Read gen Yòhanɛ̀s 5 Bible Online

Yòhanɛ̀s 5 - gen bible

Yòhanɛ̀s 5

¹E yomè a, Yudàviwo be àzãɖùɖu ɖe va, eye Yesù yì Yèruzàlɛm.

²Ètãku ɖe lè èdùa be àgbo kè wo yɔna be: “Àlɛ̃wo be Àgboa” nu. Wo yɔna ètãkua lè Hebrùgbe mè be Bɛtzata. Àkpàta àtɔ̃ trɔ do è.

³Dɔ̀nɔ̀ sùgbɔ mlɔ̃na ànyi ɖo àkpàta kèawo mè: ŋùvìnɔ̀wo, dɔ̀nɔ̀kplibɔwo, ku èsekunɔ̀wo. [Wo nɔ̀nàtè kpɔ èsìa be huãhuã.

⁴Đo a, eji-ejia, Mawu be àtikplɔtɔ ɖe ɖìnà va ètãkua mè, eye e huãnà èsìa. Àmè cucugbã kè gbe ɖo ètãkua mè, ne wo hũa èsìa kpòa, èdɔ̀ ɖekpekpe kè àmèa le lea vɔ̀nà na ɛ̀.]

⁵Dɔ̀nɔ̀kplibɔ ɖe lè funua, so èpè ègbã vɔ ènyi.

⁶Yesù kpɔ ɛ̀ lè ànyimɔmlɔ̃, eye kè be sè be e dìdì kè ŋusùa lè nènea, e biɔ ɛ̀ be: “Wò ji be èdɔ̀ wòa ne vɔ̀ na wòa?”

⁷Dɔ̀nɔ̀a ɖo e ŋuti be: “Àpetɔ, nyè mu ɖo àmè ɖe kè la sɔ mù do ètãkua mè, wàlɛbɛ kè èsìa tɔna hũahũaa ò. Gà kè mè mù le jè àgbàgba be ma yì ɖo e mèa, àmè bu ɖona e mè jè ŋùkɔ̀ na mù.”

⁸Yesù gblɔ̃ na ɛ̀ be: “Sitè, sɔ àpo àba a ne wòa zɔ̃!”

⁹Eye zè ɖèkaa, ŋusùa jètè. E sɔ yebe àba a, eye be zɔ̃. Vɔ̀a, gbè ŋua gbèa, jɛ̃gbɔ̃zã gbè ye bè nyi.

¹⁰Yudàviwo to na ŋusù kè be èdɔ̀ vɔ̀a be: “Jɛ̃gbɔ̃zã gbè ye nyi egbè; wo mu ɖè èmɔ na wò be wòa sɔ àpo àba ò.”

¹¹Vɔ̀a ŋusùa ɖo e ŋuti na wo be: “Àmè kè dà èdɔ̀ na mùa, ye gblɔ̃ na mù be: 'Sɔ àpo àba ne wòa zɔ̃!'”

¹²Wo biɔ ɛ̀ be: “Àmè kɛ ye nyi àmè kè gblɔ̃ na wò be: 'Sɔ àpo àba ne wòa zɔ̃ ò?'”

¹³Vɔ̀a, àmè kè èdɔ̀ vɔ̀ na a, mu jèsi àmè kè dà èdɔ̀ na ɛ̀a ò, ɖo Yesù bu do è lè àmè sùgbɔ kèwo bɔ̀ lè funuawo dòmè.

¹⁴E yomè a, Yesù kpɔ ɛ̀ lè mawuxɔa mè. E gblɔ̃ na ɛ̀ be: “Fifì kè èdɔ̀ vɔ̀ na wòa, mù gbà wɔ̀ ènuvuɛ̃ ke ò; ne mu nyi nène òa, ènu kè la kpe wòa, la nyrã wu.”

¹⁵Ŋusùa yì gblɔ̃ na Yudàviwo be Yesù ye dà èdɔ̀ na yè.

