Read gen Yòhanɛ̀s 17 Bible Online

Yòhanɛ̀s 17 - gen bible

Yòhanɛ̀s 17

¹Kè Yesù gblɔ̃ ènyà kèawo vɔ̀a, e kɔ ŋùmè yì ji, kpɔ jiŋùkusi, gblɔ̃ be: “Àta gà mèa sù; na gogo Èvi wò ne Èvi wò cã bèa na wò gogo.

²Ne, sɔ zɔ̃ ɖo ŋusɛ̃ kè wò na ɛ̀ ɖo àgbètɔwo kpata jia nua, bèa na àgbè mà-vɔ àmè kèwo keŋu wò sɔ do àsi na ɛ̀awo.

³Vɔ̀a, àgbè mà-vɔa ye nyi be wo ne jèsi wò, Mawu ŋutɔ-ŋutɔ ɖèka kè lèa, ne woa jèsi Yesù, *Mɛ̀sia kè wò dɔ̃ ɖoɖaa.

⁴Mù wɔ̀ èdɔ kè wò sɔ do àsi na mùa kaka wu e nu, sɔ na gogo wò lè ànyigbã ji.

⁵Fifìa, Àta, na mù gogo lè gbɔ wò. Na mù gogo ŋua kè mù ɖo lè gbɔ wò gbɔ̀xue xixea va jɔ̀ a.

⁶Mù ɖè wò fiɔ àmè kèwo wò cã so xixea mè, sɔ do àsi na mùawo. Tɔ̀wò ye wo nyi. Wò sɔ wo na mù, eye wo wɔ̀ ɖo àpo ènyà ji.

⁷Wo nya fifì be ènu kèwo keŋu wò sɔ do àsi na mùawo so gbɔ wò.

⁸Wo gbà nya be ènyà kèwo mù gblɔ̃ na yèwoa, nyi ekèwo wò sɔ do àsi na mùawo. Wo xɔ̀ woa ji sè. Wo nya nyuɛ̃ ɖe fifì be gbɔ wò ye mù so, eye wo xɔ̀sè be èwò ye dɔ̃ mù ɖoɖa.”

⁹“Mù le fãkue ɖo woa ta. Nyè mu le fãkue ɖo xixea ta ò; vɔ̀ bòhũa, àmè kèwo wò na mùawo ta ye mù le fãkue ɖo. Đo, tɔ̀wò ye wo nyi.

¹⁰Ènu kèwo keŋu nyi tɔ̀ nyèawo nyi tɔ̀wò. Nène a ke ye ènu kèwo keŋu nyi tɔ̀wòawo cã nyi tɔ̀ nyè, eye mù kpɔ gogo lè woa mè.

¹¹So fifìa jia, nyè mu la gbà nɔ̀ xixe kèa mè ò, ɖo mù le yì gbɔ wò. Vɔ̀a, woawo yaa, wo la ci xixea mè. Àta kɔ̀kɔ̀ɛ, kpɔ woa ji lè àpo nyikɔ mè. Nyikɔ kè wò na mùa mè, ne woa nɔ̀ ɖèka, sìgbè àlekè ènyè kudo wò mi lè ɖèkaa nène.

¹²Wàlɛbɛ kè mù nɔ̀ kudo woa, mù kpɔ woa ji lè àpo nyikɔ mè. Lè nyikɔ kè wò na mùa mè. Mù lebè na wo, eye woa dòmètɔ ɖe mu bu, tovò na èvi cɔ̃crɔ̃a ò, àleke be Ŋɔ̀ŋlɔ̃ a ne zɔ̃ sù.

¹³Fifìa, Àta mù gbãnà gbɔ wò. Eye, mù le gblɔ̃ ènyà kèawo lè xixea mè wàlɛbɛ kè mù gbà kpɔ̀tɔ̀ lè e mèa, ne woa kpɔ jìjɔɛ nyèa lè woa ɖokoewo mè, eye jìjɔ̀ɛ a ne nyi jìjɔɛ blibo na wo.

¹⁴Mù sɔ àpo ènyà do àsi na wo, eye xixea crì wo, ɖo wo mu nyi xixea tɔ̀ sìgbè àlekè ènyè cã nyè mu nyi xixea tɔ̀ ò a nène.

¹⁵Nyè mu le biɔ be wòa ɖè wo jo lè xixea mè ò. Vɔ̀ bòhũa, ne wòa ɖè wo lè àmè vuɛ̃ a si mè.

¹⁶Wo mu nyi xixea tɔ̀ ò, sìgbè àlekè nyè cã nyè mu nyi xixea tɔ̀ òa nène.

¹⁷Sɔ nyàwo a lè wo ɖì. Àpo ènyà ye nyi nyàwo a.

¹⁸Mù dɔ̃ wo ɖoɖa xixea mè sìgbè àlekè wò cã wò dɔ̃ mù ɖoɖa xixea mèa nène.

¹⁹Đo woawo ŋutia, mù ɖo ɖokoe nyè kɔ̀kɔ̀ɛ, ne woawo cã woa nɔ̀ kɔ̀kɔ̀ɛ lè nyàwo mè.”

²⁰“Nyè mu le fãkue ɖo woawo ɖèɖe kpò ta ò. Vɔ̀a, mù gbà le fãkue ɖo àmè kèwo cã la gbà xɔ̀ ji nyè sè to woabe mawunya gbɔ̃gblɔ̃ mèawo ta.

²¹Ne woa kpata woa nɔ̀ ɖèka, sìgbè àlekè èwò, Àta wò lè ɖèka lè mè nyè, eye ènyè cã mù lè èwò mèa, woawo cã wo ne nɔ̀ mia mè, ne xixea bèa xɔ̀sè be, èwò ye dɔ̃ mù ɖoɖa.

²²Ènyè yaa, gogo kè wò na mùa, mù sɔ ɛ̀ na wo, ne woa nɔ̀ ɖèka sìgbè àlekè mia cã mi lè ɖèkaa nène.

²³Mù lè woa mè sìgbè àlekè wò cã wò lè mè nyè, ne woa zɔ̃ sù lè ɖèkawɔ̀wɔ mè, ne xixea ne nya be èwò ye dɔ̃ mù ɖoɖa, be wò lɔ̃ wo sìgbè àlekè wò lɔ̃ mùa nène.

²⁴Àta, mù ji be àfi kè mù lèa, àmè kèwo wò sɔ do àsi na mùawo cã woa nɔ̀ funu kudo mù, ne woa kpɔ gogo kè wò na mùa, ɖo wò lɔ̃ mù keŋu gbɔ̀xue va ɖo xixea.

²⁵Àta jɔ̀jɔɛtɔ, xixea mu jèsi wò ò. Vɔ̀a, ènyè yaa, mù jèsi wò, eye àmè kèawo nya be èwò ye dɔ̃ mù ɖoɖa.

²⁶Mù ɖè nyikɔ wò fiɔ wo; mù la gbà ɖè è fiɔ wo ke, ne lɔ̃lɔ̃ kè wò ɖo na mùa ne nɔ̀ woa mè, ne ènyè ŋutɔ cã ma nɔ̀ woa mè.”