Read gen Èsea gbìgbɔ̀ hlɛ̃ 16 Bible Online

Èsea gbìgbɔ̀ hlɛ̃ 16 - gen bible

Èsea gbìgbɔ̀ hlɛ̃ 16

¹Mìabe ŋùkuviwo ne nɔ̀ nukuyàya be wètria ji, ne mìa nɔ ɖù Toŋutivayì be àzãa na Tɔhonɔ̀, mìabe Mawu, ɖoa, nukuyàya hùenu ye Tɔhonɔ̀, mìabe Mawu ɖè mì to so Ejiptè be ànyigbã ji, èzã mè.

²Mì la sɔ àlɛ̃, ègbɔ ku ènyì nɔ wɔ̀ Toŋutivayì be vɔsaa na Tɔhonɔ̀, mìabe Mawu, lè tèpe kè Tɔhonɔ̀ cã be yèa sɔ yèbe nyikɔ ɖoa.

³Lè vɔsa kèa mèa, mì mu la ɖù mawɛ huãhuã be ènu ɖùɖu ɖekpe ò. Mì la ɖù kpɔ̃nɔ àkpiti, ŋùkèkè adrɛ̃, kpɔ̃nɔ àkpiti kè nyi àyàɖùɖu be ènu ɖùɖua, ɖoa kpàtà ye mì hɔ̃ jo lè Ejiptè be ànyigbã ji. Mì la nɔ wɔ̀ ekèa, ne mìa sɔ nɔ ɖoŋù gbè kè gbè mi jo lè Ejiptè be nyigbã jia, mìabe àgbè ŋùkèkèwo kpata.

⁴Ŋùkèkè adrɛ̃ kèawo mèa, wo mu la kpɔ mawɛ huãnu lè mìa gbɔ, lè mìabe ànyigbã bliboa ji ò. Èlã kè mì wù àzãa be ŋùkèkè cucugbãa be wètrɔ mèa, ɖo la vɔ̀ gbè ŋua gbè ke, eye, èŋù mu la kè do è ò.

⁵Mì mu kpɔ èmɔ la wɔ̀ Toŋutivayì be vɔsaa, lè èdù kèwo Tɔhonɔ̀, mìabe Mawu sɔ na mìawo dòmètɔ ɖekpekpe mè kpò ò.

⁶Tèpe kè Tɔhonɔ̀, mìabe Mawu cã, be yèa sɔ yèbe nyikɔ ɖoa, kpò ye mì la wɔ̀ Toŋutivayì be vɔsaa lè, wètrɔ mè, ne èwè le ɖoxɔ̀a, wàlɛbɛ kè tututu mì to lè Ejiptètɔwo be ànyigbã jia.

⁷Mì la wù èlãa, eye mì la ɖù ì, lè tèpe kè Tɔhonɔ̀, mìabe Mawu cã a, eye, ne èŋù kèa, mì la trɔ tùtà mìabe gòxɔwo mè.

⁸Mì la ɖù kpɔ̃nɔ àkpiti, ŋùkèkè àdɛ̃. Ŋùkèkè adrɛ̃ a gbèa ye la nyi àzã kè mì le ɖù na Tɔhonɔ̀, mìabe Mawu a be ènuwuwu. Mì mu la wɔ̀ èdɔ ɖekpe ò[72].

⁹Mì la hlɛ̃ kuasiɖa adrɛ̃, eye, mì la tɔ kuasiɖa adrɛ̃ kèawo hɛ̃hlɛ̃, so gbè kè gbè mì tɔ nukuyàyaa jia.

¹⁰Eye mì la ɖù kuasiɖawo be àzã, sɔ do bùbu Tɔhonɔ̀, mìabe Mawu ŋuti. Mì la hɛ̃ ènu nana fàa va, ɖo lekè mì kpɔ be Tɔhonɔ̀, mìabe Mawu tusì na mì ɖoa nu.

¹¹Mì la nɔ̀ jìjɔɛkpɔkpɔ mè ku mìabe ŋusùviwo, mìabe nyɔ̃nùviwo, mìabe sumɔ̃vi ŋusùwo, mìabe sumɔ̃vi nyɔ̃nùwo, Levì kèwo lè mìabe èdùwo mèa, àmèjrowo, ècɔɛviwo kudo àhòsì kèwo ye lè mìa dòmèa, sɔ yì Tɔhonɔ̀ be ŋùkɔ̀, lè tèpe kè Tɔhonɔ̀, mìabe Mawu la cã be yèa sɔ yèbe nyikɔ ɖoa.

