Read gen Èsea gbìgbɔ̀ hlɛ̃ 28 Bible Online

Èsea gbìgbɔ̀ hlɛ̃ 28 - gen bible

Èsea gbìgbɔ̀ hlɛ̃ 28

¹Ne wò ɖo èto Tɔhonɔ̀, àpo Mawu be ègbè tututu, eye wò kpɔ e gbɔ be yèa wɔ̀ ɖo yebe èse kèwo kpata mù sɔ le do àsi na wò egbèa jia, Tɔhonɔ̀ àpo Mawu la na wò la wu ànyigbã ji be dùkɔ̃wo kpata.

²Ne wò ɖo èto Tɔhonɔ̀ àpo Mawu be ègbèa, sìtu kèwo keŋu la kɔ̀ ɖo ji wò, eye wo la ɖì na wòawo ye nyi ekèawo:

³Sìtu la nɔ̀ ji wò lè èdù wòwo mè, eye sìtu la nɔ̀ ji wò lè àgblè wòwo mè.

⁴Sìtu la nɔ̀ àpo jìjimè ji sùgbɔ; sìtu la nɔ̀ àpo àgblèwo ji, eye nukuwo la sùgbɔ; sìtu la nɔ̀ èlã wòwo ji, ènyì ku àlɛ̃ wòwo la do àmì, eye wo la jì ɖo e ji fuu.

⁵Sìtu la nɔ̀ àpo àjàfi ku àpo mawɛ-ze ji.

⁶Sìtu la nɔ̀ àpo yìyi ku gbɔ̀gbɔ ji.

⁷Ne kɛ̃tɔ wòwo sitè ɖo ŋuti wòa, Tɔhonɔ̀ la ɖù woa ji, lè ŋùku wò mè. Wo la to èmɔ ɖèka va, vɔ̀a, wo la kã hlɛ̃ lè ŋùkɔ̀ na wò, la si to èmɔ vòvò adrɛ̃ jo.

⁸Tɔhonɔ̀ la tusì na àpo àvàwo, kaka wo la ɖɔ, eye be la tusì na ènu kèwo keŋu wò la wɔ̀a. E la tusì na wò lè ànyigbã kè Tɔhonɔ̀, àpo Mawu sɔ le do àsi na wòa ji.

⁹Ne wò le Tɔhonɔ̀, àpo Mawu be èsewo ɖo àsi, eye wò le zɔ̃ ɖo yebe ɖoɖowo nua, Tɔhonɔ̀ la sɔ wò sɔ ɖo ye ŋutɔ be dùkɔ̃ kɔ̀kɔ̀ɛ, sìgbè lekè Tɔhonɔ̀ fìã àjɔ̀gbè na wòa nène.

¹⁰Ne ànyigbã ji be dùkɔ̃wo keŋu kpɔ be Tɔhonɔ̀ be nyikɔ lè ŋuti wòa, wo la nɔ vɔ̃ wò.

¹¹Tɔhonɔ̀ la na wò nyɔna, e la na, wò la jì ɖo e ji, e la na, èlãha wòwo la jì ɖo e ji, eye àgblè mè-nuku wòwo la gbãgo, lè ànyigbã kè be àjɔ̀gbè Tɔhonɔ̀ fìã na tɔgbe wòwo, be yè la sɔ na wòa ji.

¹²Tɔhonɔ̀ la hũ yebe jiŋùkusi, eye be la na èji la jà ɖo ànyigbã ji na wò, ɖo yebe hùenu.

¹³Ne wò sè ètonu na Tɔhonɔ̀, àpo Mawu a, Tɔhonɔ̀ la sɔ wò ɖo ŋùkɔ̀ na dùkɔ̃wo keŋu, wò mu la nɔ̀ ŋùgbe ò. Eji kpò wò la nɔ yì; wò mu la ɖiɖi va gɔ̃mè kpɔ ò,

¹⁴ɖoa, wò mu la zɛ̃ yì ɖùsi mè, àlo, èmìɔ̃ mè, lè èmɔ kèwo keŋu, mù le ta na mì egbèa ji, la kplɔ̀ vòduwo do, ne wòa yì sɛ̃ wo ò.”

