Read gen Èsea gbìgbɔ̀ hlɛ̃ 4 Bible Online

Èsea gbìgbɔ̀ hlɛ̃ 4 - gen bible

Èsea gbìgbɔ̀ hlɛ̃ 4

¹Fifìa, Izràɛlviwo, mì ɖo èto, ne mìa sè èse ku èkɔ̀nu kè nyè ŋutɔ, mù le fiɔ mì, ne mìa zɔ̃ ɖo woa ji, àleke be mìa teŋu nɔ̀ àgbè, ne mìa teŋu ɖo, ne mìa xɔ̀ ànyigbã kè Tɔhonɔ̀, mìa tɔwo be Mawu a sɔ le na mìa.

²Mì mu la sɔ ènyà ɖekpe, sɔ kpe èse kèwo mù sɔ le do àsi na mìa ò, eye mì mu la ɖè ɖekpe lè e mè ò, àleke be mìa le Tɔhonɔ̀, mìabe Mawu a be èse kèwo mù sɔ le na mìawo ɖo àsi[18].

³Mìa ŋutɔ mì sɔ mìabe ŋùkuviwo kpɔ ènu kè Tɔhonɔ̀ wɔ̀ lè Peɔ̀r be èto ji lè vòdu Baal be ènyàa mè[19]. Àmè kèwo kpata jè Peɔ̀r be Baal yomè a, Tɔhonɔ̀ crɔ̃ woa kpata, lè mìa dòmè.

⁴Vɔ̀a mì, àmè kèwo ye wɔ̀ ànùkua na Tɔhonɔ̀, mìabe Mawu a, mì ci àgbè, kaka va na egbè.

⁵Kpɔɖa, mù le fìɔ mì èseawo ku ɖoɖoawo, sìgbè lekè Tɔhonɔ̀ Mawu nyè gblɔ̃ ɛ̀ na mùa nène, àleke be mìa wɔ̀ ɖo e ji, ne mì va yì ɖo ànyigbã kè mì la xɔ̀a jia.

⁶Mì le wo ɖo àsi, ne mìa wɔ̀ ɖo woa ji, ekèa ye la na mì àɖàŋù ku ènunya lè dùkɔ̃ kèwo la sè èse kèawo keŋuã be ŋùmè, àleke be wo la gblɔ̃ be: 'Dùkɔ̃ gã kèa, ènunya ku àɖàŋù kpò ye teŋu nɔ̀ e si!'

⁷Lè nyàwototo mèa, dùkɔ̃ gã kɛ ye lè, kè be vòduwo gogona ɛ̀, sìgbè lekè Tɔhonɔ̀, miabe Mawu a wɔ̀nà, gà ɖekpekpe gàmè kè mi gbe yɔ ɛ̀ kpòa nène ò?

⁸Eye dùkɔ̃ gã kɛ ye ɖo èse ku ɖoɖo kèwo ye sɔ̀gbè sìgbè èse kèa keŋu kè mù sɔ ɖo ŋùku mè na mì egbèa nène ò?

⁹Vɔ̀a, mì kpɔ nyuɛ̃ ɖe, ne mì mu gbà ŋlɔ̀be ènu kèwo mì kpɔ ku mìabe ŋùkuviwo ò. Wo mu gbà bu gbèɖe, lè mìabe èjìwo mè ò. Mì la fiɔ mìabe èviwo ku mìabe èviwo be èviwo,

¹⁰lekè gbè ŋua gbèa, mì nɔ̀tè ɖo Tɔhonɔ̀, mìabe Mawu a be ŋùkɔ̀, lè Horɛb be ètoa gbɔ, gbè kè gbè Tɔhonɔ̀ gblɔ̃ na mù be: 'Bɔ̀ dùkɔ̃a na mù! Mù la na, woa sè àpe ègbè, ne ma fiɔ wo lekè wo la nɔ si mù ɖo, lè woabe àgbè ŋùkèkèwo keŋu mè, lè ànyigbã ji, ne woa fiɔ woabe èviwo cã,'

¹¹lekè gbè ŋua gbè a, mì dɔ̃ va tɔtè ɖo èto a gbɔ: èzò le bì lè e mè, e le bìzò kaka yì tɔ jiŋùkusi, lè lilikpowo be èzã mè, lè èzã be vìvìti cricriwo mè.

