Read gen Èdɔwɔ̀wɔwo 16 Bible Online

Èdɔwɔ̀wɔwo 16 - gen bible

Èdɔwɔ̀wɔwo 16

¹Paolò zɔ̃ èmɔ va ɖo Dɛrbè ku Listrà. *Nukplavi ɖe kè wo yɔna be Timòteoa lè funua. Ènɔa nyi Yudàvi nyɔ̃nù ɖe kè xɔ̀ Yesù ji sè a, eye ètɔa nyi Grikwo.

²Nɔ̀vi lè Kristò mè kèwo lè Listrà ku Ikonìaawo ɖù ɖase nyuɛ̃ so Timòteo ŋuti,

³eye Paolò jro be yèa kplɔ̀ ɛ̀ ɖo ŋuti. E sò èvo na ɛ̀ ɖo Yudàvi kèwo lè àgo ŋuawo jiawo ŋuti, ɖo woawo keŋu nya be ètɔa, Grikwo bè nyi.

⁴Paolò ku Silà gblɔ̃nà ɖoɖo kèwo ji *àmèdɔ̃dɔ̃awo ku èhamèmègãwo ɖo èkpe lè Yèruzàlɛm a na àmèwo, lè èdù kèwo mè wo le toawo, eye wo biɔna so woa si be woa wɔ̀ ɖo ɖoɖo kèawo ji.

⁵Nène a, èhamètɔwo be xɔ̀sèa gbà likè kpe è, eye wo le sùgbɔ ɖo e ji gbè sia gbè.

⁶Gbɔ̃gbɔ̃ Kɔ̀kɔ̀ɛ a mu ɖè èmɔ na Paolò ku Silà be woa do Mawu be àŋɛ̀a lè Azìa ò. Ekèa ŋutia, wo zɔ̃ èmɔ to Frigìa ku Galatìa be àgowo ji,

⁷va ɖo Misìa be lipòwo ji. Wo tèkpɔ be yèwoa yì Bitinìa, vɔ̀a, Yesù be Gbɔ̃gbɔ̃ a mu ɖè èmɔ na wo ò,

⁸eye wo to Misìa, va yì Troa.

⁹Lè èzã mèa, Paolò kpɔ àvìmènu. Màkedonìa ŋusù ɖe ze ɖo e ji. Ŋusùa nɔ̀tè, le ɖè kuku na ɛ̀ be: “Tɔ̀ wò jɔ̀, va Màkedonìa, ne wòa va do mi àlɔ̀.”

¹⁰Ekè Paolò kpɔ àvìmènu kèa vɔ̀a, mi jro la jè èmɔ zè ɖèka, la yì Màkedonìa, ɖo e ze na mi be Mawu ye yɔ mi ne mia yì do Àŋɛ̀nyuɛ̃ a na èdù ŋua mè tɔwo.

¹¹Mi ɖo ètɔ̀jihũ lè Troa, zɔ̃ tɛ̃ɛ, yì Samɔtrakè, eye ekè èŋù kèa, mi yì Neapolìs.

¹²Mi jo lè funua yì Fìlipì kè nyi èdù gã lè Màkedonìa be àgoa ji, eye be nyi Romàtɔwo be èdùa. Mi nɔ̀ èdù kèa mè ŋùkèkè ɖewo.

¹³Jɛ̃gbɔ̃zã gbèa, mi to lè èdùa mè yì ètɔ̀ to, àfi kè mi susu be mi la kpɔ kuefãpe lèa. Mi nɔ̀ ànyi, eye mi pò nupo na nyɔ̃nù kèwo va bɔ̀awo.

¹⁴Nyɔ̃nù kèawo dòmètɔ ɖèka lè nyi Liɖìa, so Tiatirà eye e sànà àvɔ biɖibiɖi xɔ̀asìwo. E sina Mawu, eye Tɔhonɔ̀ hũ yebe susu be ne le èto ɖo ènyà kèwo Paolò lè gblɔ̃a ŋuti.

