Read gen Lukà 5 Bible Online

Lukà 5 - gen bible

Lukà 5

¹Gbè ɖèkaa, Yesù tɔtè lè Genezarɛtè be ètɔ̀a to, eye àmèha a le dri ì be yèwoa sè mawunya.

²E kpɔ ètɔ̀jihũ èvè lè ètɔ̀a to. Èɖɔkplɔ̀tɔwo to lè woa mè le kpàsà woabe èɖɔwo.

³Yesù ɖo èhũ ɖèka kè nyi Simɔ̀n tɔ̀a mè, eye be biɔ ɛ̀ be ne kù yè jo lè àgoa ŋuti vi ɖe. Yesù nɔ̀ ànyi lè ètɔ̀jihũa mè, eye be le fiɔ ènu àmèha a.

⁴Ekè e pò nupo vɔ̀a, e gblɔ̃ na Simɔ̀n be: “Kù èhũa yì ègũa ji, ne mìa dà èɖɔawo sɔ ɖè èlã.”

⁵Simɔ̀n ɖo e ŋuti na Yesù be: “Ènufiɔtɔ, mi jè àgbàgba èzã bliboa kpata, vɔ̀, mi mu le ènu ɖekpe ò; gãkea, mù la gbà dà èɖɔa, zɔ̃ ɖo ègbè wòa ji.”

⁶Ekè wo dà èɖɔawoa, wo le èlã fuu, àleke be woabe èɖɔawo tɔ zɛ̃zɛ̃.

⁷Nène a, wo mì àsi na woa tɔ̀ kèwo lè èhũ ɖèa mèawo be woa va kpe ɖo yèwo ŋuti. Wo va, eye wo ɖè èlãawo ɖo èhũ èvèawo mè. Èhũawo ɖɔ àleke be wo tɔ nyɔ̀nyrɔ̃.

⁸Ekè Simɔ̀n, àmè kè Yesù yɔ be Petròa kpɔ ekèa, e jè èklò ɖo Yesù be àkɔ mè, gblɔ̃ na ɛ̀ be: “Tɔhonɔ̀, yì àzɔ̀ge na mù, ɖo èvuɛ̃wɔ̀tɔ ye mù nyi.”

⁹E gblɔ̃ ekèa, ɖo e wɔ̀ ŋùdã, ɖo èlã gbogbo kè wo lea ŋuti.

¹⁰Nène a ke, e wɔ̀ ŋùdã na Yakobò ku Yòhanɛ̀s, Zebedeo be èvi kèwo nyi Simɔ̀n be èhadɔwɔ̀tɔwo cã. Vɔ̀ Yesù gblɔ̃ na Simɔ̀n be: “Mù gbà vɔ̃ ò; so ekèa jia, àgbètɔwo ye wò la nɔ kplɔ̀!”

¹¹Eye ekè wo kù woabe èhũawo va àgoa, wo gble woabe ènuwo keŋu ɖɛ, eye wo kpàsà ɛ̀ do.

¹²Gbè ɖèkaa, ekè Yesù lè èdù ɖe mèa, ŋusù ɖe kè èkpòdɔ xɔ̀ ŋuti na kplìnyàa kpɔ ɛ̀. Ekè e kpɔ Yesùa, e jè èklò sɔ ŋùkumè cɔ̃ ànyi, blìbɔ̀ na ɛ̀, le gblɔ̃ be: “Tɔhonɔ̀, ne wò jro a, wò la teŋu na ŋuti nyè la kɔ̀.”

¹³Yesù drɛ̃ àlɔ̀, eye be tɔ àsi ŋusùa, gblɔ̃ be: “Mù jro, ŋuti wò ne kɔ̀!” Funu funua ke èdɔ̀a vɔ̀ lè e ŋuti.

¹⁴Yesù do *èse na ɛ̀ be: “Mù gbà gblɔ̃ ɛ̀ na àmè ɖe ò. Vɔ̀ yì ne wòa sɔ ɖokoe wò fiɔ mawunɔa, eye wòa na àpo ènu nana sìgbè àlekè Mosè biɔa nène, ne wòa sɔ fiɔ be ŋuti wò kɔ̀.”

¹⁵Yesù be nyikɔ lè ɖì hòo ɖo e ji wu sãa, eye àmèha fuu lè bɔ̀ va be yèwoa sè yebe ènyà, eye bèa dà èdɔ̀ na yèwo.

¹⁶Vɔ̀ Yesù jona lè àmèawo dòmè yìnà zògbè ji, yì fãnàkue.

¹⁷Gbè ɖèkaa, ekè Yesù le fiɔ ènua, Farizìwo ku èsefiɔtɔwo so èdù sùgbɔ mè lè Galilea ku Yudeà kudo Yèruzàlɛm va funua. Tɔhonɔ̀ be ŋusɛ̃ lè Yesù ji, be dà èdɔ̀ na àmèwo.

¹⁸Gà ŋua mèa, ŋusù ɖewo kɔ èdɔ̀nɔ̀kplibɔ ɖe ɖo àba ji va, eye wo ji be yèwoa sɔ ɛ̀ va tèpe kè Yesù lèa, ne yèwoa sɔ àmèa ɖo ŋùmè na ɛ̀.

¹⁹Đo àmèha a ŋutia, wo mu teŋu ɖo èxɔ̀a mè ò. Ekèa na be wo lia èxɔ̀a ta, eye wo ɖè èmɔ to èkpe kè wo sɔ gba èxɔ̀awo dòmè, ɖiɖi àmèa ku yebe àba ɖo Yesù gbɔ, lè àmèha a dòmè.

