Read gen Èsea gbìgbɔ̀ hlɛ̃ 26 Bible Online

Èsea gbìgbɔ̀ hlɛ̃ 26 - gen bible

Èsea gbìgbɔ̀ hlɛ̃ 26

¹Ne wo ɖo ànyigbã kè Tɔhonɔ̀, àpo Mawu sɔ le wɔ̀ ècrɔ̃nu na wòa jia, ne wò xɔ̀ ɛ̀, sɔ wɔ̀ tɔ̀wò, eye wò lè e jia,

²wò la ɖè lè àgblè mè-kusɛ̃sɛ̃ cucugbã wòawo keŋu ŋuti, wò la ɖè lè nuku kèwo wò la kpɔ so ànyigbã kè Tɔhonɔ̀, àpo Mawu sɔ na wòa jia ŋuti. Wò la sɔ nukuawo do àjàfi mè, eye wò la yì tèpe kè Tɔhonɔ̀, àpo Mawu cã be yèa sɔ yèbe nyikɔ ɖoa.

³Wò la yì kpɔ hũbonɔ kè le wɔ̀dɔ lè funua, gbè ŋua gbèa, eye wò la gblɔ̃ na ɛ̀ be: 'Mù le hũ e mè na Tɔhonɔ̀, àpo Mawu be egbèa, mù va ɖo ànyigbã kè be àjɔ̀gbè Tɔhonɔ̀ fìã na mia tɔgbewo be yè la sɔ na mia ji.'

⁴Hũbonɔa la xɔ̀ àjàfia lè àsi wò, eye be la sɔ ɛ̀ ɖo Tɔhonɔ̀, àpo Mawu be vɔsakpea be ŋùkɔ̀.

⁵E yomè a, wò la gblɔ̃ lè Tɔhonɔ̀, àpo Mawu a be ŋùkɔ̀ be: 'Tɔgbe nyè nyi Aràmtɔ kè sãnà so àfi ɖe, yì àfi bua[108]. E hũ va yì Ejiptè-nyigbã ji, àfi kè be nyi àmèjro nɔ̀ ku àmè vi kèwo mu sùgbɔ ò a. Wo va jì ɖo e ji, eye wo trɔ zũ dùkɔ̃ sɛ̃ŋu gã ɖe.

⁶Vɔ̀a, Ejiptètɔwo do àyà na mi, wo do mi èhiã mè, eye wo do èdɔ sɛ̃ŋuwo àsi na mi.

⁷Eye, ekè mi do àpa yɔ Tɔhonɔ̀, mia tɔwo be Mawu a, Tɔhonɔ̀ ɖo èto miabe ègbè; e kpɔ miabe èhiã, miabe àyàɖùɖu, eye be ku ŋuzĩzĩ na mi.

⁸Tɔhonɔ̀ vlũ yebe àlɔ̀ sɛ̃sɛ̃a, sɔ wɔ̀ ŋùdãnu ku jèsì gã, ɖo vɔ̃vɔ̃wo, sɔ kplɔ̀ mi to lè Ejiptè-nyigbã ji.

⁹E kplɔ̀ mi va tèpe kèa, eye be sɔ ànyigbã kèa na mi, ànyigbã kè ji nyìnɔsi ku ànyisi bɔ lèa[109].

¹⁰Eye kpɔɖa, mù sɔ àgblè mè-nuku kèwo wò na mù a be cucugbã tɔ̀awo va. Wò la sɔ wo ɖo Tɔhonɔ̀, àpo Mawu a be ŋùmè, eye wò la cɔ̃ ŋùmè ànyi, lè Tɔhonɔ̀, àpo Mawu be ŋùmè, la sumɔ ɛ̀.

¹¹Eye, ne wòa sɔ do àkpe na Tɔhonɔ̀, ɖo nyɔna kèwo be na èwò ku àpo àxuedoa, wò la kpɔ jìjɔɛ ku Levì kudo àmèjro kèwo ye lè mìa dòmèa.

¹²Èpè ètɔ̃ sia èpè ètɔ̃ be vɔ̀vɔnua, wò la sɔ ènu èwogɔ̃a keŋu lè àpo nuku kè wò yàa ŋuti, na Levìwo, àmèjrowo, ècɔɛviwo, àhòsìwo; eye ne wo ɖùnu eye wo ɖɔpò, lè àpo èdùa mèa,

¹³wò la gblɔ̃ lè Tɔhonɔ̀, àpo Mawu a be ŋùkɔ̀ be: 'Mù ɖè ènuwo be mamã èwogɔ̃ kè nyi àkpa kɔ̀kɔ̀ɛa jo lè àxue nyè mè, eye mù sɔ ɛ̀ na Levìwo, àmèjrowo, ècɔɛviwo ku àhòsìwo, sìgbè lekè wò gblɔ̃ ɛ̀ na mù pɛpɛpɛa nène, eye nyè mu dà lè àpo èse ji, àlo, ŋlɔ̀be ɖoɖo wòwo ò.

¹⁴Nyè mu ɖù ɖekpe lè e ŋuti, wàlɛbɛ kè ècɔ jɔ̀ ɖo ji nyèa ò; nyè mu ɖè ɖekpe lè e ŋuti, wàlɛbɛ kè ŋuti nyè mu kɔ̀ ò; nyè mu ɖè lè e ŋuti na àmèkuku ɖekpe ò. Mù ɖo èto àpo ɖoɖowo, Tɔhonɔ̀, Mawu nyè, mù zɔ̃ ɖo ɖoɖo kèwo wò wɔ̀ na mùa ji.

¹⁵Ɖè ŋùku, so àpo Nɔ̀pe Kɔ̀kɔ̀ɛ, lè jiŋùkusi, kpɔ Izràɛl, àpo dùkɔ̃a, ne wòa tusì na ɛ̀; tusì na ànyigbã kè wò sɔ na mi, ɖo lekè wò fìã àjɔ̀gbè na mia tɔgbewoa nène, ànyigbã kè ji ànyisi ku nyìnɔsi bɔ lèa[110].'

¹⁶Egbèa, Tɔhonɔ̀, àpo Mawu le ɖè ègbè na wò be wòa wɔ̀ ɖo èse ku èkɔ̀do kèawo ji: wò la wɔ̀ ɖo woa ji ku àpo èjì blibo, ku àpo àmèti bliboa.

¹⁷Wò na, Tɔhonɔ̀ kã àtãŋu na wò egbè, be yè la nyi àpo Mawu, eye wò la zɔ̃ lè yebe èmɔwo ji, be wò la le yebe èsewo, yebe ɖoɖowo ku yebe èkɔ̀dowo ɖo àsi, ne wòa nɔ sè ètonu na ɛ̀.

¹⁸Tɔhonɔ̀ cã na, wò kã àtãŋu na ɛ̀, be wò trɔ zũ yebe dùkɔ̃ kè nyi ye ŋutɔ, ye tɔ̀[111], sìgbè lekè be fìã àjɔ̀gbè na wòa nène, be wò la le yebe èsewo keŋu ɖo àsi,

¹⁹eye be la na wò la wu dùkɔ̃ kèwo be wɔ̀awo kpata, lè gogo mè, lè nyikɔ xɔ̀xɔ mè, lè kɛ̃klɛ̃ mè, eye wò la trɔ zũ dùkɔ̃ kè lè kɔ̀kɔ̀ɛ na Tɔhonɔ̀, àpo Mawu a, sìgbè lekè be fìã àjɔ̀gbè na wòa nène.