Read gen Èdɔwɔ̀wɔwo 17 Bible Online

Èdɔwɔ̀wɔwo 17 - gen bible

Èdɔwɔ̀wɔwo 17

¹Paolò ku Silà zɔ̃ èmɔa, to Amfipolìs ku Apolonìa, eye wo va ɖo Tɛsalonikà, àfi kè Yudàviwo be bɔ̀bɔ̀pe ɖe lè.

²Paolò yì bɔ̀bɔ̀pea, sìgbè àlekè e wɔ̀nà ɛ̀ eji-ejia nène. E jrò mawunya mè ku àmè kèwo lè bɔ̀bɔ̀pea, jɛ̃gbɔ̃zã ètɔ̃.

³E ɖè ènyà sùgbɔ mè na wo, le ɖè è fiɔ wo be Kristò ɖo la ɖù àyà, kaka la ku, eye Mawu la fɔ̃ ɛ̀ so àmè kukuwo dòmè, sìgbè lekè wo ŋlɔ̀ ɖo mawunya xoma a mèa nène. E yì e ji be: “Yesù, àmè kè be àŋɛ̀ mù lè do a ye nyi Mɛ̀siaa.”

⁴Ènyàa jè woa dòmètɔ ɖewo be ŋùmè, wo xɔ̀ ɛ̀ sè, eye wo nɔ̀ Paolò ku Silà yomè. Nène a ke, Grikwo sùgbɔ kèwo sumɔna Mawu a ku nyɔ̃nù ɖìnyi fuu nɔ̀ woa yomè.

⁵Vɔ̀a, Yudàviwo ɖɔ ku ŋuhuã, eye wo cã èdùmèvi fùflu, ènu gbegble wɔ̀tɔ kèwo ye dãna to èmɔwo jiawo bɔ̀, ne woa hɛ̃ hũnyàhũnyà va dùkɔ̃a mè. Wo na èzĩ tɔ̀ lè èdùa mè. Wo xa Jasɔ̀n be àxuea, lè ji Paolò ku Silà, be yèwoa dɔ̃ wo to yì àmèha a dòmè.

⁶Ekè wo mu kpɔ wo òa, wo dɔ̃ Jasɔ̀n ku nɔ̀vi lè Kristò mèwo dòmètɔ ɖewo yì èdùjikpɔtɔawo gbɔ, le do àpa be: “Àmè kèawo nyi àmè kèwo tɔ̀ èzĩ xixe kplògòdòa; wo va miabe ànyigbã ji,

⁷eye Jasɔ̀n ya xɔ̀ wo ɖo yebe àxomè. Woawo ye nyi àmè kèwo keŋu le gbã *èse kè Romà-Fìɔgãa do a, le gblɔ̃ be èfìɔ bu lè, kè le nyi Yesù.”

⁸Ènyà kèawo titɔ àmèha a ku èdùjikpɔtɔawo be susu,

⁹Vɔ̀a, ekè wo xɔ̀ ègà lè Jasɔ̀n ku àmè kpɔ̀tɛawo si vɔ̀a, wo tàsi wo.

¹⁰Gbè ŋua gbè be èzã mèa, nɔ̀viwo lè Kristò mè ɖo Paolò ku Silà ɖoɖa Bèrea zè ɖèka. Ekè wo ɖo funua, wo yì Yudàviwo be bɔ̀bɔ̀pea.

¹¹Yudàvi kèwo ye lè èdù kèa mèawo sè ènu gɔ̃mè wu ekèwo lè Tɛsalonikàawo. Wo xɔ̀ mawunyaa ku èjro nyuɛ̃ blibo. Ŋùkè-ŋùkèa, wo jrònà mawunya xomawo mè.

¹²Eye àmè sùgbɔ lè woa dòmè xɔ̀ Yesù ji sè. Nène a ke ye Grik-nyɔ̃nù ɖìnyi sùgbɔ ku ŋusù sùgbɔ xɔ̀ Yesù ji sè.

¹³Vɔ̀a, ekè Yudàvi kèwo lè Tɛsalonikàawo sè be Paolò le do Mawu be àŋɛ̀ lè Bèrea cã a, wo va do èzĩ tɔ̀tɔ àmèwo dòmè, eye wo hɛ̃ hũnyàhũnyà va èdùa mè.

¹⁴Nɔ̀viwo lè Kristò mè ɖèbla ɖo Paolò ɖoɖa àpùgo. Silà ku Timòteo ya ci èdùa mè funu.

¹⁵Àmè kèwo le yì, la ɖo Paolòa, kplɔ̀ ɛ̀ kaka va ɖo Atɛ̀n, eye wo trɔ jo. Paolò do wo àŋɛ̀ be woa do na Silà ku Timòteo, be woa ɖèbla va tù yè kaba.

¹⁶Wàlɛbɛ kè Paolò lè Atɛ̀n lè kpɔ èmɔ na Silà ku Timòteoa, e titɔ lè ye ɖokoe mè ŋutɔ, wàlɛbɛ kè be kpɔ kpèliwo bɔ lè èdùa mè fuua.

¹⁷E yìnà bɔ̀bɔ̀pea, jrònà ènyà mè ku Yudàviwo, kudo àmè kèwo sumɔna Mawu a. Gbè sia gbèa, e yìnà èdùa be gòdope, pònà nupo ku àmè kèwo nɔ̀nà funuawo cã.

