Read gen Èsea gbìgbɔ̀ hlɛ̃ 31 Bible Online

Èsea gbìgbɔ̀ hlɛ̃ 31 - gen bible

Èsea gbìgbɔ̀ hlɛ̃ 31

¹Mosè gblɔ̃ ènyà kèawo na Izràɛl bliboa.

²E gblɔ̃ na wo be: “Egbèa, èpè èkà ètɔ̃ ye lè àsi nyè. Nyè mu gbà ɖo ŋusɛ̃ la nɔ yì, la nɔ gbɔ̀ ò, eye Tɔhonɔ̀ gblɔ̃ na mù be: 'Wò mu la sò Yɔrdàn be ètɔ̀ kèa ò[131].'

³Tɔhonɔ̀ àpo Mawu ŋutɔ ye la zɔ̃ lè ŋùkɔ̀ na wò. E ye la crɔ̃ dùkɔ̃ kèawo lè ŋùkɔ̀ na wò eye wò la xɔ̀ woa tèpe. Eye Yosùa ye la nɔ̀ ŋùkɔ̀ na mì, sìgbè lekè Tɔhonɔ̀ gblɔ̃ ɛ̀a nène.

⁴Ènu kè Tɔhonɔ̀ wɔ̀ ku Sihɔ̀n ku Ɔg, Àmorìtɔwo be èfìɔwo ku woabe dùkɔ̃woa, ke ye be la wɔ̀ ku dùkɔ̃ kèawo: E crɔ̃ wo[132].

⁵Tɔhonɔ̀ la sɔ wo do àsi na mì, eye mì la wɔ̀ ènu kèwo keŋu lè èse kèwo mù sɔ do àsi na mìa mèa ku wo.

⁶Mì dojì, ne mìa likè; mì mu gbà vɔ̃, ne mìa hũhũ lè ŋùkɔ̀ na wo ò. Ɖoa, Tɔhonɔ̀, àpo Mawu a ye la zɔ̃ lè ŋùkɔ̀ na wò: mu la jo lè gbɔ wò ò; mu la gble wò ɖɛ ò.”

⁷Ekèa yomè a, Mosè yɔ Yosùa, eye be gblɔ̃ na ɛ̀, lè Izràɛl be dùkɔ̃ bliboa be ŋùmè be: “Dojì, ne wòa likè, ɖoa, èwò ye la kplɔ̀ dùkɔ̃ kèa ɖo ànyigbã kè be àjɔ̀gbè Tɔhonɔ̀ fìã na woa tɔgbewo, be yè la sɔ na woa ji. Èwò ye la sɔ ɛ̀ wɔ̀ ècrɔ̃nu na wo.

⁸Tɔhonɔ̀ ŋutɔ la nɔ̀ ŋùkɔ̀ na wò; e la nɔ̀ ku wò; mu la ɖè àsi lè ŋuti wò ò[133], eye mu la gble wò ɖɛ ò. Mù gbà vɔ̃ ò, eye àdìka mu gbà sò wò ò.”

⁹Eye Mosè ŋlɔ̀ èse kèa be ènyàwo, sɔ do àsi na Izràɛl be àmè sĩsĩwo kpata, ku Levì be èvi kèwo nyi hũbonɔ kèwo kɔkɔna Tɔhonɔ̀ be Zòɖùɖu-Ɖakà a.

¹⁰Eye Mosè sɔ ègbè kèa do àsi na wo be: “Èpè adrɛ̃ sia èpè adrɛ̃ yomè a, wàlɛbɛ kè mì la sɔ èfɛ̃ nɔ kè àmèa, ekè le nyi gòxɔwo be àzãa,

¹¹wàlɛbɛ kè Izràɛl bliboa la va bɔ̀, lè Tɔhonɔ̀ àpo Mawu a be ŋùmè, lè tèpe kè ye ŋutɔ la cã a, wò la hlɛ̃ èse kèa be ènyàwo lè Izràɛl be dùkɔ̃ bliboa be ŋùmè, ne woa sè è.

¹²Wò la yɔ dùkɔ̃a kpata bɔ̀: ŋusùwo, nyɔ̃nùwo, ɖèviwo ku àmèjro kèwo lè àpo èdùwo mèa, ne woa kpata, woa sè è, ne woa kpla ɛ̀, ne woa si Tɔhonɔ̀, mìabe Mawu a, àleke be woa kpɔ e gbɔ be woa le èse kèa be ènyàwo ɖo àsi, ne woa wɔ̀ ɖo e ji.

¹³Eye, woabe èvi kèwo mu kpɔ nya ɛ̀ hàɖe ò a, la sè è, eye wo la kpla lekè wo la vɔ̃ Tɔhonɔ̀, mìabe Mawu ɖoa, ŋùkèkè kèwo keŋu mì la nɔ̀ àgbè, lè ànyigbã kè mì la yì xɔ̀, ne mì sò Yɔrdàn be ètɔ̀a vɔ̀a ji.”

¹⁴Tɔhonɔ̀ gblɔ̃ na Mosè be: “Kpɔɖa, àpo èku be àzã le gogo vɔ̀. Yɔ Yosùa, ne mìa va ègòdodo be gòxɔa mè. Funua, mù la sɔ ègbè do àsi na mì.” Ekèa yomè a, Mosè ku Yosùa yì ègòdodo be gòxɔa mè.

¹⁵Eye Tɔhonɔ̀ ɖè ye ɖokoe fiɔ, lè gòxɔa mè, lè lili babla ɖe mè[134]. Lili bablaa kèa lè gòxɔa mɔnu.

