Read gen Èsea gbìgbɔ̀ hlɛ̃ 2 Bible Online

Èsea gbìgbɔ̀ hlɛ̃ 2 - gen bible

Èsea gbìgbɔ̀ hlɛ̃ 2

¹Ekèa yomè a, mi gbà trɔ, jè èmɔ to zògbè a ji, tùtà Plãŋùpòfɛ̃ be àpùa to[9], sìgbè lekè Tɔhonɔ̀, gblɔ̃ ɛ̀ na mùa nène, eye mi nɔ̀ Seir be ètoa be gbàgbla mè dìdi ɖe.

²Gbè ɖèkaa, Tɔhonɔ̀ gblɔ̃ na mù be:

³“Mì le trɔ do èto kèa fifìa, e wɔ̀ viɖe; mì trɔ tùtà àvego!

⁴Ɖè ègbè kèa na dùkɔ̃a be: Mì la to mìa nɔ̀viwo, Esaò be èvi kèwo nɔ̀nà Seir-dù mèawo be ànyigbã ji[10]. Wo la vɔ̃ mì, gãkea, mì nɔ̀ ŋùzɔ̃:

⁵mì mu gbà ɖè àhùa kpe na wo ò, ɖoa, nyè mu la sɔ ènu ɖekpe, lè èdùa mè, do àsi na mì ò. Eye nyè mu la na mì, àfɔ̀ɖope ŋutɔ cã, lè èdùa mè ò, ɖoa, Esaò ye mù sɔ Seir be èto be ànyigbã a do àsi na.

⁶Ènu kè mì la ɖùa, ègà ye mì la sɔ plè è, lè woa si; èsì kè mì la nùa ŋutɔ cã, ègà ye mì la sɔ plè è, lè woa si.

⁷Tɔhonɔ̀, mìabe Mawu a tusì na mì, lè mìabe wɔ̀nawo keŋu mè. E kpɔ mìa ji, eye be kplɔ̀ mì lè èpè èkà be àzɔ̃lì kè mì zɔ̃ to zògbè gã kèa jia mè. E nɔ̀ ku mì, eye ènu ɖekpe mu dɛ̃ mì ò.”

⁸“Ekè mi jo lè mia nɔ̀vi, Esaò be èvi kèwo ye nɔ̀nà Seir-nyigbã jiawo gbɔa, mi sɔ èmɔ kè to Àrabà, kè so Eilàt ku Esiɔ̀n-Gevɛrà. Mi trɔ tùtà Mòab be zògbè a ji.

⁹Eye Tɔhonɔ̀ gblɔ̃ na mù be: 'Mù gbà kpe àkɔ ku Mòabviwo ò, eye mù gbà wɔ̀ àhùa ku wo ò. Ɖoa, nyè mu la sɔ woabe ànyigbã dekpe na wò ò. Lɔt be jìjimèviwo[11] ye mù sɔ Ar be ànyigbãa na.

¹⁰Emì be jìjimèviwo ye nɔ̀ funua sã. Dùkɔ̃ gã ɖe ye wo nyi; wo sùgbɔ, eye wo jɔ̀ àsu sìgbè Anàkviwo nène.

¹¹Àmè ɖewo kpɔna wo be wo nyi Refayìviwo, sìgbè Anàkviwo nène, vɔ̀a, Mòabviwo yɔna wo be Emìviwo.

¹²Nène a kea, Horì be jìjimèviwo cã nɔ̀ Seir-nyigbã ji va yì sã. Esaò be jìjimèviwo xɔ̀ ànyigbãa lè woa si, crɔ̃ wo lè woa ɖokoewo be ŋùkɔ̀, eye wo nɔ̀ woa tèpe, sìgbè leke Izràɛlviwo wɔ̀ ku ànyigbã kè Tɔhonɔ̀ sɔ do àsi na woa nène.

