Read gen Yòhanɛ̀s 3 Bible Online

Yòhanɛ̀s 3 - gen bible

Yòhanɛ̀s 3

¹Ŋusù ɖe lè Farizìwo be èhabɔ̀bɔ mè. Wo yɔna ɛ̀ be Nikodemɔ̀. E nyi Yudàviwo be àgbònùgla[3] ɖèka.

²E zɔ̃ èzã va kpɔ Yesù, gblɔ̃ na ɛ̀ be: “Ènufiɔtɔ, mi nya be Mawu ye dɔ̃ wò ɖoɖa, ɖo àmè ɖe mu teŋu wɔ̀ ŋùdãdɔ kèwo ye wò lè wɔ̀awo, ne Mawu mu lè kudo è ò.”

³Yesù gblɔ̃ na ɛ̀ be: “Nyàwo ye mù le to na wò: ne wo mu gbìgbɔ̀ jì àgbètɔ òa, mu teŋu kpɔ Mawu be fìɔdua ò.”

⁴Nikodemɔ̀ gblɔ̃ na ɛ̀ be: “Àleke ye wo la gbà teŋu jì àmè kè sĩ vɔ̀a ɖo ò? E la trɔ ɖo ènɔa be àdɔ̀mè, eye wo la gbìgbɔ̀ jì ìa?”

⁵Yesù ɖo e ŋuti na ɛ̀ be: “Nyàwo mù le to na wò: ne wo mu jì àmè ɖe to èsì ku Gbɔ̃gbɔ̃ Kɔ̀kɔ̀ɛ mè òa, mu la teŋu ɖo Mawu be fìɔdua mè ò.

⁶Àmè kè wo jì to ŋutilã mèa, ŋutilã be nyi. Àmè kè wo jì to Gbɔ̃gbɔ̃ Kɔ̀kɔ̀ɛ mèa, nyi Gbɔ̃gbɔ̃ Kɔ̀kɔ̀ɛ tɔ̀.

⁷Mu gbà kpaca wò be mù gblɔ̃ na wò be: 'E lè veve ɖe be woa gbìgbɔ̀ jì wò' ò.

⁸Àya pònà, yìnà àfi kè jro èa. Wò sènà yebe pòpo, vɔ̀a wò mu nyana àfi kè be so, àlo àfi kè be lè yìa ò. Nène a ke be lè na àmè sia àmè kè wo jì to Gbɔ̃gbɔ̃ Kɔ̀kɔ̀ɛ mè.”

⁹Nikodemɔ̀ biɔ ɛ̀ be: “Àleke ye ènu kèa teŋu jɔ̀ ɖo ò?”

¹⁰Yesù ɖo e ŋuti na ɛ̀ be: “Ènufiɔtɔ gãa ɖèka ye wò nyi lè Izràɛl. Àleke wɔ̀ ye wò mu nya ènu kèawo ò?

¹¹Nyàwo mù le to na wò, ènu kè mi nyaa ŋuti ye mi le pò nupo so; eye mi le ɖù ɖase so ènu kè mi kpɔa ŋuti. Gãke mì mu xɔ̀ miabe ɖasea ji sè ò.

¹²Ne mì mu xɔ̀ ènyà nyè ji sè, wàlɛbɛ kè mù le pò nupo na mì so ànyigbã ji be ènuwo ŋuti òa, àleke ye mì la wɔ̀ la xɔ̀ ènyà nyè ji sè, wàlɛbɛ kè mù la pò nupo na mì so jiŋùkusi be ènuwo ŋuti ò?

¹³Đo àmè ɖe mu yì jiŋùkusi kpɔ, tovò na àmè kè so jiŋùkusi vaa ò. E ye nyi *Àgbètɔ be Èvia.

¹⁴Sìgbè àlekè Mosè kɔ èdã yì ji, lè zògbè jia, nènea ke ye wo la kɔ *Àgbètɔ be Èvia cã yì ji,

¹⁵àleke be àmè ɖekpekpe àmè kè la xɔ̀ e ji sè a, bèa ɖo àgbè mà-vɔ.

¹⁶Đo a, Mawu lɔ̃ xixea àleke be e sɔ Èvia àkòŋùgò na, be àmè ɖekpekpe kè xɔ̀ e ji sè a, mu gbà crɔ̃ ò, vɔ̀a, bèa ɖo àgbè mà-vɔ.

¹⁷Đo Mawu mu dɔ̃ Èvia ɖoɖa xixea mè ne bèa va ɖo kòjo na xixea ò. Vɔ̀ bòhũa, ne bèa va hlùɛ̃ ɛ̀ gã.

¹⁸Àmè kè xɔ̀ E ji sè a, wo mu la ɖo kòjo na ɛ̀ ò. Vɔ̀a, àmè kè mu xɔ̀ E ji sè òa, wo ɖo kòjo na ɛ̀ vɔ̀ xoxo, ɖo mu xɔ̀ Mawu be Èvi àkòŋùgòa be nyikɔ ji sè ò.

