Read gen Yòhanɛ̀s 11 Bible Online

Yòhanɛ̀s 11 - gen bible

Yòhanɛ̀s 11

¹Ŋusù ɖe kè tɔ̀ Lazaròa jè èdɔ̀. E so Betanìa, Mari ku nɔ̀via nyɔ̃nù Martà be èdù mè.

²Mari ye nyi àmè kè kɔ̀ àmì huɛ̃ titi ɖo Tɔhonɔ̀ be àfɔ̀wo ji kpɔ, eye be sɔ ye ŋutɔ be èɖà sɔ tutu woa. Nɔ̀via Lazarò ye jè èdɔ̀.

³Nɔ̀vi nyɔ̃nùawo dɔ̃ àmè ɖoɖa Yesù be woa to na ɛ̀ be: “Tɔhonɔ̀, èxlɔ̃ wo jè èdɔ̀.”

⁴Kè Yesù sè àŋɛ̀a, e gblɔ̃ be: “Èdɔ kèa mu la hɛ̃ èku va ò. Vɔ̀ bòhũa, e la na Mawu la ɖè yebe gogo fiɔ, eye to ekèa jia, àmèwo la na gogo Mawu be Èvia cã.”

⁵Yesù lɔ̃ Martà ku nɔ̀via nyɔ̃nù Mari kudo Lazarò.

⁶Yesù sè be Lazarò jè èdɔ̀, gãkea, e gbà wɔ̀ ŋùkèkè èvè lè àfi kè be lèa.

⁷E yomè a, e gblɔ̃ na yebe nukplaviwo be: “Mì va mia trɔ yì Yudeà.”

⁸Nukplaviawo gblɔ̃ na ɛ̀ be: “Ènufiɔtɔ, nyìsɔ̀ kpò ye Yudàviwo ji la pò wò èkpe wù, lè Yudeà, eye wò gbà le ji la trɔ yì funua kea?”

⁹Yesù ɖo e ŋuti na wo be: “Mu nyi gàpòpo woèvè ye lè ŋùkèkè ɖèka mèa? Ne àmè ɖe le zɔ̃ lè ŋùkèkè mèa, mu klɛ̃nà àfɔ̀ ò, ɖo e le kpɔ xixea be kɔ̀kɔ̀ɛ.

¹⁰Vɔ̀a, ne àmè ɖe le zɔ̃ lè èzã mèa, e klɛ̃nà àfɔ̀, ɖo kɔ̀kɔ̀ɛ mu lè e mè ò.”

¹¹Eŋuã yomè a, Yesù gbà gblɔ̃ na wo be: “Miabe èxlɔ̃ Lazarò le dɔ̃ àlɔ̃, vɔ̀a, mù la yì fɔ̃ ɛ̀.”

¹²Yebe nukplaviawo gblɔ̃ na ɛ̀ be: “Ènufiɔtɔ, ne àlɔ̃ be le dɔ̃a, e la gã.”

¹³Lazarò be èku ye Yesù le gblɔ̃ na wo. Vɔ̀a, woawo yaa, wo sɔ ɛ̀ be, àlɔ̃ be ènyà ye be le gblɔ̃ na yèwo.

¹⁴Eye Yesù hũ e mè na wo be: “Lazarò ku;

¹⁵eye, e jɔ̀jì na mù ŋutɔ ɖo mìa ŋuti, be nyè mu lè àfi kè be ku lèa ò, àleke be mìa xɔ̀sè. Mì va mia yì e gbɔ!”

¹⁶Wàlɛbɛ ŋuaa, Tomà, kè wo yɔna be Vènàvia, gblɔ̃ na *nukplavi kpɔ̀tɛawo be: “Mia cã mia yì, ne mia ku kudo è.”

¹⁷Kè Yesù va Betanìaa, e kpɔ be, Lazarò nɔ̀ èyɔ̀do mè ŋùkèkè ènè vɔ̀.

¹⁸Ekè èkpeti ètɔ̃ kpò ye Betanìa sɔ dìdì lè Yèruzàlɛm gbɔa,

¹⁹Yudàvi sùgbɔ va Martà ku Mari gbɔ, ne woa ɖo àsi àkɔ na wo, ɖo woa nɔ̀vi kè dɛ̃a ŋuti.

²⁰Kè Martà sè be Yesù gbãnàa, e to yì dogò è, wàlɛbɛ kè Mari ya ci àxomèa.