¹⁶Gà ŋua mè ye Yudàviwo tɔ Yesù yomè tĩtĩ, ɖo e dà èdɔ̀ na àmè lè jɛ̃gbɔ̃zã gbè.

¹⁷Vɔ̀a Yesù gblɔ̃ na wo be: “Ètɔ nyè le wɔ̀ èdɔ kaka va na fifì, eye nyè cã mù le wɔ̀ èdɔ.”

¹⁸Ye ŋuti ye Yudàviawo gbà le trɔ ɖo e ŋuti wu sãa, be woa wù ì, ɖo mu nyi jɛ̃gbɔ̃zã gbè be èkɔ̀a kpò ye be le ɖù ò, vɔ̀a, e gbà le gblɔ̃ be, Mawu nyi yè Tɔ, le sɔ ye ɖokoe sɔ̀ ku Mawu.

¹⁹Yesù gbà gblɔ̃ na wo be: “Nyàwo mù le to na mì, Èvia mu wɔ̀nà ènu ɖe lè ye ɖokoe sinu ò. Ènu kè be kpɔ Ètɔa le wɔ̀a kpò ye be wɔ̀nà; eye, ènu ɖekpekpe ènu kè Ètɔa wɔ̀nàa, Èvia cã wɔ̀nà ɛ̀.

²⁰Đo Àta lɔ̃ Èvia, eye be sɔ ènu kèwo kpata ye ŋutɔ wɔ̀nàawo fiɔ ɛ̀. E la gbà fiɔ ɛ̀ èdɔ kèwo wu ekèawoa, eye e la kpaca mì.

²¹Đo sìgbè àlekè ye Àta fɔ̃na àmèkukuwo, eye be nana wo àgbè a, nènea ke ye Èvia cã nana àgbè àmè kèwo be jroawo.

²²Wu ekèa, Àta mu ɖona kòjo na àmè ɖe ò; vɔ̀a, e sɔ kòjoɖoɖo kpata do àsi na Èvia.

²³Ne àmè sia àmè ne na bùbu Èvia a, sìgbè àlekè wo nana bùbu Àta nène. Àmè kè mu bù Èvia òa, mu bù Àta kè dɔ̃ ɛ̀ ɖoɖaa cã ò.”

²⁴“Nyàwo ye mù le to na mì be: Àmè kè sè ènyà nyè, eye be xɔ̀ àmè kè dɔ̃ mù ɖoɖaa ji sè a, ɖo àgbè mà-vɔ. Wo mu la ɖo kòjo na ɛ̀ ò; ɖo e to èku mè yì àgbè mè.

²⁵Nyàwo ye mù le to na mì be, gà mèa gbãnà, e va ɖo cã vɔ̀, ekè mè àmè kukuwo la sè Mawu be Èvia be ègbè. Àmè kèwo la sè yebe ègbèawo la nɔ̀ àgbè.

²⁶Đo sìgbè àlekè Àta ɖo àgbè lè ye ŋutɔ mèa, nènea ke ye be na Èvia cã la ɖo àgbè lè ye ɖokoe mè.

²⁷E na ɛ̀ àcɛ̀ be ne ɖo kòjo kudo àgbètɔwo ɖo E ye nyi *Àgbètɔ be Èvia.

²⁸Ènu kèa mu gbà kpaca mì ò, ɖo gàmè gbãnà ekè mè àmèkuku kèwo lè èyɔ̀dowo mèa, la sè *Àgbètɔ be Èvia be ègbè.

²⁹Àmè kèwo wɔ̀ nyuɛ̃a, Mawu la fɔ̃ wo so èku eye e la na wo àgbè mà-vɔ. Vɔ̀a, àmè kèwo wɔ̀ ènuvuɛ̃a, la fɔ̃ so èku ne woa ɖo kòjo na wo.

³⁰Nyè yaa, nyè mu teŋu wɔ̀ ènu ɖekpe lè ɖokoe nyè sinu ò. Ènu kè Àta gblɔ̃ na mùa, ye mù sɔ ɖona kòjo, eye mù ɖona kòjo ɖo jɔ̀jɔɛ ji. Đo nyè mu wɔ̀nà nyè ŋutɔ èjro nyè ò, vɔ̀a àmè kè dɔ̃ mù ɖoɖaa be èjro ye mù wɔ̀nà.”

