Read gen Èsea gbìgbɔ̀ hlɛ̃ 14 Bible Online

Èsea gbìgbɔ̀ hlɛ̃ 14 - gen bible

Èsea gbìgbɔ̀ hlɛ̃ 14

¹Èviwo mì nyi na Tɔhonɔ̀, mìabe Mawu. Mì mu la do àbì mìa ɖokoewo ŋuti, eye mì mu la plɔ ŋùgonu, la sɔ wɔ̀ ècɔ ò[64].

²Kè mì nyi dùkɔ̃ kè ŋuti wo kɔ̀ na Tɔhonɔ̀, mìabe Mawu a ŋutia, mìawo ye Tɔhonɔ̀ cã, ne mìa trɔ zũ dùkɔ̃ kè nyi ye ŋutɔ be dùkɔ̃, lè dùkɔ̃ kèwo keŋu lè ànyigbã jiawo dòmè[65].

³Mì mu la ɖù ènu nyɔŋu ɖekpe ò[66].

⁴Èlã kèwo mì teŋu ɖùawo ye nyi ekèawo: ènyì, àlɛ̃ ku ègbɔ,

⁵èpè ɖèka àzò ɖèka, èzĩ, èsèe, àvũgbɛ, àyɔ̀-gbɔ, ètomè-gbɔ, ègbemè-gbɔ.

⁶Èlã kèwo kpata be fèsu mè fɛ̃ ɖo èvè, eye wo gbìgbɔ̀ trɔ ɖùnà ènu kè wo mìa, mì teŋu ɖù wo.

⁷Vɔ̀a, lè kèwo trɔ ɖùnà ènu kè wo mìawo dòmèa, mì mu la ɖù ekèawo ò: èsɔ èkpovènɔ̀, ègbemè-zũi, ètomè-hlɔ̃màdɛ̃, ɖoa, wo gbìgbɔ̀ trɔ ɖùnà ènu kè wo mìa, vɔ̀a, wo mu ɖo fèsu lè àfɔ̀ nu ò. Mì mu la ɖù wo ò. Woa ŋuti mu kɔ̀ ò.

⁸Mì mu la ɖù èhã cã ò, ɖoa, e ɖo fèsuwo vɔ̀a, mu trɔ ɖùnà ènu kè be mìa ò. Èlã kè be ŋuti mu kɔ̀ ò a, ye be nyi na mì. Mì mu ɖo la ɖù èlã ŋuawo, àlo woabe kuku ò.

⁹Lè ètɔ̀mè-lãwo dòmèa, ekèwo mì teŋu ɖùawo nyi: ekèwo keŋu ɖo àjà ku ècroa, mì kpɔ èmɔ la ɖù wo.

¹⁰Vɔ̀a, ekèwo mu ɖo àjà ku ècro ò a, mì mu la ɖù wo ò, ɖoa, woa ŋuti mu kɔ̀ ò.

¹¹Mì teŋu ɖù xèvi kèwo ŋuti kɔ̀awo kpata.

¹²Vɔ̀a, xèvi kèwo mì mu la ɖù ò a, ye nyi ekèawo: èhɔ̃, àpùmè-hɔ̃, àmlãkoe,

¹³àvàkò ku e hati vòvòvòwo,

¹⁴àkpàfiɔ̃ ku e hati vòvòvòwo,

¹⁵tatabòli, àzexe, àpùmè-hɔ̃ne, ku àvàkò vòvòvòwo hati,

¹⁶àzexe, kpokpò, fãvi-hũto,

¹⁷àkpàfiɔ̃ ku e hatiwo keŋu,

¹⁸èglò ku e hatiwo keŋu, àgùtɔ.

¹⁹Èlãklìvi kèwo ɖo àwàda, eye woa ŋuti mu kɔ̀ ò a, mì mu la ɖù wo ò.

²⁰Vɔ̀a, mi teŋu ɖù èlã kèwo ɖo àwàda, eye woa ŋuti kɔ̀awo kpata.

²¹Mì mu la ɖù èlã kè kua ò. Mì la sɔ na àmèjro kè lè èdùa mèa, ne bèa teŋu ɖù ì fàa, àlo, mìa sɔ ɛ̀ sà do àmèjrowo, ɖoa, dùkɔ̃ kè ŋuti wo kɔ̀ na Tɔhonɔ̀, mìabe Mawu a ye mì nyi. Mì mu la ɖà ègbɔvi, lè ènɔa be ànɔsi mè ò[67].

²²Èpè sia èpèa, mì la nɔ ɖè ènu kèwo mì do, eye wo mìɔ̃ ɖo mìabe àgblèwo mèa be nukuwo kpata be mamã èwogɔ̃a.

²³Mì la ɖù mìabe èlù, mìabe àhà yeye, mìabe àmì, mìabe ènyì, mìabe àlɛ̃ ku mìabe ègbɔwo be èvi cucugbãawo lè Tɔhonɔ̀, mìabe Mawu be ŋùkɔ̀, lè tèpe kè be cã be yèa sɔ yèbe nyikɔ ɖoa[68]. Nène a ye mì la wɔ̀, la kpla lekè mì la nɔ vɔ̃ Tɔhonɔ̀, mìabe Mawu a ɖoa gbè sia gbè.

²⁴Ne èmɔ kè mì la zɔ̃, la sɔ àgblèmè-nukuawo be mamã èwogɔ̃a yìa dìdìa, ne tèpe kè Tɔhonɔ̀, mìabe Mawu a cã be yèa sɔ yèbe nyikɔ ɖoa mu sɔ̀ lè mìabe nɔ̀pea gbɔ ò a, ne Tɔhonɔ̀, kɔ̀ sìtu sùgbɔ ɖo mìa jia,

²⁵eŋuã, mì la sɔ nuku èwogɔ̃a dɔ̀lì ku ègà; mì la miɔ̃ ègàa ɖo àlɔ̀ mè, eye mì la yì tèpe kè Tɔhonɔ̀, mìabe Mawu cã a.

²⁶Ne mì ɖo funua, mì la sɔ ègàa plè ènu kè mì jro a, sìgbè ènyì, àlɛ̃, àlo ègbɔ, àhà vivi, àlo àhà sɛ̃sɛ̃ ku ènu ɖekpekpe kè gbe jro mì kpòa; mì la ɖù ì, lè funua ku mìabe àxuedoa keŋu, lè jìjɔɛ kpɔkpɔ mè, lè Tɔhonɔ̀, mìabe Mawu a be ŋùkɔ̀.

²⁷Mì mu gbà ŋlɔ̀be Levì kèwo lè mìabe èdùwo mèa ò, ɖoa, wo mu mã ànyigbã ɖekpe, àlo, ècrɔ̃nu ɖekpe ku mì ò.

²⁸Èpè ètɔ̃ sia èpè ètɔ̃a, mì la ɖè mìabe nukuwo kpata be mamã èwogɔ̃, èpè ètɔ̃gɔ̃a tɔ̀a ɖo vò, vɔ̀a, mì la sɔ ɛ̀ ɖo mìabe èdùa mè.

²⁹Eye, Levì kèwo mu mã ànyigbã, àlo ècrɔ̃nu ɖekpe ku mì ò a ku àmèjrowo, ècɔɛviwo kudo àhòsì kèwo ye lè mìabe èdùwo mèa, la va xɔ̀ ènu kè kpata la gbe sù wo kpòa, ne Tɔhonɔ̀, mìabe Mawu a ne tusì na mì, lè ènu kèwo keŋu mì la wɔ̀a mè.