Read gen Yòhanɛ̀s 20 Bible Online

Yòhanɛ̀s 20 - gen bible

Yòhanɛ̀s 20

¹Lè kuasiɖaa be ŋùkèkè cucugbã gbè, lè fɔ̃fɔ̃ mè, wàlɛbɛ kè xixea mè mu kpɔ kɔ̀ hàɖe òa, Mari Magdalà tɔ̀a va Yesù be èyɔ̀doa to. E kpɔ be wo ɖè èkpea lè èyɔ̀doa nu.

²E pu dù yì Simɔ̀n Petrò kudo *nukplavi ɖètɔ kè Yesù ɖève a gbɔ. E gblɔ̃ na wo be: “Wo va sɔ Tɔhonɔ̀ jo lè yebe èyɔ̀doa mè, eye mi mu nya àfi kè wo sɔ ɛ̀ dà ɖo ò.”

³Petrò kudo *nukplavi ɖetɔa yì èyɔ̀doa to.

⁴Wo àmè èvèawo pu dù ɖo du, vɔ̀a nukplavi ɖetɔa to Petrò ŋuti va èyɔ̀doa to cucugbã.

⁵E bɔ̀bɔ̀ kpɔ èyɔ̀doa mè, eye be kpɔ kplobaawo lè ànyigbã, lè èyɔ̀doa mè; vɔ̀a, mu ɖo e mè ò.

⁶Simɔ̀n Petrò va ɖo, lè e yomè. E ɖo èyɔ̀doa mè, kpɔ kplobaawo lè ànyigbã.

⁷E kpɔ dukù kè wo sɔ bla èta na Yesùa cã lè ŋɔ̀ŋlɔ̃ lè tèpe bu. Dukùa mu lè kplobaawo mè ò.

⁸E yomè a, nukplavi ɖetɔa, àmè kè va èyɔ̀doa to cucugbã cã ɖo èyɔ̀doa mè. E kpɔ kplobaawo kudo dukùa, eye be xɔ̀sè.

⁹Đo kaka na gà ŋua mèa, wo mu kpɔ ŋɔjè Ŋɔ̀ŋlɔ̃ kè gblɔ̃ be Yesù la fɔ̃ so èkua mè ò.

¹⁰E yomè a, nukplavi èvè ŋuawo trɔ yì woabe àxuewo mè.

¹¹Mari lètè lè èyɔ̀doa to le fã àvi. Wàlɛbɛ kè be le fã àvia, e ɖè èkɔ̀ kpɔ èyɔ̀doa mè ɖoɖa.

¹²E kpɔ Mawu be àtikplɔtɔ èvè lè àwù ɣe mè, nɔ̀ ànyi ɖo àfi kè wo sɔ Yesù be àmètia mlɔ̃ sãa; ɖèka lè yebe ètagbe, eye èvègɔ̃a lè yebe àfɔ̀de.

¹³Wo gblɔ̃ na ɛ̀ be: “Nyɔ̃nù, nukɛ be àvi ye wo le fã ò?” E ɖo e ŋuti na wo be: “Wo kɔ Tɔhonɔ̀ nyè jo, eye nyè mu nya àfi kè wo sɔ ɛ̀ ɖo ò.”

¹⁴Kè be le gblɔ̃ ènyà kèa, e trɔ kpɔ ŋùgbe, eye be kpɔ Yesù lètè; vɔ̀a mu nya be Yesù ye ò.

¹⁵Yesù gblɔ̃ na ɛ̀ be: “Nyɔ̃nù nukɛ ŋuti ye wò le fã àvi ɖo ò? Àmè kɛ ye wò le ji ò.” Mari sɔ ɛ̀ be àbɔ a ji kpɔtɔ ye le biɔ yè ènyà, eye be gblɔ̃ na ɛ̀ be: “Àpetɔ, ne èwò ye kɔ ɛ̀ joa, gblɔ̃ àfi kè wò sɔ ɛ̀ yì ɖoa na mù, ne ma yì sɔ ɛ̀.”

¹⁶Yesù yɔ ɛ̀ be: “Mari.” Mari trɔ, eye be gblɔ̃ lè Hebrùgbe mè be: “Rabunì!” E gɔ̃mè ye nyi: “Ènufiɔtɔ nyè.”

¹⁷Yesù gblɔ̃ na ɛ̀ be: “Mù gbà le mù ɖo tè ò, ɖo nyè mu kpɔ yì Àta gbɔ hàɖe ò. Vɔ̀a, yì to na nɔ̀vi nyèwo be mù le yì Ètɔ nyè kè nyi mìa cã mìa Tɔa gbɔ. Mù le yì Mawu nyè kè nyi mìa cã mìa be Mawu a gbɔ.”