¹⁵Ekè wo lè mawusi na ye ku yebe àxuedoa vɔ̀a, e ɖè kuku na mi veve ɖe be: “Ne mì kpɔ be mù xɔ̀ Tɔhonɔ̀ ji sè nyàwo a, mì va zɛ̃ àxue nyèa mè.” E zĩ mia ji eye mi lɔ̃ yì nɔ̀ yebe àxuea mè.

¹⁶Mi va le yì kuefãpe gbè ɖèka, eye mi dogò kluvi nyɔ̃nù ɖe kè be lãmè gbɔ̃gbɔ̃ vuɛ̃ ɖe lè, eye kluvia yɔna xɔ̀ na àmèwo. Ekèa hɛ̃nà ègà sùgbɔ vana na àpetɔawo.

¹⁷Nyɔ̃nùvi kèa, kpàsà mi ku Paolò do, lè gblɔ̃ ku àpa be: “Àmè kèawo ye nyi Mawu kè lè èji hũia be sumɔ̃viwo. Wo le do hlùɛ̃gã be èmɔa be àŋɛ̀ na mì.”

¹⁸Nène a, e nɔ̀ mia yomè, àzã fuu, eye Àdɔ̀mè va ve Paolò gbè ɖèka, eye be trɔ gblɔ̃ na gbɔ̃gbɔ̃ kè lè nyɔ̃nùvia mèa be: “Lè Yesù Kristò be nyikɔ mèa, mù ɖè ègbè na wò, to lè nyɔ̃nùvi kèa mè!” Eye gbɔ̃gbɔ̃a to lè nyɔ̃nùvia mè, wàlɛbɛ ŋua tututu.

¹⁹Ekè nyɔ̃nùvia be àpetɔwo kpɔ be mu gbà teŋu hɛ̃ ègà ɖe va na yèwo òa, wo le Paolò ku Silà, eye wo kplɔ̀ wo yì kòjo mè lè èdùmègãwo gbɔ.

²⁰Wo sɔ ènyà ɖo woa ŋuti lè Romàtɔwo be kòjoɖotɔawo gbɔ be: “Àmè kèawo le hɛ̃ hũnyàhũnyà va miabe èdùa mè. Yudàviwo ye wo nyi,

²¹eye wo le fiɔ èkɔ̀do kèwo miabe *èse gbea. Mia Romàtɔwo, mi mu teŋu xɔ̀ wo ò. Mi mu la teŋu wɔ̀ ɖo woa ji ò.”

²²Àmèha bliboa dri ɖo Paolò ku Silà ji, eye kòjoɖotɔwo na be wo zɛ̃ àwù lè wo àmè èvèawo ŋuti, eye wo pò wo ku àtãŋù.

²³Ekè wo pò wo nyuɛ̃ ɖe vɔ̀a, wo kplɔ̀ wo yì do ègà, eye wo gblɔ̃ na ègàkpajikpɔtɔa be, ne le ŋùkuvi ɖo woa ŋuti nyuɛ̃ ɖe.

²⁴Ekè e sè nènea, e kplɔ̀ wo yì tu ɖo èxɔ̀ ɖe mè lè ègàkpaa be gòglòpe, jã woabe àfɔ̀wo ɖo àtikpo be àmèviga mè, eye e tu èhɔ̃ do wo.

²⁵Lè èzã dòmè lɔ̀gea, Paolò ku Silà le fãkue, le jìhà, le mlã Mawu, eye ègàmènɔ̀tɔwo le ɖo èto wo.

²⁶Zè ɖèkaa, ànyigbã hũhũ sɛ̃sɛ̃ ɖe, àleke be ègàxɔa be dodoewo hũhũ. Zè ɖèkaa, hɔ̃truawo kpata hũ gbàa, eye kɔ̀sɔ̀kɔsɔ kèwo wo do gàmènɔ̀tɔawo keŋuãwo ŋɛ̃ lè woa ŋuti kɔ̀ ɖɛ.

