Read gen Yòhanɛ̀s 6 Bible Online

Yòhanɛ̀s 6 - gen bible

Yòhanɛ̀s 6

¹Lè ènu kèawo yomè a, Yesù yì Galilea be ètɔ̀, kè le nyi Tiberìa be ètɔ̀ gãa godo.

²Àmèha gã ɖe jè e yomè, ɖo àmèwo kpɔ jèsì kèwo be wɔ̀, na èdɔ̀nɔ̀woa.

³Ekèa ŋutia, Yesù yì èto ɖe ji eye be nɔ̀ ànyi lè funua ku yebe nukplaviwo.

⁴Toŋutivayì, kè le nyi Yudàviwo be àzãɖùɖu gãa gogo.

⁵Ekè Yesù ɖè ŋùku kpɔ àmèha gã kè gbãnà e gbɔa, e gblɔ̃ na Filipò be: “Fikɛ ye mi la kpɔ kpɔ̃nɔ lè la plè na àmè kèawo ne woa ɖù ò?”

⁶E gblɔ̃ ekèa sɔ le do è kpɔ, ɖo ye ŋutɔ nya ènu kè be la wɔ̀a.

⁷Filipò ɖo e ŋuti na ɛ̀ be: “Kpɔ̃nɔ klòsalòga àlɔ̀ èvè cã mu la sù ne àmè sia àmè bèa kpɔ vi ɖe ò.”

⁸Ãdre, Simɔ̀n Petrò be nɔ̀vi, kè nyi Yesù be nukplaviwo dòmètɔ ɖèkaa gblɔ̃ na ɛ̀ be:

⁹“Ŋusùvi ɖe lè fikèa, kè si kpɔ̃nɔ àtɔ̃ kudo tɔ̀mèlãvi èvè lèa. Vɔ̀a, fikɛ ènu ŋua teŋu sù na àmè gbogbo kèawo ò?”

¹⁰Yesù gblɔ̃ na yebe nukplaviawo be: “Mì na ne àmèawo kpata woa nɔ̀ ànyi.” Ègbe wiwli sùgbɔ lè funu, eye àmèawo nɔ̀ ànyi. Ŋusù àmègãxo kèwo lè funuawo la sù hotu èvè èkà èwì vɔ àtɔ̃.

¹¹Eye Yesù sɔ kpɔ̃nɔawo, ekè be do àkpe na Mawu vɔ̀a, e ma wo na àmèawo. E ma tɔ̀mèlãwo cã na wo nènea, eye àmè sia àmè xɔ̀ ekè be jro a.

¹²Kè wo ɖɔpò vɔ̀a, Yesù gblɔ̃ na yebe nukplaviawo be: “Mì cã ekè kpɔ̀tɔ̀a bɔ̀, ne ɖekpe mu gbà gũ ò.”

¹³Yebe nukplaviawo cã wo bɔ̀, eye ekè kpɔ̀tɔ̀ so kpɔ̃nɔ àtɔ̃awo mè, wàlɛbɛ kè àmèwo ɖù ènu vɔ̀a, ɖɔ àjàfi woèvè.

¹⁴Kè àmèwo kpɔ ŋùdãdɔ kè bè wɔ̀a, wo gblɔ̃ be: “Mawu be gblɔ̃ɖɛtɔ kè ɖo la va xixea mèa ye be nyi nyàwo.”

¹⁵Vɔ̀a, ekè Yesù kpɔ be wo la va le yè àkpasɛ̃sɛ̃, sɔ ɖo èfìɔa, e jo lè woa gbɔ, eye ye ɖèka yì èto ɖe ji.

¹⁶Kè fìɛ̃si ɖoa, Yesù be nukplaviwo ɖì va Galilea be ètɔ̀a to.

¹⁷Wo ɖo ètɔ̀jihũ ɖe mè le sò ètɔ̀a yì Kapɛrnaum. Yesù mu kpɔ va woa gbɔ hàɖe ò, vɔ̀a vìvìti do vɔ̀.

¹⁸Àya sɛ̃sɛ̃ ɖe le pò, eye ètɔ̀a le wɔ̀ àdã.

¹⁹Wàlɛbɛ kè Yesù be nukplaviawo kù èhũa, sìgbè èkpeti àtɔ̃, àlo èkpeti àdɛ̃ nènea, wo kpɔ Yesù le zɔ̃ lè ètɔ̀a ji gbãnà èhũa gbɔ. Vɔ̃vɔ̃ ɖo wo,

²⁰vɔ̀a Yesù gblɔ̃ na wo be: “Ènyè ye, mì mu gbà vɔ̃ ò!”