¹⁹Ekèa ye le nyi kòjoɖoɖoa: kɔ̀kɔ̀ɛa va xixea mè, vɔ̀ àgbètɔwo lɔ̃ vìvìti wu kɔ̀kɔ̀ɛa, ɖo woabe wɔ̀wɔwo nyrã.

²⁰Àmè kè wɔ̀nà ènu vuɛ̃ a, crìnà kɔ̀kɔ̀ɛa. Mu gogona kɔ̀kɔ̀ɛa ò, ɖo e vɔ̃na be wo la va kpɔ ènu bàɖà kèwo yè wɔ̀nàawo.

²¹Vɔ̀a, àmè kè wɔ̀nà ènu kè sɔ̀gbèa, vana kɔ̀kɔ̀ɛ nu, ne àmèwo ne kpɔ ènu nyuɛ̃ kèwo be le wɔ̀awo, ɖo yebe wɔ̀nawo sɔ̀gbè kudo Mawu be èjro.”

²²Lè ekèa yomè a, Yesù ku yebe nukplaviwo yì Yudeà be ànyigbã ji. E nɔ̀ funua ku wo, eye e le lè mawusi na àmèwo.

²³Yòhanɛ̀s cã le lè mawusi na àmèwo lè Ayinɔ̀n kè gogo Salim[4] be èdùa mè. Èsì sùgbɔ lè funua, eye àmèwo yìnà e gbɔ, eye be lènà mawusi na wo.

²⁴Wo mu kpɔ le Yòhanɛ̀s ɖo ègàkpa mè, gà ŋua mè ò.

²⁵E va e mè be ènyà dɔ̃dɔ̃ ɖe ɖo Yudàvi ɖe ku Yòhanɛ̀s be nukplaviwo dòmè so lèlèɖì ŋuti.

²⁶Wo yì Yòhanɛ̀s gbɔ, eye wo gblɔ̃ na ɛ̀ be: “Ènufiɔtɔ, àmè kè nɔ̀ Yɔrdàn be ètɔ̀a godo ku wò sãa, ekè ŋuti wò ɖù ɖase soa cã le lè mawusi na àmèwo, eye àmè sia àmè le yì e gbɔ.”

²⁷Eye Yòhanɛ̀s ɖo e ŋuti na wo be: “Àmè ɖe mu teŋu sɔ ènu ɖekpe wɔ̀ yetɔ̀, tovò na ekè wo na ɛ̀ so jiŋùkusia ò.

²⁸Mìa ŋutɔwo mì sè eye, mù gblɔ̃ be: 'Mu nyi ènyè ye nyi Mɛ̀siaa ò, vɔ̀ bòhũa, wo dɔ̃ mù ɖoɖa, jè ŋùkɔ̀ na ɛ̀ ye.'

²⁹Nyɔ̃nùkpetɔa tɔ̀ ye nyi nyɔ̃nùkpekpea, vɔ̀a nyɔ̃nùkpetɔa be èxlɔ̃ nɔ̀nà e gbɔ, eye ne e le sè nyɔ̃nùkpetɔa be ègbèa, e kpɔna jìjɔɛ. Nyè cã mù le kpɔ jìjɔɛ fifì, eye jìjɔɛ kpɔkpɔ nyèa lè blibo.

³⁰E jè be e ya be nyikɔ bèa nɔ̀ yì ji kpe è, eye nyikɔ nyèa bèa nɔ ɖè kpɔ̀tɔ̀.”

³¹“Àmè kè so jiŋùkusi vaa ye nyi ètatɔ na àmèwo kpata. Àmè kè lè ànyigbã jia, nyi ànyigbã ji tɔ̀, eye e pònà nupo so ànyigbã ji nuwo ŋuti. Àmè kè so jiŋùkusi vaa,

³²ènu kè be kpɔa kudo ènu kè be sè a ŋuti ye be ɖùnà ɖase so. Vɔ̀a, àmè ɖe mu xɔ̀nà yebe ɖasea ò.

³³Àmè kè xɔ̀ yebe ɖasea, ɖènà fiɔ be Mawu nyi nyàwo.

³⁴Àmè kè Mawu dɔ̃ ɖoɖaa, gblɔ̃nà Mawu kè nana Gbɔ̃gbɔ̃ Kɔ̀kɔ̀ɛ lè gbɔsùsu mèa be ènyà.

³⁵Àta lɔ̃ Èvia, eye be sɔ ènuwo kpata do àsi mè na ɛ̀.

³⁶Àmè kè xɔ̀ Èvia ji sè a, ɖo àgbè mà-vɔ. Vɔ̀a àmè kè mu sènà ètonu na Èvia òa, mu la ɖo àgbè mà-vɔ ò, vɔ̀a Mawu be àdɔ̀mèze lè nène mèa ji.”