²⁷Ègàkpajikpɔtɔa dà àvò fɔ̃ so àlɔ̃ mè. Ekè be kpɔ be hɔ̃truawo kpata lè nùvòa, e susu be ègàmènɔ̀tɔawo si jo ye, eye e lìɔ èwui to lè àku mè, la wù ye ɖokoe.

²⁸Vɔ̀a, Paolò do àpa sɛ̃sɛ̃ ɖe be: “Mù gbà wɔ̀ ènu veve ku ɖokoe wò ò! Mia keŋu mi lè fikèa”

²⁹Ègàkpajikpɔtɔa biɔ be woa sɔ kãligbɛ̃ va na yè, eye e ɖèbla, ɖo èxɔ̀a mè. Vɔ̃vɔ̃ ɖo è, bè le hũhũ tìtìtì, va jè Paolò ku Silà be àfɔ̀wo nu.

³⁰Ègàkpajikpɔtɔa kplɔ̀ wo to, biɔ wo be: “Àmègãwo, nukɛ ye jè be ma wɔ̀ ne woa hlùɛ̃ mù gã ò?”

³¹Wo ɖo e ŋuti na ɛ̀ be: “Xɔ̀ Tɔhonɔ̀ Yesù ji sè, eye wo la hlùɛ̃ wò ku àpo àxuedoa gã.”

³²Wo gblɔ̃ Tɔhonɔ̀ be ènyàa na ye ku àmè kèwo keŋu lè yebe àxomèawo.

³³Nène a, lè èzãa be gàpòpo ŋua ke mèa, ègàkpajikpɔtɔa kplɔ̀ wo, yì klɔ woabe àbìawo na wo, eye wo lè mawusi na ye ku yebe àxomètɔwo keŋu, zè ɖèka.

³⁴E kplɔ̀ Paolò ku Silà va yebe àxomè, eye e na wo ènu, wo ɖù. Èjì jɔ̀ ye ku yebe àxomètɔwo ŋutɔ, be yèwo xɔ̀ Mawu ji sè.

³⁵Ekè èŋù kèa, kòjoɖotɔawo dɔ̃ èkpòvitɔwo ɖoɖa, ɖè ègbè na wo be: “Mì ɖè àsi lè àmè ŋuawo ŋuti, ne woa jo.”

³⁶Nène a, ègàkpajikpɔtɔa gblɔ̃ na Paolò be: “Kòjoɖotɔawo gblɔ̃ ɖoɖa be woa ɖè àsi lè mìa ŋuti, ne mìa yì. Mì to va yì fifìa, lè fàfa mè.”

³⁷Vɔ̀a, Paolò gblɔ̃ na èkpòvitɔawo be: “Wo mu ɖo kòjo na mi ò, vɔ̀a, wo pò mi lè àgũ dòmè, eye wo do mi ègà, sĩ vɔ̀a, Romà be èdùmèviwo mi nyi. Nukɛ ŋuti ye fifìa, wo jro be yèwoa ɖè àsi lè mia ŋuti, lè wawla mè ɖo ò? Gbèɖe, woawo ŋutɔwo kpò ye la va ɖè mi to!”

³⁸Èkpòvitɔawo yì gblɔ̃ ènyàa na kòjoɖotɔawo, vɔ̀a, ekè wo sè be Romà be èdùmèviwo ye Paolò ku Silà nyia, vɔ̃vɔ̃ ɖo wo.

³⁹Nène a, wo yì ɖè kuku na wo. Wo kplɔ̀ wo to, eye wo biɔ so woa si be woa jo lè èdùa mè.

⁴⁰Ekè Paolò ku Silà to lè ègàkpaa mèa, wo va yì Liɖìa be àxomè, wo kpɔ nɔ̀viwo lè Kristò mè lè funua, wo do jìpò na wo eye wo jo.