³¹“Ne mù ɖù ɖase ɖo ɖokoe nyè ŋutia, ɖase nyèa mu la nyi nyàwo ò.

³²Vɔ̀a àmè bu ye le ɖù ɖase so ŋuti nyè, eye mù nya be ɖase kè be ɖù so ŋuti nyèa nyi nyàwo.

³³Mì dɔ̃ àmè ɖoɖa Yòhanɛ̀s gbɔ, eye be to nyàwo na mì.

³⁴Nyè yaa, nyè mu hiã be àgbètɔ bèa ɖù ɖase so ŋuti nyè ò; vɔ̀a, ne Mawu bèa hlùɛ̃ mì gã ŋuti ye mù le gblɔ̃ ènyà kèa ɖo.

³⁵Yòhanɛ̀s lè sìgbè kãligbɛ̃ kè wo sũ eye be le klɛ̃a nène, eye mì lɔ̃ kpɔ jìjɔɛ lè yebe kɔ̀kɔ̀ɛa nu na gà mè viɖe.

³⁶Vɔ̀a ènu bu lè, le ɖù ɖase so ŋuti nyè, wu Yòhanɛ̀s tɔ̀. Èdɔ kèwo Ètɔ nyè sɔ do àsi na mù eye mù le wɔ̀awo ye le ɖù ɖase so ŋuti nyè be E ye dɔ̃ mù ɖoɖa nyàwo.

³⁷Àta kè dɔ̃ mù ɖoɖaa ŋutɔ ɖù ɖase so ŋuti nyè. Vɔ̀a mì mu kpɔ ɛ̀ kpɔ ò, eye mì mu sè yebe ègbè kpɔ ò.

³⁸Yebe ènyà mu lè mìa mè ò, ɖo mì mu xɔ̀ àmè kè be dɔ̃ ɖoɖa mìa ji sè ò.

³⁹Mì kplana Ŋɔ̀ŋlɔ̃awo kudo vevedonu, ɖo mì kã ɖo e ji be e mè ye mì la kpɔ àgbè mà-vɔa lè. Vɔ̀a, Ŋɔ̀ŋlɔ̃awo ye ɖù ɖase so ŋuti nyè.

⁴⁰Eye, mì mu le ji la va gbɔ nyè ne mìa xɔ̀ àgbè mà-vɔa ò.”

⁴¹“Nyè mù xɔ̀ gogo nyèa so àgbètɔwo gbɔ ò.

⁴²Vɔ̀a, mù jèsi mì, mù nya be mì mu lɔ̃ Mawu ò.

⁴³Ètɔ nyè be nyikɔ mè ye mù va lè, eye mì mu xɔ̀ mù ò. Vɔ̀a, ne àmè bu va lè ye ɖokoe be nyikɔ mèa, mì la xɔ̀ ɛ̀.

⁴⁴Àleke ye mì teŋu xɔ̀sè ɖo ò, mì, àmè kèwo le ji gogo so mìa nɔ̀nɔwo gbɔ, eye mì mu jina gogo kè so Mawu gbɔa ò.

⁴⁵Mì mu gbà susu be ènyè ye la dohùɛ do mì lè Ètɔ nyè be ŋùkɔ̀ ò. Mosè, àmè kè ji mìabe ŋùɖo lèa, ye la dohùɛ do mì.

⁴⁶Ne mì xɔ̀ Mosè ji sè nyàwo a, mì la kè xɔ̀ nyè cã ji nyè sè, ɖo ènyè ŋuti ye Mosè pò nupo so lè yebe ŋɔ̀ŋlɔ̃wo mè.

⁴⁷Vɔ̀a, ne mì mu xɔ̀ ènu kèwo Mosè ŋlɔ̀ ɖɛa ji sè òa, àleke ye mì la wɔ̀ la xɔ̀ ènyà nyèwo ji sè ò?”