¹⁵“Vɔ̀a, ne wò mu ɖo èto Tɔhonɔ̀, àpo Mawu be ègbè, ne wòa nɔ wɔ̀ ɖo yebe èse ku ɖoɖo kèwo keŋu mù sɔ le do àsi na wò egbèa ji ò a, kpɛ̃sɛ̃ kèwo la va ji wò, eye wo la ɖì ŋuti wòawo ye nyi ekèawo:

¹⁶Kpɛ̃sɛ̃ la nɔ̀ ji wò, lè èdù wò mè, kpɛ̃sɛ̃ la nɔ̀ ji wò, lè àgblè wòwo mè.

¹⁷Kpɛ̃sɛ̃ la nɔ̀ àpo àjàfi ku mawɛ-ze ji.

¹⁸Kpɛ̃sɛ̃ la nɔ̀ àpo àdɔ̀mèviwo, àpo àgblè mè-nukuwo, àpo ènyìnɔ ku àlɛ̃wo ji.

¹⁹Kpɛ̃sɛ̃ la nɔ̀ àpo yìyi ku gbɔ̀gbɔ ji.

²⁰Tɔhonɔ̀ be kpɛ̃sɛ̃ la hɛ̃ èvlododo, àdìkasoe, ku ŋùku klɛ̃ do àmè va ji wò, lè ènu ɖekpe kè wò la wɔ̀a mè, kaka na gà kè mè wò la crɔ̃ gbidi jo lè ànyigbã ji, ne wò wɔ̀ èvuɛ̃, sɔ trɔ jo lè Tɔhonɔ̀ yomè a.

²¹Tɔhonɔ̀ la do wò èdɔ̀vuɛ̃ kè la crɔ̃ wò lè ànyigbã kè ji wò le yì, ne bèa trɔ zũ tɔ̀wòa ji.

²²Tɔhonɔ̀ la na, wò la ɖìkù, ènu la tɛ̃ wò, lãmè la ɖù wò, wò la jèzò, eye èku ɖìɖi la va ànyigbã wòa ji, kpe ɖo àkaɖa, ègbe vuɛ̃ kè la nɔ crɔ̃ àpo àgblè mè-nukuwoa ŋuti, kaka na gà kè mè wò ŋutɔ, wò la crɔ̃ gbidia.

²³Jiŋùkusi la sɛ̃ŋu lè èta ji na wò, sìgbè gàjɛ̃ nène, eye èji la gbe jàja na wò; nènea ke ànyigbã kè ji wò le zɔ̃a la lìa sìgbè ègà-yìbɔ nène lè àfɔ̀ gɔ̃mè na wò.

²⁴Ɖo èjijàja tèpea, Tɔhonɔ̀ la na àfi ku hũhũ la jà, so jiŋùkusi, ɖo àpo ànyigbãa ji; e la nɔ jà so jiŋùkusi va kɔ̀ ɖo ji wò, kaka na gà kè mè wò la crɔ̃ gbidia.

²⁵Tɔhonɔ̀ la na kɛ̃tɔ wòwo la ɖù ji wò. Ne wò to èmɔ ɖèka yì kpe àhùa ku woa, wò la si to èmɔ vòvò adrɛ̃, lè woabe ŋùkɔ̀. Wò la nyɔŋu na fìɔduwo keŋu lè ànyigbãa ji.

²⁶Àpo àmèkpòtia la nyi ènu ɖùɖu na àyamè xèviwo keŋu, ku na ànyigbã ji be èlãwo, lè àpo èdù mè, eye àmè ɖe mu la va nyà wo jo ò.

²⁷Tɔhonɔ̀ la na ènu la tɛ̃ wò, sìgbè lekè be tɛ̃ Ejiptètɔwoa nène[124]. E la na wò la jè àkpà, wò la nɔ klù ŋuti, eye mu la jè e mè na wò gbèɖe ò.

