Read gen Lukà 6 Bible Online

Lukà 6 - gen bible

Lukà 6

¹Yesù ku yebe nukplaviwo va to èlùgblè ɖewo mè, le yì, lè jɛ̃gbɔ̃zã ɖe gbè. Nukplaviawo ŋɛ̃ *èlùa be ɖe, eye wo tùkù ì lè woabe àlɔ̀wo mè sɔ le ɖù.

²Farizìwo dòmètɔ ɖewo le biɔ wo sè be: “Nukɛ ŋuti ye mì le wɔ̀ ènu kè èsea mu ɖè èmɔ be woa wɔ̀ lè jɛ̃gbɔ̃zã gbèa ò?”

³Eye Yesù ɖo e ŋuti na wo be: “Mì mu hlɛ̃ ènu kè David wɔ̀ kpɔ ekè àdɔ̀ wù ye ŋutɔ ku yebe ŋutimewo òa?

⁴E yì mawuxɔa mè, e sɔ kpɔ̃nɔ kè wo sɔ savɔa ɖù, eye be na yebe ŋutimewo cã, wo ɖù, ekè èsea mu ɖè èmɔ be àmè bu ɖe ne ɖù, ne mu nyi mawunɔ ò.”

⁵Yesù wu e nu ku ènyà kèa be: “*Àgbètɔ be Èvia kpà àcɛ̀ na jɛ̃gbɔ̃zãa.”

⁶E va jɔ̀ lè jɛ̃gbɔ̃zã bu gbè be Yesù ɖo bɔ̀bɔ̀pea mè, la fiɔ ènu. Ŋusù ɖe nɔ̀ funua ekè be ɖùsi-lɔ kua.

⁷Eye èsefiɔtɔwo ku Farizìwo le le ŋùku ɖo Yesù ŋuti be e la dà èdɔ̀ na ɛ̀ lè jɛ̃gbɔ̃zã gbè màa, ne yèwoa sɔ ji ènyà na ɛ̀.

⁸Vɔ̀a, Yesù nya woabe susu, eye e gblɔ̃ na àmè kè àlɔ̀ ku na a be: “Sitè, va tɔtè ɖo dòdòmè lè àfi kèa.” E sitè eye e yì nɔ̀tè.

⁹Yesù gblɔ̃ na àmèawo be: “Ma biɔ mì sè: e lè èsea mè be, lè jɛ̃gbɔ̃zã gbèa, woa wɔ̀ nyuɛ̃ loo, àlo woa wɔ̀ èvuɛ̃? Wo ɖè èmɔ be woa hlùɛ̃ àmè ɖo àgbè loo, àlo woa na bèa crɔ̃?”

¹⁰Eye e sã ŋùku lè àmèawo keŋu ji gòdòo, gblɔ̃ na ŋusùa be: “Drɛ̃ àlɔ̀.” Ŋusùa drɛ̃ àlɔ̀, eye, yebe àlɔ̀ jètè.

¹¹Vɔ̀, àmèawo bijì ŋutɔ, eye wo le ènu kè wo la wɔ̀ ku Yesùa kpɔ lè woa nɔ̀nɔwo dòmè.

¹²Lè ŋùkèkè kèawo mèa, Yesù yì èto ji ne bèa fãkue. E fãkue na Mawu èzã bliboa kpata.

¹³Ekè èŋù kèa, e yɔ yebe nukplaviwo va ye ɖokoe gbɔ, eye e cã àmè woèvè lè woa dòmè. E yɔ wo be *Àmèdɔ̃dɔ̃wo.

¹⁴Àmè kèawo ye nyi: Simɔ̀n, ekè be na nyikɔ be Petrò a, ku nɔ̀via Ãdre, Yakobò kudo Yòhanɛ̀s, Filipò kudo Bartelemeo.

¹⁵Màteo ku Tomà, Yakobò, kè nyi Alfeò be èvi kudo Simɔ̀n, àvũ drɛ̃tɔ na yebe èdù,

¹⁶Yudà, Yakobò be èvi, ku Yudà Iskariɔt, àmè kè va xɔ̀kpli na ɛ̀a.

¹⁷Yesù ɖì so ètoa ji ku yebe *àmèdɔ̃dɔ̃awo va ànyigbã gbàjà ji, eye yebe *nukplavi sùgbɔ buwo ku àmèha gã ɖe va bɔ̀. Àmèwo so Yudeà ku Yèruzàlɛm, Tirò ku Sidɔ̀n be àpùta nutowo keŋu mè.

¹⁸Wo va be yèwoa sè Yesù be ènyà, eye bèa dà èdɔ̀ na yèwo. Àmè kèwo gbɔ̃gbɔ̃ vuɛ̃wo le ɖèfũ naawo cã nɔ̀ woa dòmè va, eye e dà èdɔ̀ na wo.

