Read gen Yòhanɛ̀s 12 Bible Online

Yòhanɛ̀s 12 - gen bible

Yòhanɛ̀s 12

¹Ŋùkèkè àdɛ̃ gbɔ̀xue woa ɖù Toŋutivayì be àzãa, Yesù yì Betanìa, àfi kè Lazarò, àmè kè be fɔ̃ so èkua lèa.

²Wo ɖo èkplɔ̃ na ɛ̀ lè funua, Martà le sumɔ àmèwo, eye Lazarò nyi àmè kèwo nɔ̀ èkplɔ̃a ŋuti ku woawo dòmètɔ ɖèka.

³Mari sɔ àmì huɛ̃ titi kè xɔ̀ àsìa, ègò ɖèka, kɔ̀ ɛ̀ ɖo Yesù be àfɔ̀wo ji. E sɔ ye ŋutɔ be èɖà sɔ tutu wo. Àmìa be hɔ̃hɔ̃ɛ xɔ̀ àxuea mè keŋu.

⁴Eye, Yudà Iskariɔt kè nyi Yesù be nukplaviwo dòmètɔ ɖèkaa, àmè kè ŋutɔ la va xɔ̀ kpli na ɛ̀a, gblɔ̃ be:

⁵“Nukɛ ŋuti ye wo mu sà àmì huɛ̃ tititi kèa klòsalòga àlɔ̀ èkà adrɛ̃ takpo, ne woa sɔ ègàa na wɔ̀amènɔ̀wo ò?”

⁶E gblɔ̃ ekèa, mu nyi wɔ̀amènɔ̀wo nu kè be vea ŋuti ye ò; vɔ̀a fìãfì be nyi, eye ye si ye ègà kpɛtɛa nɔ̀nà, eye be fĩnà ègà kè wo sɔ ɖo e mèa.

⁷Yesù gblɔ̃ be: “Mì tàsi ì kpoo! Àzã kè gbè wo la ɖì mùa ŋuti ye be wɔ̀ ekèa ɖo.

⁸Wɔ̀amènɔ̀wo lè ku mì tɛ̀gbɛ̀, vɔ̀a, nyè yaa, nyè mu la nɔ̀ ku mì kaka sɔ yì ò.”

⁹Wàlɛbɛ ŋuaa, Yudàvi sùgbɔ sè be Yesù lè Betanìaa, eye wo zɔ̃ hòo yì funua. Mu nyi Yesù ɖèɖe ŋuti kpò ye wo yì funua ɖo ò. Vɔ̀a, wo le ji la kpɔ Lazarò kè be fɔ̃ so èkua cã.

¹⁰Mawunɔ gãwo pò ɖodu, ɖo èkpe e ji be yèwoa wù Lazarò cã,

¹¹ɖoa Lazarò ŋuti ye Yudàvi sùgbɔ xɔ̀ Yesù ji sè, eye wo trɔ lè *Mawunɔ gãwo yomè.

¹²Kè èŋù kèa, àmè fuu kèwo va àzãɖùpewo, sè be Yesù gbãnà Yèruzàlɛm.

¹³Wo sɔ èdebàyàwo, eye wo to yì dogò è. Wo le do àpa be: “Hozanà! Sìtu ɖèɖe na àmè kè gbãnà lè Tɔhonɔ̀ be nyikɔ mè, Izràɛl be èfìɔa!”

¹⁴Yesù kpɔ èsɔ-àkɛtɛvi ɖe, eye be nɔ̀ ànyi ɖo e ji, sìgbè àlekè wo ŋlɔ̀ ɛ̀ ɖɛ nènea be:

¹⁵“Mù gbà vɔ̃ ò, Ziɔ̀n be nyɔ̃nùvi kpɔɖa, èfìɔ wòa gbãnà. E lia èsɔ-àkɛtɛ be èvi ji.”

¹⁶Yebe nukplaviwo mu ŋɔjè ènu kèawo mè zè ɖèka ò; vɔ̀a wàlɛbɛ kè wo na gogo Yesù vɔ̀a, wàlɛbɛ ŋua gbɔ̀xue ye wo ɖoŋù be E ye ŋuti wo ŋlɔ̀ ènyà ŋuawo ɖɛ ɖo, eye ènu ŋuawo tutu ye wo wɔ̀ na ɛ̀.