²⁸Tɔhonɔ̀ la do wò àɖàhùa, ŋùkuvi la gbã na wò, eye ètagbɔ la titɔ na wò.

²⁹Dɔ̃ŋùkusu tataa, wò la vlũ àlɔ̀, la nɔ ɖìsà, sɔ nɔ ji èmɔ, sìgbè ŋùkuvi gbãgbãnɔ̀ nène, eye wò mu la nɔ kè ɖo e ŋuti ò. Wo la nɔ zĩ wò ɖo ànyi, la nɔ tafu wò, la nɔ fĩ wò, gãkea, àmè ɖekpe mu la nɔ̀ ànyi, la xɔ̀ na wò ò.

³⁰Nyɔ̃nù kè wò la sɔ àgɔ̀a, ŋusù bu la dɔ̃ e gbɔ; àxue kè wò la tùa, wò mu la nɔ̀ e mè ò; vɛ̃-gble kè wò la dà a, wò mu la yà yebe èku cucugbãa ŋutɔ cã ò.

³¹Wo la wù ènyì wò, lè àpo ŋùku mè, gãkea, wò mu la ɖù yebe èlãa ò. Wo la le àpo èsɔ-àkɛtɛ jo, eye mu la gbà trɔ va gbɔ wò ò. Wo la le àpo àlɛ̃wo sɔ na àpo kɛ̃tɔ, gãkea, àmè ɖekpe mu la nɔ̀ ànyi la xɔ̀ na wò ò.

³²Wo la sɔ ŋusùvi wòwo ku nyɔ̃nùvi wòwo, do àsi na èdù bu mètɔwo, eye wò la tɛ̃ ŋùkuvi ŋùkèkè blibowo, la nɔ kpɔ èmɔ ji na wo, vɔ̀a, wò mu la teŋu wɔ̀ ènu ɖekpe ò.

³³Dùkɔ̃ kè wò mu jèsi ò a, la ɖù àpo ànyigbã be nukuwo ku àpo àyàɖùɖu be àlèwo keŋu, eye àmèwo la nɔ tafu wò kòɖò.

³⁴Ènu kèwo ŋùkuvi wòwo la nɔ kpɔa, la nɔ do wò àɖàhùa.

³⁵Tɔhonɔ̀ la na ènu la tɛ̃ èklò ku àta na wò veveɖe, eye wò mu la teŋu dà ègbe le e ŋuti ò. E la tɛ̃ wò, so àfɔ̀xòmè, sɔ yì èta mè.

³⁶Tɔhonɔ̀ la kplɔ̀ wò ku èfìɔ kè wò la ɖo na ɖokoe wòa, yì dùkɔ̃ kè wò ŋutɔ cã, tɔgbe wòwo cã mu jèsi ò a, gbɔ[125], funua, wò la sumɔ vòdu kèwo nyi àti ku èkpe tatawoa!

³⁷Wò la ɖo vɔ̃vɔ̃ na dùkɔ̃ kèwo keŋu mè, Tɔhonɔ̀, àpo Mawu la kplɔ̀ wò yìa mètɔwo; wò la ɖì kòkoe na wo, eye wò la trɔ zũ àlɔmèɖènu na wo.

³⁸Wò la do ènu sùgbɔ ɖo àgblè wòwo mè, gãkea, nuku kè wò la yàa la hùe, ɖoa hùesuviwo la ɖù wo vɔ̀ keŋu.

³⁹Wò la dà vɛ̃-gblewo, wò la lebè na wo, vɔ̀a, wò mu la nù woabe àhà ò; wò mu la yà woabe èkusɛ̃sɛ̃ ŋutɔ cã ò, ɖoa, èŋɔviwo la ɖù wo vɔ̀ keŋu-keŋu.

⁴⁰Wò la ɖo àmìti-gblèwo lè àpo ànyigbãa kpata ji, gãkea, wò mu la kpɔ àmì la sì ò, ɖoa, àmì be kusɛ̃sɛ̃ wòawo la hlɛ̃ keŋu.