²¹Nukplaviawo ji be yèwoa xɔ̀ Yesù ɖo èhũa mè, vɔ̀a wàlɛbɛ ŋua ye èhũa jè àgo lè ànyigbã kè ji wo le yìa ji.

²²Kè èŋù kèa, àmè kèwo ci ètɔ̀a be àgo ɖèa jiawo kpɔ be èhũ ɖèka kpò ye lè ètɔ̀a to. Wo nya be Yesù mu ɖo ètɔ̀jihũa mè kudo yebe nukplaviwo, wàlɛbɛ kè wo jè èmɔa ò. Nukplaviawo ɖèɖe kpò ye ɖo ètɔ̀jihũa mè.

²³Gãke èhũ buwo so Tiberìa, va gogo àfi kè wo ɖù kpɔ̃nɔ lè, wàlɛbɛ kè Tɔhonɔ̀ do àkpe vɔ̀a.

²⁴Kè àmèawo mu kpɔ Yesù ò, eye wo mu kpɔ yebe nukplaviwo cã òa, wo ɖo ètɔ̀jihũawo mè, tùtà Kapɛrnaum, la yì ji ì.

²⁵Wo yì kè do e ŋuti lè ètɔ̀a be àgo ɖèa ji, eye wo biɔ ɛ̀ be: “Ènufiɔtɔ, gà kɛ mè ye wò va fikèa ò?”

²⁶Yesù ɖo e ŋuti na wo be: “Nyàwo mù le to na mì; mu nyi ŋùdãdɔ kèwo mù wɔ̀, eye mì kpɔawo ŋuti mì le ji mù ɖo ò. Vɔ̀a, kpɔ̃nɔ kè mì ɖù, ɖɔpòa ŋuti ye.

²⁷Mì mu gbà wɔ̀ èdɔ sɔ ji ènu ɖùɖu kè gblena ò, vɔ̀a, mì ji ekè nɔ̀nà ànyi, nana àgbè mà-vɔa, ekè *Àgbètɔ be Èvia la na mìa; ɖo e ye Mawu, Àta do jèsìdo.”

²⁸Wo biɔ ɛ̀ be: “Nukɛ ye e jè be mia wɔ̀ ne mia teŋu wɔ̀ Mawu be èdɔwo ò?”

²⁹Yesù ɖo e ŋuti na wo be: “Èdɔ kè Mawu le ji be mìa wɔ̀a ye nyi be mìa xɔ̀ àmè kè be dɔ̃ ɖoɖaa ji sè.”

³⁰Wo gbà biɔ ɛ̀ be: “Jèsìdo kɛ ye wò la wɔ̀, mi la kpɔ, sɔ xɔ̀ ji wò sè ò? Èdɔ kɛ ye wò la wɔ̀ ò?

³¹Mia tɔgbewo ɖù manà[6] lè zògbè ji, sìgbè àlekè wo ŋlɔ̀ ɛ̀ ɖɛ be: 'E na wo ènu ɖùɖu kè so jiŋùkusia be woa ɖù.'”

³²Yesù gblɔ̃ na wo be: “Nyàwo mù le to na mì; mu nyi Mosè ye na mì ènu ɖùɖu kè so jiŋùkusia ò. Vɔ̀a Ètɔ nyè ye na mì ènu ɖùɖu àdodoe kè so jiŋùkusia.

³³Đo, ènu ɖùɖu kè so Mawu gbɔa, ye nyi àmè kè ɖì so jiŋùkusi va nana àgbè àgbètɔwoa.”

³⁴Wo gblɔ̃ na ɛ̀ be: “Tɔhonɔ̀, nɔ̀ na mi ènu ɖùɖu ŋua tɛ̀gbɛ̀.”

³⁵Yesù ɖo e ŋuti na wo be: “Ènyè ye nyi àgbè be ènu ɖùɖua. Àmè kè dɔ̃ va gbɔ nyèa, àdɔ̀ mu la wù ì gbèɖe ò. Àmè kè xɔ̀ ji nyè sè a, sìkɔ mu la tì ì kpɔ gbèɖe ò.

³⁶Vɔ̀a, mù to è na mì. Mì kpɔ mù, gãke mì mu xɔ̀sè ò.

