Read gen Lukà 9 Bible Online

Lukà 9 - gen bible

Lukà 9

¹Yesù yɔ yebe *nukplavi woèvèawo bɔ̀, eye be na wo ŋusɛ̃ be woa nyà gbɔ̃gbɔ̃ vuɛ̃wo keŋu, eye woa dà èdɔ̀.

²E dɔ̃ wo be woa do Mawu be èfìɔdu be àŋɛ̀a, eye woa dà èdɔ̀ na èdɔ̀nɔ̀wo.

³E gblɔ̃ na wo be: “Mì mu gbà sɔ ènu ɖekpe, zɔ̃ èmɔ ò, èkpò loo, àlo àkpɛtɛ, ènu ɖùɖu loo, àlo ègà. Mìa dòmètɔ ɖekpe mu gbà sɔ àwù èvè ò.

⁴Àxue kè mè mì la zɛ̃ a, mì nɔ̀ funua, kaka na gà kè mè mì la joa.

⁵Ne wo mu xɔ̀ mì lè èdù ɖe mè òa, mì to lè e mè, eye mìa hũhũ mìabe àfɔ̀kɔ kɔ̀ ɖɛ ne bèa nyi ɖaseɖùɖu ɖo woa ŋuti.”

⁶Nukplaviawo so jè èmɔ, wo to kɔpewo mè, le do àŋɛ̀nyuɛ̃ a, eye wo le dà èdɔ̀ na àmèwo lè àfi sia àfi.

⁷Kè Herod, èfìɔgbɔfìɔa sè ènu kèwo keŋu le jɔ̀ a, e titɔ, ɖo àmè ɖewo gblɔ̃ be Yòhanɛ̀s ye fɔ̃ so èku.

⁸Èɖewo cã be Èli ye ɖè ye ɖokoe fiɔ. Eye àmè buwo cã be gblɔ̃ɖɛtɔ xoxoawo dòmètɔ ɖe ye gbà fɔ̃.

⁹Vɔ̀a Herod gblɔ̃ be: “Yohanɛ̀s ya, mù sò èta na ɛ̀. Àmè kɛ koŋu ye nyi àmè kèa, kè ŋuti mù le sè ènyà kèawo so ò?” Eye e jro be yèa dogò kudo Yesù.

¹⁰Ekè *àmèdɔ̃dɔ̃awo trɔ gbɔ̀a, wo gblɔ̃ ènu kèwo keŋu wo wɔ̀a na Yesù. Yesù kplɔ̀ woawo ɖèɖe yì tèpe ɖe kè gogo èdù kè wo yɔna be Bɛtsaidaa gbɔ.

¹¹Vɔ̀ ekè àmèhaawo sè a, wo jè e yomè yì funua. Yesù xɔ̀ wo eye e pò nupo na wo so Mawu be fìɔdua ŋuti, eye be dà èdɔ̀ na èdɔ̀nɔ̀ kèwo lè woa dòmèawo.

¹²Ekè èzã yì dodo gbea, *àmèdɔ̃dɔ̃ woèvèawo dɔ̃ va Yesù gbɔ, gblɔ̃ na ɛ̀ be: “Đo àmèha a ne woa yì kɔpewo kudo àgblèta kèwo pòxla miawo mè, ne woa yì zɛ̃ funu, ne woa ji ènu ɖe woa ɖù, ɖo tèpe kèa ɖèvò so àmèwo gbɔ.”

¹³Vɔ̀a, Yesù gblɔ̃ na wo be: “Mìawo ŋutɔ mì na wo ènu woa ɖù.” Vɔ̀ wo gblɔ̃ be: “Kpɔ̃nɔ àtɔ̃ ku tɔ̀mèlã èvè kpò ye lè mia si; eŋuã ènu ɖùɖu kpò mi la yì plè va na àmèha gbogbo kèa.”

¹⁴Ŋusù sìgbè hotu èvè èkà èwì vɔ àtɔ̃ nène ye nɔ̀ funua. Yesù gblɔ̃ na nukplaviawo be: “Mì na àmèawo ne nɔ̀ ànyi ɖo èhasòsowo mè; àmè sìgbè èkà ci èwo nène ne nɔ̀ èhasòso ɖèka mè.”

