Read gen Èsea gbìgbɔ̀ hlɛ̃ 7 Bible Online

Èsea gbìgbɔ̀ hlɛ̃ 7 - gen bible

Èsea gbìgbɔ̀ hlɛ̃ 7

¹Ne Tɔhonɔ̀, mìabe Mawu a kplɔ̀ mì ɖo ànyigbã kè la sù mìa sia jia, e la nyà dùkɔ̃ sùgbɔ jo lè ŋùkɔ̀ na mì. Dùkɔ̃ kèawo ye nyi Hitìtɔwo, Girgazìtɔwo, Àmorìtɔwo, Kanàntɔwo, Perizìtɔwo, Hivìtɔwo ku Yebusìtɔwo, woa kpata, wo lè dùkɔ̃ adrɛ̃[36] kèwo sùgbɔ eye wo sɛ̃ŋu wu mì cã.

²Ne Tɔhonɔ̀, mìabe Mawu a sɔ wo do àsi na mì, eye mì ɖù woa jia, mì la crɔ̃ wo gbidi. Mì mu gbà ɖùzò ɖekpe ku wo ò. Mì mu gbà ku ŋuzĩzĩ na wo ò.

³Mì mu la ɖè èsrɔ̃ lè woa dòmè ò; mì mu la sɔ mìabe nyɔ̃nùviwo na woabe ŋusùviwo, ne woa ɖè ò, eye mì mu la sɔ woabe nyɔ̃nùviwo na mìabe ŋusùviwo, ne woa ɖè ò,

⁴ɖoa, ekèa la na be mìabe ŋusùviwo la trɔ lè yo nyè mè, eye wo la yì nɔ sɛ̃ vòduwo[37] Ne e va e mè nènea, Tɔhonɔ̀ be àdɔ̀mèze la bìzò ɖo mì ŋuti, eye be la crɔ̃ mì zè ɖèka.

⁵Ènu kè mì la wɔ̀ na dùkɔ̃ kèawoa ye nyi ekèa: mì la gbã woabe vɔsakpewo; mì la kãkã woabe èkpeliwo; mì la ŋɛ̃ woabe vòdu-tiwo; mì la tɔzò woabe legbawo.

⁶Ɖoa, mìawo ya, dùkɔ̃ kè ŋuti wo kɔ̀ na Tɔhonɔ̀, mìabe Mawu a ye mì nyi; mìawo ye Tɔhonɔ̀, mìabe Mawu cã, ne mìa nyi dùkɔ̃ kè la nyi ye ŋutɔ tɔ̀[38], lè dùkɔ̃ kèwo keŋu lè ànyigbã jiawo dòmè.

⁷Mu nyi be ɖe ye mì sùgbɔ wu dùkɔ̃ kpɔ̀tɛawo keŋu, ŋuti ye Tɔhonɔ̀ cã mì, eye be lɔ̃ mì lekea ɖo ò. Mìabe hɛ̃hlɛ̃ mè bòhũ ye mu sù ènu ɖekpe, lè dùkɔ̃wo dòmè ò.

⁸Vɔ̀a, ne Tɔhonɔ̀ sɔ yebe àlɔ̀ sɛ̃sɛ̃ kplɔ̀ mì to, eye be xɔ̀ mì plè so Faraɔ̀n, Ejiptè be èfìɔ kè gbɔ mì nyi kluviwo lèa sia, ɖe ye Tɔhonɔ̀ lɔ̃ mì, eye be wɔ̀ ɖo àjɔ̀gbè kè be fìã na mìa tɔgbewoa ji.

⁹Ekèa ŋutia, mìa nya be Tɔhonɔ̀, mìabe Mawu a ye nyi Mawu, Mawu kè nyi Mawu ŋutɔ-ŋutɔa. E lena yebe zòɖùɖua ku yebe ànùkuawɔ̀wɔ ɖotè na àmè kèwo lɔ̃ ɛ̀, eye wo le yebe èsewo ɖo àsia, kaka na jìjimè èkà èwìvɔàtɔ̃.

¹⁰Vɔ̀a, e dɔ̃nàto na àmè kèwo crì ìa trolo[39]. Mu gblena wo ɖɛ ò. E crɔ̃na wo zè ɖèka.

¹¹Mì la le ɖoɖo, èse ku èkɔ̀do kèwo be ègbè mù le ɖè na mì egbèa, ɖo àsi.

¹²Ne mì le èto ɖo ɖoɖo kèawo ŋuti, eye mì wɔ̀ ɖo woa jia, Tɔhonɔ̀, mìabe Mawu a cã la le zòɖùɖua ku ànùkua kè be àjɔ̀gbè be fìã na mìa tɔgbewoa ɖo àsi.