³⁷Àmè kèwo kpata Ètɔ nyè sɔ na mùawo la va gbɔ nyè, eye nyè mu la nyà àmè kè va gbɔ nyèa ò.

³⁸Đo, nyè mu so jiŋùkusi va, la wɔ̀ àpe èjro ò. Vɔ̀a àmè kè dɔ̃ mù ɖoɖaa be èjro ŋuti ye mù va ɖo.

³⁹Eye, àmè kè dɔ̃ mù ɖoɖo a be èjro ye nyi be, àmè kèwo keŋu be sɔ na mùawo dòmètɔ ɖekpe mu gbà bu ò, vɔ̀ bòhũa, ma fɔ̃ woa kpata ɖo àgbè lè àzã mlɛ̃a ji.

⁴⁰Ètɔ nyè be èjro ye nyi be, àmè ɖekpekpe àmè kè kpɔ Èvia, eye be xɔ̀ e ji sè a, ne kpɔ àgbè mà-vɔ, ne ènyè yaa, ma fɔ̃ ɛ̀ ɖo àgbè, lè àzã mlɛ̃a ji.”

⁴¹So gà ŋua mèa, Yudàviwo tɔ lihũi lìli so Yesù ŋuti, ɖo e gblɔ̃ be: “Ènyè ye nyi ènu ɖùɖu kè so jiŋùkusi vaa.”

⁴²Eye wo gbà gblɔ̃ be: “Mu nyi Yesù, Yozɛ̀f be èvia yeŋuã? Mi mu jèsi ètɔa, ku ènɔa ò a? Nukɛ ŋuti bè le gblɔ̀ fifì be: 'Mu so jiŋùkusi va ò?'”

⁴³Yesù gblɔ̃ na wo be: “Mì mu gbà lì lihũi lè mìa nɔ̀nɔwo dòmè ò.

⁴⁴Àmè ɖekpe mu teŋu va gbɔ nyè, ne Àta kè dɔ̃ mù ɖoɖaa mu dɔ̃ ɛ̀ va ò; eye mù la fɔ̃ ɛ̀ so èku lè àzã mlɛ̃a ji.

⁴⁵Wo ŋlɔ̀ ɖo gblɔ̃ɖɛtɔwo be Xoma mè be: 'Mawu la fiɔ ènunya woa kpata.' Ye ŋutia, àmè ɖekpekpe kè sè ènu kè so Àta gbɔ, eye be kpla ènunya so E gbɔa, vana gbɔ nyè.

⁴⁶Àmè ɖe mu kpɔ Àta kpɔ, ne mu nyi àmè kè so Mawu gbɔa ò. E yaa, e kpɔ Àta.

⁴⁷Nyàwo mù le to na mì. Àmè kè xɔ̀ ji nyè sè a, ɖo àgbè mà-vɔ.

⁴⁸Ènyè ye nyi ènu ɖùɖu kè nana àgbè àdodoe a.

⁴⁹Mìa tɔgbewo ɖù manà lè zògbè ji, gãke wo ku.

⁵⁰Ènuɖùɖu kè so jiŋùkusia ye nyi ekèa. Àmè kè ɖù ìa, mu la ku ò.

⁵¹Ènyè ye nyi àgbè-nuɖùɖu kè ɖì so jiŋùkusi vaa. Àmè kè la ɖù ènu ɖùɖu kèa, la nɔ̀ àgbè kaka sɔ yì. Àpe ŋutilã ye nyi ènu ɖùɖu kè mù la sɔ na ne xixea ne nɔ̀ àgbè.”

⁵²Yudàviwo tɔ ènyà dɔ̃dɔ̃ sɛ̃sɛ̃ ɖe lè woa nɔ̀nɔwo dòmè. Wo le gblɔ̃ be: “Àlekè ye ŋusù kèa la teŋu na mi yebe ŋutilã be mia ɖù ɖo ò?”

⁵³Vɔ̀a Yesù gblɔ̃ na wo be: “Nyàwo ye mù le to na mì: ne mì mu ɖù *Àgbètɔ be Èvia be ŋutilã ò, eye ne mì mu nù yebe èhũ òa, mì mu la ɖo àgbè a ò.

⁵⁴Àmè kè ɖùnà àpe ŋutilã, eye be nùnà àpe èhũa, ɖo àgbè mà-vɔ, eye ènyè ya, mù la fɔ̃ ɛ̀ so èku, lè àzã mlɛ̃a ji.

