Read gen Yòhanɛ̀s 10 Bible Online

Yòhanɛ̀s 10 - gen bible

Yòhanɛ̀s 10

¹Yesù gblɔ̃ be: “Nyàwo ye mù le to na mì: àmè kè mu to àgbo nu ɖo àlɛ̃wo be èkpa a mè ò, vɔ̀a lia èkpa, to àfi bu ɖo e mèa, àmè ŋua, fìãfìtɔ kudo ènu bàɖàwɔ̀tɔ ye be nyi.

²Vɔ̀a, àmè kè to àgbo nu ɖo e mèa, nyi àlɛ̃awo be kplɔ̀tɔ.

³Àgbonuɖiatɔa hũnà àgboa na ɛ̀, eye àlɛ̃awo sènà yebe ègbè. E yɔna nyikɔ kè be sɔ na yebe àlɛ̃, ɖè sia ɖèa, eye be ɖènà wo to.

⁴Ne e kplɔ̀ woa kpata to vɔ̀a, e jènà ŋùkɔ̀ na wo, eye Àlɛ̃awo kplɔ̀nà ɛ̀ do, ɖo wo jèsi yebe ègbè.

⁵Wo mu la kplɔ̀ àmè kè wo mu jèsi òa do gbèɖe ò. Bòhũa, wo la si, ɖo wo mu jèsi yebe ègbè ò.”

⁶Yesù do èlo kèa na wo, vɔ̀a, wo mu ŋɔjè ènu kè be le gblɔ̃ na woa mè ò.

⁷Yesù gbà gblɔ̃ be: “Nyàwo mù le to na mì: ènyè ye nyi àlɛ̃wo be àgboa.

⁸Àmè kèwo kpata jè ŋùkɔ̀ na mù vaa, fìãfìtɔwo kudo èvuɛ̃wɔ̀tɔwo ye wo nyi. Vɔ̀a àlɛ̃awo mu ɖo èto wo ò.

⁹Ènyè ye nyi àgboa: àmè kè to ji nyè ɖo e mèa, e la gã. E la nɔ yì, la nɔ gbɔ̀, eye be la nɔ kpɔ ènu ɖù.

¹⁰Fìãfìtɔ yaa, vana kpò be yèa fìfĩ, yèa wù àmè, yèa gble ènu. Ènyè yaa, mù va be àgbètɔwo ne nɔ̀ àgbè, ne woa kpɔ àgbè ɖo àgbè ji.

¹¹Ènyè ye nyi àlɛ̃kplɔ̀tɔ nyuɛ̃a. Àlɛ̃kplɔ̀tɔ nyuɛ̃a sɔna yebe àgbè sɔ sana vɔ ɖo yebe àlɛ̃wo ta.

¹²Àmè kè nyi àgbãtè-lɛ̃kplɔ̀tɔ, kè àlɛ̃awo mu nyi ye tɔ̀ òa, ne e kpɔ gbète gbãnà a, e tànàsi àlɛ̃awo ɖɛ, eye be sina, eye gbètea lena àlɛ̃awo, eye be kãkãnà wo,

¹³kè be nyi àgbãtè-lɛ̃kplɔ̀tɔa, ŋuti mu kãmana na àlɛ̃awo ò.

¹⁴Ènyè ye nyi àlɛ̃kplɔ̀tɔ nyuɛ̃a. Mù jèsi àlɛ̃ nyèwo, eye àlɛ̃ nyèwo cã jèsi mù,

¹⁵sìgbè àlekè Ètɔ nyè jèsi mù, eye ènyè cã mù jèsi Ètɔ nyèa nène. Mù sɔ àgbè nyèa savɔ ɖo àlɛ̃ nyèawo ta.

¹⁶Àlɛ̃ buwo cã lè àsi nyè, ekèwo mu nyi èkpa kèa mè tɔ̀wo ò. E lè veve ɖe be, ma kplɔ̀ woawo cã va. Wo la sè àpe ègbè, àleke be àlɛ̃ha ɖèka kudo àlɛ̃kplɔ̀tɔ ɖèka kpò ye la nɔ̀ ànyi.

¹⁷Àta lɔ̃ mù, ɖo mù sɔ àgbè nyè na, ne ma, trɔ va xɔ̀ ɛ̀.

¹⁸Àmè ɖe mu le xɔ̀ ɛ̀ lè àsi nyè ò. Nyè ŋutɔ ye jro sɔ ɛ̀ le na. Mù ɖo ŋusɛ̃ la sɔ ɛ̀ na, eye mù gbà ɖo ŋusɛ̃ la gbìgbɔ̀ xɔ̀ ɛ̀. Ègbèɖèɖe kèa ye mù xɔ̀ so Ètɔ nyè gbɔ.”

¹⁹Ènyà kèawo gbà hɛ̃ màma va Yudàviwo dòmè.

²⁰Àmè sùgbɔ lè woa dòmè le gblɔ̃ be: “Gbɔ̃gbɔ̃ vuɛ̃ ye le ɖè èfũ na ɛ̀; èta gbɔ gble na ɛ̀. Nukɛ ŋuti ye mì le ɖo èto è ò?”

