Read gen Èdɔwɔ̀wɔwo 14 Bible Online

Èdɔwɔ̀wɔwo 14 - gen bible

Èdɔwɔ̀wɔwo 14

¹Ekè Paolò ku Barnabas ɖo èdù kè wo yɔna be Ikonìaa mèa, wo yì Yudàviwo be bɔ̀bɔ̀pea, pò nupo na wo, àleke be Yudàvi ku Grikwo sùgbɔ xɔ̀ Yesù ji sè.

²Vɔ̀a, Yudàvi kèwo gbe be yèwo mu la xɔ̀sè òawo, gble sùsu mè na àmè kèwo mu nyi Yudàvi òawo, e kèa ye na be wo ɖo sùsu vuɛ̃ so nɔ̀vi lè Kristò mèwo ŋuti.

³Paolò ku Barnabas nɔ̀ funua, àzã sùgbɔ. Wo dona àŋɛ̀a ku kãkã ɖo e ji. Tɔhonɔ̀ na be wo wɔ̀ jèsìwo ku ŋùdãdɔwo, sɔ ɖè è fiɔ be ènu kè yèwo lè gblɔ̃ so Mawu be màje ŋutia, nyi nyàwo.

⁴Èdùa mè tɔwo ma ɖo àkpa èvè: àkpa ɖèka lè Yudàviwo ji, eye àkpa èvègɔ̃a lè *àmèdɔ̃dɔ̃awo ji.

⁵Àmè kèwo mu nyi Yudàvi òawo ku Yudàviwo, kudo woabe ègawo ɖo be yèwoa do àyà na *àmèdɔ̃dɔ̃awo, eye yèwoa pò wo èkpe.

⁶Ekè Paolò ku Barnabas sè ènyàa, wo si yì Listrà, ku Dɛrbè, lè Likaonìa be àgo ji kudo èdù kèwo gogo funuawo mè,

⁷lè do Àŋɛ̀nyuɛ̃ a to funuawo cã.

⁸Ŋusù ɖe lè èdù kè wo yɔna be Listràa mè. Ŋusùa mu teŋu nɔ̀nà ètè nu ò, ɖo yebe àfɔ̀wo kplibɔ. So gà kè mè wo jì ŋusù kèa, e nyi kpòtɛ̃, eye mu zɔ̃ àzɔ̃lì kpɔ ò.

⁹Gbè ɖèkaa, kè be le sè Paolò be ènyàawoa, Paolò be ŋùkuviwo yì jè e ji, e kpɔ ɛ̀ dũu. Ekè Paolò, kpɔ be e ɖo xɔ̀sè kè sù ne woa dà èdɔ̀a na ɛ̀a,

¹⁰Paolò gblɔ̃ ku ègbè sɛ̃sɛ̃ ɖe na ɛ̀ be: “Sitè ne wòa jɔ̀ lè àfɔ̀ wòwo ji!” Ŋusùa tìkpo, sitè, eye be zɔ̃.

¹¹Ekè àmè kèwo lè funua, kpɔ ènu kè Paolò wɔ̀ ŋua, wo do àpa gblɔ̃ lè Likaonìa be ègbè mè be: “Vòduwo trɔ zũ àgbètɔ, ɖì va mia dòmè!”

¹²Wo yɔ Barnabas be “Zeus[16]”, eye Paolò be “Hɛrmès[17]”, ɖo Paolò ye lè ŋùkɔ̀.

¹³Vòdu Zeus, kè be èxɔ̀ lè èdùa gbɔa be hũnɔ̀a sɔ sepòpowo ɖo àcɔ na ènyì-su ɖewo, dɔ̃ wo va àgboa nu. Ye ku yebe ŋutimewo jro la savɔ na Barnabas ku Paolò.