¹⁶Tɔhonɔ̀ gblɔ̃ na Mosè be: “Kpɔɖa, zãɖe kèa, wò la mlɔ̃ ànyi, la jo yì tɔgbe wòwo gbɔ. E yomè a, dùkɔ̃ kèa la tɔ àhasì wɔ̀wɔ, eye be la nɔ kplɔ̀ èdù bu mètɔ kèwo dòmè wo la ɖoawo be vòduwo do. Dùkɔ̃ kèa la gble mù ɖɛ, la gble zòɖùɖua, e la gble èzò kè mù ɖù ku ìa.

¹⁷Gbè ŋua gbèa, mù la do àdɔ̀mèze ɖo woa ŋuti. Mù la gble wo ɖɛ, eye nyè mu la gbà kpɔ woa gbɔ ò. Gà ŋua mèa, woa ŋutɔwo ye la na wo la vũvũ wo, eye àfɔ̀ku gãgãwo ku ènu sò àdìkawo la jɔ̀ ɖo woa ji. Eye, ne ènu kèawo jɔ̀ ɖo dùkɔ̃ kèa jia, e la gblɔ̃, gbè ŋua gbè be: “Ne ènu kèawo jɔ̀ ɖo mia jia ɖe, mu ɖèfiɔ be miabe Mawu a mu gbà lè mia dòmè ò a?”

¹⁸Vɔ̀a, gbè ŋua gbèa, nyè ya, mù la gbà nɔ wla àpe ŋùku mè do è, ɖo èvuɛ̃ kèwo kpata be wɔ̀, wàlɛbɛ kè be kplɔ̀ vòduwo do a ŋuti.

¹⁹Fifìa, mì ŋlɔ̀ èhà kèa ɖɛ, ne mìa fiɔ Izràɛlviwo. Mì sɔ ɛ̀, do ènu na wo, ne woa nɔ jì ì, àleke be èhà kèa ne nyi ɖàsèfo na mù, ɖo Izràɛlviwo ŋuti.

²⁰Nyàwo be nyi be mù la kplɔ̀ dùkɔ̃ kèa yì ànyigbã kè ji nyìnɔsi ku ànyisi bɔ ɖoa ji; ànyigbã kè be àtãŋu mù kã na woa tɔgbewo, be mù la sɔ na woa[135]. Wo la ɖùnu, la ɖɔpò; wo la kpɔ lãmè. E yomè a, dùkɔ̃ kèa la trɔ jè ŋùkɔ̀ vòduwo, e la sɛ̃ wo, eye be la dovlo nyè ya; e la gbã èzò kè mù ɖù ku ìa.

²¹Eye, wàlɛbɛ kè gbledo gãgãwo ku ènu bàɖàwo la va nɔ jɔ̀ ɖo dùkɔ̃ kèa jia, èhà kèa la nyi ɖàsèfo na mù ɖo woa ŋuti, ɖoa, woabe jìjimèviwo mu la ŋlɔ̀be èhà kèa jìji gbèɖe ò. Egbèa, nyè ya, mù nya ɖoɖo kè wo la wɔ̀a xoxo, gbɔ̀xue mù la kplɔ̀ wo ɖo ànyigbã kè be àtãŋu mù kãa ji.”

²²Gbè ŋua gbèa, Mosè ŋlɔ̀ èhà kèa ɖɛ, eye be fiɔ Izràɛlviwo.

²³Tɔhonɔ̀ ɖè ègbè na Yosùa, Nun be ŋusùvia, gblɔ̃ na ɛ̀ be: “Likè, ne wòa dojì, ɖoa, èwò ye la kplɔ̀ Izràɛlviwo yì ànyigbã kè be àtãŋu mù kã be mù la sɔ na woa ji. Nyè ya, mù la nɔ̀ ku wò.”

²⁴Eye, kè Mosè ŋlɔ̀ èse kèa be ènyàwo keŋu ɖo xoma mè vɔ̀a,

²⁵e ɖè ègbè kèa na Levì kèwo ye kɔkɔna Tɔhonɔ̀ be Zòɖùɖu-Ɖakà a be:

²⁶“Mì xɔ̀ èse be xoma kèa, eye mìa sɔ ɛ̀ ɖo Tɔhonɔ̀, mìabe Mawu a be Zòɖùɖu-Ɖakà a gbɔ, ne bèa nyi ɖàsèfo ɖo mìa ŋuti.

²⁷Nyè ya, mù nya lekè mìabe èkɔ̀ lìa, eye mì nyi dùkɔ̃ jè àgla ɖoa. Ne egbè, wàlɛbɛ kè mù gbà lè àgbè lè mìa dòmèa, mì le jè àgla ɖo Tɔhonɔ̀ ŋutia, leke be la va nyi, ne mù va kua ò?

²⁸Mì yɔ mìabe kɔ̀tawo be àmèsĩsĩwo kpata ku mìabe ènuŋlɔ̀tɔwo bɔ̀ ɖo gbɔ nyè, ne ma gblɔ̃ ènyà kèawo ɖo èto mè na wo. Jiŋùkusi ku ànyigbã ye la nyi ɖàsèfo ɖo woa ŋuti, lè nyè ku wo dòmè.

²⁹Ɖoa, mù nya be lè àpe ku yomè a, mì la gble keŋu-keŋu, eye mì la jo lè èmɔ kè mù ta na mìa ji. Lè àzã kèwo gbãnàa jia, gbledo la va kpe mì, ɖoa, mì la wɔ̀ ènu kè nyrãa, lè Tɔhonɔ̀ be ŋùmè, àleke be mìabe wɔ̀nawo la nyi àgɔ̀, mì la jè do Tɔhonɔ̀.”

³⁰Ekèa yomè a, Mosè gblɔ̃ èhà kèa be ènyàwo keŋu ɖo Izràɛlviwo be àmèha bliboa be èto mè be: