Read gen Èsea gbìgbɔ̀ hlɛ̃ 12 Bible Online

Èsea gbìgbɔ̀ hlɛ̃ 12 - gen bible

Èsea gbìgbɔ̀ hlɛ̃ 12

¹Èse ku èkɔ̀do kèwo ji mì ɖo la zɔ̃ ɖo veveɖe, lè mìabe àgbè ŋùkèkèwo keŋu-keŋu mè, lè ànyigbã kè Tɔhonɔ̀, mìa tɔgbewo be Mawu a sɔ le na mìa, jia ye nyi ekèawo.

²Mì la gbã dùkɔ̃ kèwo be ànyigbã mì le xɔ̀a be vòdu sɛ̃pewo kpata, lè èto gãwo tamè, lè ètokɔ̃ɛ̃wo ji, ku lè àti do àmàwo gɔ̃mè.

³Mì la kãkã woabe vɔsakpewo, mì la gbã woabe èkpeliwo; mì la tɔzò woabe legbawo, mì la ŋɛ̃ woabe vòdu Aserà be àtiwo, eye mì la crɔ̃ woabe nyikɔ jo lè funua.

⁴Mì mu la sɛ̃ Tɔhonɔ̀, mìabe Mawu a, sìgbè lekè dùkɔ̃ ŋuawo sɛ̃nà woabe vòduwo nène ò.

⁵Ɖoa, tèpe kè Tɔhonɔ̀, mìabe Mawu a ŋutɔ la cã, lè mìabe kɔ̀tawo be nɔ̀pewo dòmè, be yèa sɔ yebe nyikɔ ɖo, ne yèa nɔ̀a, kpò ye mì la ji Tɔhonɔ̀ lè.

⁶Funua ye mì la sɔ mìabe ènumème vɔ̀sawo, àkpedo vɔ̀sawo, mìabe ènu mamã èwogɔ̃a, mìabe èjro nyuɛ̃ be ènu nanawo, mìabe àjɔ̀gbè vɔ̀sawo, ènu nana vòvòvòwo, mìabe ènyì, àlɛ̃ ku ègbɔwo be èvi cucugbãawo va.

⁷Mì la ɖù wo lè Tɔhonɔ̀, mìabe Mawu a be ŋùkɔ̀, eye mì la kpɔ jìjɔɛ ku mìabe àxomètɔwo, ɖo mìabe àlɔ̀nu-dɔ kèwo kpata ji, Tɔhonɔ̀, mìabe Mawu a tu sì ɖoa ta.

⁸Mì mu la wɔ̀ sìgbè lekè mi le wɔ̀ lè fikèa egbè, kè àmè sia àmè le wɔ̀ ènu kè be kpɔ be e nyɔa nène ò.

⁹Kè mì mu kpɔ ɖo ànyigbã ŋua, kè nyi gbɔ̃jɛ̃ be tèpe hàɖe ò, ànyigbã kè nyi ècrɔ̃nu kè Tɔhonɔ̀, mìabe Mawu a sɔ le na mìa ji ò a, ŋuti ye be nyi lekea fifìa ɖo.

¹⁰Vɔ̀a, mì la sò Yɔrdàn be ètɔ̀a, eye mì la nɔ̀ ànyigbã kè nyi ècrɔ̃nu kè Tɔhonɔ̀, mìabe Mawu a sɔ le na mìa ji. E la na mì gbɔ̃jɛ̃ lè mìabe kɛ̃tɔ kèwo la pòxla mìawo be ŋùkɔ̀, eye mì la nɔ̀ ànyigbãa ji lè àgbɔ̃ jèpò mè.

¹¹Àfi kè Tɔhonɔ̀, mìabe Mawu a cã, be yebe nyikɔ ne nɔ̀a, ye mì la sɔ ènu kèwo keŋu mù le ɖo na mì, be mìa nɔ hɛ̃ vaawo va; woawo ye nyi: mìabe ènumème vɔ̀sawo, mìabe vɔ̀sawo, mìabe ènuwo be mamã èwogɔ̃a, mìabe èjro nyuɛ̃ be ènu nanawo, ku ènu kèwo keŋu mì la cã, la sɔ wɔ̀ àjɔ̀gbè be ènu nana na Tɔhonɔ̀a.