⁵⁵Đo ŋutilã nyèa, ènu ɖùɖu àdodoe ye be nyi, eye èhũ nyè cã nyi ènunùnu àdodoe.

⁵⁶Ne àmè ɖe ɖù ŋutilã nyè, eye be nù èhũ nyèa, àmè ŋua lè àgbè lè ènyè mè, eye nyè cã mù lè àgbè lè ye mè.

⁵⁷Sìgbè àlekè Àta kè dɔ̃ mù ɖoɖaa lè àgbè, eye mù lè àgbè to Àta jia, nènea ke ye àmè kè la ɖù ŋutilã nyèa la nɔ̀ àgbè to ji nyèa yeŋu.

⁵⁸Ènuɖùɖu kè ɖì so jiŋùkusia ye nyi ekèa. E tovò na ekè mìa tɔgbewo ɖùa. Mìa tɔgbewo yaa, wo ku, vɔ̀a àmè kè la ɖù ènu ɖùɖu kèa, la nɔ̀ àgbè kaka sɔ yì.”

⁵⁹Yesù gblɔ̃ ènyà kèawo, wàlɛbɛ kè be le fiɔ ènu àmèwo lè bɔ̀bɔ̀pe kè lè Kapɛrnaum-a.

⁶⁰Kè Yesù be nukplaviwo sè ènu kèwo be gblɔ̃ woa, woa dòmètɔ sùgbɔ gblɔ̃ be: “Ènyà kèa ve sèse ŋutɔ! Àmè kɛ ye la teŋu xɔ̀ ɛ̀ ò?”

⁶¹Yesù nya be yèbe nukplaviwo le lì lihũi so ènyà kè yè gblɔ̃a ŋuti, eye be gblɔ̃ na wo be: “Ènyà kè mù gblɔ̃a nyrã lè ŋùmè na mìa?

⁶²Ne mì kpɔ Àgbètɔ be Èvia le yì jiŋùkusi, àfi kè be so vaa ɖe, nukɛ ye mì la wɔ̀ ò?

⁶³Gbɔ̃gbɔ̃ Kɔ̀kɔ̀ɛ a ye nana àgbè àmè. Àgbètɔ be ŋutilã mu teŋu wɔ̀ ènu ɖe ò. Ènyà kèwo mù gblɔ̃ na mìa ye nana Mawu be gbɔ̃gbɔ̃ kè nana àgbè a.

⁶⁴Vɔ̀a àmè ɖewo lè mìa dòmè kèwo mu xɔ̀sè ò.” So gɔ̃mèjèje a kea, Yesù nya àmè kèwo mu xɔ̀sè òawo, eye be nya àmè kè la do è àsia cã.

⁶⁵Yesù yì e ji, gblɔ̃ be: “Ènu kèa ŋuti mù gblɔ̃ na mì be, ne Àta ŋutɔ mu ɖè èmɔ na àmè ɖe òa, àmèa mu la teŋu va gbɔ nyè ò.”

⁶⁶So gà ŋua mèa, yebe *nukplavi sùgbɔ trɔ lè e yomè, eye wo mu gbà zɔ̃nà kudo è ò.

⁶⁷Wàlɛbɛ ŋua, e gblɔ̃ na woèvèawo be: “Mìawo ya ɖe, mì mu le ji la jo òa?”

⁶⁸Simɔ̀n Petrò ɖo e ŋuti na ɛ̀ be: “Tɔhonɔ̀, àmè kɛ gbɔ ye mi la yì ò? Gbɔ wò ye àgbè mà-vɔ be ènyàwo lè.

⁶⁹Fifìa, mi xɔ̀sè, eye mi nya be èwò ye nyi Mɛ̀sia kè Mawu dɔ̃ ɖoɖaa.”

⁷⁰Yesù ɖo e ŋuti na wo be: “Ènyè ŋutɔ ye cã mì, mì, àmè woèvèawo, gãke àmè ɖèka lè mìa dòmè kè nyi Àbòsam.”

⁷¹Yudà, Simɔ̀n Iskariɔt be èvi ŋuti be gblɔ̃ ènyà kèa so. Đo ye cã lè Yesù be *nukplavi woèvèawo dòmè, gãkea, e ye nyi àmè kè la va xɔ̀ kpli na ɛ̀.