Read gen Èsea gbìgbɔ̀ hlɛ̃ 32 Bible Online

Èsea gbìgbɔ̀ hlɛ̃ 32 - gen bible

Èsea gbìgbɔ̀ hlɛ̃ 32

¹“Jiŋùkusi, ɖo èto, ne ma pò nupo, ànyigbã, sè ènyà kèwo mù la gblɔ̃a.

²Àpe ènufiɔfiɔwo ne jà, sìgbè èsìjàja nène, eye àpe ènyàwo ne hlɛ̃, sìgbè àhũ nène, ɛ̃ɛ, ne jà, lè àvòmè, sìgbè èji sɛ̃sɛ̃ ɖo ègbefɛ̃fɛ̃ ji nène, ne nɔ̀ sìgbè èji sɛ̃ŋu ɖo ègbe ji nène.

³Mù la mlã Tɔhonɔ̀ be nyikɔ; mì kpɔ lekè miabe Mawu a lòlò ɖoa, jèsi.

⁴E ye kè nyi àkpãa, yebe ènuwɔ̀wɔwo nɔ̀nà blibo; yebe èmɔwo keŋu lè jɔ̀jɔɛ; ànùkua be Mawu ye be nyi, eye jɔ̀jɔɛ mà wɔ̀ mu lè e mè ò, nyàwototɔ ku ènu jɔ̀jɔɛwɔ̀tɔ ye be nyi.

⁵Vɔ̀a, mìa[136] Izràɛlviwo ya, dùkɔ̃ vuɛ̃ kpò mì nyi, mìabe èvuɛ̃ wɔ̀wɔ na be, lè Tɔhonɔ̀ be ŋùmè a, mì mu gbà nyi Tɔhonɔ̀ be èviwo ò. Jìjimè bàɖà, gbegble ye mì nyi.

⁶Dùkɔ̃ mà nyanu, jè àɖàhùa, àgbè ŋua ye wò la nɔ̀ lè Tɔhonɔ̀ be ŋùkumèa? Mu nyi Tɔhonɔ̀ ye nyi ètɔ kè jì wò ò a? Tɔhonɔ̀ ye wɔ̀ wò, ye ŋutɔ ke ye likè wò.

⁷Ɖoŋù gbè ɖe gbè, gbìgbɔ̀ kpɔ èpè kèwo va yìawo ɖa, gbìgbɔ̀ kpɔ jìjimè kèwo va yìa ɖa, biɔ ètɔ wò sè, e la gblɔ̃ ɛ̀ na wò; biɔ àpo àmè sĩsĩwo sè, wo la gblɔ̃ ɛ̀ na wò.

⁸Gà kè mè èjihũitɔa mã ànyigbã na dùkɔ̃woa, gà kè mè e mã àgbètɔwo mèa, e ɖo lipò na dùkɔ̃wo keŋu, sɔ zɔ̃ ɖo Izràɛlviwo[137], be ègbɔsùsu ji.

⁹Ɖoa Tɔhonɔ̀ ŋutɔ tɔ̀ ye nyi dùkɔ̃a, eye e cã Yakɔb be jìjimèviwo na ye ɖokoe.

¹⁰Tɔhonɔ̀ dogò yebe dùkɔ̃a lè zògbè-nyigbã ji, lè tèpe kè àmè ɖekpe mu lè ò, vɔ̀a, kè ɖɔ ku ègbemèlãwo be àpadodoa. E kpɔ e ji, eye be fiɔ ɛ̀ ènu; e lebè na ɛ̀, sìgbè yebe ŋùkuvi be èku yìbɔ nène.

¹¹Sìgbè lekè èhɔ̃ donazò lãmè na èvia kèwo le kpla zòzroa nènea, e vlũ àwàda, le zrò to yebe àtɔ̃ɛa tamè, e kèkè yebe àwàdawo keŋu, ɖo èviawo ji, e kɔ wo ɖo yebe àwàdawo ji.

¹²Nène a ye Tɔhonɔ̀ ŋutɔ ɖèka kplɔ̀ yebe dùkɔ̃a yeŋu, vòdu ɖekpe mu do è àlɔ̀ ò.