¹²Eye, mì la sɔ jìjɔɛ va Tɔhonɔ̀, mìabe Mawu a be ŋùkɔ̀, ku mìabe ŋusùviwo, mìabe nyɔ̃nùviwo, mìabe sumɔ̃vi ŋusùwo ku mìabe sumɔ̃vi nyɔ̃nùwo, kudo Levì kèwo ye lè mìabe èdùwo mèa, ɖoa, Levìawo mu le ma ènu ɖe, àlo ècrɔ̃nu ɖe ku mì ò[62].

¹³Mì kpɔ nyuɛ̃ ɖe, ne mì mu gbà wɔ̀ mìabe ènumème vɔ̀sawo lè tèpe ɖekpekpe kè mì la gbe kpɔ kpòa ò.

¹⁴Vɔ̀a, àfi kè Tɔhonɔ̀ ŋutɔ la cã, lè mìabe kɔ̀tawo dòmètɔ ɖèka mèa kpò ye mì la wɔ̀ mìabe ènumème vɔ̀sawo lè. Funua ye mì la wɔ̀ ènu kèwo keŋu mù gblɔ̃ na mìawo lè.

¹⁵Gãkea, ne mì jro a, mì teŋu wù èlã, lekè mì jro a, ɖo lekè Tɔhonɔ̀, mìabe Mawu a tusì na mì ɖoa nu, ne mìa ɖù ì, lè mìabe èdùwo kpata mè. Àmè kèwo be ŋuti kɔ̀ ku àmè kèwo be ŋuti mu kɔ̀ ò a, ŋutɔ cã teŋu ɖù ì, sìgbè àvũgbɛ, àlo èzĩ be èlã nène.

¹⁶Vɔ̀a, mì mu la ɖù èhũ ò: mì la kɔ̀ ɛ̀ ɖo ànyigbã, sìgbè èsì nène.

¹⁷Mì mu la teŋu ɖù mìabe èlù, nù mìabe vɛ̃ yeye, mìabe àmì, àlo ɖù mìabe ènyì, àlɛ̃, àlo ègbɔwo be èvi cucugbãa, àlo mìabe àjɔ̀gbè be ènunanawo kpata, èjro nyuɛ̃ be ènu nanawo, àlo ènu nana kè mì wɔ̀ lè mìa ɖokoe sinua be mamã èwogɔ̃a, lè mìabe èdùwo mè ò.

¹⁸Tɔhonɔ̀, mìabe Mawu a be ŋùkɔ̀ kpò ye mì la ɖù wo lè, lè tèpe kè Tɔhonɔ̀ mìabe Mawu ŋutɔ la cã a. Mì la ɖù ì ku mìabe ŋusùviwo, mìabe nyɔ̃nùviwo, mìabe sumɔ̃vi ŋusùwo, mìabe sumɔ̃vi nyɔ̃nùwo. Mì la ɖù ì ku Levì kèwo ye lè mìabe èdùwo mèa. Mì la kpɔ jìjɔɛ ɖo sìtu kèwo Tɔhonɔ̀, mìabe Mawu a kɔ̀ ɖo mìa ji, lè mìabe èdɔwɔ̀wɔwo mèa ta.

¹⁹Mì kpɔ nyuɛ̃ ɖe, ne mì mu gbà ɖè èkɔ̀ lè Levìwo ŋuti, lè mìabe àgbè ŋùkèkèwo kpata mè, lè ànyigbã ji ò.

²⁰Ne Tɔhonɔ̀, mìabe Mawu kèkè mìabe ànyigbã be lipòwo, sìgbè lekè be fìã àjɔ̀gbè na mì ɖoa nène, eye mì gblɔ̃ be: “Mi la ɖù èlã”, kè be jro mìa, mì teŋu ɖù èlã, sìgbè lekè be jro mì ɖoa nène.