¹²Tɔhonɔ̀ pò nupo na mì, so èzòa mè. Ègbè ɖe le pò nupo, mì le sè è, vɔ̀a, mì mu le kpɔ nɔ̀nɔmè ɖekpe ò. Ègbèa ɖèɖe kpò, mì sè[20].

¹³E ɖè yebe zòɖùɖua fiɔ mì, eye be gblɔ̃ na mì be mìa zɔ̃ ɖo Èse èwo kè be ŋlɔ̀ ɖo èkpe èvè ji na mìa ji, ne mìa sɔ le zòɖùɖu kèa ɖo àsi[21].

¹⁴Hùe ŋua nu kea, Tɔhonɔ̀ ɖè ègbè na mù be ma fiɔ mì èse ku ɖoɖo kèwo ji mì la zɔ̃ ɖo, ne mì ɖo ànyigbã kè ji mì la yì ɖo àlɔ̀ a jia.

¹⁵Mì ɖoŋù nyuɛ̃ ɖe be: Gbè kè gbè Tɔhonɔ̀ pò nupo na mì, so èzò mè, lè Horɛb be ètoa jia, mì mu kpɔ nɔ̀nɔmè ɖekpekpe ò.

¹⁶Mì mu gbà va yì wɔ̀ ènu ɖe be èkpetata kè la nyi vòdu ɖe[22], ŋusù ɖe, àlo nyɔ̃nù ɖe be nɔ̀nɔmè sɔ flù mìa ɖokoewo,

¹⁷mì mu gbà va yì wɔ̀ èlã kè zɔ̃nà lè ànyigbã ji, àlo èxè ɖe kè zrònà lè àya mè be nɔ̀nɔmè,

¹⁸mì mu gbà yì wɔ̀ èlã ɖe kè tana lè ànyigbãa, àlo, èlã ɖe kè nɔ̀nà èsì mè[23], àlo lè ègũmè be nɔ̀nɔmè ò.

¹⁹Mì mù gbà ɖe ŋùku ɖoɖa jiŋùkusi, la kpɔ dɔ̃ŋùkusu, wètri ku wètriviwo, jiŋùkusi be àhùakɔ̃wo, ne mìa va nɔ flù mìa ɖokoewo, be yèwoa jè èɖɛ̀ na wo, àlo, la sumɔ wo ò. Tɔhonɔ̀, mìabe Mawu a sɔ woa kpata na dùkɔ̃ kèwo keŋu lè jiŋùkusi gɔ̃mèawo.

²⁰Vɔ̀a, mìawo yaa, ɖe ye Tɔhonɔ̀ hlùɛ̃ mì to so Ejiptè kè nɔ̀ na mì sìgbè èkpozo kè wo sɔ srènà ègà yìbɔa nène, àleke be mìa trɔ zũ yebe dùkɔ̃, yebe ècrɔ̃nu, sìgbè lekè mì nyi ì egbèa nène[24].

²¹Gãkea, mìa ŋuti ye Tɔhonɔ̀ do àdɔ̀mèze ɖo ŋuti nyè ɖo, eye be kã àtãŋu be nyè mu la sò Yɔrdàn be ètɔ̀a, la ɖo ànyigbã nyuɛ̃ kè Tɔhonɔ̀, mìabe Mawu a sɔ le wɔ̀ ècrɔ̃nu na mìa ji ò[25].

²²Ekèa ŋutia, mù la ku lè ànyigbã kèa ji, kè nyè mu la sò Yɔrdàn be ètɔ̀a ò; vɔ̀a, mìawo ya, mì la sò ètɔ̀a, la yì xɔ̀ ànyigbã nyuɛ̃ ŋua.

²³Mì kpɔ nyuɛ̃ ɖe, ne mì mu gbà ŋlɔ̀be èzò kè Tɔhonɔ̀, mìabe Mawu ɖù ku mìa, ne mìa va ɖo vòdu, àlo, mìa va yì kpà ènu kèwo be èse Tɔhonɔ̀ do na mìa dòmètɔ ɖe be tata ò.

²⁴Ɖoa, Tɔhonɔ̀, àpo Mawu a, èzò bìnu ku Mawu hùãŋu ye be nyi[26].