¹⁹Àmè sia àmè jro be yèwoa tɔ àsi Yesù ŋuti, ɖo èdɔ̀ dàda be ŋusɛ̃ sona e mè le dà èdɔ̀ lè woa keŋu ŋuti.

²⁰Yesù kɔ ŋùmè yìji, kpɔ yebe nukplaviwo, eye be gblɔ̃ na wo be: “Sìtu ɖèɖe ye e nyi na mì, àmè kèwo nyi wɔ̀amènɔ̀woa, ɖo Mawu be fìɔdua nyi mìa tɔ̀!

²¹Sìtu ɖèɖe ye e nyi na mì, àmè kèwo àdɔ̀ le wù fifìa, ɖo mì la ɖɔpò. Sìtu ɖèɖe ye e nyi na mì, àmè kèwo le fã àvi fifìa, ɖo mì la kònu.”

²²“Sìtu ɖèɖe ye be nyi na mì, ne àmèwo crì mì, ɖo *Àgbètɔ be Èvia ŋuti, ne wo ɖè mì to lè woabe èha mè, ne wo zũ mì, eye wo gblɔ̃ ènyà vuɛ̃ so mìa ŋutia.

²³Mì jɔ̀jì eye mìa tìkpo ku jìjɔɛ gbè ŋua gbè. Mìabe àjɔ̀ lòlò lè jiŋùkusi, ɖo nènea ke ye woa tɔgbewo wɔ̀ ku Mawu be gblɔ̃ɖɛtɔwo cã va yìa yeŋu.”

²⁴“Vɔ̀ mì, àdɔ̀kùnɔ̀wo, bàbà na mì, ɖo mì xɔ̀ mìabe àkɔfa vɔ̀.

²⁵Mì, àmè kèwo ɖɔpò fifìa, bàbà na mì, ɖo, àdɔ̀ la va wù mì. Mì, àmè kèwo le kònu fifìa, bàbà na mì, ɖo mì la va blawu, la na àle[5], la fã àvi.”

²⁶“Bàbà na mì, ne àmèwo kpata pò nupo nyuɛ̃ so mìa ŋutia, ɖo nènea ke ye woa tɔgbewo kafu àjè-gblɔ̃ɖɛtɔawo va yìa yeŋu.”

²⁷“Vɔ̀ mù le to na mì, àmè kèwo le sè ènyà nyèwoa be: mì lɔ̃ mìabe kɛ̃tɔwo; mì wɔ̀ nyuɛ̃ na àmè kèwo crì mìawo.

²⁸Mì biɔ *sìtu na àmè kèwo le sɛ̃kpɛ̃ na mìawo, eye mì fãkue ɖo àmè kèwo le do àyà na mìawo ta.

²⁹Àmè kè pò èto ɖèka mè na wòa, trɔ èvègɔ̃a cã na ɛ̀. Àmè kè sɔ àpo àwùgãa, mù gbà gbe àwù vlàyà wòa cã sɔsɔ na ɛ̀ ò.

³⁰Na ènu àmè sia àmè kè biɔ wòa, eye ne àmè ɖe sɔ àpo ènu ɖe a, mù gbà biɔ ɛ̀ ò.

³¹Ènu kè mì jro be àmèwo ne wɔ̀ na mìa, mìawo cã, mì wɔ̀ ɛ̀ na wo.

³²Ne mì lɔ̃ àmè kèwo lɔ̃ mìawo ɖèɖe kpòa, àlè kɛ ye lè e mè na mì ò? Èvuɛ̃wɔ̀tɔwo cã lɔ̃nà àmè kèwo lɔ̃nà woa.

³³Ne mì wɔ̀nà àdɔ̀mènyuɛ̃ na àmè kèwo wɔ̀nà àdɔ̀mènyuɛ̃ na mì ɖèɖea, àkpe kɛ ye lè wo la do na mì ò? Èvuɛ̃wɔ̀tɔwo ŋutɔ cã wɔ̀nà nènea ke.

³⁴Ne mì wena ènu na àmè kèwo mì kpɔ èmɔ be wo la trɔ ɛ̀ na yèwoa, àkpe ɖe lè woa do na mìa? Èvuɛ̃wɔ̀tɔwo ŋutɔ cã wena ènu na woa nɔ̀nɔwo ne woa va trɔ ɛ̀ na yèwo.

³⁵Vɔ̀, mì lɔ̃ mìabe kɛ̃tɔwo; mì wɔ̀ àdɔ̀mènyuɛ̃, mì we ènu na àmè, eye mì mu gbà ɖoŋù be wo la ɖo e tèpe na yèwo ò; eŋuã mìabe àjɔ̀ la lòlò, eye mì la nyi Mawu Èji hũitɔa be èviwo. Đo ye ŋutɔ kɔ̀nà àdɔ̀mè ɖo àkpe mà ɖotɔwo ku èvuɛ̃wɔ̀tɔwo ŋuti.