¹⁴Ekè Barnabas ku Paolò sè ènyà kèa, wo zɛ̃ woabe àwùwo lè èkɔ̀, pu dù ɖo àmèha a dòmè, gblɔ̃ ku àpa be:

¹⁵“Nɔ̀viwo, nukɛ ŋuti mì le wɔ̀ ènu kèawo ɖo ò? Àgbètɔwo kpò mi nyi, sìgbè mìawo ke nène, eye mi va le do Àŋɛ̀nyuɛ̃ a na mì, be mìa trɔ jo lè ènu màɖì ènu kèawo gbɔ, va Mawu àgbèagbèa gbɔ, e ye wɔ̀ jiŋùkusi ku ànyigbã, àpù kudo ènu kèwo keŋu lè e mèawo.

¹⁶Xoxo hùenua, Mawu tàsi dùkɔ̃wo keŋu, eye àmè sia àmè sɔna èmɔ kè jro èa.

¹⁷Vɔ̀a, mu dokpò ɖase ɖùɖu na ye ɖokoe to ènyuɛ̃ kèwo be wɔ̀nàawo mè ò. E nana èji jànà na mì so jiŋùkusi, gbà nana mì ènukuwo ɖo woabe hùenu. E nana mì ènu ɖùɖu, dona jìjɔɛ na mì.”

¹⁸Barnabas ku Paolò gblɔ̃ ènyà kèawo gãke, e sɛ̃ŋu ŋutɔ gbɔ̀xue àmèawo xɔ̀ ènyà kè wo gblɔ̃a, ne woa tàsi vɔsa kè wo va la wɔ̀ na woa.

¹⁹Yudàvi ɖewo so Ãtiokìa kè lè Pisidìa be ànyigbã ji ku Ikonìa, va funua. Wo trɔ àmèha a be susu, eye wo pò èkpe Paolò kaka be jè ànyi, eye wo dɔ̃ ɛ̀ yì èdùa godo, le bù be e ku.

²⁰Vɔ̀a, ekè nukplaviawo va pòxla do èa, e sitè, trɔ ɖo èdùa mè. Ekè èŋù kèa, ye kudo Barnabas, wo jo yì Dɛrbè.

²¹Paolò ku Barnabas do Àŋɛ̀nyuɛ̃ a lè Dɛrbè, eye àmè sùgbɔ xɔ̀ Yesù ji sè. Eŋuã yomè a, wo trɔ yì Listrà, Ikonìa ku Ãtiokìa, lè Pisidìa be àgowo ji.

²²Wo do ŋusɛ̃ nukplaviawo, eye wo pòfiɔ wo be woa le xɔ̀sèa ɖo àsi ànùkuaretɔ̀ ku ènyà kèawo be: “E lè na mi be mia kpe èfũ sùgbɔ gbɔ̀xue la ɖo Mawu be fìɔdua mè.”

²³Wo cã èhamèmègãwo ɖo èhabɔ̀bɔ ɖe sia ɖe nu. Àmèdɔ̃dɔ̃awo fãkue, bla ènu, eye wo sɔ àmè kèawo do àsi na Tɔhonɔ̀, kè ji wo xɔ̀sèa.

²⁴Ekèa yomè a, àmèdɔ̃dɔ̃awo to Pisidìa be àgowo ji, va ɖo Pãfilìa.

²⁵Ekè wo do Mawu be àŋɛ̀a lè Pɛrgèa, wo yì Àtalìa.

²⁶Wo ɖo àpùjihũ so funua gbìgbɔ̀ va Ãtiokìa lè Sirìa. Fikèa ye wo sɔ wo do àsi na Mawu be màjea lè cucugbã, ɖo èdɔ kè wo va wɔ̀a ŋuti.

²⁷Ekè wo va Ãtiokìaa, wo bɔ̀ èhabɔ̀bɔa mè tɔ kèwo lè funuawo, eye wo gblɔ̃ ènu kèwo keŋu ye Mawu wɔ̀ to woa jia na wo, vevetɔa, àlekè ye Mawu hũ xɔ̀sè be àgbo na àmè kèwo mu nyi Yudàvi òawo ɖoa.

²⁸Wo nɔ̀ funua lè nukplaviawo gbɔ, dìdi ɖe.