Read gen Yòhanɛ̀s 1 Bible Online

Yòhanɛ̀s 1 - gen bible

Yòhanɛ̀s 1

¹So gɔ̃mèjèje a, Ènyàa lè; Ènyàa nɔ̀ ku Mawu, eye Ènyàa nyi Mawu.

²Eye e nɔ̀ ku Mawu so gɔ̃mèjèje a.

³Mawu ɖo ènuwo keŋu to e ji; wo mu ɖo ènu ɖekpe tovò lè e ŋuti ò.

⁴E ye mè àgbè lè, eye àgbè a nyi kɛ̃klɛ̃ na àmèwo.

⁵Eye kɛ̃klɛ̃a kɔ̀nà lè vìvìti mè; vɔ̀a vìvìtia mu xɔ̀ ɛ̀ ò.

⁶Àmè ɖe va, ekè Mawu dɔ̃ ɖoɖaa, yebe nyikɔ ye nyi Yòhanɛ̀s

⁷àmè ŋua va la nyi ɖàsèfo, ne bèa ɖù ɖase so kɛ̃klɛ̃a ŋuti, ne àmèwo keŋu ne xɔ̀sè to e ji.

⁸Mu nyi e ye nyi kɛ̃klɛ̃a ò, vɔ̀a, e va ne bèa ɖù ɖase so kɛ̃klɛ̃a ŋuti.

⁹Ènyàa nyi kɛ̃klɛ̃ àdodoe kè va xixea mè, ne bèa klɛ̃ na àgbètɔwo keŋu.

¹⁰E lè xixea mè; eye Mawu ɖo xixea to e ji; vɔ̀a xixea mu jèsi ì ò.

¹¹E va ye ŋutɔ ye tɔ̀wo gbɔ, vɔ̀a, ye tɔ̀wo mu xɔ̀ ɛ̀ ò.

¹²Vɔ̀a àmè kèwo xɔ̀ ɛ̀, eye wo xɔ̀ yebe nyikɔ ji sè a, e na wo ŋusɛ̃ be woa trɔ zũ Mawu be èviwo.

¹³Wo mu trɔ zũ Mawu be èviwo, to xixea be ɖoɖo, àlo àlekè ye àmè jìnà èvi nène ò, vɔ̀a Mawu ŋutɔ ye na wo àgbè yeye.

¹⁴Eye ènyàa trɔ zũ ŋutilã, eye be nɔ̀ mia dòmè, ɖɔ ku màje kudo nyàwo. Mi kpɔ yebe gogoa, gogo kè Èvi àkòŋùgòa xɔ̀ so Ètɔa gbɔa.

¹⁵Yòhanɛ̀s ɖù ɖase so e ŋuti gblɔ̃ be: “Àmè kè be ènyà mù to na mì sãa be: 'àmè ɖe lè yo nyè mè gbãnà, vɔ̀a, e jè ŋùkɔ̀ na mù ɖo e jɔ̀ gbɔ̀xue mù jɔ̀.'”

¹⁶Đo yebe ɖɔɖɔ mè, ye mia keŋu mi xɔ̀ màje ɖo màje ji lè.

¹⁷Ne Mosè ji ye èseawo to vaa, Yesù Kristò ji ye màje ku nyàwo a to va.

¹⁸Àmè ɖekpe mu kpɔ Mawu kpɔ ò; Mawu be Èvi àkòŋùgò, kè nyi Mawu eye be gbà le Àta gbɔa ye ɖè è fiɔ mi.

¹⁹Ekèa ye nyi Yòhanɛ̀s be ɖase, wàlɛbɛ kè Yudàviwo dɔ̃ mawunɔwo ku Levìwo so Yèruzàlɛm, be woa yì biɔ ɛ̀ sè be: “Àmè kɛ ye wò nyi ò?”

²⁰Mu mɔ ò, eye e hũ e mè be: “Mu nyi ènyè ye nyi *Mɛ̀sia ò.”

²¹Eye wo gbà biɔ ɛ̀ be: “Àmè kɛ koŋu ye wò nyi ò? Èwò ye nyi Eliyaa?” E ɖo e ŋuti be: “Ào! Mu nyi ènyè ye ò.” Wo gbà biɔ ɛ̀ be: “Èwò ye nyi Mawu be gblɔ̃ɖɛtɔa?” E ɖo e ŋuti be: “Ào.”