⁴¹Wò la jì ŋusùvi ku nyɔ̃nùviwo, gãkea, wo mu la nɔ̀ gbɔ wò ò; ɖoa, wo la le wo wɔ̀ kluviwo.

⁴²Hùesuviwo la crɔ̃ àpo àti ku àgblè mè nukuwo keŋu.

⁴³Àmèjro kèwo ye lè mìa dòmèawo la gbà nɔ kpɔ ŋusɛ̃ kpe è, wàlɛbɛ kè wò ŋutɔ, wò la nɔ gbɔjɔ ɖo e jia.

⁴⁴E ye la nɔ do ègà na wò, wàlɛbɛ kè wò ya, wò mu la ɖo ènu ɖekpe la do na ɛ̀ ò. E yaa, la nyi ètaa, eye èwò yaa, wò la nyi àsike.

⁴⁵Ne wò mu ɖo èto Tɔhonɔ̀, àpo Mawu be ègbè, ne wòa wɔ̀ ɖo yebe èse ku yebe ɖoɖo kèwo be sɔ na wòa ji ò a, kpɛ̃sɛ̃ kèawo kpata la va ji wò, eye wo la ɖì ŋuti wò, kaka na gà kè mè wò la crɔ̃ gbidia.

⁴⁶Ekèawo la nyi jèsì ku ŋùdãnuwo, la jɔ̀ ɖo ji wò, ku jìjimèvi wòwo ji, kaka sɔ yì.

⁴⁷Ne ènuwo sùgbɔ flãŋu lè àsi wò vɔ̀, wò mu sɔ jìjɔɛ ku àyosòso kè so èjì blibo mèa sɛ̃ Tɔhonɔ̀, àpo Mawu ò a,

⁴⁸àdɔ̀ la nɔ wù wò, sìkɔ la nɔ tì wò, wò la nɔ̀ àma, lè ènu sia ènu be èhiã mè, la nɔ sumɔ kɛ̃tɔ kèwo Tɔhonɔ̀ la ɖo na wòa. Wo la do èkɔ̀ga kpɛ̃kpɛ̃ na wò, kaka wò la crɔ̃ ɖiwaa.

⁴⁹Tɔhonɔ̀ la ɖo dùkɔ̃ ɖe so dìdìpe na wò, dùkɔ̃ kè la nɔ zrò, sìgbè èhɔ̃ nènea, so kaka xixea be ènukpòpe ke, dùkɔ̃ kè be ègbè, wò mu sè ò a,

⁵⁰dùkɔ̃ kè sɛ̃na èta mè, àleke be mu bùnà tɔgbewo, àlo, la ku ŋuzĩzĩ na vifɛ̃wo ò a.

⁵¹E la fɔ̀ èlã wòwo jo, la lɔ àgblè mè-nuku wòwo ɖù, kaka na gà kè mè wò la crɔ̃ vɔ̀a. Mu la gble àpo èlù kui ɖèka, àpo vɛ̃ yeye be jàja kui ɖèka, àpo àmì jàja kui ɖèka ɖɛ na wò, àlo, ènyì do àmì wòwo ku àlɛ̃nɔ ku woabe èviwo dòmètɔ ɖèka tigɔ̃ ɖɛ na wò, kaka na gà kè mè wo la na wò la crɔ̃ vɔ̀a ò.

⁵²Dùkɔ̃ kèa la pòxla do wò, la zĩ wò ɖɛ, lè àpo èdùwo keŋu mè, kaka na gà kè mè àpo àgbògbò be èglìkpa sɛ̃ŋu kɔ yìji kèwo ji wò kãna ɖoawo la mù pu ànyia. E la zĩ wò ɖɛ, la nɔ̀ ji wò, lè èdù wòwo keŋu mè, lè ànyigbã wòa kpata ji. Ɛ̃ɛ, lè ànyigbã kè Tɔhonɔ̀, àpo Mawu sɔ na wòa ji.