¹³Fifìa, mì jè èmɔ, ne mìa to Zerɛ̀d[12] be ètɔ̀ topea, lè èto èvèa dòmè.' Nène a, mi sò Zerɛ̀d be ètɔ̀a, to èto èvèawo dòmè.

¹⁴So Kadɛs-Barnea kaka va ɖo Zerɛ̀d be àfɔ̀topea, mi zɔ̃ àzɔ̃lì èpè ègbãvɔ ènyi. Ekèa na be jìjimè kèwo keŋu nyi àhùawɔ̀tɔwo, hùe ŋua nuawo, ku vɔ̀, lè àsàɖaa mè, sìgbè lekè Tɔhonɔ̀ kã àtãŋu[13] na woa nène.

¹⁵Tɔhonɔ̀ ŋutɔ sɔ àlɔ̀ ɖè wo jo, kaka na gà kè mè be crɔ̃ woa kpata vɔ̀, lè àsàɖaa mèa.

¹⁶Eye, kè èku crɔ̃ àhùawɔ̀tɔ kèawo keŋu-keŋu vɔ̀, lè dùkɔ̃a dòmèa,

¹⁷Tɔhonɔ̀ gblɔ̃ na mù be:

¹⁸'Egbèa, wò la to Ar, la va ɖo Mòab be lipò ji.

¹⁹Wò la va jè ŋùkɔ̀ Amɔ̀nviwo. Mù gbà ɖè àhùa kpe na wo ò, eye mù gbà kpe àkɔ ku ò. Nyè mu la sɔ ènu ɖekpe na wò lè Amɔ̀nviwo be anyigbã ji ò. Ɖoa, tèpe ŋua, Lɔt be jìjimèviwo ye mù sɔ ɛ̀ na.

²⁰Wo gbà susuna be Refayìviwo be ànyigbã ye be nyi. Refayìviwo nɔ̀ funua sãa, eye Amɔ̀nviwo yɔna wo be Zàmzumviwo.

²¹Dùkɔ̃ gã, sɛ̃ŋu ɖe kè jɔ̀ àsu sìgbè Anàkviwo nènea ye wo nyi sã, vɔ̀a, Tɔhonɔ̀ crɔ̃ wo, lè Amɔ̀nviwo be ŋùkɔ̀. Amɔ̀nviwo xɔ̀ woabe ànyigbã, eye wo nɔ̀ woa tèpe.

²²Nène a ke ye Tɔhonɔ̀ wɔ̀ na Esaò be èvi kèwo ye nɔ̀nà Seir-nyigbã jiawo, eye be crɔ̃ Horìviwo lè ŋùkɔ̀ na wo; wo xɔ̀ woabe ècrɔ̃nuwo lè woa si, eye wo lè woa tèpe kaka va na fifì.

²³Eye Avì be dùkɔ̃ kèwo ye nɔ̀nà kɔpe kèwo ye lè àpùa to, kaka yì ɖo Gaza-nyigbã jia,[14] Kaftɔr-nyigbã jitɔ kèwo so Kaftɔ̀r vaawo crɔ̃ wo keŋu, eye wo nɔ̀ woa tèpe.

²⁴Ekèa yomè a, Tɔhonɔ̀ gbà ɖè ègbè be: 'Mì jè èmɔ, mì jo, ne mìa to Arnɔ̀n be ètɔ̀a be àfɔ̀tope, lè èto èvèa dòmè! Kpɔɖa, mù sɔ Sihɔ̀n, Amɔrìviwo be èfìɔ kè lè àzìkpea ji, lè Hɛsbɔ̀n-nyigbã jia ku yebe èdùa do àsi wò. Mì jè àhùawɔ̀wɔ gɔ̃mè ku wo, ne mìa ɖo àlɔ̀ woabe ànyigbãa ji!