¹⁸Grik ènunyatɔwo be èhabɔ̀bɔ kèwo wo yɔna be Epikuràtɔwo[20] ku Stoikà mè tɔwo[21] cã va tɔ nupo pòpo ku ì. Woa dòmètɔ ɖewo biɔ sè be: “Ènyà kɛ ye nupo kpòtoe pòtɔ[22] kèa lè ji be yèa gblɔ̃ koŋu ò?” Eye àmè buwo be: “Àmèjrowo be sɛ̃sɛ̃ ɖe be gblɔ̃ɖɛtɔ ye be ɖo la nyi.” Lè nyàwo toto mèa, Yesù, ku fɔ̃fɔ̃ so èku be àŋɛ̀ ye Paolò le do.

¹⁹Eye wo kplɔ̀ Paolò yì èsewɔ̀pe kè wo yɔna be Areopagòa, eye èsewɔ̀tɔawo biɔ ɛ̀ be: “Ènufiɔfiɔ yeye kɛ ye wò hɛ̃ va ò? Wò la teŋu ɖè e mè na mia?

²⁰Đo ènu kèwo wò le gblɔ̃a, mi mu sè wo kpɔ ò, eye mi jro la sè woa gɔ̃mè.”

²¹Lè nyàwo toto mèa, Atɛ̀ntɔwo keŋu ku àmèjro kèwo lè èdùa mèawo mu gblena woabe gàmè sɔ wɔ̀ ènu ɖe wu woa gblɔ̃ ènyà yeye kèwo wo sèawo, àlo woa ɖo èto ènyà yeye kèwo wo mu nyà òawo ò.

²²Paolò tɔtè ɖo èsewɔ̀pea be dòdòmè eye be gblɔ̃ be: “Atɛ̀ntɔwo, mù kpɔ be mì sɛ̃nà vòduwo ŋutɔ.

²³Đo kè mù zɔ̃ to mìabe èdùa mèa, mù kpɔ vòduxɔ sùgbɔ; mù va kè ɖo vɔsakpe ɖe ŋuti. Wo ŋlɔ̀ ɖo e ŋuti be: 'Vòdu kè àmè ɖekpe mu jèsi ò a tɔ̀ ye nyi ekèa.' Ènu kè mì mu jèsi ò, vɔ̀ mì le sɛ̃ ɛ̀a, be àŋɛ̀ ye mù va la do na mì.

²⁴Mawu, kè ɖo xixea ku ènu sia ènu kè lè e mèa woa, ye nyi jiŋùkusi ku ànyigbã be Tɔhonɔ̀. Mawu kèa mu nɔ̀nà sɛ̃sɛ̃-xɔ kèwo àgbètɔ tùawo mè ò.

²⁵Mu jina be àgbètɔwo ne sɔ àlɔ̀ wɔ̀ ènu bu sɔ sɛ̃ yè, sìgbè ènu ɖe hiã yè nène ò. E ye nana àmèwo keŋu àgbè, gbɔ̃gbɔ̃, ku ènu kpɔ̀tɛawo keŋu.

²⁶E na àgbètɔxòmèvidùa jɔ̀ so àmè ɖèka mè, eye e ma wo kpedo ànyigbãa keŋu ji; e ɖo hùenuwo, eye be ɖo lipòwo na dùkɔ̃wo be nɔ̀pewo ɖèka ɖèka.

²⁷Mawu wɔ̀ ekèawo keŋu nènea, ne àgbètɔwo woa ji Mawu, eye ne woa nɔ ji ì kaka, èta mu nyɔ òa, wo teŋu va kpɔ ɛ̀, co Mawu mu dìdì lè mia dòmètɔ ɖekpekpe gbɔ ò.

²⁸Đo: 'E ye na be mi lè àgbè, mi le hũa, eye mi lè.' Sìgbè lekè mìabe èhànya ŋlɔ̀tɔ ɖewo ŋutɔ gblɔ̃ nènea be: 'Đo a, yebe jìjimèviwo miawo cã mi nyi.'

²⁹Ekè e nyi be Mawu be jìjimèviwo mi nyia, mu jè be, mia bù be Mawu lè sìgbè sìka, àlo klòsalò, àlo èkpe xɔ̀asì kè àgbètɔ sɔ yebe susu ku àɖàŋù wɔ̀a nène ò.

³⁰Ènu mànya be àgbè kèwo àgbètɔ zã lè hùenu kèwo mè àgbètɔ nɔ̀ mànya mè lèa, Mawu ŋɛ̃ ŋùkuvi pu woa ji. Vɔ̀ fifìa, e va le biɔ so àgbètɔwo si, lè àfi sia àfi kè wo lèa be wo ne ɖɔ̀lì èdɛ̃.

³¹E ɖo àzã ɖèka ɖɛ, eye àzã ŋua gbèa, e la ɖo kòjo na àgbètɔwo keŋu, lè jɔ̀jɔɛnyinyi mè, to àmè kè ye ŋutɔ ɖè ɖovòa ji. E fɔ̃ ɛ̀ so èku, sɔ ɖè ènu kèa fiɔ àmèwo keŋu.”

³²Ekè àmèwo sè fɔ̃fɔ̃ so èku be ènyàa, àmè ɖewo kò Paolò, èɖewo gblɔ̃ be: “Mi la gbà sè ènyà wòa so ènu kèa ŋuti àzã bu gbè.”

³³Paolò jo lè woa dòmè.

³⁴E lè nène gãkea, àmè ɖewo kplɔ̀ ɛ̀ do, eye wo xɔ̀sè; woa dòmètɔ ɖewo ye nyi: Deni, àmè kè nyi èsewɔ̀tɔwo dòmètɔ ɖèkaa, ku nyɔ̃nù kè wo yɔna be Damarìs-a, kudo àmè buwo cã.