Read gen Yòhanɛ̀s 7 Bible Online

Yòhanɛ̀s 7 - gen bible

Yòhanɛ̀s 7

¹Ekèa yomè a, Yesù yì sã to Galilea be àgowo ji. Mu ji la yì sã to Yudeà be àgowo ji ò, ɖo Yudàviwo be àmègãwo le ji èmɔ lè e ŋuti, ne woa wù ì.

²Fifìa Yudàviwo be gòxɔ be àzãa lili

³eye Yesù be nɔ̀viwo gblɔ̃ na ɛ̀ be: “E jè be wòa jo lè fikèa yì Yudeà, ne *nukplavi wò kèwo lè funuawo cã woa kpɔ èdɔ kèwo wò le wɔ̀awo.

⁴Đo àmè kè le ji be woa jèsi yèa, mu bènà ò. Kè wò le wɔ̀ èdɔ gã kèawoa, e jè be wòa ɖè ɖokoe wò fiɔ, ne àmè sia àmè bèa jèsi wò.”

⁵Đo nɔ̀viawo cã, mu xɔ̀ e ji sè ò.

⁶Yesù gblɔ̃ na wo be: “Àpe gàmè mu kpɔ sù hàɖe ò; vɔ̀a, mìawo yaa, gà sia gàmè ye nyɔ na mì.

⁷Àgbètɔwo mu teŋu crì mì ò. Vɔ̀a, wo crì nyè ya, ɖo mù le ɖù ɖase so woa ŋuti be woabe èdɔwɔ̀wɔwo nyrã.

⁸Mìawo yaa, mì yì àzãɖùpea. Ènyè yaa, nyè mu kpɔ le yì hàɖe ò, ɖo gàmè mu kpɔ sù na mù ò.”

⁹Kè Yesù gblɔ̃ ènyà kèawo na wo yomè a, e ci Galilea.

¹⁰Vɔ̀a kè nɔ̀viawo jo vɔ̀a, ye cã jè èmɔ yì lè wawla mè, ɖo, mu ji be àmè ɖe ne kpɔ yè ò.

¹¹Lè àzãa hùenua, Yudàviwo le ji ì, eye wo le biɔ be: “Fikɛ ŋutɔ ye be lè ò?”

¹²Àmè kèwo va àzãa ɖùpeawo le gblɔ̃ ènyà sùgbɔ so Yesù ŋuti. Àmè ɖewo le gblɔ̃ be: “Àmè nyuɛ̃ ye nyi ŋusù ŋua.” Vɔ̀a àmè buwo le gblɔ̃ be: “Àmèflùtɔ ɖe kpò ye be nyi.”

¹³Vɔ̀a, àmè kèwo le gblɔ̃ Yesù be ènyàawo dòmètɔ ɖe mu dojì kɔ ègbè yì ji ò, ɖo wo le vɔ̃ Yudàviwo be àmègãwo.

¹⁴Lè àzãɖùɖua be dòdòmèa, Yesù yì mawuxɔa mè, eye be fiɔ ènu.

¹⁵Ekèa kpaca Yudàviwo, eye wo gblɔ̃ be: “Ŋusù kèa mu kpla xoma kpɔ ò. Àleke be wɔ̀ nya ŋɔ̀ŋlɔ̃awo ò?”

¹⁶Yesù ɖo e ŋuti na wo be: “Ènufiɔfiɔ nyèa mu so gbɔ nyè ò, vɔ̀a àmè kè dɔ̃ mù ɖoɖaa gbɔ ye be so.

¹⁷Ne àmè ɖe ji be yèa wɔ̀ Mawu be èjroa, e la nya ne ènufiɔfiɔ kèa so Mawu gbɔ, àlo ne ènyè ŋutɔ ye le pò nupo lè ɖokoe nyè sinua.

¹⁸Àmè kè ji ye ŋutɔ be gogoa, pònà nupo lè ye ɖokoe sinu. Vɔ̀a àmè kè le ji àmè kè dɔ̃ ɛ̀ ɖoɖaa kpò be gogoa, mu flùnà àmè ò. Nyàwo ye be tona.

