Read gen Yòhanɛ̀s 9 Bible Online

Yòhanɛ̀s 9 - gen bible

Yòhanɛ̀s 9

¹Wàlɛbɛ kè Yesù va le yìa, e kpɔ ŋusù ɖe kè nyi ŋùvìnɔ̀ so jìjimèa.

²Yebe nukplaviwo biɔ ɛ̀ be: “Ènufiɔtɔ, àmè kɛ ye wɔ̀ ènuvuɛ̃, eye wo jì ŋusù kèa ŋùvìnɔ̀ ò? Ye ŋutɔ ye loo, àlo yebe àjìtɔwo ye?”

³Yesù ɖo e ŋuti na wo be: “Mu nyi àmè kèa, àlo yebe àjìtɔwo be ènuvuɛ̃ ŋuti ye wo jì ì ŋùvìnɔ̀ ɖo ò. Vɔ̀a, ne Mawu bèa ɖè yebe ŋusɛ̃ fiɔ, to e ji ŋuti ye.

⁴Fifì kè èŋù kèa, mi ɖo la wɔ̀ àmè kè dɔ̃ mù ɖoɖaa be èdɔwo, ɖo, èzã la va do, eye àmè ɖe mu la gbà teŋu wɔ̀ èdɔ ò.

⁵Wàlɛbɛ kè mù kpɔ̀tɔ̀ lè xixea mèa, ènyè ye nyi xixea be kɛ̃klɛ̃.”

⁶Kè Yesù gblɔ̃ ènyà kèa, e tu ètã ɖo ànyigbã, sɔ ètãa nyà èkɔ. E sɔ bàba a sì ɖo ŋùvìnɔ̀a be ŋùkuviwo ji.

⁷Eye be gblɔ̃ na ɛ̀ be: “Yì lè èsì lè Silòa be tãkua mè.” Silòa gɔ̃mè ye nyi: “*Àmèdɔ̃dɔ̃.” E yì lè èsìa, eye ekè be to vaa, e le kpɔ ènu.

⁸Èkɔa mètɔwo kudo àmè kèwo kpɔna ŋusù kèa sã, wàlɛbɛ kè be nyi ènubiɔtɔawo gblɔ̃ be: “Mu nyi ŋusù kè nɔ̀nà ànyi, biɔna ènua ye nyi ekèa òa?”

⁹Àmè ɖewo le gblɔ̃ be: “E ye.” Àmè buwo le gblɔ̃ be: “Mu nyi e ye ò. Àmè ɖì àmè ye.” Vɔ̀a ŋùvìnɔ̀a ŋutɔ le gblɔ̃ be: “Ènyè ye.”

¹⁰Eye wo biɔ ɛ̀ be: “Àleke wɔ̀ ŋùkuvi wòwo va hũ ò?”

¹¹E ɖo e ŋuti na wo be: “Àmè kè wo yɔna be Yesùa ye nyà èkɔ, sɔ sìsì ɖo àpe ŋùkuviwo ji, eye be gblɔ̃ na mù be ma yì lè èsì lè Silòa be ètɔ̀a to. Mù yì nyàwo, eye ekè mù lè èsìa vɔ̀a, ŋùkuvi nyèwo hũ.”

¹²Wo biɔ ɛ̀ be: “Fikɛ àmèa lè ò?” E ɖo e ŋuti na wo be: “Nyè mu nya ò.”

¹³Wo kplɔ̀ ŋusù kè nyi ŋùvìnɔ̀ sãa yì Farizìwo gbɔ.

¹⁴Yudàviwo be jɛ̃gbɔ̃zã gbè ye Yesù nyà èkɔ sɔ hũ ŋùkuvi na ŋùvìnɔ̀a.

¹⁵Eye Farizìwo cã biɔ ɛ̀ be àleke wɔ̀ ye yebe ŋùkuviwo hũ ma. E ɖo e ŋuti na wo be: “E nyà èkɔ sɔ sìsì ɖo ŋùkuvi nyèwo ji, eye mù lè èsì. Fifìa, mù le kpɔ ènu.”

¹⁶Farizìwo dòmètɔ ɖewo gblɔ̃ be: “Ŋusù kèa, mu so Mawu gbɔ ò; ɖo mu dona bùbu jɛ̃gbɔ̃zãa ŋuti ò.” Vɔ̀a àmè ɖewo cã gblɔ̃ be: “Àleke àmè kè nyi ènuvuɛ̃wɔ̀tɔa la teŋu wɔ̀ ŋùdãdɔ kèawo hati ò?” Eye mamã va woa dòmè.

¹⁷Wo gbà biɔ ɛ̀ be: “Èwò ya ɖe, nukɛ wò bù so àmè kè dà èdɔ̀ na wòa ŋuti ò?” E ɖo e ŋuti be: “Mawu be gblɔ̃ɖɛtɔ ye be nyi.”

¹⁸Kaka kè wo mu kpɔ sè ènyà ɖe so ŋusùa be àjìtɔwo nu òa, wo mu le ji la xɔ̀sè be ŋùvìnɔ̀ ye ŋusùa nyi sãa, eye be va le kpɔ ènu fifì ò.

¹⁹Wo yɔ yebe àjìtɔwo, eye wo biɔ wo be, “Mìabe èvi ye nyi ŋusù kèa kè mì be yèwo jì ŋùvìnɔ̀a? Leke wɔ̀ ye be le kpɔ ènu fifì ò?”