³⁶Mì nyi hòmèfanɔ̀wo sìgbè lekè mìa Tɔ cã nyi hòmèfànɔ̀a nène.”

³⁷“Mì mu gbà ɖo kòjo na àmè ò, eye Mawu mu la ɖo kòjo na mì ò. Mì mu gbà gblehùɛ do àmè ò, eye Mawu mu la gblehùɛ do mì ò. Mì sɔ àgɔ̀ kè, eye Mawu la sɔ kè mìawo cã.

³⁸Mì na ènu àmè, eye Mawu la na mì ènu. Jijenu nyuɛ̃, kè wo hũhũ, tɛ eye be ɖɔ flãŋua ye wo la sɔ do è kɔ̀ ɖo àkɔmè na mì. Đo jijenu kè mì sɔ jije ènu na àmèwoa ke Mawu la sɔ jije ènu na mì.”

³⁹Yesù gbà do èlo na wo be: “Ŋùvìnɔ̀ la teŋu kplɔ̀ ŋùvìnɔ̀a? Wo àmè èvèawo mu la gɛ̃ jè èdo mè òa?

⁴⁰*Nukplavi mu nyana ènu wu yebe ènufiɔtɔ ò; nukplavi ɖe sia ɖe kè kpla ènu nyuɛ̃ ɖe a nɔ̀nà sìgbè yebe ènufiɔtɔ nène.

⁴¹Àleke wɔ̀ ye wò le kpɔ àtikpàcàfo kè lè nɔ̀vi wò be ŋùkuvi ji, vɔ̀a wò mu le kpɔ àtikpo kè lè wò ŋutɔ àpo ŋùkuvi ji ò?

⁴²Àleke ye wò la teŋu gblɔ̃ na nɔ̀vi wò be: 'Nɔ̀vi, na ma ɖè àtikpàcàfoa jo lè àpo ŋùkuvi ji', ekè wò mu le kpɔ àtikpo kè lè wò ŋutɔ àpo ŋùkuvi ji ò? Èwò blamùtùmù wɔ̀tɔ, ɖè àtikpoa jo lè wò ŋutɔ àpo ŋùkuvi ji cucugbã, eŋuã, wò la kpɔ ènu nyuɛ̃ ɖe, la teŋu sɔ ɖè àtikpàcàfoa jo lè ŋùkuvi ji na nɔ̀vi wò.”

⁴³“Àti nyuɛ̃ ɖekpe mu sɛ̃na èku mà nyɔ mà nyɔ ò, eye àti mà nyɔ mà nyɔ ɖekpe cã mu sɛ̃na èku nyuɛ̃ ò.

⁴⁴Àti sia àti be èkusɛ̃sɛ̃ ye wo sɔ jènàsi àti kè ŋùkumè be nyia. Wo mu gbãnà èvò lè àŋùjati ji ò, eye nènea ke wo mu gbãnà vɛ̃ku-sɛ̃sɛ̃ lè àŋɔ̀tiwo ji ò.

⁴⁵Àmè nyuɛ̃ a, ènu nyuɛ̃ kèwo be jràɖo ɖo yebe èjì mèawo mè ye be ɖènà ènu nyuɛ̃wo to lè. Vɔ̀ àmè bàɖà a, ènu nyànyrã kèwo be jràɖo ɖo yebe èjì mèawo mè ye be ɖènà ènu nyànyrã to lè. Đo ènu kè ɖɔ àmè be èjì mè flãŋu a ye ènu gblɔ̃nà.”

⁴⁶“Nukɛ ŋuti mì le yɔ mù be: 'Tɔhonɔ̀, Tɔhonɔ̀', gãke mì mu wɔ̀nà ɖo ènu kè mù tona na mìa ji ò?

⁴⁷Àmè sia àmè kè va gbɔ nyè, eye e sè ènyà nyèwo, be wɔ̀ ɖo woa jia, mù la gblɔ̃ àmè kè be ɖìa na mì.

⁴⁸E ɖì àmè ɖe kè le tù èxɔ̀; e kù èdo wɔ̀gũ, eye e ɖo dòdoea ɖo àkpã ji. Èsì ɖɔ eye èsì ɖɔɖɔa mlì kɔ̀ ɖo èxɔ̀a ŋuti, vɔ̀a mu mù ò, ɖo wo tù ì nyuɛ̃ ɖe.

⁴⁹Vɔ̀, àmè kè sè ènyà nyèwo, eye mu wɔ̀ ɖo woa ji òa, lè sìgbè àmè ɖe, kè tù èxɔ̀ ɖo èkɔ mè, eye mu ɖo dodoe na ɛ̀ òa nène. Èsì ɖɔɖɔa ɖè èxɔ̀a eye, troloa, e mù gblò, kãkã keŋu-keŋu.”