¹⁹Mu nyi Mosè ye na mì èseaa? Vɔ̀a mìa dòmètɔ ɖekpe mu zɔ̃nà ɖo èsea ji ò. Nukɛ ŋuti mì le ji la wù mù ɖo ò?”

²⁰Àmèha a ɖo e ŋuti na ɛ̀ be: “Gbɔ̃gbɔ̃ vuɛ̃ ye lè èwò mè. Àmè kɛ ye le ji la wù wò ò?”

²¹Yesù gbà ɖo e ŋuti na wo be: “Èdɔ ɖèka kpò ye mù wɔ̀, eye be kpaca mìa kpata.

²²Mosè ɖo èvo sòso na mì, mu nyi ye gbɔ be so ò, vɔ̀a mìa tɔgbewo gbɔ ye be so, eye mì sònà èvo lè jɛ̃gbɔ̃zã gbè.

²³Ne mì teŋu sò èvo na àmè lè jɛ̃gbɔ̃zã gbè, kè ye mì ma dà lè Mosè be èsea ji òa, nukɛ ŋuti ye mì le do àdɔ̀mèze ɖo ŋuti nyè be mù dà èdɔ̀ na àgbètɔ blibo lè jɛ̃gbɔ̃zã gbè ɖo ò?

²⁴Mì mu gbà nɔ kpɔ ènu be nɔ̀nɔmè, sɔ nɔ ɖo kòjo ò, vɔ̀a, mì nɔ ɖo kòjo jɔ̀jɔɛ.”

²⁵Yèruzàlɛmtɔwo le gblɔ̃ be: “Mu nyi ŋusù kè àmèwo le ji la wùa yeŋuã òa?

²⁶E ye le pò nupo àgbãŋùgbà ŋua! Vɔ̀a àmè ɖe mu le gblɔ̃ ènyà ɖe na ɛ̀ ò. Àlo àmègãwo va ŋɔjè e mè be E ye nyi Mɛ̀siaa?

²⁷Mi nya àfi kè ŋusù kèa soa. Vɔ̀a ne Mɛ̀sia ŋutɔ vaa, àmè ɖekpe mu la nya àfi kè be soa ò.”

²⁸Wàlɛbɛ ŋua, kè Yesù le fiɔ ènu lè mawuxɔa mèa, e gblɔ̃ be: “Mì be yèwo jèsi mù! Mì be yèwo nya àfi kè mù soa! Nyè mu va lè ɖokoe nyè sinu ò. Vɔ̀a àmè kè nyi àmè àdodoe a ye dɔ̃ mù ɖoɖa. Mì mu jèsi ì ò.

²⁹Nyè ya, mù jèsi ì, ɖo ye gbɔ ye mù so. E ye dɔ̃ mù ɖoɖa.”

³⁰Wàlɛbɛ ŋuaa, wo ji be yèwoa le è; vɔ̀a, àmè ɖe mu tɔ ɛ̀ àsi ò, ɖo yebe gàmè mu kpɔ sù ò.

³¹Àmè sùgbɔ le àmèha a dòmè, xɔ̀ e ji sè. Eye wo gblɔ̃ be: “Ne Mɛ̀siaa ŋutɔ vaa, e la gbà wɔ̀ ŋùdãdɔ wu ŋusù kèa ye à?”

³²Farizìwo sè lihũi kè àmèha a le lì so Yesù ŋutia. *Mawunɔ gãwo ku Farizìwo dɔ̃ gbãdãgbãwo ɖoɖa be woa yì le è.

³³Yesù gblɔ̃ na wo be: “Mù la gbà nɔ̀ ànyi ku mì na hùenu vi ɖe kpò. E yomè a, mù la gbà trɔ yì àmè kè dɔ̃ mù ɖoɖaa gbɔ.

³⁴Mì la ji mù, vɔ̀a, mì mu la kpɔ mù ò. Đo mì mu la teŋu va àfi kè mù le yìa ò.”

³⁵Yudàviwo tɔ gbɔ̃gblɔ̃ lè woa nɔ̀nɔwo dòmè be: “Fikɛ be la yì, eye mi mu la teŋu kpɔ ɛ̀ ò? E la yì àmè kèwo kã ɖo ègbe lè Grikwo dòmèa gbɔa? E la yì fiɔ ènu Grikwo ye à?

