Read gen Èsea gbìgbɔ̀ hlɛ̃ 25 Bible Online

Èsea gbìgbɔ̀ hlɛ̃ 25 - gen bible

Èsea gbìgbɔ̀ hlɛ̃ 25

¹Ne ènyà dɔ̃dɔ̃ va ɖo àmèwo dòmèa, wo la va kòjo mè, eye wo la ɖo kòjo na wo. Wo la ɖè kunù na àmè kè be ènyà jɔ̀ a, eye wo la dohùɛ̀ do àmè kè jè àgɔ̀a.

²Ne ɖe ye wo la pò àmè kè jè àgɔ̀a, kòjoɖotɔa la na àmè kè jè àgɔ̀a la mlɔ̃ ànyigbã, eye be la na wo la do èba nenè kè jè ɖo àgɔ̀ kè be jè a nua na ɛ̀, lè kòjoɖotɔa be ŋùmè.

³Wo la do èba èkà na ɛ̀; wo mu la pò è wu nènea ò[102], àleke be wo mu gbà va do àbì veve e ŋuti, kè la va ɖìgbɔ nɔ̀vi wòa, lè àpo ŋùmè ò.

⁴Wò mu la bla ènu na ènyì, wàlɛbɛ kè be le tùkù èlùa ò[103].

⁵Ne nɔ̀vi ŋusùwo lè èdu, eye ɖèka ku, èvi mà jia, àmè kè kua be èsrɔ̃a mu la yì ɖè àmèjro, kè mu so xòmèa mè ò. Èsrɔ̃a be nɔ̀vi bu, àlo fòfoa la nɔ̀ ku nyɔ̃nùa, la ɖè è, eye be la wɔ̀ èsrɔ̃tɔ be èdɔdoàsi yì nyɔ̃nùa gbɔ[104].

⁶Ŋusùvi cucugbã kè nyɔ̃nùa la jìa, wo la sɔ ɛ̀ na àmè yìnugbea, àleke be àmè yìnugbea be nyikɔ mu la gũ lè Izràɛl-nyigbã ji ò[105].

⁷Vɔ̀a, ne ŋusùa mu jro la ɖè fòfoa, àlo nɔ̀via be àhòsìa ò a, àhòsìa la yì èdùa be àgbonu, la yì kpɔ èdùmè-mègãwo, eye be la gblɔ̃ na wo be: 'Èsrɔ̃ nyè vi, àlo, èsrɔ̃ nyè gãa gbe be yè mu la le fòfoa, àlo nɔ̀via be nyikɔ ɖotè, lè Izràɛl-nyigbã ji ò. E gbe be yè mu la wɔ̀ èsrɔ̃tɔ be èdɔdoàsi va gbɔ nyè ò.'

⁸Èdùmè-mègãwo la yɔ ŋusùa, la pò nupo na ɛ̀. E la nɔ̀tè ɖo ŋùkɔ̀ na wo, eye be la ɖo e ŋuti be: 'Nyè mu jro be ma ɖè è ò.'

⁹E yomè a, nyɔ̃nùa la zɔ̃ gogo è, lè èdùmè-mègãwo be ŋùkɔ̀, e la ɖè àfɔ̀kpawo lè àfɔ̀ na ŋusùa[106], eye be la tu ètã kɔ̀ ɖo ŋùku mè na ŋusùa, la gblɔ̃ na ɛ̀ be: 'Ènu kè wo wɔ̀nà na ŋusù kè mu jro la gbìgbɔ̀ tù nɔ̀via, àlo fòfoa be àxuedo ò a yeŋu!'

¹⁰Lè Izràɛl-nyigbã jia, wo la ɖo nyikɔ na ɛ̀ be 'Ŋusù kè wo ɖè àfɔ̀kpa lè àfɔ̀ na a be xòmè.'

¹¹Ne ŋusù ɖe le dà èkɔ̃ ku ye hatia, ne woa dòmètɔ ɖe be èsrɔ̃ gogo wo, la va dɔ̃ èsrɔ̃a jo lè ŋusù èvègɔ̃a sia, ne nyɔ̃nùa drɛ̃ àlɔ̀ le ŋusù èvègɔ̃a be ŋusù, lè àta mè na ɛ̀a,

¹²wò la sò àlɔ̀ na nyɔ̃nùa; wò mu la ku ŋuzĩzĩ na ɛ̀ ò.

¹³Ènudànu vòvò èvè: gã ɖèka ku vi ɖèka mu la nɔ̀ àkpò mè na wò ò.

¹⁴Jijenu vòvò èvè, gã ɖèka, vi ɖèka mu la nɔ̀ àxomè na wò ò.

¹⁵Ènudànu sɔ̀gbè ɖèka ku jijenu sɔ̀gbè ɖèka ye wò la ɖo, ne àpo àgbè ŋùkèkèwo ne dìdì lè ànyigbã kè Tɔhonɔ̀, àpo Mawu sɔ le na wòa ji.

¹⁶Ɖoa, àmè ɖekpekpe àmè kè le wɔ̀ èfĩnua, àmè ɖekpekpe àmè kè le wɔ̀ ènu màjɔ̀ màjɔa nyi ènu nyɔŋu na Tɔhonɔ̀, àpo Mawu[107].

¹⁷Wò la nɔ ɖoŋù ènu kè Àmàlɛktɔwo wɔ̀ ku wò, wàlɛbɛ kè wò to so Ejiptè, lè èmɔ ji gbãnàa.

¹⁸Wàlɛbɛ kè wo va dogò mì lè èmɔa ji, eye ènu tìkɔ̀ na mìa, wo crɔ̃ àmè kèwo keŋu be lãmè gbã, eye wo ci ŋùgbe, lè mìabe àmèha a ŋutia. Wo mu si Mawu viɖe ŋutɔ cã ò.

¹⁹Wò la ɖoŋù nyuɛ̃ ɖe be, ne Tɔhonɔ̀, àpo Mawu na wò gbɔ̃jɛ̃ vɔ̀, lè kɛ̃tɔ wò kèwo keŋu trɔ do wòa si, lè ànyigbã kè Tɔhonɔ̀, àpo Mawu sɔ le wɔ̀ ècrɔ̃nu na wòa jia, wò la crɔ̃ Àmàlɛk jo lè ànyigbã ji gbidi, àleke be àmè ɖe mu la gbà ɖoŋù yebe nyikɔ ŋutɔ cã ò!