò ye be dɔ̃ ɛ̀ ɖoɖa.

²⁷Èkpònɔ̀ sùgbɔ cã lè Izràɛl, lè Mawu be gblɔ̃ɖɛtɔ Èlìze be hùenu, gãke Èlìze mu dà èdɔ̀ na woa dòmètɔ ɖe ò; Namàn, Sirìatɔa ɖèka kpò be dà èdɔ̀ na.”

²⁸Kè àmè kèwo lè bɔ̀bɔ̀peawo sè ènyà kèawoa, woa kpata wo bijì.

²⁹Wo sitè dɔ̃ Yesù to lè èdùa mè. Wo kplɔ̀ ɛ̀ yì èto kè ji wo tù woabe èdùa ɖoa be tamè ne woa tùtù ì ɖoɖa bàlìa mè.

³⁰Vɔ̀a, Yesù to woa dòmè jo.

³¹Yesù yì Kapɛrnaum, Galilea be èdùa ɖe mè, le fiɔ ènu àmèwo lè Jɛ̃gbɔ̃zã gbè.

³²Àlekè bè lè fiɔ ènu àmèwo ɖoa, wɔ̀ ŋùdã na àmè kèwo le ɖo èto èa, ɖo e le pò nupo ku ŋusɛ̃.

³³Eye ŋusù ɖe lè bɔ̀bɔ̀pe kè mè Yesù lè fiɔ ènu lèa, gbɔ̃gbɔ̃ vuɛ̃ ɖe le donupo na ɛ̀. E tɔ àpa dodo ku ègbè lelele be:

³⁴“Yesù Nazarɛttɔ̀! Nukɛ ye lè mi ku èwò dòmè ò? Wò va be yèa crɔ̃ mi ye à? Mù nya àmè kè wò nyia. Mawu be àɖèsãa ye wò nyi.”

³⁵Vɔ̀a, Yesù blù do gbɔ̃gbɔ̃ vuɛ̃ a, ɖè ègbè na ɛ̀ be: “Bɔ̀nu, ne wòa to lè ŋusù kèa mè!” Eye ekè gbɔ̃gbɔ̃a kɔ ɛ̀ pu ànyi lè woa dòmèa, e to lè e mè, kè mu wɔ̀ èvuɛ̃ ɖe ku ì òa.

³⁶Ekèa wɔ̀ ŋùdã na àmè sia àmè, eye wo le biɔ woa nɔ̀nɔwo be: “Ènyà kɛ ye nyi ekèa ò? E ɖènà ègbè ɖo gbɔ̃gbɔ̃ màkɔ̀màkɔwo ji ku àcɛ̀, kudo hɔ̃hlɔ̃, eye wo tona.”

³⁷Eye Yesù be nyikɔ gbãkpe àgo ŋua kpata ji kpedo.

³⁸Eye E to lè bɔ̀bɔ̀pea, yì Simɔ̀n be àxomè. Àvìvɔ sɛ̃ŋu ɖe jè Simɔ̀n be lɔ̃xo ji gà ŋua mè, eye àmèwo ɖè kuku na Yesù be bèa dà èdɔ̀a na ɛ̀.

³⁹Eye be gogo èdɔ̀nɔ̀a, ɖè ègbè sɛ̃sɛ̃ ɖe na èdɔ̀a, eye àvìvɔa jo lè nyɔ̃nùa ji. E yomè a, Simɔ̀n be lɔ̃xoa, sitè zè ɖèka, be xɔ̀ wo àmèjro.

⁴⁰Ekè èwè le ɖoxɔ̀a, àmè kèwo be àmè le le èdɔ̀ hamèhamèwoa, kplɔ̀ wo va Yesù gbɔ, eye be ɖo àlɔ̀ èdɔ̀nɔ̀awo ji ɖèka ɖèka, eye be dà èdɔ̀ na wo.

⁴¹Eye gbɔ̃gbɔ̃ vuɛ̃wo cã to lè èdɔ̀nɔ̀ sùgbɔ mè, le do àpa be: “Mawu be èvi ye wò nyi.” Vɔ̀a, Yesù blùnà do wo, eye mu nana wo èmɔ be woa pò nupo ò, ɖo wo nya be e ye nyi Mɛ̀sia.

⁴²Eye kè èŋù kèa, Yesù to lè èdùa mè eye be yì àfi kè àmè ɖe mu la ɖè fũ na ɛ̀ lè òa. Eye àmèwo tɔ ɛ̀ jìji. Kè wo va kpɔ ɛ̀a, wo mu gbà ji be bèa jo lè yèwo gbɔ ò.

⁴³Vɔ̀a, Yesù gblɔ̃ na wo be: “Mù ɖo la do Mawu be fìɔɖùɖua be àŋɛ̀nyuɛ̃ a na èdù kpɔ̀tɛawo cã ɖo ènu kè ŋuti ye Mawu dɔ̃ mù ɖoɖaa yeŋu.”

⁴⁴Eye e dona àŋɛ̀a lè bɔ̀bɔ̀pe kèwo lè Yudeà a mè.