¹⁸Mari Magdalà tɔ̀a yì to na nukplaviawo be: “Mù kpɔ Tɔhonɔ̀, eye e gblɔ̃ ènyà kèawo na mù.”

¹⁹Gbè ŋua gbè kè le nyi kuasiɖaa be ŋùkèkè cucugbãa, nukplaviawo tu èhɔ̃ ɖo èta, lè èxɔ̀ kè mè wo bɔ̀ lèa mè, wètrɔ mè, ɖo wo le vɔ̃ Yudàviwo. Yesù va nɔ̀tè lè woa dòmè. E gblɔ̃ na wo be: “Fàfa ne nɔ̀ ku mì.”

²⁰Wàlɛbɛ kè be le pò nupoa, e sɔ yebe àlɔ̀wo kudo yebe àxàdaa mè fiɔ wo. Ekè nukplaviawo kpɔ ɛ̀a, èjì jɔ̀ wo.

²¹Yesù gbà gblɔ̃ na wo be: “Fàfa ne nɔ̀ ku mì! Sìgbè àlekè Àta dɔ̃ mù ɖoɖaa, nènea ke ye nyè cã mù le dɔ̃ mì.”

²²Kè Yesù gblɔ̃ ènyà kèawo yomè a, e plu àya ɖo woa ji, eye be gblɔ̃ na wo be: “Mì xɔ̀ Gbɔ̃gbɔ̃ Kɔ̀kɔ̀ɛ a.”

²³Ne mì sɔ àgɔ̀ kè àmè ɖe a, Mawu la sɔ kè àmèa. Vɔ̀a, ne mì mu sɔ àgɔ̀ kè àmè ɖe òa, Mawu mu la sɔ kè àmèa ò.

²⁴Gãkea, Tomà, àmè woèvèawo dòmètɔ ɖèka, kè wo yɔna be Vènàvia, mu lè woa dòmè wàlɛbɛ kè Yesù va ò.

²⁵Nukplavi kpɔ̀tɛawo gblɔ̃ na ɛ̀ be: “Mi kpɔ Tɔhonɔ̀a.” Vɔ̀a Tomà-ɖo e ŋuti na wo be: “Ne nyè mu kpɔ plɛ̃ŋugò-bìawo tèpe lè yebe àlɔ̀wo mè, ne mù sɔ àlɔ̀vi nyè do plɛ̃ŋugò-bìawo tèpe, eye mù sɔ àlɔ̀ nyè ɖo yebe àxàda mè òa, nyè mu la xɔ̀sè kpɔ ò.”

²⁶Ŋùkèkè ènyi yomè a, nukplaviawo gbà bɔ̀ lè èxɔ̀a mè ke, eye Tomà lè woa dòmè. Èxɔ̀a be hɔ̃truwo lè tutu, gãke Yesù va nɔ̀tè lè woa dòmè. E gblɔ̃ na wo be: “Fàfa ne nɔ̀ ku mì.”

²⁷E yomè a, e to na Tomà be: “Drɛ̃ àpo àlɔ̀vi ɖoɖa fikèa, ne wòa kpɔ àpe àlɔ̀wo. Drɛ̃ àpo àlɔ̀ ne wòa sɔ ɛ̀ ɖo àxàda nyè mè. Tɔtè àɖìka dodo, ne wòa xɔ̀sè.”

²⁸Tomà gblɔ̃ na ɛ̀ be: “Tɔhonɔ̀ nyè, Mawu nyè!”

²⁹Yesù gblɔ̃ na ɛ̀ be: “Kè wò kpɔ mùa, wò xɔ̀sè. Vɔ̀a, *sìtu ɖèɖe ye e nyi na àmè kèwo mu kpɔ ò, vɔ̀ xɔ̀sèawo.”

³⁰Yesù gbà wɔ̀ jèsi sùgbɔ buwo lè yebe nukplaviwo be ŋùmè, vɔ̀a wo mu ŋlɔ̀ wo ɖo xoma kèa mè ò.

³¹Vɔ̀a, wo ŋlɔ̀ ekèawo, ne mìa xɔ̀sè be Yesù ye nyi, *Mɛ̀sia, Mawu be Èvia. Eye ne mì xɔ̀ e ji sè a, mì la kpɔ àgbè to yebe nyikɔ mè.