Read gen Yòhanɛ̀s 13 Bible Online

Yòhanɛ̀s 13 - gen bible

Yòhanɛ̀s 13

¹Gbɔ̀xue Toŋutivayì be àzãa ne vaa, Yesù nya be gàmè sù ne yèa jo lè xixe kèa mè yì Àta gbɔ. E lɔ̃ àmè kèwo nyi ye tɔ̀awo lè xixe kèa mè. E lɔ̃ wo kaka sɔ yì vɔ̀vɔnu.

²Wàlɛbɛ kè Yesù kudo yebe nukplaviwo le ɖù ènu fìɛ̃si mèa, Àbòsam ɖo sùsu mè na Yudà, Simɔ̀n Iskariɔt be èvia ne bèa do Yesù àsi.

³Kè Yesù nya be Mawu sɔ ènu sia ènu do àsi na yè, be Mawu gbɔ yè so, eye Mawu gbɔ yè trɔ le yìa,

⁴e sitè lè ènu ɖùɖua gbɔ, ɖè àwù kè be do a ɖɛ, eye be sɔ àvɔ ɖe sã ɖo àlì.

⁵E yomè a, e kɔ̀ èsì ɖo àdàwa ɖe mè, tɔ àfɔ̀ kɔklɔ na yebe nukplaviwo, eye be sɔ àvɔ kè be sã do àlìa le tutu àfɔ̀ na wo.

⁶Ekè be ɖo Simɔ̀n Petrò jia, Petrò gblɔ̃ na ɛ̀ be: “Tɔhonɔ̀ èwò ye la klɔ àfɔ̀ na mùa?”

⁷Yesù ɖo e ŋuti na ɛ̀ be: “Ènu kè mù le wɔ̀a, wò mu la teŋu nya ɛ̀ fifì ò. Vɔ̀a, e yomè a wò la va sè e gɔ̃mè.”

⁸Petrò gblɔ̃ na ɛ̀ be: “Wò mu la klɔ àfɔ̀ na mù gbèɖe ò.” Eye Yesù gblɔ̃ na ɛ̀ be: “Ne nyè mu klɔ àfɔ̀ na wò òa, eŋuãa, wò mu la kpɔ ènu ɖekpe be gomè ku mù ò.”

⁹Simɔ̀n Petrò gblɔ̃ na ɛ̀ be: “Ne e nyi nène ye à, Tɔhonɔ̀, mu gbà nyi àfɔ̀wo ɖèɖe kpò wò la klɔ na mù ò. Klɔ àlɔ̀ nyèwo ku èta nyè cã.”

¹⁰Yesù gblɔ̃ na ɛ̀ be: “Àmè kè lè ye ɖokoe ɖì vɔ̀a, mu gbà hiã la lè èsì ò; àfɔ̀ kɔklɔ kpò be hiã, ɖo e ɖì keŋu-keŋu. Mìawo yaa, mì ɖì; vɔ̀a mu nyi mìa kpata ò.”

¹¹Yesù nya àmè kè la do è àsia. Ekèa ŋuti ye be gblɔ̃ be: “Mu nyi mìa kpata be ŋuti ye kɔ̀ ò.”

¹²Kè be klɔ àfɔ̀ na wo vɔ̀a, Yesù gbà sɔ yebe àwùa do, eye be yì nɔ̀ ànyi. E biɔ yebe nukplaviawo be: “Mì sè ènu kè mù wɔ̀ na mìa gɔ̃mèa?

¹³Mì yɔna mù be Ènufiɔtɔ, kudo Àpetɔ; mìabe ènyà lè e mè, ɖo e lè nènea nyàwo.

¹⁴Vɔ̀a, ne ènyè kè nyi mìabe Tɔhonɔ̀, ku Ènufiɔtɔa mù klɔ àfɔ̀ na mìa, eŋuãa, e jè be mìawo cã, mìa nɔ klɔ àfɔ̀ na mìa nɔ̀nɔwo.

¹⁵Đo kpɔwɔɛ ye mù na mì, ne mìa cã mìa nɔ wɔ̀ sìgbè àlekè mù wɔ̀ na mìa nène.

¹⁶Nyàwo ye mù le to na mì. Sumɔvi mu wu àpetɔa ò. *Àmèdɔ̃dɔ̃ cã mu wu àmè kè dɔ̃ ɛ̀a ò.

¹⁷Fifì kè mì nya ènu kèawoa, ne mì wɔ̀ ɖo woa jia, Mawu la tu sì na mì.

¹⁸Mu nyi mìa kpata ŋuti ye mù le gblɔ̃ ènyà kèa so ò, ɖo mù nya àmè kèwo mù cãawo. Vɔ̀a, ne ŋɔ̀ŋlɔ̃ a bèa zɔ̃ sù be: 'Àmè kè le ɖù ènu kudo mùa sitè ɖo ŋuti nyè.'