²⁵Ne mì va yì jì èviwo ku tɔgbeyɔviwo, eye mì sĩ, lè ànyigbã kè ji mì le yìa, ne mì va yì wɔ̀ èvuɛ̃, sɔ wɔ̀ legba, àlo, ènu kèwo be èse Tɔhonɔ̀ do na mìawo dòmètɔ ɖe be tata, sɔ jè àgɔ̀ do Tɔhonɔ̀, mìabe Mawu a,

²⁶mù le tà jiŋùkusi ku ànyigbã na mì egbèa be: mì la crɔ̃ zè ɖèka, lè ànyigbã kè ji mì la ɖo àlɔ̀ a; mì mu la nɔ̀ e ji dìdi ɖe ò; mì la crɔ̃ gbidi-gbidi.

²⁷Tɔhonɔ̀ la kã mì hlɛ̃ ɖo dùkɔ̃wo dòmè, eye mìa dòmètɔ ɖewo kpò ye la kpɔ̀tɔ̀ la nɔ̀ èdù kèwo dòmè Tɔhonɔ̀ la kplɔ̀ mì yìa.

²⁸Eye, ne mì yì èdù ŋuawo mèa, mì la nɔ sumɔ vòdu kèwo àgbètɔ sɔ àlɔ̀ wɔ̀awo. Vòdu kèawo nyi àtiwo, èkpewo; wo mu kpɔna ènu ò, wo mu sènà ènu ò, wo mu ɖùnà ènu ò eye wo mu ɖo sèse lè lãmè ɖekpe cã ò.

²⁹Wàlɛbɛ ŋua ye mì la va nɔ ji Tɔhonɔ̀, mìabe Mawu a, eye, ne mì ji ì ku mìabe èjì blibo, ku mìabe èkla bliboa, mì la kpɔ ɛ̀.

³⁰Ne mì va lè vevesèse mèa, wàlɛbɛ kè ènu kèawo keŋu la va nɔ jɔ̀ ɖo mìa ji, lè èsɔ̀ mèa, wàlɛbɛ ŋua ye mì la trɔ va Tɔhonɔ̀, mìabe Mawu a gbɔ, wàlɛbɛ ŋua ye mì la sè ètonu na ɛ̀.

³¹Ɖoa, Tɔhonɔ̀, mìabe Mawu a, Mawu kè kuna ŋuzĩzĩ na àmèa ye be nyi. Mu la gble mì ɖɛ ò, mu la crɔ̃ mì ò, mu la ŋlɔ̀be èzò kè be ɖù ku mìa tɔwo ò.

³²Mì biɔ, ne woa tùxo na mì, ne woa gblɔ̃ blèmà mè be ènyà, ènu kèwo jɔ̀ gbè ɖe gbè, so kaka gà kè mè Mawu wɔ̀ àgbètɔ ɖo ànyigbã jia, mì biɔ, lè ànyigbã kplògòdòa keŋu ji, be ènu ɖe gbà jɔ̀, kè lòlò wu ènu kè Tɔhonɔ̀ wɔ̀a màa? Mì biɔ be wo gbà sè ènu ɖe kè wu eŋuã màa?

³³E jɔ̀ kpɔ be dùkɔ̃ ɖe sè, vòdu ɖe, le pò nupo lè èzò mè, sìgbè lekè mì sè èa nène, eye dùkɔ̃ kèa ci àgbè kpɔa?

³⁴E jɔ̀ kpɔ be vòdu ɖe va, be yèa sɔ dùkɔ̃ ɖe sɔ wɔ̀ yè tɔ̀, so dùkɔ̃ bu mè, to dodokpɔwo mè, to jèsìwo mè, to nùkunuwo mè, to àhùa wɔ̀wɔ ku yebe àlɔ̀ sɛ̃sɛ̃ vũvlũ mè, to àdìka sòso ku vɔ̃vɔ̃ dodo na àmè ji, sìgbè ènu kèwo keŋu, Tɔhonɔ̀, mìabe Mawu a wɔ̀ na mì, eye mìa ŋutɔ mì kpɔ lè Ejiptè a?