¹⁵Nukplaviawo na àmèawo nɔ̀ ànyi.

¹⁶Yesù sɔ kpɔ̃nɔ àtɔ̃awo ku tɔ̀mèlã èvèawo, eye ekè e kɔ ŋùmè yì jia, e do àkpe ɖo woa ji, eye be kã wo, sɔ wo na nukplaviawo be woa ma na àmèha a.

¹⁷Àmè sia àmè ɖù ènu, ɖɔpò, eye wo fɔ̀ ɖùkpɔ̀tɔ̀awo ɖɔ àjàfi woèvè.

¹⁸Eye, gbè ɖèkaa, Yesù ɖèka le fãkue, eye yebe nukplaviwo lè e ŋuti. E biɔ wo be: “Àmè kɛ ye àmèhaawo gblɔ̃nà be mù nyi ò?”

¹⁹Wo ɖo e ŋuti be: “Àmè ɖewo be èwò ye nyi Yohanɛ̀s Mawusilènamètɔa, èbuwo be èwò ye nyi Èli, èbuwo cã be Mawu be gblɔ̃ɖɛtɔ xoxoawo dòmètɔ ɖèka ye fɔ̃ so èku.”

²⁰Yesù gbà biɔ wo be: “Vɔ̀a miawo ya ɖe, àmè kɛ ye mì gblɔ̃nà be mù nyi ò?” Petrò ɖo e ŋuti be: “Èwò ye nyi Mawu be Mɛ̀sia!”

²¹Yesù do èse na yebe nukplaviwo veve ɖe be wo mu gbà gblɔ̃ ènyà kèa na àmè ɖekpe ò.

²²E gblɔ̃ cã be: “E lè na *Àgbètɔ be Èvia be ne kpe èfũ sùgbɔ. Dùmèmègãwo, * mawunɔ gãwo kudo èsefiɔtɔwo la gbe è, eye wo la wù ì. Eye lè ŋùkèkè ètɔ̃gɔ̃a gbèa, E la fɔ̃ so èku.”

²³Yesù gblɔ̃ na woa kpata be: “Ne àmè ɖe jro la jè yɔ nyè mèa, ne gbe ye ɖokoe, ne sɔ yebe gbè sia gbè be àtisòga, ne bèa kpàsà mù do.

²⁴Đo àmè kè jro be yèa hlùɛ̃ yèbe àgbè a, la bu ì; vɔ̀a àmè kè bu yebe àgbè ɖo èta nyèa, la hlùɛ̃ ɛ̀ gã.

²⁵Àlè kɛ ye lè e mè na àmè be xixe kplògòdòa bèa nyi ye tɔ̀, vɔ̀a, ye ŋutɔ, bèa crɔ̃, àlo bèa bu ò?

²⁶Đo ne àmè ɖe le kpɛ̃ŋù ɖo ènyè kudo ènyà nyèwo ŋutia, *Àgbètɔ be Èvia cã la kpɛ̃ŋù ɖo e ŋuti, wàlɛbɛ kè e la va lè ye ku ètɔa, kudo àtikplɔtɔ kɔ̀kɔ̀ɛawo be gogo mèa.

²⁷Vɔ̀a, mù le kã ɖo e ji na mì be àmè ɖewo lè àmè kèwo lè fikèawo dòmè, kèwo mu la ku gbɔ̀xue Mawu be èfìɔɖùɖua la va ò.”

²⁸Eye, sìgbè ŋùkèkè ènyi nène, lè ènyà kèawo yomè a, Yesù kplɔ̀ Petrò, Yòhanɛ̀s ku Yakobò yì èto ɖe ji ne bèa fãkue.

²⁹Ekè be le fãkuea, yebe ŋùmè be kpɔkpɔ mè trɔ. Yebe àwù ɣe peŋu-peŋu, le dàzò ŋàŋlà.

³⁰Troloa, àmè èvè le pò nupo kudo è. Woawo ye nyi Mosè ku Èli.

³¹Wo ze lè gogo mè, eye wo le pò nupo ku ì so èku kè be la va ku lè Yèruzàlɛm-a ŋuti.