¹³E na dùkɔ̃a ɖù ànyigbã be ètowo ji, ne bèa sɔ àgblè mè nukuawo nyì ye ɖokoe. E na ànyisi to lè àkpã tòtro mè, be nù. E na àmìti mìɔ̃, lè àhlìhãkpe ji, èkusɛ̃sɛ̃awo ɖì, dùkɔ̃a ɖù.

¹⁴Ènyì ku àlɛ̃wo nana woabe ànɔsi babla, àlɛ̃vi, ègbɔvi, ègbɔ ku Basàn be àgbò doàmìwo nana woabe èlã, ku èlù be èwɔ meme, vɛ̃ku be èhũ, kè nyi àhà yeye wò nùnàa.

¹⁵Nène a ye, kè Yesùrun do àmì vɔ̀a, e jè àgla[138]. Ɛ̃ɛ, wò doàmì, wò kpɔ lãmè, wò trì; dùkɔ̃a gble Mawu kè wɔ̀ ɛ̀a ɖɛ, e dovlo Mawu kè nyi yebe àkpã, yebe hlùɛ̃tɔa.

¹⁶Dùkɔ̃ kèa mèviwo sɔ èdù bu mè be vòduwo do àdɔ̀mèze na Mawu, wo wɔ̀ ènu nyɔŋuwo, sɔ jè àgɔ̀ do Tɔhonɔ̀,

¹⁷Wo savɔ na gbɔ̃gbɔ̃ vuɛ̃ kèwo mu nyi Mawu ò a[139], na vòdu kèwo wo mu jèsi ò a, ènu sɛ̃sɛ̃ yeye kèwo woa tɔgbewo cã mu nya ò a.

¹⁸“Àkpã kè jì wòa, wò ɖè èkɔ̀ lè e ŋuti, wò ŋlɔ̀be Mawu kè ɖo wòa!”

¹⁹Ènu kè Tɔhonɔ̀ kpɔa fɔ̃ àdɔ̀mèze na ɛ̀, ɛ̃ɛ, yebe ŋusùviwo ku yebe nyɔ̃nùviwo hɔ̃ èjì na ɛ̀.

²⁰Ekèa ŋuti be gblɔ̃ be: “Mù la wla àpe ŋùmè do wo, eye mù la kpɔ ènu kè la va jɔ̀ ɖo woa jia, ɖoa, jìjimè jɔ̀vuɛ̃ ye wo nyi, èvi kèwo ŋuti wo mu teŋu dojì ɖo ò a.

²¹Wo sɔ ènu màɖì nuwo, le do àdɔ̀mèze na mù; wo sɔ woabe legba mà ɖì ènuwo le hɔ̃ èjì na mù. E nyɔ! Nyè yaa, mù la sɔ ènu kè mu nyi dùkɔ̃ ò a kpã ŋùkɔ̀ wo! Mù la sɔ dùkɔ̃ fùflu ɖe[140] hɔ̃ èjì na wo!

²²Fifìa, àpe àdɔ̀mèzea be èzò le bì, e le bì kaka yì kɔ̀ ɖo èkuwode be gòglòpe ke! E vũvũ ànyigbã ku ènu kèwo mìɔ̃nà ɖo e jia! E bì ètowo be ègũnuwo!

²³Mù la lɔ jɔ̀gbèvuɛ̃wo kpata kɔ̀ ɖo woa ji, àŋùti nyèwo la lɔ wo.

²⁴Ne àdɔ̀ wù àmè gbɔjɔ wo, èji be ègbèɖèɖe ku àpe àɖi sɛ̃ŋu be tete vũvũ woa, mù la ɖo èlã wɔ̀ àdãwo be àɖu na wo, ku èlã kèwo tana lè èkɔ mèa be àɖi.

²⁵Lè èmɔ jia, èwui la crɔ̃ woabe èviwo, lè àxuewo mèa, àdìka sò àmè la ɖùfìɔ; ènu kè la kpe ɖèkajɛ a ke ye la kpe tùgbɛ̀jɛ lè àxuea cã; ènu kè la crɔ̃ vifɛ̃ hũkɔ̃ɛa ke ye la crɔ̃ àmègã èta ɣe cã.”