²²Wo gbà biɔ ɛ̀ be: “Àmè kɛ ŋutɔ koŋu ye wò nyi ò? Ne mia yì ɖo ègbè na àmè kèwo ye dɔ̃ mi ɖoɖa gbɔ wòa. Àmè kɛ ye wò ŋutɔ wò gblɔ̃nà be yè nyi ò?”

²³E ɖo e ŋuti be: “Ènyè ye nyi àmè kè be ègbè le ɖì lè zògbè ji be: 'Mì jɔ̀ Tɔhonɔ̀ be èmɔa.'” Sìgbè àlekè Mawu be gblɔ̃ɖɛtɔ, Ezayà gblɔ̃a nène.

²⁴Farizìwo lè àmè kèwo wo dɔ̃ ɖoɖa Yòhanɛ̀s gbɔawo dòmè.

²⁵Wo biɔ ɛ̀ be: “Kè wò mu nyi *Mɛ̀sia, àlo Èli, àlo Mawu be gblɔ̃ɖɛtɔ òa, nukɛ ŋuti ye wò jo le lè mawusi na àmèwo ɖo ò?”

²⁶Yòhanɛ̀s ɖo e ŋuti na wo be: “Ènyè yaa, mù le lè mawusi na mì kudo èsì. Vɔ̀a àmè ɖe lè mìa dòmè, ekè mì mu jèsi ò;

²⁷àmè ŋua ye nyi àmè kè le yo nyè mè gbãnàa; nyè mu sù la tu yebe àfɔ̀kpa-kawo ŋutɔ cã ò.”

²⁸Ènu kèawo jɔ̀ lè Betanìa, lè Yɔrdàn be ètɔ̀a godo, àfi kè Yòhanɛ̀s le lè mawusi na àmèwo lèa.

²⁹Ekè èŋù kèa, Yòhanɛ̀s kpɔ Yesù zɔ̃ gbãnà e gbɔ, eye be gblɔ̃ be: “*Mawu be àlɛ̃vi kè la va sɔ xixea be èvuɛ̃wo yìa ye nyi ekèa.

³⁰Àmè kèa ye nyi àmè kè ŋuti mù gblɔ̃ so be: 'Àmè ɖe jè yo nyè mè gbãnà, ɖo, e jè ŋùkɔ̀ na mù, eye e jɔ̀ gbɔ̀xue mù jɔ̀.'

³¹Nyè ŋutɔ nyè mu jèsi ì sãa ò. Vɔ̀a, mù va le lè mawusi na àmèwo kudo èsì, ne ma sɔ ɖè è fiɔ Izràɛl dùkɔ̃a.”

³²Yòhanɛ̀s gbà gblɔ̃ so e ŋuti be: “Mù kpɔ Gbɔ̃gbɔ̃ a, be lè sìgbè àhɔ̃ne nène, ɖì so jiŋùkusi va nɔ̀ e ji.

³³Nyè mu kpɔ nya àmè kè ŋùmè ye be nyia ò. Vɔ̀a, Mawu kè dɔ̃ mù ɖoɖa be ma lè mawusi na àmèwo kudo èsìa, gblɔ̃ na mù be: 'Àmè kè ji ye wò la kpɔ Gbɔ̃gbɔ̃ a la ɖì va, eye be la nɔ̀ ɛ̀ jia, àmè ŋua ye nyi àmè kè la sɔ Gbɔ̃gbɔ̃ Kɔ̀kɔ̀ɛ a lè mawusi na àmèwo.'

³⁴Eye nyè ya mù kpɔ, eye mù gbà le ɖù ɖase be, àmè kèa ye nyi Mawu be Èvia.”

³⁵Yebe èŋù kè gbèa, Yòhanɛ̀s gbà lè funua ke kudo yebe *nukplavi èvè.

³⁶Eye, kè be kpɔ Yesù va le yìa, e gblɔ̃ be: “Kpɔɖa, *Mawu be àlɛ̃via ye nyi ekèa!”

³⁷Ekè Yòhanɛ̀s be *nukplavi èvèawo sè ènu kè be gblɔ̃a, wo jè Yesù yomè.