³⁵Mìawo yaa, wo na, mì kpɔ ènu kèawo keŋu, ne mìa sɔ nya be Tɔhonɔ̀ kpò ye nyi Mawu. Mawu bu mu gbà lè, tovò na ɛ̀ ò[27].

³⁶E na, mì sè yebe ègbè, so jiŋùkusi ke, ne bèa sɔ tù mì ɖo. E na mì kpɔ yebe èzò gãa, lè ànyigbã ji, eye be pò nupo, so e mè, na mì.

³⁷Kè be lɔ̃ mìa tɔgbewo ŋutia, e cã mì, àmè kèwo nyi woabe jìjimèviwoa. E kplɔ̀ mì to so Ejiptè, ku yebe àlɔ̀ sɛ̃sɛ̃a.

³⁸E nyà dùkɔ̃ gã bu kèwo trì àkɔ wu mìawo jo lè ŋùkɔ̀ na mì, ne mìa yì nɔ̀ woabe ànyigbã kè be sɔ le wɔ̀ ècrɔ̃nu na mì egbèa ji.

³⁹Ekèa ŋutia, mì kpɔ ɛ̀ jèsi egbèa, ne mìa nya ɛ̀ be Tɔhonɔ̀, ye nyi Mawu, lè jiŋùkusi ku ànyigbã ji; Mawu bu mu gbà lè ò.

⁴⁰Ekèa ŋutia, mì le yebe èse ku ɖoɖo kèwo mù sɔ le na mì egbèa ɖo àsi, àleke be ènu sia ènu ne nyɔ na mìa ku mìabe èviwo, ne mìa nɔ̀ àgbè dìdi, lè ànyigbã kè Tɔhonɔ̀, mìabe Mawu sɔ le na mìa ji kaka sɔyì.”

⁴¹Ekèa yomè a, Mosè cã èdù ètɔ̃ lè Yɔrdàn be ètɔ̀a godo, lè èwèzɛ̃pe,

⁴²ne woa nyi bèbèpe na àmè ɖe kè mu la jro ò, vɔ̀a, la wù àmè kè mu crì ò a. Ne àmè kè wù àmèa yì bè ɖo èdù kèawo dòmètɔ ɖe mèa, eŋuã, wo mu ɖo la wù ì ò.

⁴³Èdùawo ye nyi Besɛ̀r lè zògbè ji, lè èto-nyigbã gbàjà kè nyi Rubɛ̀n be jìjimèviwo tɔ̀a, Ramɔ̀t, lè Gilead-nyigbã kè nyi Gad be jìjimèviwo tɔ̀a ku Golàn-nyigbãa, lè Basàn kè nyi Manasè be jìjimèviwo tɔ̀a.

⁴⁴Mawu be èse kè Mosè sɔ na Izràɛlviwoa ye nyi ekèa.

⁴⁵Ekèawo ye nyi ɖoɖo ku èse kèwo Mosè sɔ do àsi na Izràɛlviwo, ekè wo to so Ejiptè,

⁴⁶wàlɛbɛ kè wo lè Yɔrdàn be ètɔ̀a godo, lè bàlìa mè, jè ŋùkɔ̀ Bɛt-Peɔr. Sihɔ̀n, Àmorìtɔwo be èfìɔ kè nɔ̀nà Hɛsbɔ̀n be ànyigbã jia ye wo le. Mosè ku Izràɛlviwo ɖù e ji, kè wo to so Ejiptè a,

⁴⁷wo xɔ̀ yebe ànyigbã ku Ɔg, Basàn be èfìɔa cã be ànyigbã. Èfìɔ kèawo nyi Àmorìtɔwo be èfìɔ èvè kèwo lè Yɔrdàn be ètɔ̀a godo, lè èwèzɛ̃pe,

⁴⁸so Àroà, kè lè Arnɔ̀n be ètɔ̀a nu, kaka sɔ yì Sihɔ̀n be ètoa gbɔ. Wo gbà yɔna èto kèa be Hɛrmɔ̀n.

⁴⁹Wo xɔ̀ Àrabà keŋu, lè Yɔrdàn be ètɔ̀a godo, lè èwèzɛ̃pe lɔ̀ge, kaka sɔ yì ɖo Àrabà be gbàgàa nu, lè Pisgà be bàlìa mè.