¹³E la lɔ̃ mì, la tusì na mì, eye be la na mì la jì ɖo e ji kpe è; e la tusì na mìabe àdɔ̀mèviwo ku mìabe àgblè mè nukuwo, mìabe èlù, mìabe àhà yeye, mìabe àmì, mìabe ènyì do àmìwo ku mìabe àlɛ̃-nɔwo, lè ànyigbã kè be àjɔ̀gbè be fìã be yè la sɔ na mìa tɔgbewoa.

¹⁴Sìtu la nɔ̀ mìa ji wu dùkɔ̃wo keŋu. Èkò mu la nɔ̀ mìabe ànyigbã ji, lè ŋusù gbɔ, àlo, lè nyɔ̃nù gbɔ ò. Èkò mu la nɔ̀ mìabe èlãhawo cã dòmè ò.

¹⁵Tɔhonɔ̀ la ɖè èdɔ̀lelewo keŋu ku Ejiptè be èdɔ̀ vuɛ̃, crɔ̃ àmè, xɔ̀ lè àmè ŋuti kèwo kpata mì nya nyuɛ̃ ɖeawo jo lè mìa dòmè. Mu la na èdɔ̀ kèawo la ba mì ò, vɔ̀a Tɔhonɔ̀ la ɖo wo ɖoɖa àmè kèwo keŋu crì mìa gbɔ.

¹⁶Mì la crɔ̃ dùkɔ̃ kèwo keŋu Tɔhonɔ̀, mìabe Mawu la do àsi na mì, ŋuzĩzĩ màku na wo. Mì mu la sɛ̃ woabe vòduwo ò; èmɔ̀tetre be nyi na mì.

¹⁷Ne mì susu be 'Dùkɔ̃ kèawo mètɔwo sùgbɔ wu mi; leke mi la wɔ̀, la teŋu nyà wo jo, la xɔ̀ woa tèpe ò a?'

¹⁸Mù gbà vɔ̃ wo ò! Mì nɔ ɖoŋù ènu kè Tɔhonɔ̀ mìabe Mawu wɔ̀ ku Faraɔ̀n, kudo Ejiptè dùkɔ̃ bliboa.

¹⁹Mì nɔ ɖoŋù ŋusɛ̃dɔ gã kèwo mìawo ŋutɔ mì kpɔ ku mìabe ŋùkuviwo, mì nɔ ɖoŋù jèsì ku ŋùdãnu kèawo, mì nɔ ɖoŋù Tɔhonɔ̀, mìabe Mawu be àlɔ̀ sɛ̃sɛ̃ kè be vlũ, wàlɛbɛ kè be ɖè mì to so Ejiptè a, ɛ̃ɛ! Tɔhonɔ̀ mìabe Mawu la gbà wɔ̀ nènea ku dùkɔ̃ kèwo keŋu la do vɔ̃vɔ̃ na mìa.

²⁰Tɔhonɔ̀, mìabe Mawu a la ɖo àdãgbãwo ɖoɖa wo ŋutɔ cã, kaka na gà kè mè woa dòmètɔ kèwo gbà kpɔ̀tɔ̀, eye wo le bè do mìa, kpata la crɔ̃a.

²¹Mì mu gbà hũhũ lè ŋùkɔ̀ na wo ò, ɖoa, Tɔhonɔ̀, mìabe Mawu lè mìa dòmè; Mawu gã, kè ŋuti vɔ̃vɔ̃ lèa ye be nyi.

²²Tɔhonɔ̀, mìabe Mawu a la nyà dùkɔ̃ kèawo lè ŋùkɔ̀ na mì, ɖèka ɖèka. Mì mu la teŋu crɔ̃ woa kpata, zè ɖèka ò. Ne mu nyi nène ò a, èlã wɔ̀adãwo la jì ɖo e ji, eye ekèa la ɖè èfũ na mì.

²³Gãkea, Tɔhonɔ̀, mìabe Mawu a la do èdù kèawo àsi na mì; e la do àdìka sò àmè gãɖe woa mè, kaka na gà kè mè wo la crɔ̃ keŋu vɔ̀a.

²⁴E la do woabe èfìɔwo àsi na mì, eye mì la gũ woabe nyikɔwo lè ànyigbã ji.

²⁵Mì la tɔzò woabe vòduwo be legbawo kpata. Sìka ku klòsalò kè wo sɔ ɖo àcɔ na woa mu gbà tre èmɔ̀ na mì, ne mìa jro la sɔ wo na mìa ɖokoe ò, ɖo ènu nyɔŋu wo nyi na Tɔhonɔ̀, mìabe Mawu a.

²⁶Mì mu la sɔ bùsu-nu ɖekpe ɖo mìabe àxomè ò; ne mu nyi nène ò a, mìawo ŋutɔ cã, mì la trɔ ènu nyɔŋu kè wo la crɔ̃ gbidi, sìgbè woawo ke nènea. Mì ɖo la crì wo gbidi, eye wo ɖo la nyɔŋu na mì, ɖoa, wo la crɔ̃ wo keŋu, ɖoa kpɛ̃sɛ̃ lè woa ji.