Read gen Èsea gbìgbɔ̀ hlɛ̃ 23 Bible Online

Èsea gbìgbɔ̀ hlɛ̃ 23 - gen bible

Èsea gbìgbɔ̀ hlɛ̃ 23

¹Àmè ɖekpe mu la dɔ̃ ku ètɔa be èsrɔ̃ ò; eye àmè ɖekpe mu ɖo la klo àvɔ lè ètɔa be èsrɔ̃ ŋuti ò[90].

²Ŋusù kè wo ta, àlo kè wo sò èvo jo na a mu la teŋu kpɔ èmɔ la nɔ̀ Tɔhonɔ̀ be èhabɔ̀bɔa mè ò.

³Àmè kè nyi àhasìvia mu la teŋu nɔ̀ Tɔhonɔ̀ be èhabɔ̀bɔa mè ò. Yebe jìjimèviwo cã mu la teŋu ɖo e mè, kaka na jìjimè èwogɔ̃a ò[91].

⁴Amɔ̀nìtɔ ku Mòabtɔwo[92] mu la ɖo Tɔhonɔ̀ be èhabɔ̀bɔa mè ò. Woabe jìjimè èwogɔ̃a ŋutɔ cã mu la teŋu kpɔ èmɔ, la ɖo Tɔhonɔ̀ be èhabɔ̀bɔa mè ò.

⁵Ɖoa, wo mu sɔ ènu ɖùɖu ku èsì va dogò mì, kè mì lè èmɔ ji, so Ejiptè-nyigbã ji gbãnà a ò; wo gbà dà Bìleam, Beɔ̀r kè so Petɔ̀r lè Mɛ̀zòpotamìa-nyigbã jia be èvi ɖo mìa ŋuti, be ne sɛ̃kpɛ̃ na mì.

⁶Vɔ̀a Tɔhonɔ̀, àpo Mawu mu ɖo èto Bìleam ò, Tɔhonɔ̀, àpo Mawu trɔ kpɛ̃sɛ̃a zũ sìtu na wò, ɖoa, Tɔhonɔ̀ àpo Mawu lɔ̃ wò ŋutɔ[93].

⁷Kaka kè wò lè àgbèa, wò mu la ji woabe ŋuti fàfa, àlo woabe nyɔna gbèɖe ò.

⁸Wò mu la kpɔ Edɔ̀mtɔ be e nyi àmè nyɔŋu ò, ɖoa, nɔ̀vi wò ye be nyi. Nène a ke ye wò mu la kpɔ Ejiptètɔ be e nyi àmè nyɔŋu ò, ɖoa, wò nyi àmèjro, nɔ̀ woabe ànyigbã ji kpɔ.

⁹Woabe jìjimè ètɔ̃gɔ̃a mèviwo la teŋu ɖo Tɔhonɔ̀ be èhabɔ̀bɔa mè fàa.

¹⁰Ne wò do àsàɖa, kpã ŋùkɔ̀ àpo kɛ̃tɔwo, lè àhùagbe jia, kpɔ nyuɛ̃ ɖe be wò mu gbà wɔ̀ ènu ɖe kè la na be ŋuti wò mu la kɔ̀ ò.

¹¹Ne e va e mè be gbãdãgbã ɖe lè ku wò, kè ŋuti mu kɔ̀ ò, ɖoa, wàlɛbɛ kè be le kudrɔ̃ lè èzã mèa, e va na àfɔ̀a, e la to lè àsàɖaa mè, eye mu la gbà ɖo e mè kè ò.

¹²Ne wètrɔ le gogoa, gbãdãgbãa la lè èsì, eye ne èwè ɖo èxɔ̀ vɔ̀a, e la trɔ va ɖo àsàɖaa mè.

¹³Wò la jrà tèpe ɖe ɖo, lè àsàɖaa godo, funua ye wò la nɔ yì àfɔ̀ji lè.

¹⁴Wò la kpà àti ɖe ɖo àgbã wò mè; wò la sɔ nɔ kù èdo, eye ne wò yì àfɔ̀ji vɔ̀a, wò la nɔ kù èkɔ cɔ̃ èmia.