⁵³Ne kɛ̃tɔ wòwo pòxla do wò, zĩ wò ɖɛa; lè àyàɖùɖu, èhiã ku àdɔ̀ wù àmè kè mè wo la zĩ wò ɖoa mèa, wò la ɖù wò ŋutɔ àpo àdɔ̀mèviwo, wò la ɖù ŋusùvi ku nyɔ̃nùvi kèwo Tɔhonɔ̀, àpo Mawu la na wòawo be èlã.

⁵⁴Ŋusù kè wo nyì lè mìa dòmè ku èbèlele ku àcɔɖoɖo veve kè nɔ̀ tɔ̀xɛa ŋutɔ cã a la sɔ ŋùku bàɖà nɔ kpɔ nɔ̀viawo, fòfoawo ku dàdaawo. E la sɔ ŋùku vuɛ̃ nɔ kpɔ nyɔ̃nù kè ye ŋutɔ fɛ̃na ɖo àkɔ nua, eye be la nɔ kpɔ èvia kèwo kpɔ̀tɔ̀awo bàɖà,

⁵⁵ɖoa, mu jro la mã èvia kèwo be la ɖù, ɖekpe mà gble ɖɛa be èlã ku woa dòmètɔ ɖekpe, wàlɛbɛ kè kɛ̃tɔ wòwo le zĩ ji wò, le do wò èhiã mè, lè àpo èdùwo keŋu mèa ò.

⁵⁶Nyɔ̃nù kè wo nyì lè mìa dòmè ku èbèlele ku àcɔɖoɖo veve kè nɔ̀ tɔ̀xɛa, nyɔ̃nù kè mu jrona la sɔ àfɔ̀xòmè tɔ ànyigbã ŋutɔ cã a ò, ɖo lekè be lenabè na kɔ̀kɔ ku àcɔɖoɖo ŋutia, la sɔ ŋùku bàɖà nɔ kpɔ ŋusù kè be fɛ̃na ɖo àkɔ nua, e la sɔ ŋùku vuɛ̃ nɔ kpɔ ye ŋutɔ be ŋusùvi ku ye ŋutɔ be nyɔ̃nùvi.

⁵⁷E la sɔ ŋùku bàɖà nɔ kpɔ èvi kè to lè ye ŋutɔ be àta mèa; e la sɔ ŋùku vuɛ̃ nɔ kpɔ èvi kèwo ye ŋutɔ jìawo, ɖoa, lè ènu sia ènu be èhiã gã kè mè be lèa mèa, e la ɖù wo, lè bèbe mè, wàlɛbɛ kè kɛ̃tɔ kèwo zĩ ji wòa sɔ wò do àyàɖùɖu ku èhiã mè, lè àpo èdùwo keŋu mèa[126].

⁵⁸Eye, ne wò mu jè àgbàgba, ne wòa zɔ̃ ɖo èse kèa be ɖoɖowo ji ò a, ne wò mu wɔ̀ ɖo èse kèwo wo ŋlɔ̀ ɖo xoma kèa mè ji, ku bùbu na gogo be nyikɔ kè nyi Tɔhonɔ̀, àpo Mawu be nyikɔ ɖo vɔ̃vɔ̃a ji ò a,

⁵⁹Tɔhonɔ̀ la pò wò, e la pò èwò ku àpo jìjimèviwo, e la do ŋùdã be àbì mìa ŋuti, e la do àbì veve màku mìa ŋuti, e la do mì èdɔ̀ sɛ̃ŋu veveɖe.

⁶⁰E la na èdɔ̀vuɛ̃, xɔ̀ lè àmè ŋuti kèwo keŋu wò vɔ̃ lè Ejiptè-nyigbã jia la gbìgbɔ̀ trɔ va ji wò, eye wo la nɔ̀ ji wò.

