Read gen Èdɔwɔ̀wɔwo 12 Bible Online

Èdɔwɔ̀wɔwo 12 - gen bible

Èdɔwɔ̀wɔwo 12

¹Gà ŋua mèa, èfìɔ Herod *Agripà tɔ àyà dodo na àmè ɖewo lè èhamètɔwo dòmè.

²E na wo sɔ èwui wù Yakobò kè nyi Yòhanɛ̀s be nɔ̀via.

³Ekè e kpɔ be ènu kèa jè ŋùmè na Yudàviwo a, e ɖè ègbè be woa le Petrò cã. Kpɔ̃nɔ àkpiti be àzã gbè be wɔ̀ ekèa.

⁴Ekè e le Petròa, e tu ì ɖo ègàkpa mè, sɔ ɛ̀ do gbãdãgbã èhasòso ènè-ènè tèpe ènè si, ne woa ɖia ɛ̀. E ɖo è be Toŋutivayì be àzãa yomè a, yèa ɖè è to, va dùkɔ̃a be ŋùkɔ̀, la ɖo kòjo na ɛ̀.

⁵Vɔ̀a, wàlɛbɛ kè Petrò lè ègàkpa mèa, èhamètɔwo le fãkue veve ɖe na Mawu ɖo e ta.

⁶Ekè e kpɔ̀tɔ̀ ŋùkèkè ɖèka ne Herod bèa kplɔ̀ Petrò va dùkɔ̃a be ŋùkɔ̀, la ɖo kòjo na ɛ̀a, èzã mèa, Petrò le dɔ̃ àlɔ̃ lè gbãdãgbã èvè dòmè. Wo do è kɔ̀sɔ̀kɔsɔ èvè, eye gbãdãgbã buwo nɔ̀tè lè èhɔ̃a ji, le ɖia ègàkpaa.

⁷Zè ɖèkaa, Tɔhonɔ̀ be àtikplɔtɔ ɖe ze ɖo e ji, eye kɔ̀kɔ̀ɛ ɖe klɛ̃ ɖo ègàxɔa mè. Mawu be àtikplɔtɔa tɔ àsi àxàda mè na Petrò, hũhũ ì, fɔ̃ ɛ̀, gblɔ̃ be: “Sitè kaba!” Eye kɔ̀sɔ̀kɔsɔawo sò lè àlɔ̀ na ɛ̀.

⁸Mawu be àtikplɔtɔa gblɔ̃ na ɛ̀ be: “Bla ègo ji, eye do àfɔ̀kpa wòwo.” Eye e wɔ̀ do e ji. Mawu be àtikplɔtɔa gblɔ̃ na ɛ̀ be: “Sɔ àwù gã wòa do, ne wòa kplɔ̀ mù do.”

⁹Eye Petrò to, kplɔ̀ Mawu be àtikplɔtɔa do. Petrò mu le nya be ènu kè Mawu be àtikplɔtɔa le wɔ̀a, nyàwo ye be nyi ò, e bù be àvìmènu ye yè le kpɔ.

¹⁰Wo to gbãdãgbã cucugbãawo ŋuti, gbà to èvègɔ̃awo ŋuti, yì jè ègàgbo kè lè èdùa nua nu: àgboa, hũ lè ye ɖokoe si. Ekè wo to lè èdùa mèa, wo to èmɔ ɖe, le yì, eye Mawu be àtikplɔtɔa bu lè Petrò gbɔ, zè ɖèka.

¹¹Ekèa yomè a, Petrò va jèsi ye ɖokoe, eye be gblɔ̃ be: “Mù sè e mè nyuɛ̃ ɖe fifìa be, Tɔhonɔ̀ ye dɔ̃ yebe àtikplɔtɔ ɖoɖa, be va hlùɛ̃ mù gã lè Herod *Agripà ku ènu kèwo Yudàviwo lètè kpɔa keŋu si.”