¹⁵Àpo àsàɖa mè ɖo la nyi tèpe kè ŋuti kɔ̀a, ɖoa, Tɔhonɔ̀ àpo Mawu ŋutɔ le yì, le gbɔ̀, sɔ le kpɔ ji wò, lè àpo àsàɖaa mè, ne bèa nɔ sɔ kɛ̃tɔ wòwo nɔ do àsi na wò. Tɔhonɔ̀ mu ɖo la kpɔ àfɛ̃nu ɖekpe lè àsàɖaa mè ò. Ne mu nyi nène ò a, e la trɔ lè yomè na wò.

¹⁶Ne kluvi ɖe si jo lè àpetɔa gbɔ, va ci gbɔ wòa, wò mu la kplɔ̀ ɛ̀ do àsi na àpetɔa ò.

¹⁷Gbɔ wò ye be la nɔ̀, lè mìa dòmè, lè tèpe kè be la cã lè mìabe èdùwo dòmè, be yèa nɔ̀, na yèbe nyɔnaa. Wò mu la tɛ ɛ̀ ɖoto ò.

¹⁸Vòdu mè be gbòlò ɖekpe mu la nɔ̀ Izràɛl nyɔ̃nùviwo dòmè ò. Vòdu mè be àhasìtɔ ɖekpe mu la nɔ̀ Izràɛl ŋusùwo dòmè ò[94].

¹⁹Nyɔ̃nù àlo ŋusù ɖekpe mu la sɔ àhasì wɔ̀wɔ be èci va ɖè àjɔ̀gbè lè Tɔhonɔ̀, àpo Mawu be àxomè ò. Ɖoa ekèa nyi ènu nyɔŋu na Tɔhonɔ̀, àpo Mawu.

²⁰Wò mu la do ènu ɖekpe kè la jì ɖo e jia na nɔ̀vi wò: wò mu la do ègà na ɛ̀ ò; wò mu la do ènu ɖùɖu na ɛ̀ ò; wò mu la do ènu ɖekpe, kè la jì ɖo e ji, wàlɛbɛ kè be la tu ìa ò.

²¹Wò la do ègà jì-gà na àmèjro fàa, vɔ̀a, wò mu la do è na nɔ̀vi wò ò, ne Tɔhonɔ̀, àpo Mawu ne tusì na wò, lè àpo àlɔ̀nudɔwo kpata mè, lè ànyigbã kè ji wò le yì, ne bèa nyi tɔ̀wòa ji[95].

²²Ne wò fìã àjɔ̀gbè na Tɔhonɔ̀ àpo Mawu a, wɔ̀ ɖo e ji kaba, ne mu nyi nène ò a, Tɔhonɔ̀, àpo Mawu la va biɔ wò yebe èfɛ̃; ekèa la va nyi èvuɛ̃ na wò.

²³Vɔ̀a, ne wò mu fìã àjɔ̀gbè ò a, mu la nyi àgɔ̀jèje na wò ò.

²⁴Gãkea, ne ènu ɖe gbe to lè ènu mè na wò kpòa, kpɔ e gbɔ be wòa wɔ̀ ɖo e ji, zɔ̃ ɖo àjɔ̀gbè kè wò fìã ku àpo ènu, lè ɖokoe wò si na Tɔhonɔ̀, àpo Mawu a.

²⁵Ne wò ɖo nɔ̀vi wò be vɛ̃-gble mèa, wò teŋu ɖù vɛ̃ku sɛ̃sɛ̃wo lekè be jro wò ɖoa fàa, be la sù wò; vɔ̀a, wò mu la gbã èku sɛ̃sɛ̃awo, la lɔ wo jo ò.

²⁶Ne wò va èhavi wò be àgblè mè, eye wo le yà nukuwoa, wò teŋu sɔ àlɔ̀ ŋɛ̃ èbli, àlo èlù fàa, vɔ̀a, wò mu la sɔ àgɔ̃, la sɔ yà nuku lè èhavi wò be àgblè mè, sɔ jo ò.