²¹Àmè buwo le gblɔ̃ be: “Mu nyi àmè kè gbɔ̃gbɔ̃ vuɛ̃ le ɖè èfũ na a be ènyàgbɔ̃gblɔ̃ ye nyi e ŋua ò. Gbɔ̃gbɔ̃ vuɛ̃ la teŋu hũ ŋùkuvi na ŋùvìnɔ̀a?”

²²Wàlɛbɛ ŋuaa, wo lè ɖù mawuxɔa be kpekpe be àzã le Yèruzàlɛm, lè àvìvɔ hùenu.

²³Yesù le yì, le gbɔ̀ le mawuxɔa be àfi kè wo yɔna be Salomɔ̀n be àwaa mè.

²⁴Yudàviwo pòxla do e, eye wo gblɔ̃ na ɛ̀ be: “Kaka na gà kɛ mè ye wò la gble mi ɖo mànya mè ò? Ne èwò ye nyi Mɛ̀siaa, to è na mi, ne mia nya ɛ̀.”

²⁵Yesù ɖo e ŋuti na wo be: “Mù to è na mì. Vɔ̀a mì mu xɔ̀ ji nyè sè ò. Èdɔ kèwo mù le wɔ̀ lè Ètɔ nyè be nyikɔ mèawo, le ɖù ɖase so ŋuti nyè.

²⁶Vɔ̀a mì mu xɔ̀sè ò, ɖo mì mu lè àlɛ̃ nyèwo dòmè ò.

²⁷Àlɛ̃ nyèwo sènà àpe ègbè. Mù jèsi wo, eye wo kplɔ̀nà mù do.

²⁸Ènyè yaa, mù nana wo àgbè mà-vɔ. Wo mu la ku gbèɖe ò. Àmè ɖe cã mu teŋu xɔ̀ wo lè àsi nyè ò.

²⁹Ètɔ nyè kè sɔ wo do àsi na mùa wu ènu sia ènu eye àmè ɖe mu teŋu gbĩ ènu ɖe lè Àta be àlɔ̀ mè ò.

³⁰Nyè kudo Àta, mi lè ɖèka.”

³¹Yudàviwo gbà fɔ̀ èkpe be yèwoa pò è wù.

³²Vɔ̀a Yesù gblɔ̃ na wo be: “Mù wɔ̀ èdɔ nyuɛ̃ kèwo Ètɔ nyè ɖo na mùawo sùgbɔ lè mìabe ŋùkumè. Èdɔ kèawo dòmètɔ kɛ ŋuti ye mì le ji la pò mù èkpe wù ɖo ò?”

³³Yudàviwo ɖo e ŋuti na ɛ̀ be: “Mi mu le ji la pò wò èkpe wù ɖo èdɔ nyuɛ̃ ɖe ŋuti ò. Vɔ̀a bùsu-nya kè wò le gblɔ̃a ŋuti ye; ɖo èwò kè nyi àgbètɔa, wò sɔ ɖokoe wò sɔ wɔ̀ Mawu.”

³⁴Yesù gblɔ̃ na wo be: “Wo mu ŋlɔ̀ ɖo mìabe Èse Xoma mè be: 'Mù gblɔ̃ be: mì nyi mawuwo òa?'

³⁵E va vana e mè be, èsea yɔna àmè kèwo wo gblɔ̃nà mawunya naawo be mawuwo, Vɔ̀a, àmè ɖekpe mu la teŋu gũ Ŋɔ̀ŋlɔ̃awo ò.

³⁶Mì le pò nupo ɖo àmè kè ŋuti Àta kɔ̀, be dɔ̃ ɖoɖa xixea mèa ŋuti be: 'Wò le gblɔ̃ bùsu-nya', ɖo mù gblɔ̃ be ènyè ye nyi Mawu be Èvia.

³⁷Ne nyè mu le wɔ̀ Ètɔ nyè be èdɔwo òa, mì mu gbà xɔ̀ ji nyè sè ò.

³⁸Vɔ̀a, ne mù le wɔ̀ woa, ne mì mu xɔ̀ ji nyè sè cã òa, mì xɔ̀ èdɔawo ji sè, ne mìa nya, ne mìa ŋɔjè e mè be Àta lè mè nyè, eye nyè cã mù lè Àta mè.”

³⁹Kè Yesù gblɔ̃ ènyà kèa, wo gbà ji la le è, vɔ̀a, e glo wo.

⁴⁰Yesù gbà trɔ yì Yɔrdàn be àgo ɖèa ji, àfi kè Yòhanɛ̀s le lè mawusi na àmèwo lè cucugbãa, eye be nɔ̀ funua.

⁴¹Àmè sùgbɔ yì kpɔna ɛ̀ lè funu. Wo gblɔ̃nà be: “Yòhanɛ̀s mu wɔ̀ ŋùdãdɔ ɖe ò, vɔ̀a, ènu kèwo kpata be gblɔ̃ so ŋusù kèa ŋutia ye nyi nyàwo.”

⁴²Eye àmè sùgbɔ xɔ̀ Yesù ji sè lè funua.