²⁶Mù gblɔ̃ be: “Mù la gbã wo hãnyà hãnya, eye mù la gũ wo jo lè àgbètɔwo be susu mè,

²⁷Gãkea nyè mu jro be woabe kɛ̃tɔ ne kò mù, ne woa va nɔ gblɔ̃ be: “Miawo ye na ekèawo keŋu jɔ̀, mu nyi Tɔhonɔ̀ ye wɔ̀ ènu kèawo ò!”

²⁸Ekè e nyi be dùkɔ̃ kèa nyi dùkɔ̃ kè be ɖoɖowo le gbãa, wo mu ɖo ènunya ò.

²⁹Ne wo ɖo àdòdò a, wo la kè sè e gɔ̃mè, eye ènunya la nɔ̀ susu mè na wo, na woabe èsɔ̀ godo.

³⁰Leke àmè ɖèka la teŋu nyà àmè èkà èwì vɔ àtɔ̃ (1000) ɖo ò? Eye àmè hotu àtɔ̃ (10000) la teŋu si lè àmè èvè pɛ nu, ne mu nyi be woabe àkpã kè nyi Tɔhonɔ̀a ɖè kɛ̃tɔawo do àsi ò?

³¹Ekè miabe kɛ̃tɔwo be àkpã mu lè sìgbè miabe àkpã nène ò a, woa ŋutɔ wo ɖù ɖase so e ŋuti.

³²Woabe vɛ̃-gblewo so Sodɔ̀m be vɛ̃-gblewo dòmè, kèwo mu tovò na Gòmɔrà be àgblèwo ò a. Woabe vɛ̃kuwo ɖɔ ku àɖi ɖèɖe, woabe vɛ̃kpòwo ve kpàa.

³³Woabe vɛ̃a nyi èdã be àɖi, flìbo be àɖi bàɖà bàɖà ɖe.

³⁴Ènu kè ènyè Tɔhonɔ̀, mù ɖo ɖɛa, Ènu kè mù ɖo ɖɛ na woa,

³⁵Tɔ̀ nyè ye nyi èhlɔ̃biɔbiɔ, ku èfɛ̃tu, ne gà mè sùa, woabe àfɔ̀ la ɖiɖi, ɖoa, woabe cɔ̃crɔ̃ be àzã gogo, eye ènu kè la jɔ̀ ɖo woa ji kpàtàa, la va èzã ɖe kèa.”

³⁶Tɔhonɔ̀ la sò jɔ̀jɔɛ na yebe dùkɔ̃a, e la ku ŋuzĩzĩ na yebe sumɔ̃viwo, wàlɛbɛ kè be la kpɔ be wo gbɔjɔa, wàlɛbɛ kè kluvi, àlo, àblɔ̀ɖèvi mu gbà lè ò a.

³⁷Hùe ŋua nu ye be la biɔ be: “Fikɛ ye woabe vòduwo lè ò, eye àkpã kè le wla woa ɖe?

³⁸Woabe vòdu kèwo ɖùnà woabe vɔsa be àmìwoa ɖe? Ekèwo ye nùnà woabe èsìkɔ̀ɖɛ be àhàwoa ɖe? Wo ne sitè, ne woa va hlùɛ̃ mì gã! Wo ne sɔ àfi kè mì la wla ɖoa fiɔ!

³⁹Mì le kpɔ fifì be ènyè ye, ènyè ɖèka kpò ye, kè vòdu ɖekpe mu nɔ̀ ŋuti nyè ò a, ènyè kpò ye ɖo ŋusɛ̃, nana èku ku àgbè. Ne mù do àbì àmè ŋutia, ènyè ke gbà wùnà àbì a. Àmè ɖekpe mu teŋu xɔ̀ àmè, lè àsi nyè ò.