²⁰Àjìtɔawo ɖo e ŋuti na wo be: “Mi nya be miabe èvi ye be nyi, eye mi jì ì ŋùvìnɔ̀.

²¹Vɔ̀a, àleke wɔ̀ be lè kpɔ ènu fifìa, mi mu nya ɛ̀ ò. Àmè kè hũ ŋùkuvi na ɛ̀a, mi mu nya e cã ò. Mì biɔ ɛ̀ sè; mu gbà nyi vifɛ̃ ò. Ye ŋutɔ la ɖo e ŋuti na mì.”

²²Àjìtɔawo gblɔ̃ ènyà kèa, ɖo wo le vɔ̃ Yudàviwo. Yudàviwo be àmègãwo bɔ̀, pò ɖodu vɔ̀ be yèwo la nyà àmè ɖekpekpe àmè kè la hũ e mè be Yesù ye nyi Mɛ̀siaa to lè bɔ̀bɔ̀pea.

²³Ènu kèa ŋuti ye yebe àjìtɔwo gblɔ̃ be: “Mu gbà nyi vifɛ̃ ò, mì biɔ ɛ̀ sè.”

²⁴Eye wo gbà yɔ ŋusù kè nyi ŋùvìnɔ̀ sãa, wo gblɔ̃ na ɛ̀ be: “Na gogo Mawu! Mi nya be, ŋusù kèa ènuvuɛ̃wɔ̀tɔ ye be nyi.”

²⁵Ŋusùa ɖo e ŋuti na wo be: “Nyè mu nya ne èvuɛ̃wɔ̀tɔ ye be nyi ò. Ènu kè mù nyaa kpò ye nyi be ŋùvìnɔ̀ ye mù nyi sã, vɔ̀ fifìa, mù le kpɔ ènu.”

²⁶Wo biɔ ɛ̀ be: “Nukɛ be wɔ̀ na wò ò? Àleke ye be wɔ̀, hũ ŋùkuvi na wò ò?”

²⁷E ɖo e ŋuti na wo be: “Mù gblɔ̃ ɛ̀ na mì sã, vɔ̀a, mì mu ɖo èto mù ò. Nukɛ ŋuti ye mì le ji la gbà sè è ò? Àlo, mìawo cã, mì le ji la nyi yebe nukplaviwo ye à?”

²⁸Farizìawo tɔ ɛ̀ zũzũ be: “Èwò ye nyi yebe *nukplavi. Mosè be nukplavi ye miawo ya mi nyi.

²⁹Mi nya be Mawu pò nupo kudo Mosè, vɔ̀a, àmè kèa yaa, mi mu nya àfi kè be soa ŋutɔ cã ò.”

³⁰Ŋusùa ɖo e ŋuti na wo be: “E wɔ̀ ŋùdã na mù ŋutɔ be mì mu nya àfi kè be soa ò, vɔ̀a, e ye jo hũ ŋùkuvi na mù!

³¹Mì nya be, Mawu mu ɖona èto àmè vuɛ̃ ò, vɔ̀a ne àmè ɖe sɛ̃nà Mawu nyuɛ̃ ɖe, eye be wɔ̀nà yebe jro a, nènemea ye be ɖona èto.

³²So gà kè mè ye wo ɖo xixea, àmè ɖe mu sè be wo hũ ŋùkuvi na àmè kè wo jì ŋùvìnɔ̀a kpɔ gbèɖe ò.

³³Ne ŋusù kèa mu so Mawu gbɔ òa, mu la teŋu wɔ̀ ènu ɖe ò.”

³⁴Farizìwo ɖo e ŋuti na ɛ̀ be: “Èwò kè wo jì ɖo ènuvuɛ̃ mèa, èwò ye le ji la fiɔ mi ènua?” Eye wo ɖè è to.

³⁵Kè Yesù sè be wo ɖè è toa, e va kpɔ ɛ̀, eye be biɔ ɛ̀ be: “Wò xɔ̀ *Àgbètɔ be Èvia ji sè a?”

³⁶Ŋusùa ɖo e ŋuti na ɛ̀ be: “Àpetɔ, àmè kɛ ye ò, ne ma xɔ̀ e ji sè?”

³⁷Eye Yesù gblɔ̃ na ɛ̀ be: “Wò kpɔ ɛ̀ vɔ̀; àmè kè le pò nupo kudo wòa ye.”

³⁸Ŋusùa be: “Mù xɔ̀sè Tɔhonɔ̀”, eye be cɔ̃ ŋùmè ànyi lè Yesù be ŋùkɔ̀, jè *èɖɛ̀ na ɛ̀.

³⁹Eye Yesù gblɔ̃ be: “Kòjoɖoɖo ŋuti ye mù va xixea mè ɖo, ne àmè kèwo mu kpɔna ènu òa, woa kpɔ ènu, eye àmè kèwo kpɔna ènua, woa trɔ zũ ŋùvìnɔ̀wo.”

⁴⁰Farizì kèwo lè Yesù gbɔawo, sè ènyà kèawo, eye wo biɔ ɛ̀ be: “Ŋùvìnɔ̀wo ye miawo cã mi nyia?”

⁴¹Yesù ɖo e ŋuti na wo be: “Ne ɖe ye mì nyi ŋùvìnɔ̀woa, mìabe ènuvuɛ̃wo mu la ci èkɔ̀ na mì ò. Vɔ̀a, fifìa, mì be: 'Mi le kpɔ ènu!' Ènu kèa ŋuti mìabe ènuvuɛ̃ kpɔ̀tɔ̀ ci èkɔ̀ ji na mì.”