Read gen Èsea gbìgbɔ̀ hlɛ̃ 19 Bible Online

Èsea gbìgbɔ̀ hlɛ̃ 19 - gen bible

Èsea gbìgbɔ̀ hlɛ̃ 19

¹Ne Tɔhonɔ̀, mìabe Mawu crɔ̃ dùkɔ̃ kèwo be ànyigbã be sɔ le na mìa, ne mì xɔ̀ dùkɔ̃ ŋuawo be ànyigbã, eye mì lè woabe èdùwo ku woabe àxuewo mèa,

²mì la ɖè èdù ètɔ̃ ɖovò, lè mìabe ànyigbã kè Tɔhonɔ̀ sɔ do mìa sia ji.

³Mì la mã ànyigbãa ɖo tèpe ètɔ̃, eye mì la ta èmɔ kèwo wo la to, la ɖo èdùawo mè, bɔ̀bɔɛɖea, lè ànyigbã kè Tɔhonɔ̀, mìabe Mawu sɔ wɔ̀ ècrɔ̃nu na mìa ji, àleke be àmè ɖekpekpe àmè kè la wù àmèa, teŋu si yì bè ɖo èdùawo mè[85].

⁴Ɖoɖo kè nu àmè kè wù àmèa teŋu kpɔ èmɔnu, la wla ɖo èdùawo mè, ne bèa sɔ ɖè yebe àgbèa ye nyi ekèa: ne àmèa mu jro gbɔ̀xue wù nɔ̀via kè nyi àmè kè mu crì sã ò a.

⁵Ne àmè ɖe yì àve mè ku àmè bu, la yì sò àti, eye àmè ɖèka be àlɔ̀ ɖiɖi, wàlɛbɛ kè be le dà èfiɔa, ne èfiɔa tìkpo, yì pò àmè èvègɔ̃a, be kua, àmè kè be àlɔ̀ mè èfiɔa gɛ̃ soa, tɛŋu si yì wla ɖo èdù kèawo dòmètɔ ɖèka mè, ne bèa ci àgbè.

⁶Èhlɔ̃biɔtɔa mu la sɔ àdɔ̀mèze[86], jè àmè kè wù àmèa yomè, la kpɔ ɖo lekè èmɔa dìdì ɖoa ŋuti, la yì xe è, eye be la wù ì ò. Wo mu la sò èku kòjo na àmè kè wù àmèa ò. Ɖoa, mu crì àmè kè be wùa sã ò.

⁷Ekèa ŋuti mù le ɖè ègbè na mì be: 'Mì la ɖè èdù ètɔ̃ ɖovò.'

⁸Eye, ne Tɔhonɔ̀, mìabe Mawu kèkè mìabe ànyigbãa, sìgbè lekè be kã àtãŋu na mìa tɔgbewoa nène, eye be sɔ ànyigbã kè kpata be àjɔ̀gbè be fìã be ye la sɔ na woa do àsi na mìa,

⁹ekè mì le èse kè mù sɔ le na mì egbèa kpata ɖo àsi, eye mì wɔ̀ ɖo e ji, le lɔ̃ Tɔhonɔ̀, mìabe Mawu, le zɔ̃ lè yebe èmɔwo ji gbè sia gbè ŋutia, mì la sɔ èdù ètɔ̃ bu kpe ètɔ̃ cucugbã tɔ̀awo.

¹⁰Nène a, wo mu la kɔ̀ èɖe mà-nyãtɔ ɖe be èhũ ɖo mìabe ànyigbã kè Tɔhonɔ̀, mìabe Mawu sɔ wɔ̀ ècrɔ̃nu, sɔ na mìa ji ò. Ne mu nyi nène ò a, èhũ ŋua be kpɛ̃sɛ̃ la va jè mìa ŋutɔ mìa ji.

¹¹Vɔ̀a, ne àmè ɖe crì nɔ̀via, le ɖia ɛ̀, kaka va zrò jè e ji, eye be pò èku tèpe na ɛ̀, sɔ wùa, ne àmè kè wù àmèa si, yì bè ɖo èdù kèawo dòmètɔ ɖèka mèa,

¹²yebe èdù mè be àmè sĩsĩwo la dɔ̃ àmè ɖoɖa èdù kè mè be si yì bè ɖoa mè, wo la yì le è, eye wo la sɔ ɛ̀ do àsi na èhlɔ̃biɔtɔa, ne woa wù ì.

¹³Mì mu la ku ŋuzĩzĩ na ɛ̀ ò. Mì la ɖè èɖe mà-nyãtɔ be èhũ kɔ̀ɖɛ a jo lè Izràɛl-nyigbã ji, ne mìa ŋutɔ, mìabe nyɔ̃na.

¹⁴Mì mu la ɖè mìa nɔ̀vi be ànyigbã be lipòa jo lè ekè mìa tɔgbe kèwo va ɖo cucugbãawo ɖo na ècrɔ̃nu kè mì xɔ̀ lè ànyigbã kè Tɔhonɔ̀, mìabe Mawu sɔ na mìa ji ò.

¹⁵Àmè ɖèka mu la tɛŋu ɖù ɖase so àmè kè wù àmè, àmè kè wɔ̀ èvuɛ̃, àlo àmè kè jè àgɔ̀ ɖekpekpe kpòa ŋuti ò. Vɔ̀a, ne àmè sù èvè, àlo ètɔ̃, ɖù ɖasea, keŋu gbɔ̀xue wo teŋu kpɔ ènyàa gbɔ.

¹⁶Ne àmè ɖe va ɖù àjè-ɖase ɖo àmè ɖe ŋuti, sɔ le dohùɛ do è be e jè àglaa,

¹⁷eŋuã, àmè èvè kèwo le dɔ̃ ènyà, lè Tɔhonɔ̀ be ŋùmèawo la va hũbonɔ ku kòjoɖotɔ kèwo la nɔ̀ èdɔ mè, gbè ŋua gbèa be ŋùkɔ̀.

¹⁸Ne kòjoɖotɔawo la kù ènu mè kito-kitoa, wo la va kè ɖo e ŋuti be ɖàsèfoa nyi àjè ɖàsèfo; àjè ye be le ɖà, sɔ le dohùɛ do nɔ̀via.

¹⁹Mì la wɔ̀ ènu kè be jro be woa wɔ̀ na yè nɔ̀via na ɛ̀. Nène a, mì la ɖè èvuɛ̃a to lè mìa dòmè.

²⁰Eye, ne àmè kpɔ̀tɛawo sè èa, vɔ̃vɔ̃ la ɖo wo, eye wo la tɔtè èvuɛ̃ ŋua wɔ̀wɔ, lè mìa dòmè.

²¹Mì mu la ku ŋuzĩzĩ na àmè ò: ŋùkuvi ɖo ŋùkuvi tèpe, àɖu ɖo àɖu tèpe, àlɔ̀ ɖo àlɔ̀ tèpe, àfɔ̀ ɖo àfɔ̀ tèpe.