¹⁹Mù le to na mì fifì, keŋu gbɔ̀xue bèa va jɔ̀. Àleke be, ne e va jɔ̀ a, mìa xɔ̀sè be, ènyè ye nyi àmè kè mù nyia.

²⁰Nyàwo ye mù le to na mì. Àmè kè xɔ̀ àmè kè mù dɔ̃ ɖoɖaa, ènyè ŋutɔ ye be xɔ̀. Eye àmè kè xɔ̀ mùa, xɔ̀ àmè kè dɔ̃ mù ɖoɖaa cã.”

²¹Kè Yesù gblɔ̃ ènyà kèawo vɔ̀a, yebe àyè gbãdo eye be gblɔ̃ na yebe nukplaviawo be: “Nyàwo ye mù le to na mì: àmè ɖèka lè mìa dòmè la do mù àsi.”

²²Yebe nukplaviwo le kpɔ woa nɔ̀nɔwo, ɖo wo mu nya àmè kè ŋuti be le gblɔ̃ ènyà kèa so tututu ò.

²³Nukplaviawo dòmètɔ ɖèka, àmè kè Yesù ɖève a, lè àxàda mè na ɛ̀.

²⁴Simɔ̀n Petrò wɔ̀ ŋùkuvi na ɛ̀ be ne biɔ Yesù àmè kè be ènyà be le gblɔ̃a.

²⁵Eye *nukplavi ŋua bi ɖo Yesù be àkɔta, biɔ ɛ̀ be: “Tɔhonɔ̀, àmè kɛ ye ò?”

²⁶Yesù ɖo e ŋuti na ɛ̀ be: “Àmè kè mu la kã kpɔ̃nɔ, la tɔ desì, la sɔ na a ye.” Eye Yesù kã kpɔ̃nɔ, tɔ desì, eye be sɔ na Yudà, Iskariɔt Simɔ̀n be èvia.

²⁷Kè Yudà xɔ̀ kpɔ̃nɔa, Satana ɖo ye mè; eye Yesù gblɔ̃ na ɛ̀ be: “Ènu kè wò ɖo la wɔ̀a, wɔ̀ ɛ̀ kaba.”

²⁸Àmè kèwo le ɖù ènu kudo Yesùawo dòmètɔ ɖe mu nya ènu kè ŋuti be gblɔ̃ ènyà kèa ɖo ò.

²⁹Kè be nyi be Yudà ye hɛ̃nà ègà kpɛtɛa, àmè ɖewo bù be Yesù le to na ɛ̀ be ne yì plè ènu kè wo la sɔ ɖù kpɔ̃nɔ àkpiti be àzãa, àlo ne yì na ènu wɔ̀amènɔ̀wo.

³⁰Ekè Yudà ɖù kpɔ̃nɔa, e to zè ɖèka. Èzã do vɔ̀.

³¹Kè Yudà to vɔ̀a, Yesù gblɔ̃ be: “Fifìa wo ɖè *Àgbètɔ be Èvia be gogo fiɔ, eye to Èvia jia, wo ɖè Mawu be gogo fiɔ.

³²Mawu la na ɛ̀ gogo lè ye ŋutɔ mè, eye e la na ɛ̀ gogo zãɖe kèa.

³³Èvi nyèwo, àzã vi ɖe kpò ye kpɔ̀tɔ̀ ne ma nɔ̀ mìa gbɔ. Mì la ji mù, eye sìgbè àlekè mù gblɔ̃ na Yudàviwo nènea, mì mu la teŋu yì àfi kè mù le yìa ò.

³⁴Mù le na mì *èse yeye: mì lɔ̃ mìa nɔ̀nɔwo. Mì lɔ̃ mìa nɔ̀nɔwo sìgbè àlekè mù lɔ̃ mìa nène.

³⁵Ne mì lɔ̃ mìa nɔ̀nɔwoa, àmèwo kpata la nya be mì nyi *nukplavi nyèwo.”

³⁶Simɔ̀n Petrò biɔ ɛ̀ be: “Tɔhonɔ̀, fikɛ wò le yì ò?” Yesù ɖo e ŋuti na ɛ̀ be: “Wò mu la teŋu kplɔ̀ mù do yì àfi kè mù le yì fifìa ò. Vɔ̀a, e yomè a, wò la jè yo nyè mè.”

³⁷Petrò gblɔ̃ na ɛ̀ be: “Tɔhonɔ̀ nukɛ ŋuti ye nyè mu la teŋu kplɔ̀ wò do fifì ò? Mù sɔ̀gbè la ku ɖo èta wò.”

³⁸Yesù gblɔ̃ na ɛ̀ be: “Wo sɔ̀gbè la ku do èta nyè nyàwo a? Nyàwo mù le to na wò; kòklo mu la ku àtɔ egbè gbɔ̀xue wò la gbe, zè ètɔ̃ be ye mu jèsi mù ò.”