²¹Martà gblɔ̃ na Yesù be: “Tɔhonɔ̀! Ne wò kè lè fikèa ye à, nɔ̀vi nyèa mu la ku ò.

²²Gãke fifì ŋutɔ cã a, mù nya be ènu ɖekpekpe kè wò la biɔ Mawu a, e la na wò.”

²³Yesù gblɔ̃ na ɛ̀ be: “Nɔ̀vi wò la fɔ̃ so èku.”

²⁴Martà gblɔ̃ be: “Mù nya be e la fɔ̃ lè àzã mlɛ̃ kè le nyi fɔ̃fɔ̃ so èku be àzãa gbè.”

²⁵Yesù gblɔ̃ na ɛ̀ be: “Ènyè ye nyi fɔ̃fɔ̃ so èku kudo àgbè a. Àmè kè xɔ̀ ji nyè sè a, ne e gbà ku cã a, e la nɔ̀ àgbè.

²⁶Àmè ɖekpekpe kè lè àgbè, eye be xɔ̀ ji nyè sè a, mu la ku gbèɖe ò. Wò xɔ̀ e ji sè a?”

²⁷Martà ɖo e ŋuti na ɛ̀ be: “Ɛ̃ɛ, Tɔhonɔ̀! Mù xɔ̀sè, be èwò ye nyi Mɛ̀siaa, Mawu be Èvi kè va xixea mèa.”

²⁸Kè Martà gblɔ̃ ènyà ŋuaa, e yì yɔ nɔ̀via Mari, eye be ɖè èkpa na ɛ̀ be: “Ènufiɔtɔa va; e le yɔ wò.”

²⁹Kè Mari sè ènyà kèawoa, e sitè zè ɖèka, yì kpɔ Yesù.

³⁰Yesù mu kpɔ ɖo kɔpea mè hàɖe ò; e kpɔ̀tɔ̀ lè àfi kè Martà yì dogò è lèa.

³¹Yudàviwo lè àxuea mè kudo è, le ji la ɖo àsi àkɔ na ɛ̀. Ekè wo kpɔ Mari sitè, eye be to zè ɖèkaa, wo kpàsà ɛ̀ do; wo susu be e le yì èyɔ̀doa gbɔ, la yì fã àvi.

³²Ekè Mari ɖo àfi kè Yesù lèa, eye be kpɔ ɛ̀a, e jè èklò lè yebe àfɔ̀ nu, gblɔ̃ na ɛ̀ be: “Tɔhonɔ̀! Ne ɖe ye wò kè lè fikèa, nɔ̀vi nyè mu la ku ò.”

³³Kè Yesù kpɔ be Mari le fã àvi eye Yudàvi kèwo kpàsà ɛ̀ doawo cã le fã àvia, àkpɔ̃ ɖɔ ɛ̀, eye yebe àyè gbãdo.

³⁴E biɔ wo be: “Fikɛ ye mì ɖì ì ɖo ò?” Wo ɖo e ŋuti na ɛ̀ be: “Tɔhonɔ̀ va kpɔ ɛ̀ ɖa.”

³⁵Eye Yesù fã àvi.

³⁶Yudàviwo gblɔ̃ be: “Mì kpɔ lekè be lɔ̃ ɛ̀ ɖa!”

³⁷Vɔ̀a, woa dòmètɔ ɖewo gblɔ̃ be: “Àmè, kè hũ ŋùkuvi na ŋùvìnɔ̀a, mu teŋu wɔ̀ be Lazarò mu gbà ku òa?”

³⁸Yesù be èjì gbà hũhũ lè ye ɖokoe mè, eye be yì èyɔ̀doa to. Àkpã mè ye wo kù èyɔ̀doa ɖo, eye wo sɔ èkpe ɖo e nu.

³⁹Yesù gblɔ̃ be: “Mì ɖè èkpea jo!” Martà, àmè kè yì ènugbea be nɔ̀vi nyɔ̃nùa gblɔ̃ na ɛ̀ be: “Tɔhonɔ̀, e la nɔ̀ ɖè àya vɔ̀; ŋùkèkè ènè sɔ̃ŋu ye nyi ekèa.”

⁴⁰Yesù gblɔ̃ na ɛ̀ be: “Nyè mu to na wò be, ne wò gbe xɔ̀sè kpòa, wò la kpɔ Mawu be gogoa?”

