Read gen Èsea gbìgbɔ̀ hlɛ̃ 15 Bible Online

Èsea gbìgbɔ̀ hlɛ̃ 15 - gen bible

Èsea gbìgbɔ̀ hlɛ̃ 15

¹Èpè adrɛ̃ sia èpè adrɛ̃ be ènuwuwua, mì la nɔ sɔ èfɛ̃wo kè àmèwo ɖù do mìa kè wo.

²Èfɛ̃ sɔ kè àmè kèa ye nyi be àmè ɖekpekpe kè do ènu na yebe èhavia, la sɔ kè àmè kè be do ènu, àlo ègà na a. Mu ɖo la gbà zĩ yebe èhavia, àlo nɔ̀via ji, to èmɔ ɖekpe nu ò. Ɖoa, Tɔhonɔ̀ ɖo è be mìa sɔ èfɛ̃ kè àmè.

³Mì teŋu biɔ èfɛ̃ àmèjro ya fàa. Vɔ̀a, ne mì do ènu na mìa nɔ̀via, mì la sɔ kè è.

⁴Wɔ̀amènɔ̀ mu la nɔ̀ mìa dòmè ò, ɖoa, Tɔhonɔ̀, mìabe Mawu a la kɔ̀ sìtu sùgbɔ ɖo mìa ji, lè ànyigbã kè be sɔ le na mì, ne bèa nyi mìa tɔ̀a ji.

⁵Gãkea, mì ɖo la le èto ɖo Tɔhonɔ̀, mìabe Mawu be ègbè ŋuti veveɖe, eye mì ɖo la jè àgbàgba, la nɔ wɔ̀ ɖo èse kè mù sɔ le do àsi na mì egbèa ji gbɔ̀xue.

⁶Ɖoa, Tɔhonɔ̀, mìabe Mawu la tusì na mì, sìgbè lekè be fìã àjɔ̀gbèa nène. Nène a, mì la nɔ xɔ̀ dùkɔ̃ sùgbɔ àwòba-nu, vɔ̀a mìawo ŋutɔ, mì mu la do ènu àwòba ò. Mìa ŋutɔ, mì la ɖù dùkɔ̃ sùgbɔ ji, vɔ̀a, woawo yaa, wo mu la ɖù mìa ji ò.

⁷Ne nɔ̀vi wò dòmètɔ ɖe nyi wɔ̀amènɔ̀, lè gbɔ wò, lè àpo èdù ɖe mè, lè ànyigbã kè Tɔhonɔ̀ àpo Mawu sɔ le na wòa jia, wò mu la sɛ̃tamè ɖo e ŋuti ò. Wò mu la miɔ̃ àsi do nɔ̀vi wò wɔ̀amènɔ̀a, ne wòa tè è ènu ò.

⁸Wò la hũ àlɔ̀ wò na ɛ̀ fàa, eye wò la do àwòba-nu kèwo keŋu be la hiãa, na ɛ̀[69].

⁹Kpɔ nyuɛ̃ ɖe, ne wò mu gbà ɖo yàkàme be susu ɖe ɖo èjì mè, ne wòa nɔ gblɔ̃ be: 'Èpè adrɛ̃ kè mè wo sɔna èfɛ̃ kè àmèa gogo vɔ̀', ne wòa xà ɖo ekèa ŋuti, la sɛ̃tamè ɖo nɔ̀vi wòa ŋuti, eye wò mu la sɔ ènu kè be le biɔa na ɛ̀ ò. Ɖoa, ne e yɔ Tɔhonɔ̀, ɖo ŋuti wòa, ekèa la nyi èvuɛ̃ na wò.

¹⁰Wò la na ɛ̀ fàa; mu nyi ku àdɔ̀mèvuɛ̃ ò. Ne wò wɔ̀ nènea, Tɔhonɔ̀ àpo Mawu la tusì na wò, lè àpo èdɔwɔ̀wɔwo kpata, ku àpo àlɔ̀nu-dɔwo keŋu mè.

¹¹Eye, ekè e nyi be wɔ̀amènɔ̀wo mu la dɛ̃ lè ànyigbã ji ò a[70], mù le do èse kèa na wò: Wò la nɔ hũ àpo àlɔ̀ gã ɖe, na nɔ̀vi wò, na àmè kè nyi ŋuzĩzĩmea ku wɔ̀amènɔ̀ kè lè ànyigbã wòa jia.

