Read gen Èsea gbìgbɔ̀ hlɛ̃ 20 Bible Online

Èsea gbìgbɔ̀ hlɛ̃ 20 - gen bible

Èsea gbìgbɔ̀ hlɛ̃ 20

¹Ne mì to, la yì wɔ̀ àhùa ku mìabe kɛ̃tɔwo, eye mì kpɔ èsɔwo, àhùakèkewo, kudo àhùakɔ̃ kè sùgbɔ wu mìa, mì mu ɖo la vɔ̃ ò, ɖoa, Tɔhonɔ̀, mìabe Mawu kè kplɔ̀ mì to so Ejiptè-nyigbã jia, lè ku mì.

²Gbɔ̀xue mi la tɔ àhùaa jia, hũbonɔa la sitè, la pò nupo na àhùakɔ̃a.

³E la gblɔ̃ na ɛ̀ be: 'Izràɛlviwo, mì ɖo èto, ne mìa sè! Egbèa, mì le yì, la wɔ̀ àhùa ku mìabe kɛ̃tɔwo: mìabe èjìdo mu gbà gbɔjɔ ò. Mì mu gbà vɔ̃ ò. Àdìka mu gbà sò mì, ne mìa pò tìtìtì, lè ŋùkɔ̀ na wo ò.

⁴Ɖoa, Tɔhonɔ̀, mìabe Mawu ye le zɔ̃ lè ŋùkɔ̀ na mì, ne bèa wɔ̀ àhùa ku mìabe kɛ̃tɔwo, ɖo mìa tà, ne bèa xɔ̀ na mì.'

⁵Ènuŋlɔ̀tɔwo la gblɔ̃ na dùkɔ̃a be: 'Àmè ɖe lè fikèa, kè tù àxue yeye kè ŋuti mu kpɔ kɔ̀ ò a? Ne àmè ɖe lèa, ne trɔ jo, zè ɖèka yì àxomè; ne mu nyi nène ò a, ne e va ku lè àhùa-gbe jia, àmè bu la va nɔ̀ yebe àxuea mè.

⁶Àmè ɖe lè kè dà vɛ̃-gble, eye mu kpɔ gbã àgblèa mè be èkusɛ̃sɛ̃ cucugbãawo hàɖe ò a? Ne àmè ɖe lèa, ne trɔ jo, zè ɖèka yì àxomè; ne mu nyi nène ò a, ne e va ku lè àhùa-gbe jia, àmè bu la va gbã àgblèa mè be èkusɛ̃sɛ̃ cucugbãawo.

⁷Àmè ɖe lè kè sɔ àgɔ̀ nyɔ̃nù kè mu kpɔ ɖè ò a? Ne àmè ɖe lèa, ne trɔ jo, zè ɖèka yì àxomè, ne mu nyi nène ò a, ne e va ku lè àhùa-gbe jia, ŋusù bu la va ɖè yebe àgɔ̀sɔa.'

⁸Ènuŋlɔ̀tɔawo la gbà gblɔ̃ kpe è, na dùkɔ̃a be: 'Ŋusù ɖe lè mìa dòmè kè le vɔ̃, eye àdìka lè sòa? Ne trɔ yì àxomè zè ɖèka, ne mu gbà va na nɔ̀viawo be èjìdo ne srè, ne woa gbɔjɔ sìgbè ye ŋutɔ ke nène ò.'

⁹Eye, ne ènuŋlɔ̀tɔawo pò nupo na dùkɔ̃a vɔ̀a, wo la ɖo àhùa ŋùkɔ̀nɔ̀tɔwo àhùakɔ̃a nu.

¹⁰Ne mì gogo èdù ɖe, la wɔ̀ àhùa ku ìa, mìa biɔ ŋuti fàfa so èdùa gbɔ.

¹¹Ne èdùa ɖo e ŋuti na mì be: 'Mia wɔ̀ ŋuti fàfa!' Eye wo hũ woabe àgbowo na mìa, èdùa mètɔwo kpata la nɔ wɔ̀dɔ na mì, eye wo la nɔ sumɔ mì.

¹²Vɔ̀a, ne wo gbe be yèwo mu la nɔ̀ ŋuti fàfa mè ku mì ò, eye wo ɖè àhùa kpe na mìa, mì la trɔ do wo, eye mì la xa èdùa.

¹³Tɔhonɔ̀, mìabe Mawu la sɔ ɛ̀ do àsi na mì, eye mì la sɔ èwui wù èdùa mè be ŋusùwo keŋu.

¹⁴Nyɔ̃nùwo, ɖèviwo, èlãwo ku ènu kèwo keŋu lè èdùa mè ku èdùa mètɔwo be ènuwo trɔ zũ ènu kèwo Tɔhonɔ̀, mìabe Mawu sɔ le na mì, so àhùa kèa mèa.

¹⁵Nène a ye mì la wɔ̀ ku èdù kèwo keŋu dìdì so mìa gbɔ sùgbɔ, ekèwo mu lè dùkɔ̃ kèawo be èdùwo dòmè òa.

¹⁶Vɔ̀a, èdù kèwo nyi dùkɔ̃ kèawo tɔ̀, kèwo Tɔhonɔ̀, mìabe Mawu sɔ wɔ̀ ècrɔ̃nu na mìa, nyi ekèwo mè, mì mu la gble àmè ɖekpe ɖo àgbè lè ò.

¹⁷Ekèa ŋutia, mì la crɔ̃ àmè kè gbe nyi Hitìtɔ, Amɔrìtɔ, Kanàntɔ, Perizìtɔ, Hivìtɔ, Yebusìtɔ kpòa, mì la crɔ̃ wo gbidi, sìgbè lekè Tɔhonɔ̀, mìabe Mawu ɖo è na mìa nène.

¹⁸Mì la crɔ̃ wo, ne wo mu gbà va fiɔ mì ènu nyɔŋu kèwo kpata wo wɔ̀nà na woabe vòduwoa wɔ̀wɔ, ne mìa va jè àgɔ̀ do Tɔhonɔ̀, mìabe Mawu ò.

¹⁹Ne mì nɔ̀ èdù ɖe ji dìdiɖe, le wɔ̀ àhùa, ne mìa sɔ xɔ̀ ɛ̀a, mì mu la ɖè èfiɔ to, la crɔ̃ àtiwo lè èdùa mè ò, ɖoa, àti ŋuawo be èkusɛ̃sɛ̃wo ye mì la nɔ ɖù. Mì mu la sò wo ò. Àgblèji be àtiwo mu nyi àgbètɔ kè ji mì le zĩa ò.

²⁰Àti kè mì nya be mu sɛ̃na èku, wo ɖùnà ò a, kpò mì la sò, la zã, sɔ zĩ èdù kè le wɔ̀ àhùa ku mìa ji, kaka na gà kè mè mì la ɖù e ji, eye be la sù mìa sia.