³²Petrò ku ye tɔ̀wo yaa, àlɔ̃ bla wo, gãke, kè wo fɔ̃a, wo kpɔ Yesù be gogo kudo àmè èvè kèwo tɔtè ɖo e gbɔawo.

³³Ekè àmèawo lè jo lè Yesù gbɔa, Petrò, gblɔ̃ na ɛ̀ be: “Ènufiɔtɔ, e nyɔ be mia nɔ̀ fikèa! Mia tù gòxɔ ètɔ̃, ɖèka la nyi tɔ̀ wò, ɖèka la nyi Mosè tɔ̀ eye ɖèka la nyi Èli cã tɔ̀.”

³⁴Ekè Petrò le gblɔ̃ ènyà kèa, lilikpo ɖe ɖiɖi va cɔ̃ woa ji, wàlɛbɛ kè wo kpɔ lilia cɔ̃ woa jia, vɔ̃vɔ̃ ɖo nukplaviawo.

³⁵Ègbè ɖe ɖì so lilia mè, gblɔ̃ be: “Àmè kèa ye nyi Èvi nyè ekè mù cã a! Mì ɖo èto è!”

³⁶Ekè ègbèa ɖì nène vɔ̀a, Yesù ɖèka kpò ye kpɔ̀tɔ̀. Nukplaviawo mu kè ènu gblɔ̃ ènyà ɖekpe so ènu kè wo kpɔa ŋuti na àmè ɖekpe lè àzã ŋuawo ji ò.

³⁷Ekè èŋù kè, eye Yesù ku yebe *nukplavi ètɔ̃awo ɖì so ètoa ji gbãnà a, àmèha gã ɖe va dogò è.

³⁸Kpɔɖa, ŋusù ɖe tɔ àpa dodo lè àmèawo dòmè gblɔ̃ be: “Ènufiɔtɔ, mù ɖè kuku na wò, va kpɔ èvi nyè ŋusùvia ɖa! Đo, èvi àkòŋùgo be nyi na mù.

³⁹Gbɔ̃gbɔ̃ ɖe jènà e ji, eye be dona àpa. E nyàmànà ɛ̀ eye futukpɛ tona lè ènu mè na ɛ̀, e sɛ̃naŋu ŋutɔ gbɔ̀xue be jona lè e ji, eye yebe lãmè gbãnà gudu-gudu.

⁴⁰Mù ɖè kuku na nukplavi wòawo be, woa nyà ɛ̀ to lè lãmè na ɛ̀, vɔ̀ wo mu teŋu ì ò.”

⁴¹Yesù gblɔ̃ be: “O, jìjimè màɖo xɔ̀sè, gbegble! Àzã nène ye mù la nɔ̀ mia gbɔ ò? Kaka va na gà kɛ mè ye mù la gbà dojì la nɔ hɛ̃ mì ò? Kplɔ̀ èvi wòa va fikèa.”

⁴²Ekè ètɔa kplɔ̀ ɛ̀ gbãnà a, gbɔ̃gbɔ̃ vuɛ̃ a sɔ ŋusùvia pu ànyi, nyàmà ɛ̀. Vɔ̀ Yesù ɖè ègbè ɖo gbɔ̃gbɔ̃ vuɛ̃ a ji, eye e dà èdɔ̀ na ŋusùvia, sɔ ɛ̀ na ètɔa.

⁴³Àmè sia àmè be ènu ku, ɖo Mawu be ŋusɛ̃ gãa ŋuti. Ekè Yesù be ènu kèwo keŋu be wɔ̀awo le dãŋù do àmèwoa, e gblɔ̃ na yebe nukplaviawo be:

⁴⁴“Mì le ènyà kèa ɖo èta mè nyuɛ̃ ɖe: Wo la sɔ Àgbètɔ be Èvia do àsi na àmèwo.”

⁴⁵Vɔ̀a wo mu sè ènyà kèa gɔ̃mè ò. E lè wawla do wo be wo mu gbà ŋɔjè e mè ò. Vɔ̀a wo vɔ̃ ne woa biɔ ɛ̀ ènyà kèa gɔ̃mè sè.