²⁰Eye ekè Yesù kpɔ woabe xɔ̀sèa, e gblɔ̃ na èdɔ̀nɔ̀a be: “Wo sɔ èvuɛ̃ wòwo kè wò.”

²¹Èsefiɔtɔawo ku Farizìawo tɔ woa nɔ̀nɔwo biɔ biɔ sè be: “Àmè kɛ ye nyi ekèa, le gblɔ̃ bùsu-nya lekea ò? Àmè kɛ teŋu sɔ èvuɛ̃ kè àmè ne mu nyi Mawu ɖèɖe kpò ò?”

²²Ekè Yesù kpɔ jèsi be wo le biɔ ènyà kèawo woa nɔ̀nɔwoa, e biɔ wo be: “Nukɛ ŋuti mì le do àɖìkà lè mìabe susuwo mè ɖo ò?

²³Ne wo be: 'Wo sɔ èvuɛ̃ wòwo kè wò', àlo: 'Sitè ne wòa zɔ̃a'; e kɛ be gbɔ̃gblɔ̃ ye lè bɔ̀bɔɛ ɖe wu ò?

²⁴Vɔ̀a, ne mìa nya be, ŋusɛ̃ lè *Àgbètɔ be Èvia si lè ànyigbã ji ne bèa sɔ èvuɛ̃ kè àmèa”, e gblɔ̃ na èdɔ̀nɔ̀kplibɔa be: “Mù le to na wò be sitè, ŋlɔ̃ àpo àba, ne wòa yì àxomè!”

²⁵Troloa, ŋusùa sitè lè woabe ŋùkumè, sɔ ènu kè ji be mlɔ̃ a, eye be yì àxomè, le kafu Mawu.

²⁶Àmè kèwo kpata lè funua, kã yàa eye vɔ̃vɔ̃ ɖo wo. Wo kafu Mawu le gblɔ̃ be: “Mi kpɔ ènu màjɔ̀ gbèɖe egbè.”

²⁷Lè ènu kèawo yomè a, Yesù to, eye be kpɔ dùgajɔ̀tɔ ɖe kè be nyikɔ nyi Levì, e nɔ̀ ànyi ɖo ègàjɔ̀pe. Yesù gblɔ̃ na ɛ̀ be: “Va jè yo nyè mè.”

²⁸Levì gble ènuwo keŋu ɖɛ, eye be sitè, jè e yomè.

²⁹Levì tɛ èkplɔ̃ gã ɖe na Yesù lè yebe àxomè. Dùgajɔ̀tɔwo ku àmè buwo cã be èha gã ɖe nɔ̀ èkplɔ̃a ŋuti ku wo.

³⁰Eye, nènea Farizìwo ku woabe èsefiɔtɔwo lì lihũi, biɔ Yesù be nukplaviwo be: “Nukɛ ŋuti ye mì le ɖù, gbà le nù ku dùgajɔ̀tɔwo kudo ènuvuɛ̃wɔ̀tɔwo ɖo ò?”

³¹Vɔ̀ Yesù ɖo e ŋuti na wo be: “Mu nyi àmè kèwo lè sɛ̃sɛ̃ ɖeawo ye hiã èdɔ̀yɔ̀tɔ ò, vɔ̀ bòhũa, èdɔ̀nɔ̀wo ye hiã èdɔ̀yɔ̀tɔ.

³²Nyè mu va be ma yɔ àmè jɔ̀jɔɛwo ò; vɔ̀ èvuɛ̃wɔ̀tɔwo ŋuti mù va ɖo, ne woa ɖɔ̀lìdɛ̃.”

³³Àmè ɖewo gblɔ̃ na Yesù be: “Yòhanɛ̀s be nukplaviwo blana ènu eji-eji, eye wo fãnàkue. Eye Farizìwo be nukplaviwo cã wɔ̀nà nènea ke. Vɔ̀ tɔ̀wòawo ya ɖùnà, gbà nùnà.”

³⁴Yesù biɔ wo sè be: “Mì la teŋu na nyɔ̃nùkpetɔa be èxlɔ̃wo la bla ènu wàlɛbɛ kè nyɔ̃nùkpetɔa lè woa gbɔa?

³⁵Gàmè gbãnà, kè wo la sɔ nyɔ̃nùkpetɔa jo lè woa gbɔ. Àzã ŋuawo mè ye wo la bla ènu lè.”

³⁶Yesù do èlo ɖe cã na wo be: “Àmè ɖe mu trɛ̃na yebe àwù yeye be yèa sɔ ta àwù xoxo ò. Ne e wɔ̀ ɛ̀a, e la gũ àwù yeyea. Gbà sɔ kpe èa, àwù yeyea be kãkãa mu la sɔ̀gbè ku xoxoa ò.

³⁷Nène a ke, àmè ɖe mu sɔna vɛ̃ yeye dona èlãgbàzegò xoxowo mè ò. Ne e wɔ̀ ɛ̀a, vɛ̃ yeyea be ŋusɛ̃ la wo èlãgbàzegòawo, vɛ̃a ŋutɔ la kɔ̀ŋùgbe, eye èlãgbàzegòawo cã la gũ.

³⁸Vɔ̀a, e jè be woa sɔ vɛ̃ yeye kɔ̀ ɖo èlãgbàzegò yeyewo mè.

³⁹Sɔ yì e jia, àmè ɖe mu nùnà vɛ̃ xoxo vɔ̀, gbà jina yeye ò, ɖo e gblɔ̃nà be: 'Xoxoa nyɔ wu.'”