²⁵So egbèa, mù le sɔ vɔ̃vɔ̃ ku àdìka le do mìa ŋuti, lè dùkɔ̃ kèwo le jiŋùkusi gɔ̃mèawo keŋu be ŋùmè, àleke be, ne wo sè mìabe nyikɔa, wo la hũhũ, eye wo la pò tìtìtì lè ŋùkɔ̀ na mì.'

²⁶Ekèa ŋuti mù dɔ̃ àmèwo so Kedemɔ̀t be zògbè a ji, ɖoɖa Hɛsbɔ̀n be èfìɔ, Sihɔ̀n ku ŋuti fàfa be ènyà kèawo be:

²⁷'Na, ne mia to àpo ànyigbã ji, va yì. Èmɔa kpò mi la to tɛ̃ɛ, kè mi mu la zɛ̃ to èmìɔ̃ mè, àlo ɖùsi mè ò a.

²⁸Ènu kè mi la ɖùa, ègà ye mi la sɔ plè è lè àsi wò. Èsì kè mi la nùa, èfɛ̃ ye mi la tu na wò ɖo e ta. Gbe ɖè èmɔ na mi, ne mia zɔ̃, to ànyigbã wòa ji, va yì kpò,

²⁹sìgbè lekè Esaò be èvi kèwo lè Seir, ku Mòabvi kèwo lè Ar-nyigbã jiawo ɖè èmɔ na mia nène, kaka na gà kè mè mi la sò Yɔrdàn be ètɔ̀a, la sɔ ɖo ànyigbã kè Tɔhonɔ̀, miabe Mawu sɔ na mia ji.'

³⁰Vɔ̀a, Hɛsbɔ̀n be èfìɔ, Sihɔ̀n mu jro la ɖè èmɔ na mi, ne mia to yebe ànyigbãa ji ò. Ɖoa, Tɔhonɔ̀, mìabe Mawu a na yebe èjì trì, eye ètamè sɛ̃ŋu na ɛ̀, àleke be Tɔhonɔ̀ bèa sɔ ɛ̀ do àsi na mì, gbè ŋua gbè.

³¹Eye Tɔhonɔ̀ gblɔ̃ na mù be: 'Kpɔɖa, mù sɔ èfìɔ Sihɔ̀n ku yebe ànyigbãa do àsi na wò. Sɔ ɛ̀ to àlɔ̀ ɖoɖo ècrɔ̃nuawo ji!'

³²Sihɔ̀n ku yebe dùkɔ̃ bliboa to va dogò mi, ne mia wɔ̀ àhùa lè Yahàs.

³³Tɔhonɔ̀, miabe Mawu sɔ ɛ̀ do àsi na mi, eye mi ɖù ye ku èviawo kudo yebe àhùakɔ̃ bliboa ji.

³⁴Ekèa yomè, zè ɖèkaa, mi ɖo àlɔ̀ yebe èdùwo kpata ji, eye mi crɔ̃ èdù ɖe sia ɖe gbidi: mi mu gble ŋusù, nyɔ̃nù, àlo ɖèvi ɖekpe ɖo àgbè ò.

³⁵Èlãawo kpò mi le, eye mi hlà èdùawo.

³⁶So Àroà kè lè Arnɔ̀n be ètɔ̀ wɔ̀adã to ku èto èvè dòmèa nu, ku so èdù kè lè èto èvèawo be bàlìa mè kaka va ɖo Gilead, èdù ɖekpe mu glo mi ò: Tɔhonɔ̀, miabe Mawu sɔ woa kpata do àsi na mi.

³⁷Vɔ̀a, Amɔ̀n be jìjimèviwo be ànyigbãwo kpò mi mu gogo ò: mi mu gogo Yàbɔk be ètɔ̀ wɔ̀adãa be èto èvèawo ɖekpe nu, àlo èdù kèwo ye lè ètoawo tamè ku àfi kèwo kpata Tɔhonɔ̀, miabe Mawu do èse na mi be mi mu gbà yì ò.