⁴⁶Nukplaviawo le dɔ̃ ènyà lè woa nɔ̀nɔwo dòmè be, yèwo dòmètɔ kɛ ye nyi àmè gãa màa.

⁴⁷Kè Yesù nya woabe susua, e kplɔ̀ ɖèvi ɖe va ye ɖokoe gbɔ,

⁴⁸eye be gblɔ̃ na wo be: “Àmè ɖekpekpe kè xɔ̀ ɖèvi kèa lè àpe nyikɔ mèa, ènyè ŋutɔ ye be xɔ̀, eye àmè kè xɔ̀ mùa, xɔ̀ àmè kè dɔ̃ mù ɖoɖaa. Àmè kè hùe wu lè mìa keŋu dòmèa ye nyi àmè gãa.”

⁴⁹Yòhanɛ̀s gblɔ̃ na Yesù be: “Ènufiɔtɔ, mi kpɔ àmè ɖe, le nyà gbɔ̃gbɔ̃ vuɛ̃ to lè àmèwo mè lè àpo nyikɔ mè, eye mi gbè e na ɛ̀ ɖo mu lè mia dòmè ò.”

⁵⁰Yesù gblɔ̃ na ɛ̀ be: “Mì mu gbà gbe na ɛ̀ ò, ɖo àmè kè mu sitè ɖo mìa ŋuti òa, lè mìa ji.”

⁵¹Ekè gà kè mè wo la kɔ Yesù yì Jiŋùkusia le gogoa, e ɖo e koŋu, eye be jè èmɔ tùtà Yèruzàlɛm.

⁵²Yesù ɖo àmèdɔ̃dɔ̃wo ɖoɖa jè ŋùkɔ̀, eye wo va ɖo Sàmarìa be èdù ɖe mè ne woa jràɖo ɖɛ na yebe vava.

⁵³Vɔ̀a, èdùamètɔwo mu jro be yèwoa xɔ̀ ɛ̀ ò, ɖo e ɖota Yèruzàlɛm.

⁵⁴Vɔ̀ ekè yebe nukplavi èvè, Yakobò ku Yohanɛ̀s kpɔ ekèa, wo gblɔ̃ na ɛ̀ be: “Tɔhonɔ̀, wò jro be mia na èzò ne gɛ̃ so jiŋùkusi va fiɔ̃ woa[9]?”

⁵⁵Yesù trɔ ɖoɖa woa gbɔ, eye be kã ŋùkumè na wo[10].

⁵⁶Eye Yesù kudo yebe nukplaviwo jo yì kɔpe bu mè.

⁵⁷Wàlɛbɛ kè wo lè èmɔ ji le yìa, àmè ɖe gblɔ̃ na Yesù be: “Mù la kplɔ̀ wò do yì àfi sia àfi kè wò la yìa.”

⁵⁸Yesù gblɔ̃ na ɛ̀ be: “Wɛ̀tɛ̀klɛ̀wo ɖo woabe èdowo, eye àyamè xèviwo ɖo woabe àtɔ̃wo, vɔ̀a, Àgbètɔ be Èvia ya mu ɖo tèpe kè be la dà èta ɖo ò.”

⁵⁹E gblɔ̃ na àmè bu be: “Kplɔ̀ mù do.” Àmèa ɖo e ŋuti na ɛ̀ be: “Na ne ma yì ɖì ètɔ nyè gbɔ̀xue.”

⁶⁰Eye Yesù gblɔ̃ na ɛ̀ be: “Tàsi lè àmè kukuwo ŋuti, ne woa ɖì woabe kukuwo, vɔ̀a, èwò ya, yì do Mawu be èfìɔɖùɖua be àŋɛ̀.”

⁶¹Àmè bu cã gbà gblɔ̃ na ɛ̀ be: “Mù la kplɔ̀ wò do, Tɔhonɔ̀, vɔ̀a, na ne ma sìa àxue nyè mè tɔwo gbɔ̀xue.”

⁶²Yesù gblɔ̃ na ɛ̀ be: “Àmè ɖekpekpe àmè kè sɔ àlɔ̀ ɖo àgblèdèkèke ŋuti vɔ̀, gbà le trɔ kpɔ ŋùgbea, mu jè na Mawu fìɔdua ò.”