¹⁷Àmè kèwo keŋu nɔ̀ Yesù ŋuti wàlɛbɛ kè be yɔ Lazarò, fɔ̃ ɛ̀ so èkuawo, le ɖù ɖase so ènu kèwo jɔ̀awo ŋuti.

¹⁸Ekè àmèawo sè be e wɔ̀ jèsì kèa, ŋuti ye wo va dogò Yesù ɖo.

¹⁹Farizìwo le gblɔ̃ lè woa nɔ̀nɔwo dòmè be: “Mì mu kpɔ fifì be mì mu teŋu wɔ̀ ènu ɖekpe òa? Àmèwo kpata ye le kpàsà ɛ̀ do ŋua!”

²⁰Grik ɖewo cã lè àmè kèwo va Yèruzàlɛm, lè kpɔ̃nɔ àkpiti be àzãa hùenua dòmè, be yèwoa sumɔ Mawu.

²¹Wo yì kpɔ Filipò kè so Bɛtsaida, lè Galilea nyigbã jia, eye wo gblɔ̃ na ɛ̀ be: “Àpetɔ, mi le ji la kpɔ Yesù.”

²²Filipò yì to è na Ãdre, eye wo àmè èvèawo yì to è na Yesù.

²³Yesù gblɔ̃ na wo be: “Gàmè sù fifì ne woa na gogo Àgbètɔ be Èvia.

²⁴Nyàwo ye mù le to na mì be, ne èbliku kè gɛ̃ jè ànyigbã mu ku òa, èbliku ɖèka kpò be nyina. Vɔ̀a ne e kua, e sɛ̃na èku sùgbɔ.

²⁵Àmè kè lɔ̃ yebe àgbè a, la bu ì; eye àmè kè crì yebe àgbè lè xixe kèa mèa, e la nɔ̀ e si kaka na àgbè mà-vɔ.

²⁶Ne àmè ɖe ji la sumɔ mùa, ne kpàsà mù do. Àfi kè mù lèa, sumɔ̃vi nyèa cã la nɔ̀ funua. Ne àmè ɖe sumɔ mùa, Àta la na ɛ̀ gogo.”

²⁷“Fifìa, Èkla nyè ɖɔ ku àkpɔ̃, eye leke mù la gblɔ̃ ò? Mù la gblɔ̃ be Àta xɔ̀ mù lè gàpòpo kèa sia? Vɔ̀a, gàpòpo kèa ŋuti ye mù va ɖo.

²⁸Àta na gogo àpo nyikɔ.” Zè ɖèkaa, ègbè ɖe ɖì so jiŋùkusi be: “Mù na ɛ̀ gogo vɔ̀; eye mù la gbà na ɛ̀ ke.”

²⁹Àmèha kè lè funua sè ègbèa, eye wo gblɔ̃ be: “Èji ye ɖè ègbè!” Àmè buwo gblɔ̃ be: “Àtikplɔtɔ ɖe ye pò nupo na ɛ̀.”

³⁰Vɔ̀a Yesù gblɔ̃ na wo be: “Mu nyi ènyè ŋuti ye ègbè kèa ɖì ɖo ò; vɔ̀a, mìawo ŋuti ye.

³¹Fifì ye wo la ɖo kòjo na xixea; fifì ye wo la nyà xixe kèa be jiɖùtɔa.

³²Ènyè yaa, ne wo kɔ mù jo lè ànyigbã kèa ji, yì jia, mù la dɔ̃ àmèwo keŋu va gbɔ nyè.”

³³Yesù gblɔ̃ ekèa sɔ le ɖè èku kè ŋùmè be la kua fiɔ.

³⁴Vɔ̀a àmèwo ɖo e ŋuti na ɛ̀ be: “Mi sè, èsea fiɔ mi be, Mɛ̀siaa la nɔ̀ àgbè kaka sɔ yì. Àleke ye èwò yaa, wò teŋu gblɔ̃ be wo ɖo la kɔ *Àgbètɔ be Èvia yì ji ɖo ò? Àmè kɛ ye le nyi Àgbètɔ be Èvi ŋua ò?”