¹²Ne, lè mìa nɔ̀vi Hebrùviwo dòmèa, ŋusù ɖe, àlo nyɔ̃nù ɖe sɔ ye ɖokoe sà do mìa dòmètɔ ɖe a, ne e nyi kluvi na àmèa èpè àdɛ̃ a, mì ɖo la ɖè àsi lè e ŋuti, ne bèa jo, lè mìa gbɔ, èpè adrɛ̃gɔ̃ a.

¹³Vɔ̀a, mì mu la ɖè àsi lè e ŋuti, be la jo, àlɔ̀ gbalo ò.

¹⁴Mì la sɔ lè mìabe àlɛ̃, ègbɔ ku ènyìwo dòmè; mì la kù lè mìabe èlì, èlù ku àhà ŋuti sɔ na ɛ̀, ɖoa, ènu kèwo keŋu, mì la na ɛ̀a, so Tɔhonɔ̀, mìabe Mawu be sìtu kèwo be kɔ̀ ɖo mìa jiawo mè.

¹⁵Mì la ɖo ŋùku ì be, lè Ejiptè-nyigbã jia, kluvi mìawo ŋutɔ cã mì nyi sãa, eye Tɔhonɔ̀, mìabe Mawu a xɔ̀ mì plè. Ekèa ŋuti mù le sɔ èse kèawo le do àsi na mì egbèa ɖo.

¹⁶Vɔ̀a, ne kluvi kèa gblɔ̃ na mì be: 'Nyè mu jro be ma jo lè gbɔ wò ò' ɖoa, e lɔ̃ mìa ku mìabe àxuedoa, eye e lè jìjɔɛ mè, lè mìa gbɔa,

¹⁷eŋuã, mì la sɔ ènuŋɔnu, eye mì la ŋɔ èto na ɛ̀, ɖo hɔ̃tru ŋuti, eye, e la nyi mìabe kluvi kaka sɔ yì. Nène a ke ye mì la wɔ̀ na mìabe kluvi nyɔ̃nùa cã.

¹⁸Mu gbà sɛ̃ŋu na mì be mìa ɖè àsi lè e ŋuti, ne bèa jo ò, ɖoa, kè be wɔ̀dɔ na mì, èpè àdɛ̃ a, e hɛ̃ àlè va na mì, zè èvè, wu fɛ̃tu kè àpà-dɔwɔ̀tɔ xɔ̀nàa. Eye, Tɔhonɔ̀, mìabe Mawu la tusì na mì, lè ènu kèwo keŋu mì la wɔ̀a mè[71].

¹⁹Mì la ɖè àlɛ̃wo, ègbɔwo, ènyìwo ku èlãwo keŋu be èvi àsu cucugbãawo ɖɛ na Tɔhonɔ̀, mìabe Mawu. Mì mu la sɔ mìabe ènyì be èvi àsu cucugbãa sɔ wɔ̀ èdɔ lè àgblè mè ò. Mì mu la kpà èfu na mìabe àlɛ̃-su, àlo, ègbɔ-su cucugbãawo ò.

²⁰Tɔhonɔ̀, mìabe Mawu be ŋùmè ye mìa ku mìabe àxuedoa, mì la ɖù wo lè, èpè sia èpè, lè tèpe kè Tɔhonɔ̀, mìabe Mawu la cã a.

²¹Vɔ̀a, ne ènu ɖe wɔ̀ èlãa, ne e le tɔ̃bo, àlo, ŋùkuvi gbã na ɛ̀, àlo èdɔ̀ bu lè e ŋutia, mì mu la sɔ savɔ na Tɔhonɔ̀, mìabe Mawu ò.

²²Mìabe èdùwo mè ye mì la teŋu ɖù wo lè. Àmè kè ŋuti kɔ̀a ku àmè kè be ŋuti mu kɔ̀ ò a, teŋu ɖù ì ɖodu, sìgbè èzĩ, àlo àvũgbɛ be èlã nène.

²³Gãkea, mì mu la ɖù yebe èhũa ò. Mì la kɔ̀ è ɖo ànyigbã, sìgbè èsì nène.