³⁶Nukɛ ŋutɔ be le gblɔ̃ be: 'Mì la ji mù, vɔ̀a mì mu la kpɔ mù ò, ɖo àfi kè mù le yìa, mì mu la teŋu va ò?'”

³⁷Lè àzãa be ŋùkèkè mlɛ̃a gbèa, kè nyi zĩzĩ be ŋùkèkèa, Yesù nɔ̀tè, gblɔ̃ be: “Ne sìkɔ le tì àmè ɖe a, ne va gbɔ nyè. Eye, àmè kè xɔ̀ ji nyè sè a, ne nù èsì.

³⁸Sìgbè àlekè ŋɔ̀ŋlɔ̃ a gblɔ̃ ɖɛ nènea, àgbè be ètɔ̀ sàsrawo la so nènemea mè.”

³⁹Yesù le gblɔ̃ ekèa so Gbɔ̃gbɔ̃ Kɔ̀kɔ̀ɛ kè àmè kèwo xɔ̀ e ji sèawo la xɔ̀a ŋuti. Wàlɛbɛ ŋua, wo mu kpɔ na Gbɔ̃gbɔ̃ a ò, ɖo Mawu mu kpɔ ɖè Yesù be gogoa fiɔ ò.

⁴⁰Àmè kèwo sè yebe ènyàwo lè àmèha a mèa dòmètɔ ɖewo gblɔ̃ be: “Ŋusù kèa ye le nyi Mawu be gblɔ̃ɖɛtɔa nyàwo!”

⁴¹Àmè ɖewo le gblɔ̃ be: “Àmè kèa ye nyi Mɛ̀sia à!” Vɔ̀a àmè buwo gbà gblɔ̃ be: “Mɛ̀siaa la teŋu so Galilea?

⁴²Ŋɔ̀ŋlɔ̃ a mu gblɔ̃ be David be jìjimè ye Mɛ̀sia la soa? Eye be la so Bɛtlɛhɛ̀m, kɔpe kè mè David sĩ lèa mè òa?”

⁴³Nène a, màma va àmèha a dòmè ɖo e ŋuti.

⁴⁴Àmè ɖewo lè woa dòmè le ji la le è, vɔ̀a woa dòmètɔ ɖe be àlɔ̀ mu jè e ŋuti ò.

⁴⁵Gbãdãgbãwo trɔva * mawunɔ gãwo ku Farizìawo gbɔ. Àmè kèawo gblɔ̃ na wo be: “Nukɛ ŋuti mì mu le è va ò?”

⁴⁶Gbãdãgbãwo ɖo e ŋuti na wo be: “Mi mu sè àmè ɖe pò nupo sìgbè ŋusù kèa nène kpɔ ò.”

⁴⁷Farizìawo gblɔ̃ be: “Mìawo cã mì tàsi mìa ɖokoewo be flù mìa?

⁴⁸Mì kpɔ àgbònùglawo dòmètɔ ɖe, àlo Farizì ɖe xɔ̀ e ji sè a?

⁴⁹Vɔ̀a àmè kèwo mu jèsi Mosè be èseawo ò, eye kpɛ̃sɛ̃ lè woa jiawo kpò ye le jè e yomè.”

⁵⁰Vɔ̀a Nikodemɔ̀, Farizìwo dòmètɔ ɖèka kè yì kpɔ Yesù sãa, gblɔ̃ be:

⁵¹“Miabe èsea gblena hùɛ do àmè ɖe, ne wo mu ɖo èto è sɔ nya àgɔ̀ kè be jè a gbɔ̀xue ò a?”

⁵²Wo ɖo e ŋuti na ɛ̀ be: “Galilea ye wò cã wò soa? Jrò ŋɔ̀ŋlɔ̃ a mè kpɔ nyuɛ̃ ɖe. Wò la kpɔ be Mawu be gblɔ̃ɖɛtɔ ɖe mu sona Galilea ò.” [

⁵³Eye wo jo yì woabe àxuewo mè àmètɔ̀ àmètɔ̀.]