³⁵Yesù gblɔ̃ na wo be: “Gàmè vi ɖe kpò ye kɔ̀kɔ̀ɛa la gbà nɔ̀ mìa dòmè. Mì zɔ̃ wàlɛbɛ kè kɔ̀kɔ̀ɛa lèa. Ne mu nyi nène òa, vìvìti la va do do mì. Vɔ̀a, àmè kè le zɔ̃ lè vìvìti mèa, mu nyana àfi kè be lè yìa ò.

³⁶Kè kɔ̀kɔ̀ɛa lè mìa gbɔa, mì xɔ̀ e ji sè, ne mìa nyi kɔ̀kɔ̀ɛa be èviwo.” Kè Yesù gblɔ̃ ènyà kèawo vɔ̀a, e jo lè funu sɔ ye ɖokoe wla do àmèha a.

³⁷Togbɔ be e wɔ̀ nùkunu sùgbɔ lè woa dòmè cã a, wo mu xɔ̀ e ji sè ò.

³⁸Ne ènyà kè Mawu be gblɔ̃ɖɛtɔ Ezayà gblɔ̃a bèa zɔ̃ sù be: “Tɔhonɔ̀, àmè kɛ ye xɔ̀ ènyà kè mi gblɔ̃a ji sè ò? Àmè kɛ ye Tɔhonɔ̀ ɖè yebe ŋusɛ̃ fiɔ ò?”

³⁹Wo mu teŋu xɔ̀sè ò, ɖo Ezayà gbà gblɔ̃ be:

⁴⁰“Mawu gbã woabe ŋùkuviwo, ne wo mu gbà kpɔ ènu ò. E cɔ̃ ènu woabe àyèwo ji, ne wo mu gbà ŋɔjè ènu mè ò. Ne wo mu gbà ɖɔ̀lì èdɛ̃, ne ma dà èdɔ̀ na wo ò.”

⁴¹Ezayà gblɔ̃ ènyà kèa, ɖo e kpɔ Yesù be gogoa ɖoɖa eye be pò nupo so e ŋuti.

⁴²Togbɔ be ènu lè nène cã a, Yudàviwo be àmègãwo ŋutɔ sùgbɔ xɔ̀ Yesù ji sè. Vɔ̀a wo mu ɖè è fiɔ ò, ɖo wo le vɔ̃ be, Farizìwo la va ɖè yèwo to lè bɔ̀bɔ̀pea.

⁴³Wo lɔ̃nà be àgbètɔwo ne kafu yèwo wu be Mawu bèa kafu yèwo.

⁴⁴Yesù gbà gblɔ̃ be: “Àmè kè xɔ̀ ji nyè sè a, mu xɔ̀ ènyè ɖèka ji sè ò; vɔ̀a, e xɔ̀ Àmè kè dɔ̃ mù ɖoɖaa ji sè.

⁴⁵Eye, àmè kè kpɔ mùa, kpɔ Àmè kè dɔ̃ mù ɖoɖaa cã.

⁴⁶Ènyè kè nyi kɔ̀kɔ̀ɛa, mù va xixea mè, ne àmè ɖekpekpe kè xɔ̀ ji nyè sè a, mu gbà nɔ̀ vìvìti mè ò.

⁴⁷Ne àmè ɖe sè ènyà nyèwo, eye mu wɔ̀ ɖo woa ji òa, mu nyi ènyè ye la ɖo kòjo na ɛ̀ ò. Đo nyè mu va ne ma ɖo kòjo na xixea ò; vɔ̀ bòhũa, mù va ne ma hlùɛ̃ xixea gã ye.

⁴⁸Àmè kè gbè mù, eye mu xɔ̀ ènyà nyèwo òa, ɖo yebe kòjoɖotɔ vɔ̀. Ènyà kèwo mù gblɔ̃a, ye la ɖo kòjo na ɛ̀ lè àzã mlɛ̃a gbè.

⁴⁹Nyè mu pò nupo lè ɖokoe nyè sinu ò. Àta kè dɔ̃ mù ɖoɖaa ŋutɔ ye to ènu kè mù la gblɔ̃a kudo ènu kè mù la fiɔa na mù.

⁵⁰Eye mù nya be Àta be èsea, nana àgbè mà-vɔ. Eye ènu kèwo keŋu mù le gblɔ̃a, mù le gblɔ̃ wo sìgbè àlekè Àta gblɔ̃ ɛ̀ na mùa nène.”