⁴⁰Ɛ̃ɛ, mù kɔ àlɔ̀ yìji, eye mù le kã àtãŋu be: 'Ènyè ye nyi Mawu àgbè-àgbè kè lè, kaka sɔ yìa!

⁴¹Ne mù ɖa èwui wɔ̀ ànyrã nyèa, ne mù kpã ŋùkɔ̀ kɛ̃tɔ nyèwo ku kòjoɖoɖoa, àpe èhlɔ̃biɔbiɔ la jè woa ji, eye mù la dɔ̃ èto na àmè kèwo crì mùa.

⁴²Wàlɛbɛ kè èwui nyèa le ɖù woabe èlãa, àŋùti nyèwo la nɔ nù woabe èhũ, kaka la mu. Àmè ci àhùawo ku àhùalewo be èhũ wo la nù. Kɛ̃tɔwo be kplɔ̀tɔwo be èlã wo la ɖù.'”

⁴³Dùkɔ̃wo, mì kafu Tɔhonɔ̀ be dùkɔ̃a, ɖoa, Tɔhonɔ̀ la biɔhlɔ̃ na yebe sumɔ̃viwo be èhũ. Èhlɔ̃biɔbiɔ kèa la gɛ̃ jè yebe kɛ̃tɔwo ji; Nène a, e la sɔ yebe dùkɔ̃a ku yebe ànyigbã be èvuɛ̃ kè è. Tɔhonɔ̀ la dɔ̃ èto na yebe kɛ̃tɔwo vɔ̀a, e la kɔ̀ yebe dùkɔ̃a be ànyigbã ŋuti[141].

⁴⁴Nène a ye Mosè, kè ŋuti Yosùa, Nun be èvia lè, va ɖè èhà kèa mè be ènyàwo keŋu ɖo èto mè na Izràɛl be dùkɔ̃a.

⁴⁵Kè Mosè gblɔ̃ ènyà kèawo keŋu na Izràɛl bliboa vɔ̀a,

⁴⁶e gblɔ̃ na wo be: “Mì le ènyà kèwo keŋu mù le gblɔ̃ na mì egbèa ɖo àsi veveɖe, eye mìa do wo èto mè na mìabe èviwo, be wo ne wɔ̀ ɖo èse kèa be ènyàwo kpata ji.

⁴⁷Ɖoa, mu nyi ènyà gbalo ye wo nyi na mì ò. Ènyà kèawo ye nyi mìabe àgbè bliboa, eye ènyà kèawo ji, mì la wɔ̀ ɖo, ne mìa nɔ̀ àgbè dìdi, lè ànyigbã kè mì la xɔ̀, ne mì sò Yɔrdàn be ètɔ̀a vɔ̀a.”

⁴⁸Gbè ŋua gbè tutua, Tɔhonɔ̀ gblɔ̃ na Mosè be:

⁴⁹“Lia Nebò be èto kè lè Avarim be ètowo dòmèa ji, ne wòa yì Mòab-nyigbã ji, jè ŋùkɔ̀ Yerikò, ne wòa kpɔ Kanàn-nyigbã kè mù la sɔ na Izràɛlviwoa ɖa.

⁵⁰Lè èto kè wò la liaa jia, wò la ku, la yì tɔgbe wòwo gbɔ, sìgbè lekè fòfo wò Arɔ̀n cã ku, lè Hor be ètoa ji, jo yì yebe xòmèwo gbɔa nène[142].

⁵¹E la nyi lekea, ɖoa, mì wɔ̀ èvuɛ̃ gã ɖe ɖo ŋuti nyè lè Izràɛlviwo dòmè, lè Meribà be èsìa gbɔ, lè Kadɛ̀s, lè Sin be zògbè a ji, wàlɛbɛ kè mì mu do bùbu lekè mù lè kɔ̀kɔ̀ɛ ɖoa ŋuti, lè Izràɛlviwo dòmè ò.

⁵²Wò la jè ŋùkɔ̀ ànyigbã kè mù sɔ le na Izràɛlviwoa, wò la kpɔ ɛ̀ ɖoɖa, lè àzɔ̀ge, gãkea, wò mu la yì e ji ò.”