¹²Ekè e kpɔ nènea, e kpɔ èmɔa, yì Mari, kè nyi Yòhanɛ̀s kè wo gbà yɔna be Markòa be ènɔ̀ be àxomè. Àmè sùgbɔ bɔ̀ ɖo funua, le fãkue.

¹³E pò àgboa, eye sumɔ̃vi-nyɔ̃nù kè be nyikɔ nyi Rodɛs-a va kpɔ àmè kè le pò àgboa.

¹⁴Ekè e sè àmèa bè ègbèa, e jèsi ì be Petrò ye, eye èjì jɔ̀ ɛ̀ àleke be, mu gbà jo hũ àgboa cã ò, vɔ̀a, e sidù yì gblɔ̃ be Petrò ye lè àgboa ji.

¹⁵Wo biɔ ɛ̀ be: “Wò le jè àɖàhùa ye à?” Gãkea, Rodɛs gbà kpɔ̀tɔ̀ le kã ɖo eji be nyàwo yè le to na wo. Wo be: “Eŋuã yebe àtikplɔtɔ ye!”

¹⁶Petrò kpɔ̀tɔ̀ le pò àgboa. Wàlɛbɛ kè wo hũ ì na ɛ̀a, wo kpɔ ɛ̀ be e ye, eye wo kã yàa.

¹⁷E wɔ̀ àlɔ̀ na wo be woa nɔ̀ kpoo, eye e gblɔ̃ àlekè Tɔhonɔ̀ ɖè è to lè ègàkpa mè ɖoa na wo. E gbà gblɔ̃ na wo be: “Mì yì to ènyà kèawo na Yakobò ku nɔ̀vi kpɔ̀tɛawo cã.” Ekèa yomè a, e jo lè woa gbɔ yì tèpe bu.

¹⁸Ekè èŋù va kèa, gbãdãgbãawo titɔ ŋutɔ. Wo le biɔ woa ɖokoewo be: Nukɛ jɔ̀ ɖo Petrò ji ò?

¹⁹Herod Agripà na wo ji ì kaka, vɔ̀ wo mu kpɔ ɛ̀ ò. E biɔ ènyà gbãdãgbãawo, eye be ɖè ègbè be wo ne yì wù wo. Ekèa yomè a, Herod Agripà jo lè Yudeà, yì nɔ̀ Kayizarèa àzã ɖewo.

²⁰Herod Agripà bijì do Tirò ku Sidɔ̀ntɔwo ŋutɔ. Nène a àmèawo wɔ̀ ɖèka, jè èxlɔ̃ yebe ènujikpɔtɔ Blastò, eye wo yì kpɔ ɛ̀. Wo jro la biɔ ɛ̀ ŋuti fàfa, ɖo yebe ànyigbã ji ye ènu ɖùɖu sona vana woa gbɔ.

²¹Ekè àzã kè wo ɖoa sùa, Herod Agripà do yebe èfìɔwua, nɔ̀ ànyi ɖo yebe èfìɔzìkpea ji, pò nupo na dùkɔ̃a,

²²eye ekè dùkɔ̃a le sèa, woawo keŋu sò àyo, gblɔ̃ be: “Vòdu ɖe be ègbè ye, mu nyi àgbètɔ tɔ̀ ye ò!”

²³Troloa, Tɔhonɔ̀ be àtikplɔtɔ be àlɔ̀ jè Herod ŋuti, ɖo mu sɔ gogo na Mawu ò, eye èyewo ɖù ì kaka be ku.

²⁴Mawu be ènyàa le sĩ, le gbãkpe ɖo e ji.

²⁵Ekè Barnabas ku Saolò wɔ̀ ènu kè gbe wo dɔ̃ wo ɖoɖaa vɔ̀a, wo ɖo àsi tè, eye wo trɔ gbɔ̀ so Yèruzàlɛm, kplɔ̀ Yòhanɛ̀s kè wo yɔna be Markòa bɔ̀ ɖo ŋuti.