¹²Mìa nɔ ɖoŋù be mì nyi kluviwo kpɔ, lè Ejiptè, mìa le èse kèawo ɖo àsi, ne mìa nɔ wɔ̀ ɖo woa ji[73].

¹³Ne mì yà nukuwo keŋu vɔ̀, eye mì fiɔ̃ vɛ̃kuwo keŋu vɔ̀a, mì la ɖù gòxɔwo be àzã ŋùkèkè adrɛ̃.

¹⁴Mì la nɔ̀ mìabe àzãa be jìjɔɛkpɔkpɔ mè ku mìabe ŋusùviwo, mìabe nyɔ̃nùviwo, mìabe sumɔ̃vi ŋusùwo, mìabe sumɔ̃vi nyɔ̃nùwo, Levì kèwo lè mìabe èdùwo mèa, àmèjrowo, ècɔɛviwo ku àhòsì kèwo ye lè mìa dòmèawo, lè mìabe èdùwo mè.

¹⁵Mì la wɔ̀ ŋùkèkè adrɛ̃ be èmɔzɔ̃zɔ̃, sɔ do bùbu Tɔhonɔ̀, mìabe Mawu ŋuti, yì tèpe kè Tɔhonɔ̀, la cã a, ɖoa, Tɔhonɔ̀, mìabe Mawu la tu sì na mì, to mìabe àgblè-nukuwo ji, ku to mìabe wɔ̀nawo keŋu mè, àleke be jìjɔɛ mè kpò mì la nɔ̀.

¹⁶Èpè ɖekpekpe mèa, mìabe dùkɔ̃ mè be ŋusùwo keŋu la yì Tɔhonɔ̀, mìabe Mawu be ŋùku mè, lè tèpe kè be la cã a, zè ètɔ̃; wo la wɔ̀ ɛ̀, na kpɔ̃nɔ àkpiti be èmɔzɔ̃zɔ̃a, wo la wɔ̀ ɛ̀, na kuasiɖawo be àzãa, eye wo la gbà wɔ̀ ɛ̀, na gòxɔwo be àzãa. Àmè ɖekpe mu la yì Tɔhonɔ̀ be ŋùmè, àlɔ̀ gbalo ò.

¹⁷Àmè sia àmè la sɔ yebe àlɔ̀ savɔ, ɖo sìtu kè Tɔhonɔ̀, mìabe Mawu kɔ̀ ɖo e jia nu.

¹⁸Mì la ɖo kòjoɖotɔwo ku ènuŋlɔ̀tɔwo na mìabe kɔ̀tawo, lè èdù kèwo keŋu Tɔhonɔ̀, mìabe Mawu sɔ le na mìawo mè. Woawo ye la nɔ ɖo kòjo na dùkɔ̃a, lè jɔ̀jɔɛwɔ̀wɔ mè[74].

¹⁹Mì mu la nɔ sò kòjo gɔ̃glɔ̃ ò; mì mu la nɔ kpɔ àmè be ŋùmè, la sɔ nɔ sò kòjo ò. Mì mu la xɔ̀ èzãnu ò, ɖoa, èzãnu gbãnà ŋùku na àɖàŋùɖètɔwo, eye be gblena àmè kèwo be ènyà jɔ̀awo be ènyà.

²⁰Mì la nɔ ji jɔ̀jɔɛwɔ̀wɔ, eye, jɔ̀jɔɛwɔ̀wɔ kpò, mì la nɔ ji, ne mìa teŋu nɔ̀ àgbè, ne mìabe àsi ne teŋu sù ànyigbã kè Tɔhonɔ̀, mìabe Mawu sɔ le na mìa ji.

²¹Mì mu la ɖì vòdu Aserà be àti ɖekpe, na mìa ɖokoewo, ɖo vɔsakpe kè mì la tù na Tɔhonɔ̀, mìabe Mawu a gbɔ ò.

²²Mì mu la wɔ̀ kpèli kèwo Tɔhonɔ̀, mìabe Mawu crì ŋuawo dòmètɔ ɖekpe, na mìa ɖokoewo ò.