²¹Ne tèpe kè Tɔhonɔ̀, mìabe Mawu cã, be yèa sɔ yèbe nyikɔ ɖoa dìdì sùgbɔ so àfi kè mì lèa gbɔa, mì la sɔ ènyì, àlɛ̃ ku ègbɔ lè èlãha kè Tɔhonɔ̀, mìabe Mawu na mìa dòmè, la wù, eye mì la zɔ̃ ɖo ɖoɖo kèwo mù na mìa ji. Mì la ɖù wo, lè mìabe èdùwo mè, ɖo lekè mì jro ɖoa nu.

²²Ɛ̃ɛ, mì teŋu ɖù ì, sìgbè lekè wo ɖùnà àvũgbɛ àlo èzĩ nène. Àmè kè be ŋuti mu kɔ̀ ò a, teŋu ɖù ì ku àmè kè be ŋuti kɔ̀a fàa.

²³Vɔ̀a, mì kpɔ nyuɛ̃ ɖe, ne mì mu gbà ɖù èhũ ò; ɖoa, èhũ ye nyi àgbè[63], eye mì mu ɖo la ɖù èlã ku àgbè ò.

²⁴Mì mu la ɖù ì ò, vɔ̀a, mì la kɔ̀ ɛ̀ ɖo ànyigbã, sìgbè èsì nène.

²⁵Mì mu gbà ɖù ì ò. Ne mì w ɔ̀ ɖo èse kèawo jia, mìa ŋutɔ cã, mìabe èviwo cã, lè mìa yomè a, mì la nɔ̀ àgbè lè nyɔna mè, ɖoa, mì wɔ̀ ènu kè jɔ̀ a lè Tɔhonɔ̀ be ŋùmè.

²⁶Ènu kè kpò mì la sɔ va tèpe kè Tɔhonɔ̀ cã a ye nyi ènu kèwo ŋuti mì kɔ̀, sɔ ɖɛ na Tɔhonɔ̀a ku mìabe àjɔ̀gbè vɔ̀sawo.

²⁷Mì la sɔ èlã ku èhũa savɔ lè Tɔhonɔ̀, mìabe Mawu be vɔsakpea ji. Mì la kɔ̀ mìabe vɔ̀sawo be èhũa ɖo Tɔhonɔ̀, mìabe Mawu be vɔsakpea ji, eye mì la ɖù èlãa.

²⁸Mì ɖo èto ènyà ku ɖoɖo kèwo kpata mù le do àsi na mìa. Ne, mì wɔ̀ ɖo woa jia, ènu la nyɔ na mì ku mìabe jìjimèviwo kaka sɔ yì, ɖoa, mì wɔ̀ ènu kè nyɔ, eye be jè lè Tɔhonɔ̀, mìabe Mawu be ŋùmè a.

²⁹Ne Tɔhonɔ̀, mìabe Mawu crɔ̃ dùkɔ̃ kèwo be ànyigbã ji mì le yìa lè ŋùkɔ̀ na mì, ne mìa xɔ̀ woabe ànyigbã, sɔ wɔ̀ mìa tɔ̀a, ne mì xɔ̀ woabe ànyigbã, eye mì lè woabe èdù mèa,

³⁰mì kpɔ nyuɛ̃ ɖe, ne mì mu gbà wɔ̀ ènu kè wo wɔ̀nàa, ne wo crɔ̃ wo lè ŋùkɔ̀ na mì vɔ̀a ò. Mì kpɔ nyuɛ̃ ɖe, ne mì mu gbà va yì biɔ woabe vòduwo ta sè be: 'Leke dùkɔ̃ kèawo sɛ̃nà woabe vòduwo ɖo ò? Ne miawo cã, mia wɔ̀ nènea' ò.

³¹Ɖo Tɔhonɔ̀, mìabe Mawu ŋutia, mì mu la wɔ̀ sìgbè woawo nène ò. Ɖoa, ènu kèwo keŋu nyɔnaŋu na Tɔhonɔ̀a, ènu kèwo keŋu Tɔhonɔ̀ crìa ye wo wɔ̀nà na woabe vòduwo. Wo tɔnazò woabe ŋusùvi ku nyɔ̃nùviwo, sɔ̀ sanavɔ na woabe vòduwo!