³⁸Yesù trɔ kpɔ ŋùgbe eye be kpɔ be Yòhanɛ̀s be nukplaviawo jè yè yomè. E biɔ wo be: “Nukɛ mì le ji ò?” Wo ɖo e ŋuti na ɛ̀ be: “Rabì, e gɔ̃mè ye nyi 'Ènufiɔtɔ', fikɛ ye wò nɔ̀nà ò?”

³⁹E gblɔ̃ na wo be: “Mì va kpɔ àfi kè mù nɔ̀nàa ɖa.” Wo kpàsà ɛ̀ do yì jèsi àfi kè be nɔ̀nàa, eye wo nɔ̀ e gbɔ gbè ŋua gbè. Ènu kèawo kpata le jɔ̀, wètrɔ gà ènè mè lɔ̀ge.

⁴⁰Nukplavi èvè kèwo ye sè Yòhanɛ̀s be ènyà, eye wo jè Yesù yomèa dòmètɔ ɖèka ye nyi Ãdre, Simɔ̀n Petrò be nɔ̀vi.

⁴¹Ãdre yì kpɔ nɔ̀via Simɔ̀n cucugbã, eye be gblɔ̃ na ɛ̀ be: “Mi kpɔ *Mɛ̀sia.” E gɔ̃mè ye nyi “Kristò”[1].

⁴²Eye e kplɔ̀ ɛ̀ va Yesù gbɔ. Yesù kpɔ ɛ̀ dũu, gblɔ̃ na ɛ̀ be: “Èwò ye nyi Simɔ̀n, Yòhanɛ̀s be èvi. Wo la yɔ wò be Kefàs.” E gɔ̃mè ye nyi: “Àkpã[2].”

⁴³Yebe èŋù kè gbèa, Yesù ɖo e be yèa yì Galilea. E dogò Filipò lè èmɔ ji, eye be gblɔ̃ na ɛ̀ be: “Kpàsà mù do!”

⁴⁴Filipò so Bɛtsaida, Ãdre ku Petrò be èdù mè.

⁴⁵E yì kpɔ Natanàɛl, gblɔ̃ na ɛ̀ be: “Mi kpɔ àmè kè be ènyà Mosè to na mi lè Èse Xoma a mèa, àmè kè ŋuti gblɔ̃ɖɛtɔwo cã pò nupo soa, Yesù, Yozɛ̀f be èvi, Nazarɛttɔ̀a ye.”

⁴⁶Vɔ̀a Natanàɛl gblɔ̃ na Filipò be: “Ènu ɖɔ̀hũi ɖe teŋu to so Nazarɛta?” Filipò ɖo e ŋuti na ɛ̀ be: “Va, ne wòa kpɔ.”

⁴⁷Yesù kpɔ Natanàɛl gbãnà ye gbɔ, eye be gblɔ̃ so e ŋuti be: “Mì kpɔ ɖa, Izràɛlvi àdodoe, kè mè àjè-zɔ̃li ɖekpe mu lè òa ye nyi ekèa.”

⁴⁸Natanàɛl biɔ Yesù be: “Fikɛ ye wò jèsi mù so ò?” Yesù ɖo e ŋuti na ɛ̀ be: “Wàlɛbɛ kè wò lè vòtia gɔ̃mèa, gbɔ̀xue Filipò la yɔ wòa, mù kpɔ wò xoxo.”

⁴⁹Natanàɛl gbà gblɔ̃ na ɛ̀ be: “Ènufiɔtɔ, èwò ye nyi Mawu be Èvia, èwò ye nyi Izràɛl be èfìɔa!”

⁵⁰Yesù ɖo e ŋuti na ɛ̀ be: “Ekè mù gblɔ̃ na wò be mù kpɔ wò lè vòtia gɔ̃mèa, wò xɔ̀sè. Vɔ̀a wò la gbà kpɔ ènu kèwo wu ekèawoa!”

⁵¹Yesù yì e ji, gblɔ̃ be: “Nyàwo mù le to na mì: mì la kpɔ jiŋùkusi la hũ, eye Mawu be àtikplɔtɔwo la nɔ̀ yì ji, la nɔ̀ gbɔ̀ va *Àgbètɔ be Èvia ji!”