⁶¹Tɔhonɔ̀ la na wò la jè èdɔ̀ ku àbì kèwo keŋu be ènyà wo mu gblɔ̃ ɖo èse be xoma kèa mè ŋutɔ cã ò a, kaka na gà kè mè wò la crɔ̃ ɖiwaa.

⁶²Eye, ne wò mu ɖo èto Tɔhonɔ̀ be ègbè ò a; lè mì, àmè kèwo ye sùgbɔ sìgbè jiŋùkusi be wètriviwo nène cãawo dòmèa, àmè viɖewo kpò ye la kpɔ̀tɔ̀.

⁶³Eye, sìgbè lekè tutu Tɔhonɔ̀ sɔna jìjɔɛ lenabè na mì sãa, wɔ̀nà ne mìa sùgbɔ, ne mìa nɔ̀ nyɔna mèa nènea, nènea ke ye Tɔhonɔ̀ le sɔ jìjɔɛ, la kpɔ e gbɔ be mìa gũ, ne mìa crɔ̃. Nène a ye be la hɔ̃ mì jo lè ànyigbã kè ji mì le yì, ne bèa trɔ zũ mìa tɔ̀a jia yeŋu.

⁶⁴Tɔhonɔ̀ la kãkã wò hlɛ̃ ɖo dùkɔ̃wo keŋu dòmè, so ànyigbã be àgo ɖe ji, yì àgo bu ji. Funua, wò la sumɔ vòdu kèwo wò ŋutɔ cã, tɔgbe wòwo cã mu jèsi ò a, vòdu kèwo nyi àti ku èkpe tatawoa!

⁶⁵Ne wò lè dùkɔ̃ ŋuawo dòmèa, wò mu la kpɔ gbɔ̃jɛ̃ ò; wò mu la kpɔ tèpe kè wò la sɔ àpo àfɔ̀xòmè ɖoa ŋutɔ cã ò. Ne wò lè dùkɔ̃ ŋuawo dòmèa, Tɔhonɔ̀ la na, àgbɔ̃ mu la jèpò na wò ò; e la na, èjì wò la ci jojojoe, eye ŋùkuvi wòwo mu la gbà nɔ klɛ̃ lè èta ŋuti na wò ke ò, wò la gbɔjɔ.

⁶⁶Àpo àgbèa la flà lè wò ŋutɔ, ŋùku wò mè. Vɔ̃vɔ̃ la nɔ ɖo wò èzã ku kedè. Wò mu la gbà kã ɖo wò ŋutɔ, àpo àgbè ji ò.

⁶⁷Ŋùdekɛ̃nyɛ mèa, wò la nɔ gblɔ̃ be: “Gà kɛ mè ye wètrɔ la ɖo ò?” Wètrɔ mèa, wò la nɔ gblɔ̃ be: “Gà kɛ mè ye ŋùdekɛ̃nyɛ la ɖo ò?” Ɖoa, ènu kèwo ŋùkuvi wòwo la nɔ kpɔa, la nɔ sò àdìka na wò.

⁶⁸Tɔhonɔ̀ la sɔ àpùjihũ, kɔ wò, trɔ yì Ejiptè, tùtà èdù kèa mè, tùtà èdù kè ŋuti, mù gblɔ̃ so na wò be: “Ŋùkuvi wòwo mu la gbà kpɔ èdù kèa mè kpɔ gbèɖe ò!”. Ne mì ɖo funua, mìawo ŋutɔ, mì la sɔ mìa ɖokoewo ɖo àsì, be yèwoa nyi kluvi ŋusùwo ku kluvi nyɔ̃nùwo na àpo kɛ̃tɔwo, gãkea, àmè ɖekpe mu la nɔ̀ ànyi, la plè mì ò!”

⁶⁹Sɔ kpe èzò kè Tɔhonɔ̀ ɖù ku Izràɛlviwo, lè Horɛb be ètoa ji sãa, èzò kè be ègbè Tɔhonɔ̀ gbà ɖè na Mosè be ne ɖù ku Izràɛlviwo, lè Mòab-nyigbã jia be ènyàwo ye nyi ekèawo: