Read gen Yòhanɛ̀s 8 Bible Online

Yòhanɛ̀s 8 - gen bible

Yòhanɛ̀s 8

²Ekè èŋù kèa, e gbìgbɔ̀ yì mawuxɔa mè ŋùdekɛ̃nyɛ fùtùu. Kè àmèwo zɔ̃ hòo va e gbɔa, e nɔ̀ ànyi, eye be tɔ wo ènufiɔfiɔ.

³Wàlɛbɛ ŋua, èsefiɔtɔwo kudo Farizìwo kplɔ̀ nyɔ̃nù ɖe va. Wo sò nyɔ̃nùa do, be le wɔ̀ *àhasì, eye wo kplɔ̀ ɛ̀ va ɖotè lè àmèwo be ŋùkɔ̀.

⁴Wo gblɔ̃ na ɛ̀ be: “Ènufiɔtɔ, wo sò nyɔ̃nù kèa do, be le wɔ̀ *àhasì.

⁵Mosè ɖè ègbè na mi, lè èsea mè be mia pò èkpe leke be nyɔ̃nùawo wù. Nukɛ wò ya wò kpɔ so e ŋuti ò?”

⁶Wo le gblɔ̃ ekèa, ne woa sɔ tè è kpɔ, ne woa sè ènyà lè e nu, sɔ dohùɛ do è. Vɔ̀a Yesù bɔ̀bɔ̀, tɔ ènu ŋɔ̀ŋlɔ̃ ɖo ànyigbã kudo yebe àlɔ̀vi.

⁷Kè wo kpɔ̀tɔ̀ le biɔ ɛ̀ ènyàa, Yesù fɔ̃ yì ji, gblɔ̃ na wo be: “Mìa dòmètɔ kè mu wɔ̀ ènuvuɛ̃ kpɔ ò a, ne dà ɛ̀ èkpe cucugbã.”

⁸E gbà bɔ̀bɔ̀ le ŋlɔ̀ ènu ɖo ànyigbã ke.

⁹Kè wo sè ènyà kèawoa, wo jo, ɖèka ɖèka, so àmègãwo ji, eye, e va kpɔ̀tɔ̀ Yesù ɖèka kudo nyɔ̃nùa. Ekè nyɔ̃nùa kpɔ̀tɔ̀ lè ètè lè ŋùkɔ̀ na ɛ̀a,

¹⁰Yesù kɔ èta yì ji, eye be gblɔ̃ na ɛ̀ be: “Nyɔ̃nù, fikɛ wo lè ò? Àmè ɖekpe mu gblehùɛ do wò òa?”

¹¹Nyɔ̃nùa ɖo e ŋuti be: “Àpetɔ, àmè ɖekpe mu gblehùɛ do mù ò.” Yesù gblɔ̃ na ɛ̀ be: “Nyè cã nyè mu gblehùɛ do wò ò. Jo yì; vɔ̀a, mù gbà wɔ̀ ènuvuɛ̃ ke ò.”]

¹²Yesù gbà pò nupo na àmèha a be: “Ènyè ye nyi xixea be kɛ̃klɛ̃a. Ne àmè ɖe kplɔ̀ mù do a, àmè ŋua mu la zɔ̃ lè vìvìti mè ò, vɔ̀a, e la ɖo kɔ̀kɔ̀ɛ kè nana àgbè a.”

¹³Farizìwo gblɔ̃ na ɛ̀ be: “Wò ŋutɔ wò le ɖù ɖase na ɖokoe wò; ɖase wòa mu nyi àdodoe ò.”

¹⁴Yesù ɖo e ŋuti na wo be: “Ne mù le ɖù ɖase na ɖokoe nyè ŋutɔ cã a, ɖase nyèa nyi nyàwo, ɖo mù nya àfi kè mù so, kudo àfi kè mù le yìa. Mìawo yaa, mì mu nya àfi kè mù so, kudo àfi kè mù le yìa ò.

¹⁵Mì ɖona kòjo sìgbè àgbètɔwo nène. Gãke nyè yaa, nyè mu le ɖo kòjo na àmè ɖe ò.

¹⁶Vɔ̀a ne e nyi be mù ɖo kòjo cã a, mù sònà ènyà jɔ̀jɔɛ; ɖo mu nyi ènyè ɖèka ye ɖona kòjoa ò. Vɔ̀a, ènyè ku Ètɔ nyè kè dɔ̃ mù ɖoɖaa ye.

¹⁷Wo ŋlɔ̀ ɖo mìabe Èse Xoma a mè be, ènu kè àmè èvè ɖù ɖase ɖèka na a nyi nyàwo.

¹⁸Mù le ɖù ɖase so ɖokoe nyè ŋuti, eye Ètɔ nyè kè dɔ̃ mù ɖoɖaa cã le ɖù ɖase na mù.”

¹⁹Wo biɔ ɛ̀ be: “Fikɛ Ètɔ wòa lè ò?” Yesù ɖo e ŋuti be: “Mì mu jèsi mù ò; mì mu jèsi Ètɔ nyè cã ò; ɖo ne mì kè jèsi mùa, mì la jèsi Ètɔ nyè cã.”

²⁰Yesù le gblɔ̃ ènyà kèawo wàlɛbɛ kè be le fiɔ ènu lè mawuxɔa mè, lè tèpe kè wo yɔna be Ènujɔ̀pea. Àmè ɖe mu le è ò, ɖo yebe gàmè mu kpɔ sù hàɖe ò.

²¹Eye Yesù gbà gblɔ̃ na wo be: “Mù le jo, eye mì la ji mù vɔ̀a, mì la ku ci mìabe ènuvuɛ̃wo mè. Àfi kè mù le yìa, mì mu la teŋu va ò.”

²²Yudàviwo le gblɔ̃ be: “E le ji la wù ye ɖokoe ye à? Đo e gblɔ̃ be: 'Mì mu la teŋu yì àfi kè mù le yìa ò.'”

²³Yesù ɖo e ŋuti na wo be: “Ànyigbã kèa ji ye mì so. Ènyè yaa, jiŋùkusi ye mù so va. Xixe kèa tɔ̀ ye mì nyi. Ènyè yaa, nyè mu nyi xixe kèa tɔ̀ ò.

²⁴Ye ŋuti ye mù gblɔ̃ na mì be, mì la ku ci mìabe ènuvuɛ̃wo mè. Ne mì mu xɔ̀sè be mù nyi àmè kè mù nyi òa, Ɛ̃ɛ mì la ku ci mìabe ènuvuɛ̃wo mè.”

²⁵Wo biɔ ɛ̀ be: “Àmè kɛ ye wò nyi ò?” Yesù ɖo e ŋuti na wo be: “Àmè kè mù gblɔ̃ na mì so gɔ̃mèjèje a be mù nyia, kpò ye mù nyi.

²⁶Mù ɖo ènyà sùgbɔ la to, eye mù la hɛ̃ so mìa ŋuti. Vɔ̀a, àmè kè dɔ̃ mù ɖoɖaa, nyàwototɔ ye be nyi; eye ènyà kè mù sè so e gbɔa kpò ye mù le to na xixea.”

²⁷Wo mu sè e mè be Àta ŋuti ye be le pò nupo so na yèwo ò.

²⁸Yesù gblɔ̃ na wo be: “Wàlɛbɛ kè mì la kɔ *Àgbètɔ be Èvia yì ji vɔ̀a, mì la nya be mù nyi Àmè kè mù nyia, eye nyè mu wɔ̀nà ènu ɖe lè ɖokoe nyè sinu ò: ènu kè Àta fiɔ mùa kpò ye mù gblɔ̃nà.

²⁹Àmè kè dɔ̃ mù ɖoɖaa lè kudo mù. Mu gble ènyè ɖèka ɖɛ ò; ɖo ènu kèwo jè ŋùmè na ɛ̀a kpò ye mù wɔ̀nà.”

³⁰Wàlɛbɛ kè be le pò nupo nènea, àmè sùgbɔ xɔ̀ e ji sè.

³¹Eye Yesù to na Yudàvi kèwo xɔ̀ e ji sèawo be: “Ne mì le ènyà nyèwo ɖo àsia, mì la nyi *nukplavi nyèwo nyàwo.

³²Mì la jèsi nyàwo a eye nyàwo a la na, mì la vò.”

³³Wo gblɔ̃ na ɛ̀ be: “Abràham be jìjimèviwo ye mi nyi, eye mi mu nyi kluvi na àmè ɖe kpɔ ò. Leke wò la teŋu gblɔ̃ be, mì la vò ɖo ò?”

³⁴Yesù ɖo e ŋuti na wo be: “Nyàwo mù le to na mì. Àmè ɖekpekpe àmè kè wɔ̀nà ènuvuɛ̃a, ènuvuɛ̃ be kluvi ye be nyi.

³⁵Kluvi mu nɔ̀nà àxomè kaka sɔ yì ò. Àxuevi ye nɔ̀nà àxomè kaka sɔ yì.

³⁶Ye ŋutia, ne Èvia ye na mì vòa, eŋuã, mì la vò nyàwo.

³⁷Mù nya be, Abràham be ènukuwo ye mì nyi. Vɔ̀a ekè àpe ènyàwo mu ɖo mìabe èjì mè ò a, mì le ji la wù mù.

³⁸Ènu kè mù kpɔ lè Ètɔ nyè gbɔa, ye mù le to na mì. Mìa yaa, mì le wɔ̀ ènu kè mì sè so mìa tɔ gbɔa.”

³⁹Wo ɖo e ŋuti na ɛ̀ be: “Abràham ye nyi mia tɔ.” Yesù gblɔ̃ na wo be: “Ne mì nyi Abràham be èviwo nyàwo a, mì nɔ wɔ̀ ènu sìgbè Abràham nène.

⁴⁰Vɔ̀a, fifìa, mì le ji la wù mù, ènyè àmè kè to nyàwo kè mù sè so Mawu gbɔa, na mìa. Abràham mu wɔ̀ ènu kèa ò.

⁴¹Mìawo yaa, ènu kèwo mìa tɔ wɔ̀a ye mì le wɔ̀.” Wo ɖo e ŋuti na ɛ̀ be: “Ètɔ ɖèka kpò ye mi ɖo, eye nyi Mawu. Mi mu nyi àhasìviwo ò!”

⁴²Yesù ɖo e ŋuti na wo be: “Ne Mawu ye nyi mìa tɔa, mì la kè lɔ̃ mù, ɖo Mawu mè mù so va. E ya ŋuti ye mù lè fikèa ɖo. Nyè mu va lè ɖokoe nyè sinu ò; vɔ̀a, e ye dɔ̃ mù ɖoɖa.

⁴³Nukɛ ŋuti ye mì mu ŋɔjè ènu kè mù le gblɔ̃ na mìa mè ò? Kè ènyà nyèwo vena sèse na mìa ŋuti ye.

⁴⁴Àbòsam ye nyi mìa tɔ, eye ènu kè be jro a ye mì jina la wɔ̀. Àmèwùtɔ ye be nyi, so kaka gɔ̃mèjèje a ke. Ye kudo nyàwo wo mu nyina ò. Đo nyàwo mu lè e ya mè ò. Ne e lè ɖà àjèa, e ɖènà yebe jɔ̀jɔmè fiɔna. Đo e nyi àjèɖàtɔ, gbà nyi àjèɖàɖa be ètɔ.

⁴⁵Vɔ̀a, ènyè yaa, kè mù tona nyàwo a ŋuti ye mì mu xɔ̀ ji nyè sè ò ɖo.

⁴⁶Mìa dòmètɔ kɛ ye la teŋu ɖè è fiɔ mù be mù wɔ̀ ènuvuɛ̃ ò? Ne mù jo le to nyàwo a, nukɛ ŋuti ye mì mu xɔ̀ ji nyè sè ɖo ò?

⁴⁷Àmè kè nyi Mawu tɔ̀a ɖona èto Mawu be ènyàwo. Eye, kè mìawo yaa, mì mu nyi Mawu tɔ̀ òa, ye ŋuti ye mì mu le ɖo èto mù ò ɖo.”

⁴⁸Yudàviawo ɖo e ŋuti be: “Kè mi be wò nyi Sàmarìatɔ, eye gbɔ̃gbɔ̃ vuɛ̃ lè èwò mèa, wò mu kpɔ be miabe ènyà lè e mè ò a?”

⁴⁹Yesù ɖo e ŋuti na wo be: “Aò! Gbɔ̃gbɔ̃ vuɛ̃ mu lè mè nyè ò. Ètɔ nyè ye mù le na gogo, vɔ̀a mìawo yaa, mì jo le do vlo mù.

⁵⁰Nyè mu le ji gogo na ɖokoe nyè ò. Àmè ɖe lè, kè le wɔ̀ ɛ̀. E ye nyi kòjoɖotɔa.

⁵¹Nyàwo ye mù le to na mì be, ne àmè ɖe wɔ̀ ɖo àpe ènyàwo jia, àmèa mu la ku gbèɖe ò.”

⁵²Wàlɛbɛ ŋua, Yudàviawo gblɔ̃ na ɛ̀ be: “Mi nya fifì be, gbɔ̃gbɔ̃ vuɛ̃ ye lè èwò mè, ɖo Abràham ku, gblɔ̃ɖɛtɔwo cã ku, co gãkea, wò le gblɔ̃ be: 'Ne àmè ɖe lebè na ènyà nyèwoa, mu la ɖɔ èku kpɔ ò.'

⁵³Wò wu mia tɔgbe Abràham kè kua? Mawu be gblɔ̃ɖɛtɔwo cã ku! Àmè kɛ ŋutɔ ye wò bù be yè nyi ò?”

⁵⁴Yesù ɖo e ŋuti na wo be: “Ne mù kè le na gogo ɖokoe nyè ye à, gogo nyèa mu la ɖo gɔ̃mè sèse ɖekpe ò. Ètɔ nyè ye le na mù gogo, Ètɔ nyè kè mì be e ye nyi mìabe Mawu a.

⁵⁵Mìabe Mawu kè mì mu jèsi òa. Ènyè yaa, mù jèsi ì. Ne mù gblɔ̃ be nyè mu jèsi ì òa, mù la nyi àjèɖàtɔ sìgbè mìawo ke nène. Vɔ̀a, mù jèsi ì, eye mù wɔ̀nà ɖo yebe ènyàwo ji.

⁵⁶Èjì jɔ̀ mìa tɔ Abràham, wàlɛbɛ kè be le bù àpe vava be ŋùkèkèa ŋuti kpɔa. E kpɔ ɛ̀ nyàwo, eye yebe èjì hũhũ kudo jìjɔɛ.”

⁵⁷Yudàviwo gblɔ̃ na ɛ̀ be: “Nukɛ! Wò mu kpɔ ɖo èpè èkà ci èwo hàɖe ò, vɔ̀a wò jo kpɔ Abràham a?”

⁵⁸Yesù ɖo e ŋuti na wo be: “Nyàwo ye mù le to na mì: mù lè xoxo keŋu gbɔ̀xue Abràham va jɔ̀.”

⁵⁹Wàlɛbɛ ŋua, wo fɔ̀ èkpewo la sɔ pò è; vɔ̀a, Yesù bè, eye be to jo lè mawuxɔa mè.