⁴¹Eye wo mlì èkpea jo. Yesù ɖè ŋùkuvi kpɔ jiŋùkusi, gblɔ̃ be: “Àta mù do àkpe na wò be wò ɖo èto mù.

⁴²Mù nya be wò ɖona èto mù tɛ̀gbɛ̀. Vɔ̀a àmèha kè trɔ do mùa ŋuti ye mù le gblɔ̃ ènyà kèa ɖo, ne woa nya be Èwò ye dɔ̃ mù ɖoɖa.”

⁴³Kè Yesù gblɔ̃ ènyà kèawo yomè a, e do àpa sɛ̃sɛ̃ ɖe be: “Lazarò, to va!”

⁴⁴Eye àmè kuku kè be àfɔ̀wo kudo àlɔ̀wo lè bablaa, to kudo àmèɖìvɔawo, eye dukù ɖe bla ŋùmè na ɛ̀. Yesù gblɔ̃ na wo be: “Mì tu àvɔawo lè e ŋuti, ne bèa jo.”

⁴⁵Kè Yudàvi kèwo ye va Mari gbɔawo, kpɔ ènu kè Yesù wɔ̀a, woa dòmètɔ sùgbɔ xɔ̀ e ji sè.

⁴⁶Gãkea èbuwo yì kpɔ Farizìwo, gblɔ̃ ènu kè Yesù wɔ̀a kpata na wo.

⁴⁷Mawunɔ gãwo kudo Farizìwo yɔ èdùnyagblɔ̃tɔwo be èhabɔ̀bɔa bɔ̀. Wo gblɔ̃ be: “Nukɛ ye mi la wɔ̀ fifì ò? Ŋusù kèa jo le wɔ̀ jèsì sùgbɔ.

⁴⁸Ne mi tàsi ì be le yì e ji nènea, àmèwo keŋu la xɔ̀ e ji sè eye Romàtɔwo la va gbã miabe mawuxɔa ku miabe dùkɔ̃a.”

⁴⁹Woa dòmètɔ ɖèka tɔ̀ Kayafà. E ye nyi mawunɔ gã lè èpè ŋua mè. E gblɔ̃ be: “Mì mu kpɔ le va ènyàa ji hàɖe ò!

⁵⁰Eŋuãa, mì mu kpɔ be, ne àmè ɖèka ku ɖo àmè sia àmè taa, e nyɔ na mì wu be àmè sia àmè bèa ku lè dùkɔ̃a mè òa?”

⁵¹Vɔ̀a mu nyi ye ŋutɔ be èjro be sɔ le gblɔ̃ ènyà kèa ò. Ekè e ye nyi mawunɔ gã lè èpè ŋua mèa, Mawu to e ji gblɔ̃ ɖɛ be Yesù la ku ɖo dùkɔ̃a ta

⁵²eye, mu nyi Yudàviwo be dùkɔ̃a ɖèɖe ta kpò ye ò, vɔ̀a, ne bèa bɔ̀ Mawu be èvi kèwo kãkã ɖo ànyigbã jiawo ɖodu.

⁵³So gbè ŋua gbè ye wo pò ɖodu, ɖo e be yèwoa wù ì.

⁵⁴Ènu kèa ŋuti ye Yesù mu gbà ɖènà ye ɖokoe fiɔ Yudàviwo àgbãŋùgbà ò. E jo lè funu, yì kɔpe ɖe kè gogo zògbè jia mè. Wo yɔna kɔpea be Efràyim. Yesù kudo yebe nukplaviwo nɔ̀ funua.

⁵⁵Wàlɛbɛ ŋua, Yudàviwo be Toŋutivayì be àzãa gogo. Àmè sùgbɔ jo lè woabe èdùwo mè yì Yèruzàlɛm ne woa lè woa ɖokoewo ɖì, gbɔ̀xue àzãa bèa va ɖo.

⁵⁶Wo le ji Yesù, eye wàlɛbɛ kè wo lè mawuxɔa mèa, wo le biɔ woa nɔ̀nɔwo be: “Nukɛ mì bù so e ŋuti ò? Kãkã ɖo e ji mu lè be e la va kpɔ̃nɔ àkpiti be àzãɖùpea ò!”

⁵⁷Mawunɔ gãwo kudo Farizìwo na ègbè vɔ̀ be, ne àmè ɖe nya àfi kè Yesù lèa, ne va gblɔ̃ ɛ̀, ne woa yì le è.